“Beno kwisa na mono, beno yonso ya ke mona mpasi mpi ya ke nata kilo ya mingi, ebuna mono ta pesa beno kikesa. Beno baka vangu na mono na mapeka na beno, mpi beno longuka na mono, sambu mono kele mawete mpi ya kudikulumusa na ntima, ebuna beno ta baka kikesa sambu na beno mosi. Sambu vangu na mono kele mpasi ve na kunata mpi kizitu na mono kele kilo ve.”—Matayo 11:28-30, Mbalula ya Nsi-Ntoto ya Mpa.

 “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno ntangu ya kupema. Beno baka kilo na mono, beno nata yo; beno vanda balonguki na mono, sambu mono kele muntu ya pima, mono kele muntu ya ntima ya mbote; ebuna beno ta zaba kupema. Kilo yina ya mono ta pesa beno yo kele mpasi ve na kunata yo, sambu yo kele kilo mingi ve.”—Matayo 11:28-30, Bible en Kituba.

 Yezu lombaka bantu yina vandaka kuwa yandi na kukwisa na yandi. Yandi ke bwisa bo ntima nde kana bo longuka na yandi, bo ta baka kikesa.

 “Beno kwisa na mono, beno yonso ya ke mona mpasi mpi ya ke nata kilo ya mingi.” Bantu yina Yezu lombaka na kukwisa na yandi vandaka ti “kilo mingi” sambu na bansiku mpi binkulu ya bantu yina bamfumu ya mabundu vandaka kulomba bo na kuzitisa. (Matayo 23:4; Marko 7:7) Bantu vandaka mpi ti kilo ya ke katuka na basusi mpi bampasi, sambu bo vandaka kusala mingi mpi ngolo kaka sambu na kuzwa bima ya kuzingila.

 “Mono ta pesa beno kikesa.” Yezu silaka nde yandi ta pesa kikesa to kupema na bantu yina ndimaka emvitasio na yandi ya mawete. Yandi salaka yo mutindu yandi sadisaka bo na kuzaba mambu yina Nzambi ke zolaka mpenza nde bo sala. (Matayo 7:24, 25) Kuzaba mambu yai katulaka bo na kimpika ya bangindu ya luvunu mpi ya bansiku ya ngolo-ngolo ya mabundu. (Yoane 8:31, 32) Ata kulonguka malongi ya Yezu mpi kusadila yo ke lombaka bikesa mingi, kusala mpidina ke pesaka kikesa.

 “Beno baka vangu na mono na mapeka na beno, mpi beno longuka na mono.” Na ntangu ya ntama, mbala mingi bantu ya kisalu vandaka kusadila vangu, disongidila dibaya to nti yina bo vandaka kutula na mapeka, sambu na kunata bima ya kilo mingi. Yo yina, ngogo “vangu” kumaka kutendula kuvanda na nsi ya kiyeka ya muntu ya nkaka. (Levi 26:13; Yezaya 14:25; Yeremia 28:4) Beto lenda balula mpi bangogo “beno longuka na mono” nde “beno kuma balongoki na mono.” Yo yina, Yezu vandaka kusiamisa bantu yina vandaka kuwa yandi na kukuma balongoki na yandi, disongidila na kulanda yandi mpi na kulanda mbandu na yandi.—Yoane 13:13-15; 1 Piere 2:21.

 “Beno ta baka kikesa sambu na beno mosi.” Yezu silaka ve nde bampasi yonso ta mana na mbala mosi. Kansi, yandi sadisaka bantu yina vandaka kuwa yandi na kubaka kikesa mpi kukuma ti kivuvu. (Matayo 6:25-32; 10:29-31) Bantu yina kumaka balongoki na yandi mpi ndimaka malongi na yandi monaka nde kusadila Nzambi kele ve kilo, kansi yo natilaka bo kiese ya kieleka.—1 Yoane 5:3.

 “Sambu vangu na mono kele mpasi ve na kunata mpi kizitu na mono kele kilo ve.” Na kuswaswana ti bamfumu ya mabundu ya ntangu na yandi, Yezu vandaka ya kudikulumusa mpi mawete. (Yoane 7:47-49) Yandi vandaka ve ata fioti makambu ngolo to nku. Kansi, yandi vandaka ntima-mbote mpi bantu vandaka kusolula ti yandi kukonda mpasi. Yandi vandaka ve makambu ngolo na mambu yina yandi vandaka kuvingila nde balongoki na yandi kusala. (Matayo 7:12; Marko 6:34; Luka 9:11) Yandi songaka bo mpi mutindu bo lenda baka mambote na mawa ya Nzambi mpi kubaka kikesa ya muntu ke bakaka kana yandi kele ti conscience ya mbote. (Matayo 5:23, 24; 6:14) Bikalulu ya kitoko ya Yezu vandaka kusala nde bantu kukwisa pene-pene na yandi mpi yo pusaka bo na kundima vangu na yandi ya kitoko mpi na kukuma balongoki na yandi.

 Yezu tubaka mambu yina kele na Matayo 11:28-30 ntangu yandi vandaka na kisalu ya kulonga na Galilea na mvu 31 ya ntangu na beto. Na kati ya bantu yina sonikaka ba evangile, ntumwa Matayo mpamba muntu sonikaka emvitasio yai ya mawete ya Yezu. Sambu yandi vandaka ntete kalaki ya mpaku mpi Muyuda, Matayo zabaka mbote mutindu bantu vandaka kuniokwama; bo vandaka kuniokwama sambu na mpaku ya bantu ya Roma mpi sambu mambu vandaka kusalama na mutindu ya mbi na dibundu ya Bayuda. Ntembe kele ve nde yandi bakaka kikesa ntangu yandi monaka Yezu ke sadila kiyeka yina Tata na yandi, Yehowa, a me pesaka yandi, sambu na kubinga bantu ya kudikulumusa mpi ya bo vandaka kumona mpamba na kukwisa na yandi.—Matayo 11:25-27.

 Evangile ya Matayo ke benda dikebi na bikalulu ya kitoko mingi yina Yezu monisaka; Yezu kele Mesia ya Nzambi silaka mpi muntu yina ta yala Kimfumu ya Nzambi na bilumbu ke kwisa.—Matayo 1:20-23; Yezaya 11:1-5.

 Tala video yai ya nkufi sambu na kumona na bunkufi mambu yina kele na mukanda ya Matayo.