Yezu ke longa na Sinagoga mosi ya Kapernaumi mpi yandi me tuba nde yandi kele dimpa ya kieleka yina me katuka na zulu. Yandi tubaka mambu yai na bantu yina katukaka na esti ya Nzadi-Mungwa ya Galilea, bayina diaka mampa ti bambisi ya masa yina yandi pesaka.

Yezu me landa disolo na yandi, yandi me tuba nde: “Ba-nkaka na beno diaka mana na ntoto ya zelo na zelo kansi bo fwaka.” Yandi me tendula nde: “Mono kele dimpa ya luzingu yina katukaka na zulu. Kana muntu kudia dimpa yai yandi ta zinga kimakulu; mpi na kutuba ya mbote, dimpa yina mono ta pesa kele nsuni na mono sambu na luzingu ya nsi-ntoto.”—Yoane 6:48-51.

Na nsungi ya madidi ya mvu 30 ya ntangu na beto, Yezu zabisaka Nikodemo nde Nzambi zolaka nsi-ntoto mingi kibeni yo yina yandi pesaka mwana na yandi bonso ngulusi. Ntangu yai, Yezu me monisa nde yo kele mfunu nde bantu kudia nsuni na yandi, disongidila kutula lukwikilu na kimenga yina yandi ta pesa. Mpidina, bo ta baka luzingu ya mvula na mvula.

Kansi bantu me ndima ve mambu yina Yezu me tuba. Bo me kudiyula nde: “Inki mutindu muntu yai lenda pesa beto nsuni na yandi sambu beto dia yo?” (Yoane 6:52) Yezu ke zola bo bakisa nde mambu yina yandi ke tubila kele ya kifwani, kansi ya kieleka ve. Mambu yina yandi me tuba na nima ke monisa nki yandi ke zola kutuba.

“Kana beno dia ve nsuni ya Mwana ya muntu mpi beno nwa ve menga na yandi, beno kele ve ti luzingu na kati na beno mosi. Muntu yina ke dia nsuni na mono mpi ke nwa menga na mono kele na luzingu ya mvula na mvula, . . . sambu nsuni na mono kele madia ya kieleka, mpi menga na mono kele kima ya kunwa ya kieleka. Muntu yina ke dia nsuni na mono mpi ke nwa menga na mono ke bikala na bumosi ti mono.”—Yoane 6:53-56.

Mambu yai me pesa Bayuda yina me wa yo makasi kibeni. Mbala ya nkaka bo me yindula nde, Yezu ke siamisa bantu na kudia nitu ya muntu to na kufwa Nsiku ya Nzambi yina ke buyisa kunwa menga. (Kuyantika 9:4; Levi 17:10, 11) Kansi, Yezu ke tubila ve kudia nsuni na yandi to kunwa menga na yandi. Yandi ke monisa nde bantu yonso yina ke zola kubaka luzingu ya mvula na mvula fwete monisa lukwikilu na kimenga yina yandi ta pesa ntangu yandi ta tambika nitu na yandi ya kukuka mpi ta tiamuna menga na yandi yina ke monisa luzingu na yandi. Kansi, ata balongoki na yandi mingi me bakisa ve dilongi yai. Bankaka me tuba nde: “Mambu yai kele mpasi na kundima; nani lenda wa yo?”—Yoane 6:60.

Yezu me bakisa nde balongoki na yandi ya nkaka ke bokuta-bokuta, yo yina yandi me yula bo nde: “Keti diambu yai ke budisa beno sakuba? Ebuna, beno ta sala inki kana beno mona Mwana ya muntu ke tombuka kisika yina yandi vandaka ntete? . . . Mambu yina mono me tubila beno kele mpeve mpi kele luzingu. Kansi bantu ya nkaka na kati na beno ke kwikila ve.” Ntangu yandi me tuba mambu yai, balongoki mingi me kwenda mpi me yambula kulanda yandi.—Yoane 6:61-64.

Yo yina, Yezu me yula bantumwa na yandi 12 nde: “Keti beno mpi ke zola kukwenda?” Piere me tuba nde: “Mfumu, na nani beto ta kwenda? Nge kele ti bangogo ya luzingu ya mvula na mvula. Beto me kwikilaka mpi beto me zabaka nde nge kele Santu ya Nzambi.” (Yoane 6:67-69) Mambu yina Piere me tuba ke monisa kibeni nde bo kele ya kwikama, ata yandi ti bantumwa ya nkaka ke bakisa mpenza ve dilongi yai ya Yezu.

Yezu me sepela ti mambu yina Piere me tuba, ata mpidina yandi me songa bo nde: “Mono solaka beno 12, mpidina ve? Kansi muntu mosi na kati na beno kele muntu ya ke kusilaka bantu makambu.” (Yoane 6:70) Yezu ke tubila Yudasi Iskariote. Ntembe kele ve nde na ntangu yina, Yezu me mona nde Yudasi me yantika kuyedisa bampusa ya mbi.

Ata mpidina, Yezu me sepela na kuzaba nde Piere ti bantumwa ya nkaka kele ti lukanu ya kulanda yandi mpi ya kusala kisalu yina yandi ke sala ya ke gulusaka luzingu ya bantu.