Yezu me katuka kupesa mvutu na ngiufula ya bantumwa ya me tala kidimbu ya kukala na yandi mpi nsuka ya ngidika ya bima. Yandi ke yibuka mambu yina mpi ntangu yai yandi me pesa mbandu ya nkaka sambu na kupesa bo ndongisila mosi ya mayele. Bantu yina ta vanda na luzingu na nsungi ya kukala na yandi ta mona kulungana ya mbikudulu yai.

Yandi me yantika mbandu yango mutindu yai: “Kimfumu ya zulu me fwanana ti bamwense kumi yina bakaka minda na bo mpi basikaka sambu na kukwenda kukutana ti bakala yina ke kwela. Tanu na kati na bo vandaka bazoba, mpi tanu vandaka mayele.”—Matayo 25:1, 2.

Yezu ke zola ve kutuba nde kimvuka mosi ya balongoki na yandi yina ta baka Kimfumu ya zulu kele bazoba mpi nde kimvuka ya nkaka kele mayele. Kansi, yandi ke zola kutuba nde sambu na kubaka Kimfumu, konso longoki kele ti makuki ya kusola kana yandi ta kengila to ve. Ata mpidina, Yezu ke ndima kibeni nde konso longoki lenda bikala ya kwikama mpi kubaka balusakumunu ya tata na yandi.

Na mbandu yina Yezu me pesa, bamwense yonso kumi me basika na nganda sambu na kukutana ti bakala yina ke kwela mpi bo ta vanda na kati ya bantu yina ta kota ti yandi. Ntangu bakala yango ta kuma, bamwense yina ta vanda ti minda na bo sambu na kupesa nsemo na nzila mpi bo ta pesa yandi lukumu ntangu yandi ta kota ti nkento na yandi na nzo yina bo yidikilaka nkento. Kansi, inki mutindu mambu me luta?

Yezu me tuba nde: “Bamwense ya bazoba bakaka minda na bo kansi bo bakaka ve mafuta, kansi  bamwense ya mayele bakaka minda na bo mpi mafuta na milangi na bo. Sambu bakala yina ke kwela vandaka kusukinina, mpongi simbaka bo yonso mpi bo lalaka.” (Matayo 25:3-5) Bakala yina kwisaka ve na ntangu yina bo vandaka kuvingila yandi. Yo ke monana nde yandi sukininaka mingi yo yina bamwense lalaka. Bantumwa lenda yibuka mbandu ya Yezu ya muntu yina butukaka na dibuta ya kintotila mpi kwendaka na insi mosi mpi ‘nsuka-nsuka yandi vutukaka na nima ya kubaka kiyeka ya kintotila.’—Luka 19:11-15.

Na mbandu ya bamwense kumi, Yezu me tubila mambu yina salamaka ntangu bakala yina ke kwela kwisaka. Yandi me tuba nde: “Na kati-kati ya mpimpa, bo waka ndinga mosi ya ngolo nde: ‘Bakala yina ke kwela yandi yai! Beno basika sambu na kukutana ti yandi.’” (Matayo 25:6) Keti bamwense yai vandaka ya kuyilama mpi vandaka kukengila?

Yezu me tuba nde: “Ebuna bamwense yina yonso telamaka mpi yidikaka minda na bo. Bamwense ya bazoba tubilaka bamwense ya mayele nde, ‘Beno pesa beto ndambu ya mafuta na beno, sambu minda na beto ke zola kufwa.’ Bamwense ya mayele vutulaka nde: ‘Mbala ya nkaka yo ta fwana ve sambu na beto ti beno. Kansi beno kwenda na bantu yina ke tekaka yo, mpi beno sumba ya beno mosi.’”—Matayo 25:7-9.

Bamwense tanu ya bazoba kengilaka ve mpi yilamaka ve sambu na kukwisa ya bakala yina ke kwela. Bo vandaka ve ti mafuta ya kufwana sambu na minda na bo mpi yo lombaka nde bo kwenda kusosa. Yezu me tuba nde: “Ntangu bo vandaka kukwenda sambu na kusumba yo, bakala yina ke kwela kwisaka. Bamwense yina vandaka ya kuyilama kotaka ti yandi na nkinsi ya makwela, ebuna bantu kangaka kielo. Na nima, bamwense yina ya nkaka mpi kwisaka, ebuna bo tubaka nde, ‘Mfumu, Mfumu, kangudila beto kielo!’ Yandi vutudilaka bo nde, ‘Mono ke tubila beno kieleka nde, mono me zaba beno ve.’” (Matayo 25:10-12) Mambu yai ya mpasi kuminaka bo sambu bo vandaka ve ya kuyilama mpi kengilaka ve.

Bantumwa me bakisa nde bakala ya ke kwela yina Yezu ke tubila kele yandi mosi. Nkutu, ntama mingi ve yandi kudifwanisaka ti bakala yina ke kwela. (Luka 5:34, 35) Bamwense ya mayele kele banani? Ntangu Yezu tubilaka “kimvuka ya fioti” yina ta baka Kimfumu, yandi tubaka nde: “Beno lwata bilele mpi beno vanda ya kuyilama mpi minda na beno kulanda kupela.” (Luka 12:32, 35) Yo yina, na mbandu yai ya bamwense, bantumwa me bakisa nde Yezu ke fwanisa bo ti bamwense ya mayele. Ebuna, inki dilongi Yezu me pesa na mbandu yai?

Yezu me monisa dilongi yango pwelele. Na nsuka ya mbandu na yandi, yandi me tuba nde: “Yo yina, beno landa na kukengila sambu beno me zaba ve kilumbu mpi ngunga.”—Matayo 25:13.

Ya kieleka, Yezu ke longisila balongoki na yandi ya kwikama nde sambu na kukala na yandi, bo fwete “landa na kukengila.” Yandi ta kwisa, yo yina balongoki na yandi fwete vanda ya kuyilama mpi kukengila bonso bamwense tanu ya mayele, mpidina bo ta vidisa ve kivuvu na bo ya kitoko mpi balusakumunu yina bo ta baka.