Kisalu ya Yezu ke kuma na nsuka mpi yandi ke landa kusadila bambandu sambu na kumonisa nde bansekudi ti bamfumu ya banganga-nzambi kele bantu ya mbi. Yo yina bo ke sosa kufwa yandi. (Luka 20:19) Kansi Yezu me manisa ntete ve kumonisa nde bo kele bantu ya mbi. Yandi me pesa mbandu yai ya nkaka:

“Kimfumu ya zulu me fwanana ti ntotila mosi yina salaka nkinsi ya makwela sambu na mwana na yandi ya bakala. Yandi tindaka bampika na yandi sambu na kubinga bantu yina yandi bingaka na nkinsi ya makwela, kansi bantu yina buyaka kukwisa.” (Matayo 22:2, 3) Na luyantiku ya mbandu na yandi, Yezu me tubila “Kimfumu ya zulu.” Yo kele kieleka nde, Yehowa Nzambi muntu kele “ntotila” yina. Mwana ya ntotila kele nani mpi banani kele bantu yina bo me binga na nkinsi yango? Yo kele mpasi ve na kubakisa nde Mwana ya Yehowa muntu kele mwana ya ntotila, yandi muntu ke pesa mbandu yai mpi nde bantu yina bo me bingisa kele bayina ta yala ti Mwana yai na Kimfumu ya zulu.

Banani kele bantu ya ntete yina ntotila me binga? Banani Yezu ti bantumwa na yandi zabisaka nsangu ya Kimfumu? Yo kele Bayuda. (Matayo 10:6, 7; 15:24) Dikanda yai ndimaka kuwakana ya Nsiku na mvu 1513 na ntwala ya ntangu na beto, mpidina bo kumaka bantu ya ntete yina ke sala “kimfumu ya banganga-nzambi.” (Kubasika 19:5-8) Kansi, inki ntangu kibeni ntotila bingaka bo “na nkinsi ya makwela”? Na mvu 29 ya ntangu na beto, ntangu Yezu yantikaka kusamuna nsangu ya Kimfumu ya zulu.

Bantu mingi ya Izraele salaka nki ntangu bo bingaka bo? Mutindu Yezu tubaka yo, bo “buyaka kukwisa.” Bamfumu mingi ya mabundu ti bantu ya nkaka buyaka kundima nde Yezu kele Mesia mpi Ntotila yina Nzambi me ponaka.

Kansi, Yezu me monisa nde Nzambi pesaka Bayuda dibaku ya nkaka; yandi me tuba nde: “Yandi [ntotila] tindaka diaka bampika ya nkaka mpi tubaka nde, ‘Beno tubila bantu yina mono bingaka nde: “Mono me lamba madia, mono me fwa bangombe mpi bambisi na mono ya mafuta, mpi bima yonso kele ya kuyidika. Beno kwisa na nkinsi ya makwela.”’ Kansi, sambu bo monaka yo mpamba, bo kwendaka, mosi na kilanga na yandi, ya nkaka na mumbongo na yandi; kansi bantu ya nkaka kangaka bampika na  yandi, bo sadilaka bo mambu kukonda luzitu, mpi bo fwaka bo.” (Matayo 22:4-6) Yo me fwanana ti mambu yina salamaka ntangu dibundu ya Bukristu yantikaka. Na ntangu yina, Bayuda vandaka kaka ti dibaku ya kuvanda bantu ya Kimfumu kansi mingi na kati na bo buyaka dibaku yina, nkutu bo niokulaka ‘bampika ya ntotila.’—Bisalu 4:13-18; 7:54, 58.

Inki ta kumina dikanda yai? Yezu me tuba nde: “Ntotila waka makasi, ebuna yandi tindaka basoda na yandi, mpi yandi fwaka bantu yina fwaka bampika na yandi mpi yandi yokaka mbanza na bo tiya.” (Matayo 22:7) Mambu yai kuminaka dikanda ya Bayuda na mvu 70 ya ntangu na beto ntangu bantu ya Roma bebisaka “mbanza na bo” Yeruzalemi.

Keti mutindu Bayuda buyaka kukwisa ntangu ntotila bingaka bo ke tendula nde yandi ta binga diaka ve bantu ya nkaka? Na kutadila mbandu ya Yezu, yo kele ve mutindu yina. Yandi me tuba nde: “Ebuna [ntotila] tubilaka bampika na yandi nde, ‘Nkinsi ya makwela kele ya kuyilama, kansi bantu yina mono bingaka fwanaka ve. Yo yina, beno kwenda na banzila yina ke nataka na nganda ya mbanza, mpi beno binga bantu yonso yina beno ta mona sambu bo kwisa na nkinsi ya makwela.’ Ebuna, bampika yina kwendaka na banzila mpi bingaka bantu yonso yina bo monaka, bantu ya mbi ti ya mbote; mpi nzo yina bo salaka nkinsi ya makwela fulukaka ti bantu yina vandaka kudia.”—Matayo 22:8-10.

Yo yina, ntumwa Piere yantikaka kusadisa Bantu ya Makanda sambu bo kuma Bakristu, disongidila bantu yina butukaka ve na dikanda ya Bayuda to bayina kumaka ve bantu ya dibundu ya Bayuda. Na mvu 36 ya ntangu na beto, Korneye mfumu ya basoda ya Roma ti bantu ya dibuta na yandi bakaka mpeve ya Nzambi, mpidina bo kumaka na ndonga ya bantu yina ta yala na Kimfumu ya zulu yina Yezu tubilaka.—Bisalu 10:1, 34-48.

Yezu me monisa nde yo ke tendula ve nde, “ntotila” ta ndima bantu yonso yina ta kwisa na nkinsi ya makwela. Yandi me tuba nde: “Ntangu ntotila kotaka sambu na kutala bantu yina yandi bingaka, yandi monaka muntu mosi yina lwataka ve lele ya makwela. Ebuna yandi tubilaka yandi nde, ‘Mpangi, nki mutindu nge me kota awa kukonda lele ya makwela?’ Yandi tubaka kima ve. Ebuna ntotila tubilaka bansadi na yandi nde, ‘Beno kanga yandi bansinga na maboko ti na makulu mpi beno losa yandi na mpimpa na nganda. Kuna yandi ta dilaka mpi ta kwetisaka meno.’ Sambu bantu yina bo me bingaka kele mingi, kansi bayina bo me solaka kele fioti.”—Matayo 22:11-14.

Ziku bamfumu ya mabundu yina ke widikila Yezu ke bakisa ve ntendula ya mambu yonso yina yandi ke tuba. Ata mpidina, bo kele ve na kiese mpi bo kele kibeni ti lukanu ya ngolo ya kufwa muntu yina ke pesa bo nsoni mutindu yai.