Mbandu yina Yezu me katuka kupesa ya mwana yina vilaka, fwete pusa bakalaki ya mpaku, bansekudi, ti Bafarize yina ke widikila yandi na kubakisa nde Nzambi kele ti luzolo ya kulolula bansumuki yina me balula ntima. (Luka 15:1-7, 11) Ntangu yai, yandi ke tubila balongoki na yandi. Yandi me pesa bo mbandu ya mvwama mosi yina me wa nde kapita na yandi to muntu yina ke twadisaka nzo na yandi salaka ve mambu na mutindu ya mbote.

Yezu me tuba nde bo fundaka kapita yina nde yandi ke sadila bima ya mfumu na yandi na mutindu ya mbi. Yo yina, mfumu me tuba nde yandi ta katula kapita yai na kisalu. Kapita yai me kuditubila nde: “Inki mono ta sala, sambu mfumu na mono ke katula mono na kisalu ya kikapita? Mono kele ve ti ngolo ya me fwana sambu na kutimuna, mpi mono ke wa nsoni na kukwendaka kulomba bima.” Sambu na kununga mambu yina ta kumina yandi, yandi me tuba nde: “Mono me zaba mambu ya mono ta sala sambu ntangu bo ta katula mono na kisalu ya kikapita, bantu kuyamba mono na banzo na bo.” Mbala mosi, yandi me binga konso muntu yina vandaka ti mfuka mpi me yula yandi nde: “Nge kele ti mfuka ya mfumu na mono ya ikwa?”—Luka 16:3-5.

Muntu ya ntete me tuba nde: “Bitesilu 100 ya mafuta ya olive.” Yo kele balitre ya mafuta 2 200. Ziku muntu yai vandaka ti kilanga ya nene ya ba olive to yandi vandaka musadi-mumbongo yina ke tekaka mafuta. Kapita me songa yandi nde: “Baka mukanda na nge ya mfuka, vanda mpi sonika nswalu 50 [balitre 1 100].”—Luka 16:6.

Kapita me yula muntu ya zole nde: “Ebuna nge, nge kele na mfuka ya ikwa?” Yandi me tuba nde: “Bitesilu ya nene 100 ya ble.” Yo kele balitre 22 000. Kapita me songa yandi nde: “Baka mukanda na nge ya mfuka mpi sonika 80.” Kapita me katudila yandi mfuka ya bitesilu 20.—Luka 16:7.

Kapita yai ke landa kutwadisa mambu ya me tala mbongo ya mfumu na yandi, yo yina yandi me fwa ve nsiku mutindu yandi me katudila bantu yina vandaka ti bamfuka mbongo ya nkaka yina yo lombaka nde bo futa. Sambu yandi me katudila bantu yango mbongo ya nkaka, yandi ke sala kinduku ti bantu yina lenda sadisa yandi ntangu bo ta katula yandi na kisalu.

Na nima, mfumu me wa mambu yina kapita me sala. Ata mfumu me bakisa nde kusala mpidina ke tendula nde kapita yai me bebisa mbongo na yandi, mfumu me yituka mpi me sikisa kapita sambu ‘ata yandi me konda lunungu’ yandi ‘me sala mambu na mayele yonso.’ Yezu me tuba diaka nde: “Bana ya ngidika yai ya bima kele mayele mingi na mutindu ya kusala mambu na ntwala ya ndonga na bo mosi ya bantu kuluta bana ya nsemo.”—Luka 16:8.

Yezu ke sikisa ve mutindu kapita yina me sala mambu; yandi ke siamisa mpi ve bantu na kusala mumbongo na mayele ya mbi. Kansi, inki yandi ke zola kulonga? Yandi me longisila balongoki na yandi nde: “Beno kudisadila banduku na bimvwama ya kukonda lunungu sambu ntangu yo ta mana, bo yamba beno na bisika ya kuzinga ya mvula na mvula.” (Luka 16:9) Dilongi mosi ke basika na mbandu yai na yina me tala kubakisa mambu yina ta salama na  bilumbu ke kwisa mpi kusala mambu na mayele yonso. Bansadi ya Nzambi, “bana ya nsemo,” fwete sadila bima na bo ya kinsuni na mayele yonso ti kivuvu ya luzingu ya mvula na mvula na mabanza.

Kaka Yehowa Nzambi ti mwana na yandi bantu lenda yamba muntu na Kimfumu ya zulu to na paladisu awa na ntoto na nsi ya Kimfumu yina. Beto ta monisa nde beto ke sala bikesa ya mingi sambu na kusala kinduku ti bo, kana beto ke sadila bimvwama na beto sambu na kupesa maboko na mambote ya Kimfumu. Mpidina, beto ta vanda na luzingu ya mvula na mvula ntangu wolo, arza, mpi bimvwama ya nkaka ya kinsuni ta beba.

Yezu me tuba diaka nde bantu yina kele ya kwikama na mutindu bo ke sadila bimvwama to bima ya kinsuni yina bo kele ti yo, ta vanda mpi ya kwikama na mutindu na bo ya kusadila mambu ya kuluta mfunu. Yandi me tuba nde: “Yo yina, kana beno me kudimonisa ve bantu ya kwikama na bimvwama ya kukonda lunungu, nani ta pesa beno bimvwama ya kieleka [mu mbandu mambote ya Kimfumu]?”—Luka 16:11.

Yezu ke zola kulonga balongoki na yandi nde kana bo ke zola kubaka “bisika ya kuzinga ya mvula na mvula,” Nzambi ta lomba bo mambu mingi. Muntu lenda vanda ve nsadi ya kieleka ya Nzambi mpi mpika ya bimvwama ya kinsuni ti ya kukonda lunungu. Na nsuka, Yezu me tuba nde: “Nsadi mosi ve lenda vanda mpika ya bamfumu zole, sambu yandi ta menga mosi mpi ta zola ya nkaka to yandi ta kangama na mosi mpi ta vweza ya nkaka. Beno lenda vanda ve bampika ya Nzambi mpi ya Kimvwama.”—Luka 16:9, 13.