Yezu me wa boma sambu bantu ya Sanedreni me wakana sambu na kufwa yandi, yo yina yandi me kwenda na mbanza Efrayimi na nordi-esti ya Yeruzalemi. Yandi me bikala kuna ti balongoki na yandi, ntama ti bambeni na yandi. (Yoane 11:54) Kansi sambu Paki ya mvu 33 ya ntangu na beto me kuma pene-pene, ntangu fioti na nima yandi me katuka na mbanza yai. Yandi ke kwenda na nordi na nzila ya Samaria mpi yandi me kuma na Galilea; yai kele mbala ya nsuka yina yandi me kwisa na mbanza yai na ntwala nde bo fwa yandi.

Ntangu yandi ke kwenda mpi ke kota na konso bwala, yandi me kutana ti bantu kumi ya maladi ya lepre. Maladi yai ke zengaka malembe-malembe bitini ya nitu ya muntu mu mbandu misapi ya maboko ti ya makulu to makutu. (Kutanga 12:10-12) Nsiku ya Nzambi vandaka kutuba nde kana muntu kele ti maladi ya lepre, yandi fwete tuba na ndinga ya ngolo nde: “Mvindu, mvindu!” mpi yandi fwete zinga na kingenga.—Levi 13:45, 46.

Yo yina, bantu yai kumi ya maladi ya lepre me telama ntama ti Yezu. Kansi, bo me tuba na ndinga ya ngolo nde: “Yezu, Longi, wila beto mawa!” Ntangu Yezu me mona bo, yandi me songa bo nde: “Beno kwenda kudimonisa na banganga-nzambi.” (Luka 17:13, 14) Na mutindu yina, Yezu me monisa nde yandi ke zitisa Nsiku ya Nzambi yina vandaka kupesa banganga-nzambi nswa ya kutuba nde bantu yina vandaka ti maladi ya lepre me beluka. Na nima, bo lenda zinga diaka ti bantu yina kele ti mavimpi ya mbote.—Levi 13:9-17.

Bantu yina kumi ya maladi ya lepre ke ndima nde Yezu kele ti ngolo ya kusala bimangu. Nkutu na ntwala nde bo beluka, bo me kwenda kumona banganga-nzambi. Ntangu bo ke kwenda, lukwikilu na bo na Yezu me natila bo lusakumunu. Bo me yantika kumona mpi kuwa nde lepre me mana.

Bantu uvwa yina belukaka me landa kukwenda. Kansi mosi me sala ve mpidina. Yandi kele muntu ya Samaria mpi yandi me vutuka sambu na kusosa Yezu. Sambu na nki? Yandi kele na ntonda ya mingi na Yezu sambu na mambu yina yandi me sadila yandi. Muntu yai ya vandaka ti maladi ya lepre ke pesa “Nzambi nkembo na ndinga ya ngolo;” yandi me bakisa nde Nzambi muntu me belula yandi. (Luka 17:15) Ntangu yandi me mona Yezu, yandi me bwa na makulu ya Yezu mpi me pesa yandi matondo.

Yezu me yula bantu yina kele pene-pene na yandi nde: “Keti bo yonso kumi kumaka ve bunkete? Ebuna, bantu yina ya nkaka uvwa kele na wapi? Keti ata muntu ya nkaka ve vutukaka sambu na kupesa Nzambi nkembo katula kaka muntu yai ya insi ya nkaka?” Ebuna, Yezu me zabisa muntu yina ya Samaria nde: “Telama mpi kwenda; lukwikilu na nge me belula nge.”—Luka 17:17-19.

Mutindu Yezu me belula bantu yai kumi, yandi me monisa nde yandi me sala yo na nsadisa ya ngolo ya Yehowa Nzambi. Ntangu yai, muntu mosi na kati ya bantu yina kumi me beluka na nzila ya diambu yina Yezu me sala mpi ntembe kele ve nde yandi me kuma na nzila yina ke nata na luzingu. Beto ke zinga ve na ntangu yina Nzambi ke sadila Yezu sambu na kugulusa bantu mutindu yina. Kansi kana beto monisa lukwikilu na Yezu, beto lenda kuma na nzila yina ke nata na luzingu disongidila luzingu ya mvula na mvula. Bonso muntu yina ya Samaria, keti beto ke monisaka mpi ntonda?