Kãnhmar ẽg kar vỹ nén ũ tỹ “kãka kórég” tag ri ke kato tẽgtẽ ke mũ. Jesus vỹ ẽg mỹ tó ja, tag vỹ “jagtar mág” nĩnh mũ. (Mateus 24:21) Ẽg pi vẽsỹrinhrénh mág to vẽnh péjunh nỹtĩ. Hã ra ẽg ne han ke nỹtĩ, ẽg tỹ ẽg jy nĩgãn jé?

Vẽnh vĩ há tỹ Sermão do Monte ki, Jesus tó ja: “Topẽ tỹ tỹ ẽg pãꞌi nĩ ẽn hã ve sórm nĩ. Kỹ tag hã to vãsãn nĩ, ti jykre kuryj tag hã to jykrén mág nĩ.” (Mateus 6:33) Ẽg hã ren kỹ tag han tĩ?

Topẽ tỹ tỹ ẽg pãꞌi nĩ ẽn hã ve sórm nĩ, kỹ tag hã to vãsãn nĩ. Ẽg tỹ vẽnh kar mỹ ven ke nỹtĩ, Topẽ Pãꞌi vỹ nén ũ há kãfór nĩ, ẽg mỹ. (Mateus 6:25, 32, 33) Topẽ Pãꞌi ne tugnĩn vỹ há kãfór nĩ, ẽg mỹ? Topẽ Pãꞌi vỹ ẽprã ke pãꞌi ag vỹ há kãfór nĩ. Ti tãvĩn vỹ nén ũ jagy e ki han ke mũ, ẽprã ke ag mỹ.

Topẽ Pãꞌi nón tĩm nĩ. Ẽg tỹ vãsãnsãn ke nỹtĩ, ẽg tỹ Topẽ tỹ ẽg jyvẽn mũ ag ki króm jé. Ẽg tỹ Jeová vĩ jẽmẽ sór tũ nỹtĩn kỹ, ẽg nén kuprẽg ja ag vỹ kórég nỹtĩnh mũ, ẽg mỹ. (Provérbios 16:25) Jãvo, ẽg tỹ Jeová vĩ ki króm nỹtĩn kỹ, ẽg tỹ mũ há han ke mũ, kar ti tỹ mỹ sér nĩnh ke mũ. — Isaías 48:17, 18.

Vãsãn nĩ, ã tỹ Topẽ Pãꞌi krẽm ke nĩ jé, kar Topẽ jykre kuryj to jykrén mág nĩ jé. Jesus tỹ  ke tĩ, ũn pir ag tỹ nén ũ ag nón pétã ke mũ vã. Ũn ag tỹ vẽjẽn to, kar vẽnh rãnhrãj to, kar ĩn há to krĩ kufy gy nỹtĩ. Tag tugnĩn ag pi tempo nỹtĩ, Topẽ Pãꞌi to vãsãnsãn jé. — Mateus 6:19-21, 25-32.

Jesus tỹ ke tĩ, ũn ag tỹ Topẽ Pãꞌi krẽm ke nỹtĩ sór tĩ, ũri ag pi kókĩnkĩr kar ag pi krĩ kufy nỹtĩnh. — Mateus 6:33.

Jesus nón mũnh fã ag tỹ Topẽ Pãꞌi krẽm ke nỹtĩ vã. Kar ag tóg Topẽ jykre kuryj to jykrén mág mũ. Ag pi nén ũ kórég tỹ tũ ki vég mũ. Jãvo Topẽ tóg ag jy nĩgãn mũ. Hã ren kỹ sir?

Ag tỹ Topẽ tỹ ẽg jyvẽn tĩ ag ki króm tĩ vã. Tag tugnĩn ag pi nén ũ vẽnh mỹ e ag nỹtĩ vã. Ag tỹ Topẽ Pãꞌi kri fi tar tãvĩ tĩ vã. Tag tóg ag ajũna ke mũ, ag tỹ nén ũ jagy ag fĩn rãm jé. Topẽ tóg ag “tar han nĩ” ag tỹ nén ũ vẽnh mỹ ag kato vãsãnsãn jé. — 2 Corinto 4:7-9.

Cristo mré ke si ag tỹ Jesus vĩ jẽmẽ tĩ vã, ag tỹ Topẽ Pãꞌi krẽm ke nỹtĩ jé. Ag tỹ Topẽ vĩ to kãmén tĩ vã, ẽmã kar ki. (Colossos 1:23) Ũri ũn ag mỹ ge han tĩ hẽn?

Háv! Jeová Kãmén Fã ag tỹ ki kanhró nỹtĩ, kãnhmar Topẽ Pãꞌi tỹ nén ũ kórég ag tỹ tũꞌ kenh ke mũ. Hã tugnĩn ag tỹ vãsãnsãn nỹtĩ, Jesus vĩ jẽmẽ jé: “kỹ nação kar vỹ vẽnh vĩ sér ẽn mẽnh mũ ga kar mũ hã, kỹ ag tóg Topẽ tỹ ẽg Pãꞌi nĩm ke mẽnh mũ. Ag tỹ mẽg kãn kỹ, kurã tỹ ẽgno vẽ sir” he tóg, Jesus ti.”— Mateus 24:14.

à tỹ Topẽ Pãꞌi vẽnh vĩ sér tag mẽg nĩn kỹ, ã ne han ke mũ? Ẽg tỹ ã mỹ to vĩ tĩ, ã tỹ povo tỹ ẽmã tỹ Beréia, Macedônia tá, kãgran jé. Paulo tỹ Beréia tá ke ag mỹ, Topẽ Pãꞌi to kãmén nĩn kỹ, ag tóg “Paulo ag vĩ kri fi mũ.” Kỹ ‘kurã kar ki ag tóg Topẽ vĩ to vẽnh kanhrãn mũ’, ag tỹ ki kanhró nĩ jé, Paulo tỹ ki hã tó tĩ.— Han kãme 17:11, 12.

à tỹ ge han ke mũ gé. à tỹ Topẽ Pãꞌi ti jykre kuryj tag hã to jykrén mág nĩn kỹ, kar ã tỹ tag hã to vãsãn nĩn kỹ, urĩ Topẽ tỹ ã jy nĩgãn ke mũ, kar kãnhmar ã tỹ jatun mỹ nĩnh ke mũ mỹr.