Bamvula kiteso ya 17 me luta banda Yezu yulaka balongi bangiufula na tempelo ntangu yandi vandaka ti bamvula 12. Beto me kuma ntangu yai na nsungi ya madidi ya mvu 29 ya ntangu na beto. Bantu mingi ke tuba sambu na Yoane mpangi ya Yezu. Yandi ke longa na insi ya mvimba, na esti ya Nzadi ya Yordani.

Yoane vandaka kubenda kibeni dikebi ya bantu, yo vanda na mutindu yandi vandaka mpi na kutuba na yandi. Bilele na yandi vandaka ya mika ya shamo, mpi yandi vandaka kulwata mukaba ya mpusu ya mbisi. Yandi vandaka kudia bampasu ti bwiki. Inki nsangu yandi vandaka kulonga? Yandi vandaka kulonga nde: “Beno balula ntima, sambu Kimfumu ya zulu me kuma pene-pene.”—Matayo 3:2.

Nsangu yina yandi vandaka kulonga vandaka kupesa bawi na yandi kikesa. Bantu mingi bakisaka nde bo fwete balula ntima, disongidila, bo fwete soba bikalulu mpi banzila na bo, mpi kuyambula luzingu na bo ya mbi ya ntama. Bantu yina vandaka kukwisa na yandi vandaka kukatuka na ‘Yeruzalemi, na Yudea ya mvimba, mpi na babwala yonso yina vandaka na nziunga ya Yordani.’ (Matayo 3:5) Bantu mingi na kati na bo vandaka kubalula ntima. Yandi vandaka kubotika bo disongidila, yandi vandaka kudindisa bo ya mvimba na masa ya Yordani. Sambu na nki?

Yandi vandaka kubotika bantu sambu na kumonisa nde bo me balula ntima na masonga yonso mpi me yambula masumu yina bo salaka mutindu bo zitisaka ve kuwakana ya Nsiku ya Nzambi. (Bisalu 19:4) Kansi, bantu yonso ve fwanaka na kubaka mbotika. Ntangu bamfumu ya mabundu, Bafarize ti Basaduse kwisaka na Yoane, yandi bingaka bo “bana ya biwuta,” mpi yandi tubilaka bo nde: “Beno sala mambu yina ke monisa nde beno me balula ntima. Beno yindula ve na kutuba na ntima na beno nde, ‘Tata na beto kele Abrahami.’ Sambu mono ke tubila beno nde Nzambi lenda basisila Abrahami bana na matadi yai. Bo me tula dezia disoka na musisa ya banti. Yo yina, konso nti yina ke butaka ve mbuma ya mbote, bo ta zenga yo mpi ta losa yo na tiya.”—Matayo 3:7-10.

Bantu vandaka kutudila Yoane dikebi ya mingi, nsangu na yandi vandaka kusimba ntima na bo, mpi yandi vandaka kubotika bantu mingi. Yo yina, bo tindaka banganga-nzambi mpi Balevi sambu na kuyula yandi nde: “Nge kele nani?”

Yoane tubaka na pwelele yonso nde: “Mono kele Kristu ve.”

Bo yulaka yandi nde: “Ebuna, nge kele nani? Keti nge kele Eliya?”

Yandi vutulaka nde: “Mono kele Eliya ve.”

Bo yulaka yandi nde: “Keti nge kele Mbikudi?” disongidila mbikudi ya nene yina Moize tubaka nde yandi ta kwisa.—Kulonga 18:15, 18.

Yoane vutulaka nde: “Ve!”

Bo dindamanaka mpi yulaka yandi nde: “Nge kele nani? Songa beto sambu beto pesa mvutu na bantu yina tindaka beto. Inki nge ke tuba sambu na nge mosi?” Yandi vutulaka nde: “Mono kele ndinga ya muntu mosi yina ke tuba na ndinga ya ngolo na ntoto-makanga nde: ‘Beno sala nde nzila ya Yehowa kuvanda ya kusungama,’ kaka mutindu mbikudi Yezaya tubaka.”—Yoane 1:19-23.

Bo yulaka yandi diaka nde: “Ebuna, kana nge kele ve Kristu to Eliya to Mbikudi, sambu na nki nge ke botika bantu?” Yandi pesaka mvutu mosi ya mfunu nde: “Mono ke botika na masa. Na kati na beno kele ti muntu mosi yina beno me zaba ve, muntu yina ke kwisa na nima na mono, muntu yina mono me fwana ve na kukangula bansinga ya sandale na yandi.”—Yoane 1:25-27.

Ya kieleka, Yoane zabaka nde yandi ke yidika nzila mutindu yandi ke sadisa bantu na kuyidika ntima sambu na kundima Mesia yina fwete kuma Ntotila mpi yina bambikudulu tubilaka na ntwala. Yoane tubaka sambu na yandi nde: “Muntu yina ke kwisa na nima na mono me luta mono na ngolo, mpi mono me fwana ve na kukatula basandale na yandi.” (Matayo 3:11) Ya kieleka, Yoane tubaka nkutu nde: “Muntu yina ke kwisa na nima na mono me lutaka na ntwala na mono, sambu yandi vandaka na luzingu na ntwala na mono.”—Yoane 1:15.

Yo yina, nsangu yai ya Yoane: “Beno balula ntima, sambu Kimfumu ya zulu me kuma pene-pene” fwanaka kibeni. (Matayo 3:2) Yo sadisaka bantu yonso na kuzaba kisalu yina Yezu Kristu, ntotila ya Yehowa zolaka kusala.