DILONGI 06
Luzingu Yantikaka Nki Mutindu?
Nzambi “kele nto ya luzingu.” (Nkunga 36:9) Keti nge ke ndimaka yo? Bantu ya nkaka ke tubaka nde luzingu kudibasikilaka. Kana yo kele masonga, pana yo ke tendula nde beto kudibasikilaka. Kansi kana Yehowa Nzambi muntu salaka luzingu, yo ke tendula nde kele ti kikuma mosi yina pusaka yandi na kusala yo. a Na disolo yai, beto ta mona na Biblia mutindu luzingu yantikaka mpi sambu na nki beto fwete ndima nde disolo yango kele ya kieleka.
1. Nani salaka zulu ti ntoto?
Biblia ke tubaka nde: “Na luyantiku Nzambi gangaka zulu ti ntoto.” (Kuyantika 1:1) Bantu mingi ya siansi ke ndimaka nde zulu ti ntoto kele ti luyantiku. Inki mutindu Nzambi salaka yo? Yandi sadilaka ‘ngolo na yandi ya bisalu,’ disongidila mpeve santu na yandi sambu na kusala bima yonso ya kele na zulu mpi na ntoto. Mu mbandu bambwetete mpi baplanete.—Kuyantika 1:2.
2. Sambu na nki Nzambi salaka ntoto?
Yehowa ‘salaka ve ntoto kaka sambu na mpamba, kansi yandi salaka yo sambu bantu kuzinga.’ (Yezaya 45:18) Yandi salaka ntoto sambu yo vanda kisika mosi ya kitoko mpi sambu bantu kuvanda ti bima yina bo kele na yo mfunu sambu na kuzinga mvula na mvula. (Tanga Yezaya 40:28 mpi 42:5.) Siansi ke monisaka nde ntoto kele ve mpila mosi ti baplanete yonso ya nkaka. Ntoto mpamba kele kisika ya mbote yina bantu lenda zinga.
3. Inki ke salaka nde bantu kuvanda ve mpila mosi ti bambisi?
Ntangu Nzambi salaka ntoto, yandi salaka bima ya ke zingaka na zulu na yo. Ntete, yandi salaka banti mpi bambisi mingi. Na nima, ‘Nzambi salaka muntu na kifwani na yandi.’ (Tanga Kuyantika 1:27.) Inki ke salaka nde bantu kuvanda ve mpila mosi ti bambisi? Sambu Nzambi me salaka beto na kifwani na yandi, beto ke landaka bikalulu na yandi, mu mbandu zola mpi lunungu. Diaka, yandi salaka beto ti mayele ya kulonguka bandinga, ya kusepela ti bima ya kitoko mpi miziki. Beto kele mpi ve mutindu mosi ti bambisi sambu beto lenda sambila Nzambi yina salaka beto.
LONGUKA MAMBU MINGI
Beto tala mambu ya ke ndimisa nde Nzambi muntu salaka luzingu mpi nde disolo ya Biblia ya ke tubaka nde Nzambi muntu salaka bima yonso kele ya kieleka. Beto tala mpi mutindu bikalulu ya mbote yina bantu ke vandaka ti yo lenda longa beto mambu ya me tala Nzambi.
4. Nzambi salaka luzingu
Bo ke kumisaka bantu, sambu na bima yina bo ke salaka na kulanda bima yina Nzambi me salaka. Kansi nani fwete baka lukumu sambu na bima yina bo ke landaka? Beno tala VIDEO mpi na nima beno pesa mvutu na ngiufula ya ke landa.
-
Inki bima bantu me salaka na kulanda bima yina Nzambi me salaka?
Konso nzo kele ti muntu yina salaka yo mpi tungaka yo. Ebuna nani salaka bima yonso ya kele na zulu mpi na ntoto? Beno tanga Baebreo 3:4 mpi na nima beno pesa mvutu na bangiufula yai:
-
Inki bima ya Nzambi me salaka ke yitukisaka nge?
-
Keti yo me fwana na kundima nde Nzambi muntu salaka zulu ti ntoto mpi bima yonso ya kele na zulu na yo? Sambu na nki?
Keti nge zabaka yo?
Nge lenda zwa mikanda mpi bavideo ya ke tubila mambu yai na jw.org na kitini “Keti Yo Kudibasikilaka?” mpi na kitini “Bangindu na Yina Me Tala Kisina ya Luzingu.”
“Ya kieleka konso nzo kele ti muntu yina tungaka yo, kansi Nzambi muntu tungaka bima yonso”
5. Disolo ya Biblia ya ke tubaka nde Nzambi muntu salaka bima yonso kele ya kieleka
Na Kuyantika kapu 1, Biblia ke tubila kisika ntoto mpi bima ya ke zingaka na zulu na yo katukaka. Keti disolo yai kele ya kieleka to ya luvunu? Beno tala VIDEO mpi na nima beno pesa mvutu na bangiufula ya ke landa.
-
Keti Biblia ke tubaka nde Nzambi salaka ntoto mpi bima ya ke zingaka na zulu na yo na bilumbu sambanu ya bangunga 24?
-
Nge ke yindula nde disolo ya Biblia ya ke tubaka nde Nzambi muntu salaka bima yonso kele ya kieleka mpi yina beto fwete ndima? Kana mpidina to ve, sambu na nki?
Beno tanga Kuyantika 1:1 mpi na nima, beno pesa mvutu na ngiufula yai:
-
Bantu ya siansi ke tubaka nde zulu ti ntoto kele ti luyantiku. Inki mutindu mambu yai ya bo ke tubaka ke wakana ti mambu ya nge me katuka kutanga na Biblia?
Bantu ya nkaka ke kudiyulaka kana Nzambi salaka kima mosi ya fioti mpi na nima yo mosi kumaka bambisi mpi bantu. Beno tanga Kuyantika 1:21, 25, 27 mpi na nima, beno pesa mvutu na bangiufula yai:
-
Keti Biblia ke tubaka nde Nzambi salaka kima mosi ya fioti mpi na nima yandi bikaka nde yo kuma bambisi mpi bantu? To keti yandi salaka bima ya ke zingaka ya “mitindu” yonso? b
6. Bantu kele ve mpila mosi ti bambisi
Beto kele ve mpila mosi ti bambisi yina Yehowa me salaka. Beno tanga Kuyantika 1:26 mpi na nima, beno pesa mvutu na ngiufula yai:
-
Mutindu Nzambi me salaka beto na kifwani na yandi ti bikalulu bonso zola mpi mawa, yo ke monisa nde yandi mosi kele ti nki bikalulu?
BANTU YA NKAKA KE TUBAKA NDE: “Disolo ya Biblia ya ke tubaka nde Nzambi muntu salaka bima yonso kele ya luvunu.”
-
Inki nge ke yindula? Sambu na nki?
NA BUNKUFI
Yehowa salaka zulu ti ntoto mpi bima yonso ya ke zingaka.
Inki Nge Me Simba?
-
Biblia ke tubaka nde zulu ti ntoto katukaka na wapi?
-
Keti Nzambi salaka kima mosi ya fioti mpi bikaka nde yo kuma bambisi mpi bantu ya mitindu yonso to keti yandi muntu salaka yo yonso?
-
Sambu na nki bantu kele ve mutindu mosi ti bima ya nkaka ya Nzambi me salaka?
TALA MPI
Tala mutindu bima yina beto ke monaka ke monisaka nde kele ti Ngangi ya salaka yo.
Tala mutindu bibuti lenda tendudila bana na bo nde Nzambi muntu salaka bima yonso.
Tala kana dilongi ya evolisio ke wakana ti mambu yina Biblia ke tubaka.
“Keti Nzambi Sadilaka Evolisio Sambu na Kusala Bima ya Ke Zingaka?” (Disolo ya kele na jw.org)
Keti mikwa ya ntama yina bo zwaka mpi mambu yina bantu ya siansi ke longukaka bubu yai ke monisaka nde luzingu kudibasikilaka to Ngangi mosi ya mayele muntu salaka yo?
Kisina ya Luzingu—Bangiufula Tanu ya Me Fwana na Kuyula (kamukanda)
a Dilongi 25 ta tubila mambu ya Nzambi ke kana kusala sambu na bantu.
b Na Biblia, ngogo “mutindu” ke tadila kimvuka ya bima ya ke zingaka.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
