NTENDULA YA BAVERSE YA BIBLIA

Yeremia 29:11—“Mono Mosi Mono Zaba Ngindu ya Mono Ke na Yo Sambu na Beno”

TALA NA

“‘Sambu mono me zaba mbote bangindu yina mono ke yindula sambu na beno,’ Yehowa a muntu me tuba, ‘bangindu ya ngemba, kansi ya mpasi ve, sambu na kupesa beno makwisa mpi kivuvu.’”—Yeremia 29:11, Mbalula ya Nsi-Ntoto ya Mpa.

“Mono mosi mono zaba ngindu ya mono ke na yo sambu na beno; mono ta sala beno mambote kansi mbi ve, mambu ya beno ke zola mono ta sala yo. Mono Mfumu Nzambi muntu me tuba.”—Yeremia 29:11, Bible en Kituba.

Ntendula ya Yeremia 29:11

Yehowa Nzambi silaka bansadi na yandi nde yandi me yidikila bo luzingu ya ngemba na bilumbu ke kwisa. Ata bo sonikaka yo sambu na bantu ya ntangu ya ntama, mambu yai ke landa kutendula bangindu ya Nzambi. Yandi kele “Nzambi yina ke pesaka kivuvu.” (Baroma 15:13) Ya kieleka, yandi salaka nde bo sonika balusilu yai na Biblia sambu beto “vanda ti kivuvu” ya kuvanda ti luzingu ya mbote na bilumbu ke kwisa.—Baroma 15:4.

Mambu ya Bo Ke Tubila na Baverse Yina Kele na Ntwala mpi na Nima ya Yeremia 29:11

Mambu yina vandaka na kati ya mukanda yina bo tindilaka bantu ya Izraele na Babilone; bo katulaka bantu yango na Yeruzalemi mpi nataka bo na kimpika. b (Yeremia 29:1) Nzambi songaka bo nde bo ta sala bamvula mingi na kimpika mpi nde bo ta tunga banzo, ta sala bilanga, mpi ta buta bana. (Yeremia 29:4-9) Kansi, Nzambi yikaka nde: “Ntangu bamvula 70 ta lunga na Babilone, mono ta tudila beno dikebi, mpi mono ta vutula beno na [Yeruzalemi].” (Yeremia 29:10) Na bangogo yina Nzambi ndimisaka bo nde yandi ta vila bo ve mpi nde kivuvu na bo ya kuvutuka na bwala na bo ta lungana.—Yeremia 31:16, 17.

Nzambi lungisaka lusilu na yandi sambu na bantu ya Izraele. Mutindu yandi tubaka yo na ntwala, Sirusi, ntotila ya Persia, nungaka Babilone. (Yezaya 45:1, 2; Yeremia 51:30-32) Na nima, Sirusi pesaka Bayuda nzila ya kuvutuka na bwala na bo. Na nima ya bamvula 70 ya kimpika, bo vutukaka na Yeruzalemi.—2 Bansangu 36:20-23; Esdrasi 3:1.

Mutindu lusilu yina kele na Yeremia 29:11 lunganaka ke bwisaka ntima ya bantu yina ke tulaka ntima na balusilu ya Nzambi bubu yai. Balusilu yango ke tadila mpi kutula ngemba na ntoto ya mvimba na nzila ya Kimfumu ya Nzambi yina Yezu Kristu ta vanda Ntotila.—Nkunga 37:10, 11, 29; Yezaya 55:11; Matayo 6:10.

Bangindu ya Luvunu na Yina Me Tala Yeremia 29:11

Ngindu ya luvunu: Nzambi kele ti “ngindu” to me yidikaka mambu sambu na konso muntu.

Diambu ya kieleka: Nzambi ke pesaka konso muntu nzila ya kupona luzingu yina yandi ta landa. Mambu ya yandi ke tuba na Yeremia 29:11, yandi sonikaka yo sambu na kimvuka ya bantu ya Izraele yina vandaka na Babilone, mpi yandi vandaka ti ngindu sambu na kimvuka yina—luzingu ya ngemba na bilumbu ke kwisa. (Yeremia 29:4) Kansi, Nzambi pesaka konso muntu nzila ya kupona kana yandi ta baka mambote na lusilu na yandi to ve. (Kulonga 30:19, 20; Yeremia 29:32) Bantu yina ke pona na kusosa Nzambi ke salaka yo ntangu bo ke sambaka yandi ti ntima ya masonga.—Yeremia 29:12, 13.

Ngindu ya luvunu: Nzambi ta pesa bansadi na yandi bimvwama ya kinsuni.

Diambu ya kieleka: Bangogo ‘kusala mambote’ to ‘kutoma’ ya kele na Babiblia ya nkaka na Yeremia 29:11, bo me balulaka yo katuka na ngogo ya Kiebreo ya ke tendula “ngemba, sante, mpi kudiwa mbote.” Na kutadila mambu ya bo ke tubila na kapu yina, Nzambi silaka ve na kupesa bantu ya Izraele yina vandaka na kimpika kimvwama kansi ngemba mpi luzingu ya kukonda bitumba. Bo zolaka kulanda kuzinga na kimvuka mpi kilumbu kele bo zolaka kuvutuka na Yeruzalemi.—Yeremia 29:4-10.

Tanga Yeremia kapu 29 ti banoti na nsi ya lutiti yina ke tendula mambu mpi bareferanse yina kele na kati-kati.

a Yehowa kele zina ya Nzambi.—Nkunga 83:18.

b Mukanda mosi (The Expositor’s Bible Commentary) ke tuba mambu yai sambu na Yeremia 29:11: “Yo kele mpasi na kuzwa lusilu ya kitoko kuluta yai na Biblia yina ke monisa zola ya ngolo ya Yahwe [Yehowa] sambu na bampika yai mpi yo pesaka bo, ata sambu na ntangu fioti, kikuma ya mbote ya kutula ntima mpi ya kuvingila.”—Volume 7, lutiti 360.