Ya kieleka, beto lenda tadila Biblia ya mvimba bonso nsangu ya me katuka na Nzambi. Tata na beto ya zulu me pesaka beto Biblia sambu na kulonga beto. Beto tadila bansangu zole ya mfunu yina Nzambi pesaka bamvula kuluta 2 000 me luta. Wanzio mosi na zina Gabriele muntu pesaka yo. Yandi “ke telamaka na ntwala ya Nzambi.” (Luka 1:19) Na nki mabaku Gabriele pesaka bansangu yina ya mfunu?

Beto kele pene-pene ya mvu 3 na ntwala ya ntangu na beto. Na wapi Gabriele ke pesa nsangu ya ntete? Na bangumba ya Yudea, ziku pene-pene ya Yeruzalemi. Nganga-nzambi mosi ya Yehowa ke zingaka kuna, zina na yandi Zekaria. Yandi ti nkento na yandi Elizabeti, me kuma minunu, mpi bo me butaka ve. Yo me kuma ntangu ya Zekaria na kusala kisalu ya kinganga-nzambi na tempelo ya Nzambi na Yeruzalemi. Ntangu Zekaria kele na tempelo, mbala mosi Gabriele me basikila yandi pene-pene ya mesa-kimenga ya ndumbu.

Ntembe kele ve nde, diambu yai me pesa Zekaria boma. Kansi Gabriele me lembika yandi ntima sambu yandi wa ve boma mpi me zabisa yandi nde: “Zekaria, kuwa boma ve, sambu Nzambi me ndima ntangu nge me bondila yandi, mpi nkento na nge Elizabeti ta butila nge mwana-bakala, ebuna nge ta pesa yandi zina Yoane.” Gabriele me tuba diaka nde Yoane “ta vanda muntu ya nene na meso ya Yehowa” mpi yandi “[ta] yidikila Yehowa bantu yina kele ya kuyilama.”—Luka 1:13-17.

Kansi, Zekaria ke ndima ve nde diambu yai ta salama. Sambu na nki? Sambu yandi ti nkento na yandi Elizabeti me kuma minunu. Yo yina, Gabriele me zabisa yandi nde: “Munoko na nge ta kangama mpi nge ta kuka ve kutuba tii na kilumbu yina mambu yai ta salama, sambu nge me kwikila ve bangogo na mono.”—Luka 1:20.

Na ntangu yina, bantu yina kele na nganda ke kudiyula sambu na nki Zekaria me sukinina na kati ya tempelo. Nsuka-nsuka yandi me basika, kansi yandi ke tuba diaka ve. Yandi lenda sala kaka bidimbu na maboko. Yo kele pwelele nde, yandi me katuka kumona diambu mosi ya kuyituka na kati ya tempelo.

Ntangu Zekaria me manisa kisalu na tempelo, yandi me vutuka na nzo na yandi. Mwa bilumbu na nima, Elizabeti me baka divumu. Elizabeti salaka bangonda tanu na nzo ntangu yandi ke vingila kubutuka ya mwana na yandi, yandi kele kaka na nzo mpi bantu ke mona yandi ve.

Na nima, Gabriele me kwisa kubasika sambu na mbala ya zole. Yandi me basikila nani? Mwana-nkento mosi ya me kwelaka ntete ve, zina na yandi Maria; yandi ke zingaka na nordi ya Yeruzalemi, na provense ya Galilea, na mbanza Nazareti. Inki wanzio ke zabisa yandi? Yandi ke zabisa Maria nde: “Nzambi me ndima nge.” Yandi ke zabisa diaka Maria nde: “Tala! nge ta baka divumu, nge ta buta mwana-bakala, mpi nge ta pesa yandi zina Yezu.” Gabriele ke tuba diaka nde: “Yandi ta vanda muntu ya nene mpi bo ta binga yandi Mwana ya Muntu ya Kuluta Zulu, . . . mpi yandi ta yala bonso Ntotila na nzo ya Yakobi kimakulu, mpi Kimfumu na yandi ta vanda ve ti nsuka.”—Luka 1:30-33.

Nge lenda bakisa nde Gabriele kele kibeni na kiese sambu yandi me baka dibaku ya kuzabisa bansangu yai zole! Kana beto tanga mambu mingi na yina me tala Yoane mpi Yezu, beto ta bakisa mbote sambu na nki bansangu yai ya me katuka na Nzambi kele kibeni mfunu.