Éfeso tá ke ag mỹ carta 6:1-24
6 Kỹ sóg ãjag krẽ mỹ: “ãjag han mũ fag vĩ kri fim nĩ,” he mũ. Ẽg Senhor jykren ha vẽ.
2 Ãjag han mũ fag kamẽg nĩ. Topẽ tỹ ẽg mỹ tag tó kỹ tóg ẽg mỹ nén ũ há tó mũ gé, hã vỹ:
3 “ã han mũ fag kamẽg nĩ, ã tỹ tĩg há han jé, ã tỹ ga kri tĩg mág han jé,” he ja nĩ.
4 Kỹ sóg ũn sanh ag mỹ: “ãjag krẽ mỹ vĩ tar pẽ han tũg nĩ, ag tỹ ãjag to jũ tũ nĩ jé,” he mũ gé. Ãjag krẽ jyvẽn nĩ, ag mỹ ẽg Senhor jykre kãmén nĩ, ag tỹ mĩ mũn jé.
Camarada mré patrão kãme
5 Ãjag kã mĩ ũ ag tóg patrão krẽm nỹtĩ gé. Ãjag patrão vĩ kri fim nĩ. Ti kamẽg nĩ. Ti rãnhrãj ki rĩr há han nĩ, ãjag tỹ Cristo rãnhrãj ki rĩr tĩ ẽn ri ke.
6 Ũ tóg kejẽn ón kỹ ti patrão tũ ki rĩr tĩ, ti patrão tỹ ti mỹ vĩ há han jé. Tag han tũg nĩ. Ãjag patrão tũ ki rĩr hapẽ han nĩ, ãjag tỹ tỹ Cristo mỹ rãnhrãj tĩ nỹtĩn kỹ, Topẽ jykre tỹ ãjag mỹ sér tĩn kỹ.
7 Ãjag patrão rãnhrãj ki rĩr kỹ mỹ sér nỹtĩm nĩ. Ãjag tỹ ẽg Senhor rãnhrãj ki rĩr vẽ, ãjag tỹ ti rãnhrãj ki rĩr kỹ.
8 Ha vé, ẽg tỹ nén ũ há han kỹ ẽg tóg ti kaja venh ke mũ, kanhkã tá. Ẽg Senhor vỹ ẽg mỹ ti kaja ven ke mũ, ti camarada ag mỹ, ag patrão mỹ ke gé, ti ki ge kỹ nỹtĩ kar ag mỹ.
9 Ãjag kã mĩ ũ vỹ tỹ patrão nỹtĩ, kỹ ãjag camarada vỹ nỹtĩ, ãjag krẽm. Ag to há nỹtĩm nĩ. Ẽg Senhor vỹ kanhkã tá nĩ. Ãjag pãꞌi vẽ, ãjag camarada pãꞌi vẽ gé hã ra. Ti mỹ ẽg tóg tỹ ũn pir nỹtĩ, tag ki ũn mág mré ũn kãsir ag.
Japo katõ vãsãnsãn jafã
10 Kỹ sóg ãjag mỹ tag tó sór mũ gé ver, ha mẽ. Ẽg Senhor ki ge kỹ nỹtĩ to tar nỹtĩm nĩ. Tar ti nĩ, kỹ tóg ẽg tar han ki kanhró nĩ gé.
11 6:11-12 Tag ki ẽg vẽnh génh ri ke han tĩ, ẽg tỹ Japo kato vãsãnsãn kỹ nỹtĩn kỹ. Hã ra Topẽ tóg ẽg mỹ ẽg tỹ ti kato vãsãnsãn jafã nĩm tĩ. Kỹ mãn nĩ, kỹ Japo tóg ẽg tỹ hẽ ri kenh ke tũ nĩ. Tar jẽ jé ẽg tóg ke mũ ha. Ẽg pijé ẽg mré ke ag kato vãsãnsãn tĩꞌ. Pãꞌi ag nỹtĩ, ũ tỹ ẽg kato vãsãnsãn mũ ag, hã ra ẽg tóg ag vég tũ nĩgtĩ. Kuty tãn ag vẽ, ga to pãꞌi ag vẽ gé. Kanhkã krẽm ag ẽmã nỹtĩ gé. Kórég kar ag nỹtĩ.
12 Ha vé 6:11
13 Kỹ mãn kãn nĩ, Topẽ tỹ ẽg mỹ nén tỹ ag kato vãsãnsãn jafã vin sór mũ ẽn ti. Kejẽn ag tóg ẽg kato vãsãn mág han ke mũ. Kurã ẽn kã ag tóg ẽg tỹ hẽ ri kenh ke tũ nĩ, Topẽ tỹ ẽg tar han kỹ.
14 Hã kỹ tar nỹtĩm nĩ. Ẽg Senhor vỹ ón vãnh nĩ. Ti ón vãnh vỹ vẽsóg fĩn ja mág ri ke nĩ. Tỹ vẽsóg fĩn ri ke han nĩ. Kỹ vẽjykre kuryj vỹ tỹ soldado tỹ camisa tỹ ferro ri ke nĩ. Ẽn tu ri ke han nĩ. Vẽjykre kuryj han to ken hã vẽ.
15 Ẽg tỹ Topẽ vĩ sér tó sór mũ vỹ ẽg pẽn né ri ke nĩ. Ẽn rĩnh ri ke han nĩ, hã vỹ: vẽnh kar mỹ Topẽ vĩ kãmén, he mũ.
16 Ẽg tỹ Jesus ki rã kỹ tóg soldado tỹ vẽjy ven jafã ma tĩ ẽn ri ke nĩ. Satanás tỹ ẽg kato vãsãn kỹ tóg ti tỹ no tỹ ẽg to pẽg kỹ ti grug ri ke nĩ. Ẽg tỹ vẽjy ven jafã tỹ vẽjy ven kỹ tóg tỹ nhyn ke tĩ, ti no gru ẽn tỹ.
17 Ẽg kren ke vỹ soldado sãpe tỹ ferro ẽn ri ke nĩ. Kỹ Topẽ vĩ vỹ rógro ri ke nĩ gé. Topẽ kuprĩg vỹ ẽg mỹ kãmén tĩꞌ, Topẽ vĩ ti. Topẽ tỹ ẽg mỹ Japo kato vãsãnsãn jafã vin ke mũn hã vẽ.
18 Kỹ Topẽ mré vẽmén nĩ gé. Ti mỹ nén kar to vĩm nĩ. Ti kuprĩg vỹ ẽg jagfy vĩ tĩ gé. Topẽ mré vĩ to krónh ke tũg nĩ. Ẽg tỹ to krónh ken kỹ tóg ẽg nũr ri ke nĩ sir. Ke tũg nĩ. Ẽg mré ti ki ge kỹ nỹtĩ kar to vĩm nĩ.
19 Kỹ inh jagfy ti mré vẽmén nĩ gé. Topẽ vĩ tó sóg tĩ. Kỹ inh mré to vĩm nĩ, isỹ inh kato vãsãnsãn mũ ag kamẽg tũ nĩ jé, isỹ vẽnh kar mỹ Topẽ tỹ nén han sór mũ ẽn kãmén há han jé, vẽnh vĩ sér ẽn.
20 Topẽ vỹ inh mỹ tag nĩm ja nĩ, sỹ han jé, hã ra sóg ver se kỹ jẽ. Kỹ tóg sỹ ag kamẽg tũ nĩnh há tĩ, sỹ Jesus kãme tó kãn jé, sỹ ti tỹ inh mỹ: “ha ag mỹ kãmén,” he mũ tag tó kãn jé.
Paulo tỹ Tíquico jẽnẽnh ke
21 Kỹ tóg inh mỹ há tĩ, ãjag tỹ isỹ nén ve ja tag mẽ kãn jé, isỹ nén han mũ mré hã. Hã jé sóg ãjag mỹ Tíquico ti jẽnẽnh ke mũ. Ẽg régre ũ vẽ gé. Iso há tãvĩ ti nĩ. Ẽg Senhor rãnhrãj han ti tĩ. To krónh ke tũ ti nĩgtĩ.
22 Ti hã vỹ ãjag mỹ inh kãmén ke mũ, ti tỹ ãjag fe tỹ háꞌ he jé. Hã jé sóg ti jẽnẽnh ke mũ.
23 Ẽg jóg tỹ Topẽ jé ãjag krĩ kuprãg, ẽg régre kar ag mré hã. Ti jé ãjag tỹ jagnẽ to há kar han. Ti jé ãjag tỹ ti ki rã há han ẽn han, ẽg jóg tỹ Topẽ ti, ẽg Senhor tỹ Jesus Cristo ti ke gé.
24 Topẽ jé ãjag tar han, ũ tỹ ẽg Senhor tỹ Jesus Cristo to há nỹtĩ ag kar, kỹ tóg tũꞌ henh ke tũ nĩ, ẽg tỹ ti to há nỹtĩ ti.
Hã vẽ.
