Ntangu wanzio Gabriele me zabisa Maria nde yandi ta buta mwana ya bakala mpi bo ta pesa yandi zina Yezu mpi yandi ta kuma Ntotila kimakulu, Maria me yula nde: “Inki mutindu yo ta salama, sambu mono me vukisaka ntete ve nitu ti bakala?”—Luka 1:34.

Gabriele me songa yandi nde: “Mpeve santu ta kwisa na zulu na nge, mpi ngolo ya Muntu ya Kuluta Zulu ta fika nge. Yo yina mwana yina ta butuka bo ta binga yandi muntu ya santu, Mwana ya Nzambi.”—Luka 1:35.

Ziku, sambu na kusadisa Maria na kundima nsangu na yandi, Gabriele me tuba diaka nde: “Tala! Mpangi na nge Elizabeti mpi kele na divumu ya mwana-bakala, na kimununu na yandi, mpi divumu na yandi me lungisa bangonda sambanu, nkento yina bo vandaka kubinga mukobo; sambu mambu ya Nzambi ke tubaka ta lungana.”—Luka 1:36, 37.

Mvutu yina Maria ke pesa ke monisa nde yandi me ndima mambu yina Gabriele me tuba. Maria me tuba nde: “Tala mpika ya Yehowa ya nkento! Bika yo salama sambu na mono mutindu nge me tuba.”—Luka 1:38.

Ntangu Gabriele me kwenda, Maria me yilama sambu na kukwenda kutala Elizabeti, yina ke zingaka ti bakala na yandi Zekaria na lweka ya bangumba ya Yudea pene-pene ya Yeruzalemi. Kana nge katuka na Nazareti tii na Yeruzalemi, nge lenda sala bilumbu tatu to iya na nzila.

Nsuka-nsuka Maria me kuma na nzo ya Zekaria. Ntangu yandi me kota na nzo, yandi me pesa mpangi na yandi Elizabeti mbote. Na mbala mosi, Elizabeti me fuluka ti mpeve santu, mpi me zabisa Maria nde: “Bo me sakumuna nge mingi na kati ya bankento, mpi bo me sakumuna mbuma ya divumu na nge! Ebuna nki mutindu mono lenda vanda ti dibaku yai ya mbote, kuvanda ti mama ya Mfumu na mono me kwisa kutala mono? Sambu kaka ntangu nge me pesa mono mbote, mwana yina kele na divumu na mono me nikana na kiese.”—Luka 1:42-44.

Na ntonda yonso, Maria me vutula nde: “Moyo na mono ke kumisa Yehowa, mpi mpeve na mono lenda kudibuyisa ve na kuyangalala mingi sambu na Nzambi Ngulusi na mono, sambu yandi me tala mpika na yandi ya nkento, ata yandi kele muntu ya mfunu mingi ve. Sambu katuka sesepi yai, bandonga yonso ya bantu ta bingaka mono muntu ya kiese, sambu Muntu ya ngolo me sadila mono mambu ya nene.” Beto ke mona nde ata Nzambi me ndima Maria, yandi ke pesa lukumu yonso na Nzambi. Yandi ke tuba nde: “Zina na yandi kele santu. Sambu mvula na mvula, mawa na yandi kele na zulu ya bantu yina ke waka yandi boma.”—Luka 1:46-50.

Maria ke landa kukumisa Nzambi ti bangogo ya kupemama ya mbikudulu: “Yandi me sala mambu ya nene ti diboko na yandi; yandi me panza bantu yina kele lulendo na bangindu ya bantima na bo. Yandi me kulumusa bantu ya ngolo na bakiti ya kimfumu mpi yandi me tombula bantu ya kukonda mfunu; yandi me pesa bantu ya kele na nzala bima mingi ya mbote, mpi bantu yina kele ti bimvwama yandi me vutula bo maboko mpamba. Yandi me sadisa nsadi na yandi Izraele, yandi me yibuka mawa na yandi, mutindu yandi tubilaka ba-nkaka na beto, Abrahami mpi bana na yandi, kimakulu.”—Luka 1:51-55.

Maria me sala kiteso ya bangonda tatu na nzo ya Elizabeti, ziku sambu na kusadisa yandi na bamposo ya nsuka ya divumu na yandi. Yo kele kibeni mbote nde bankento yai zole ya kwikama yina me baka mavumu ti lusadisu ya Nzambi, kuzinga kisika mosi na nsungi yai ya luzingu na bo!

Tala mutindu bo pesaka Yezu lukumu na ntwala nkutu nde yandi butuka. Elizabeti bingaka yandi “Mfumu na mono,” ebuna mwana yina vandaka na divumu na yandi ‘nikanaka na kiese’ ntangu Maria kwendaka kutala yandi mbala ya ntete. Kansi mutindu beto ta mona yo, mambu yina bantu ya nkaka sadilaka Maria mpi mwana na yandi yina butukaka ntete ve swaswanaka kibeni.