Na kisika ya kuvutuka na Nazareti, Yozefi ti Maria me bikala na Betelemi. Ntangu Yezu me lungisa bilumbu nana, bo me yotisa yandi mutindu Nsiku yina Nzambi pesaka bantu ya Izraele vandaka kutuba. (Levi 12:2, 3) Bantu ya Izraele vandaka mpi kupesa mwana zina na kilumbu ya nana. Bo pesaka mwana na bo zina Yezu kaka mutindu wanzio Gabriele zabisaka bo.

Ngonda mosi ti ndambu me luta mpi Yezu me lungisa bilumbu 40. Ntangu yai, bibuti na yandi ke nata yandi wapi? Na tempelo na Yeruzalemi yina kele kaka bakilometre fioti katuka kisika yina bo kele. Nsiku vandaka kutuba nde kana nkento me buta mwana-bakala, yandi fwete kwenda na tempelo sambu na kupesa dikabu ya kudikumisa bunkete na nima ya bilumbu 40.—Levi 12:4-7.

Maria me sala yo. Yandi me nata bandeke zole ya fioti sambu na kupesa makabu. Diambu yai ke monisa beto nde Yozefi ti Maria vandaka ve bamvwama. Nsiku vandaka kutuba nde nkento fwete pesa mwana-dimeme mpi ndeke. Kansi, kana nkento me kuka ve kupesa dimeme, yandi lenda pesa mayembe zole to bapizio zole. Yo vandaka mutindu yina sambu na Maria, yo yina yandi pesaka bandeke zole ya fioti.

Na tempelo, mununu mosi ya bakala me kwisa kisika yina Yozefi ti Maria kele. Zina na yandi Simeoni. Nzambi tubilaka yandi nde yandi ta fwa ve kana yandi me mona ve Kristu to Mesia yina Yehowa silaka. Na kilumbu yina, mpeve santu twadisaka Simeoni na kukwenda na tempelo, mpi kuna yandi monaka Yozefi mpi Maria ti mwana na bo. Simeoni bakaka mwana yina.

Ntangu Simeoni me baka Yezu, yandi me tonda Nzambi mpi me tuba nde: “Ntangu yai, Mfumu ya Kuluta Nene, nge ke bika mpika na nge kufwa na ngemba mutindu nge tubaka, sambu meso na mono me mona nzila yina nge ke sadila sambu na kugulusa, yina ya nge me yidika na meso ya bantu yonso, nsemo sambu na kukatula lele yina ke fika makanda mpi nkembo sambu na bantu na nge Izraele.”—Luka 2:29-32.

Yozefi ti Maria me yituka ntangu bo me wa mambu yai. Simeoni me sakumuna bo mpi me songa Maria nde mwana na yandi “kele muntu ya bo me solaka sambu na kubwisa mpi kutedimisa bantu mingi na Izraele” mpi nde Maria ta wa mpasi yina kele bonso mbele ya bo me tula makasi.—Luka 2:34.

Muntu ya nkaka mpi yina vandaka pana kilumbu yina kele Ana, mbikudi mosi ya nkento ya bamvula 84. Ya kieleka, yandi ke kondaka ve ata fioti na tempelo. Kaka na ntangu yina, yandi me kwenda kisika Yozefi, Maria mpi Yezu kele. Ana me yantika kupesa Nzambi matondo mpi kutuba mambu ya me tala Yezu na bantu yonso yina ke widikila yandi.

Yozefi ti Maria me wa kibeni kiese sambu na mambu yina me salama na tempelo! Ya kieleka, mambu yina yonso me ndimisa bo nde mwana na bo kele muntu yina Nzambi silaka.