João tỹ carta han vén 2:1-29
2 Inh krẽ, sỹ tag rán vẽ, ãjag mỹ, ãjag tỹ ti vĩ mranh sór tũ nĩ jé. Kejẽn ãjag kã mĩ ũ tóg Topẽ vĩ mranh tĩ hã ra. Kỹ ũ tóg ti jagfy vĩnh ke mũ ha, ẽg jóg tỹ Topẽ mỹ, hã vỹ: Jesus Cristo, he mũ, ũn jykre kuryj nĩ ẽn ti.
2 Ti hã tóg ũ tỹ ti tén ke mũ ag mỹ vẽnh fẽgꞌ, ti tỹ ẽg jagfy ter jé, ti tỹ ẽg tỹ Topẽ vĩ mranh tỹ tũꞌ hen jé. Hã kỹ tóg ẽg mỹ vẽnh pãte fón sór mũ. Hã ra tóg ẽg tãvĩ mỹ vẽnh pãte fón sór tũ nĩ. Ẽprã ke kar mỹ ke vẽ, mỹrꞌ.
3 Ha vé, ẽg tỹ Topẽ vĩ kri fi kỹ ẽg tóg vẽso: “vãhã inh ti ki kanhró nĩ,” henh ke mũ.
4 Ũ tóg kejẽn: “ti ki kanhró sóg nĩ,” he tĩ. Hã ra tóg ti tỹ ẽg mỹ nén tó ja ẽn han tũ nĩgtĩ. Ti ón vẽ. Ti pijé Topẽ tỹ ki hã tó mũ ki kanhró nĩꞌ.
5 Ẽg tỹ hã ra Jesus vĩ kri fi kỹ ẽg tóg Topẽ to há nỹtĩ. Kỹ ẽg tóg ti to há tãvĩ nỹtĩ ha ke gé. Tag han kỹ ẽg tóg ti ki kanhrãn mũ, kỹ ẽg tóg ti ki ge kỹ nỹtĩ ha, ha mẽ.
6 Ũ tóg ti to: “ti ki sóg rã kỹ jẽ,” he tĩ. Kỹ tóg ti jykre han kãn mũ sir. Jesus Cristo tỹ nén han ja han kãn tóg mũ. Kỹ tóg ti ki rã kỹ jẽ sir.
Jagnẽ to há nỹtĩnh ke
7 Ãjag to sóg há tãvĩ nĩ. Inh pijé ãjag mỹ nén ũ tãg rán sór mũꞌ. Nén ũ si rán sór inh mũ, ha mẽ. Vãsỹ Topẽ tóg ẽg jyvẽn ja nĩgtĩ, ẽg tỹ jagnẽ to há nỹtĩ jé. Cristo mur tũg ki tóg ẽg mỹ tag tó ja nĩgtĩ. Kỹ ãjag tóg vãsỹ mẽ ja nĩgtĩ gé.
8 Hã ra tóg tãg nĩ gé, sỹ ãjag mỹ rán mũ tag ti. Cristo vỹ ẽg mỹ tó mãn ja nĩ, ẽg tỹ jagnẽ to há nỹtĩ jé. Kỹ tóg ki króm ja nĩ. Kỹ ẽg tóg ti nón ki króm sór mũ gé. Ki hã tó ja ti nĩ. Kỹ tóg nén ũ tãg ri ke nĩ, Cristo tỹ Topẽ nón tó mãn kỹ. Ha vé, komẽr hã tóg kurãg tĩ. Kurã kãtĩg kỹ tóg ti kuty tỹ tũꞌ he tĩ, komẽr hã. Jesus tỹ ẽg mỹ: “jagnẽ to há nỹtĩm nĩ,” he to ken hã vẽ, hã vỹ: kurã, he mũ.
9 Ũ tóg kejẽn: “inh hỹn kurã mĩ tĩg mũ ha,” he tĩ. Hã ra tóg ti régre to jũ nĩ, ti irmão to. Ẽn vỹ kuty mĩ tĩ nĩ ver.
10 Ũ tỹ ti régre to há nĩ ẽn hã vỹ, kurã mĩ tĩg ke mũ. Ẽn vỹ ti régre tỹ tỹ prãnh ke han ke tũ pẽ nĩ.
11 Ũ tỹ ti régre to jũ nĩ ẽn vỹ kuty mĩ tĩ mũ. Kuty to vẽjykre han kỹ tóg jẽ nĩ ver. Kỹ tóg ti tỹ hẽ ra tĩg ke tag ki kagtĩg nĩ gé. Kyvó ri ke ti nĩ, ti tỹ kuty mĩ tĩn kỹ.
12 Inh krẽ, sỹ ãjag mỹ rán vẽ. Ãjag tỹ Topẽ vĩ mranh ja ẽn vỹ vẽnh pãte fón kỹ nĩ nĩ, Jesus Cristo tugrĩn.
13 Ãjag kã mĩ ke ũ vỹ sanh há nỹtĩ. Sỹ ãjag mỹ rán vẽ gé. Ũ tỹ nén kar tũg ki kã nĩ ja ẽn ki kanhró ãjag tóg nỹtĩ. Ãjag kã mĩ ke ũ vỹ kyrũ nỹtĩ. Sỹ ãjag mỹ rán vẽ gé. Nén-Kórég vỹ ãjag tỹ hẽ ri ke ja tũ nĩgtĩ.
14 Inh krẽ, sỹ ãjag mỹ rán vẽ. Ẽg jóg mág ki kanhró ãjag tóg nỹtĩ. Ãjag kã mĩ ke ũ vỹ sanh há nỹtĩ. Sỹ ãjag mỹ rán vẽ. Ũ tỹ nén kar tũg ki kã nĩ ja ẽn ki kanhró ãjag tóg nỹtĩ. Ãjag kã mĩ ke ũ vỹ kyrũ nỹtĩ. Sỹ ãjag mỹ rán vẽ. Tar ãjag nỹtĩ. Topẽ vĩ ki kanhró ãjag tóg nỹtĩ. Nén-Kórég vỹ ãjag tỹ hẽ ri ke ja tũ nĩgtĩ.
15 Ẽg tỹ tag ki nén ũ kórég vég mũ tag ki vẽꞌĩ sór tũg nĩ, tag ki vẽjykre ki. Ẽg tỹ tag to há nỹtĩn kỹ ẽg tóg ẽg jóg mág to há tũ nỹtĩ.
16 Ẽprã vẽjykre pijé tỹ Topẽ jykre nĩꞌ. Ẽprã vẽjykre hã vẽ, ha mẽ: nén ũ kar to én ẽg tóg tĩ. Ẽg tỹ nén ũ ve kỹ ẽg tóg ẽn mãn sór tĩ. Kỹ ẽg tóg: “ũn mág vỹ tỹ inh nĩ, isũ to, isỹ nén ũ kar to,” he tĩ gé. Topẽ jykre pijéꞌ. Ẽprã vẽjykre hã vẽ.
17 Hã ra tóg kãnhmar tũꞌ henh ke mũ, ẽg tỹ nén vég mũ tag ti. Ti tũg kỹ ẽg tỹ ne to én ke tóg tũ tĩ gé. Ũ tỹ Topẽ vĩ han tĩ ẽn vỹ tũꞌ henh ke tũ nĩ jãvo.
Ũ tỹ Cristo kato tẽ
18 Inh krẽꞌ, kurã tỹ ẽgno vỹ kakó tĩ ha. Kurã ẽn kakó nĩn kỹ Cristo kato tẽ pẽ ẽn vỹ vẽnh ven ke mũ. Tag mẽ ãjag huri. Hã ra ag tóg hur vẽnh vinven, ũ tỹ ti kato tẽ mũ tỹ hẽn ri ke ag. Hã ki ẽg tóg ki kanhró nỹtĩ, kurã tỹ ẽgno kakó nĩ ti.
19 Ẽg mré ke ag vẽ vẽ, hã ra ag tóg ón kỹ tỹ ẽg mré ke ja nỹtĩgtĩ. Ag tỹ tỹ ẽg mré ke pẽ nỹtĩ ra ag tóg ver ẽg mré mũnh ke mũ vẽ. Hã ra ag tóg ti tovãnh kỹ ti kato tẽ mũ ha. Hã ki tóg ve há tĩ, ag tỹ tỹ ẽg mré ke tũ nỹtĩ ti.
20 Ãjag kar vỹ vẽnh vĩ há ki kanhró nỹtĩ. Jagrẽ ãjag nỹtĩ, ũn jykre há ẽn kuprĩg tỹ. Hã kỹ ãjag tóg ki kanhró nỹtĩ.
21 Hã kỹ sóg ãjag mỹ rán mũ, ãjag tỹ ki kanhró nỹtĩn kỹ. Ãjag pijé ki kagtĩg nỹtĩꞌ. Ũ tỹ vẽnh vĩ há tó mũ ẽn pijé ón tĩꞌ.
22 Kỹ ũn nỹ hỹn ón tĩꞌ? Ũ tỹ ge vỹ ón pẽ han tĩ, ha mẽ: ũ tóg Jesus to: “ti pijé tỹ Cristo nĩꞌ,” he tĩ. “Topẽ tỹ ti jẽnẽ pijéꞌ, Topẽ kósin pijéꞌ,” he ag tóg tĩ gé, Jesus to. Ũ tỹ Cristo kato tẽ mũn hã vẽ. Ẽg jóg to ag tóg ón tĩ, ti kósin to ke gé.
23 Ũ tỹ Jesus to: “ti pijé tỹ Topẽ kósin nĩꞌ,” hen kỹ tóg ẽg jóg mág ki kagtĩg nĩ gé. Kỹ ũ tỹ ti to: “Topẽ kósin vỹ tỹ ti nĩ,” hen kỹ tóg ẽg jóg mág ti ki kanhró nĩ gé.
24 Vãsỹ ãjag tóg ti vĩ mẽ vén. Ẽn kã jatun tũg nĩ. Ẽn hã mĩ ẽkrén nĩ. Ãjag tỹ tag to tar nỹtĩn kỹ ãjag tóg Topẽ kósin ki ge kỹ nỹtĩ, ti panh ki ke gé. Hã kỹ ãjag tỹ nén mẽ vén ja ẽn tovãnh tũg nĩ.
25 Ti hã vỹ ẽg mỹ tó ja nĩ, ẽg tỹ ẽg rĩr krỹg ja tũ venh ke ti.
26 Ũ ag tóg ãjag krĩn kónãn sór mũ, ãjag mỹ ón kỹ, ti vĩ tón kỹ. Hã kỹ sóg ãjag mỹ vẽnh rán tag han mũ.
27 Hã ra ãjag tóg jagrẽ nỹtĩ, Topẽ kuprĩg tỹ. Kỹ tóg ãjag kanhrãn mũ sir. Ti hã vỹ ẽg kanhrãn tĩ, kỹ ũ vỹ ẽg kanhrãn mãn ke tũ nĩ ha. Nén kar kãmén ti tĩ, ẽg mỹ, ẽg jagrẽ ti. Vẽnh vĩ há hã tó ti tĩ. Ti pijé ón tĩꞌ. Ti tỹ ãjag mỹ tó mũ ẽn hã mĩ mũm nĩ, ti tỹ ãjag mỹ: “Jesus hã ki ge kỹ nỹtĩm nĩ,” hen kỹ.
28 Inh krẽꞌ, ti ki ge kỹ nỹtĩm nĩ. Kỹ tóg há tĩ. Kãnhmar ti kãtĩg ke mũ. Kãnhmar ti vẽnh ven ke mũ. Kỹ ẽg tóg mỹꞌãg ke tũ nĩ, ti kãtĩg kỹ, ẽg tỹ ti ki ge kỹ nỹtĩn kỹ. Ẽg mỹꞌãg kỹ ẽg tóg ti kãtĩg kỹ vẽnh pigju sór ke mũ. Hã kỹ ke tũg nĩ.
29 Ti hã ne vẽjykre kuryj hã mĩ tĩg ja nĩgtĩꞌ. Kỹ ũ tỹ vẽjykre kuryj han mũ vỹ tỹ ti kósin nĩ.
