Timóteo mỹ carta ũ 4:1-22
4 Inh kósinꞌ, sỹ ã jyvẽn ke vẽ, kỹ Topẽ vỹ mẽnh mũ, Jesus Cristo ti ke gé, ũ tỹ vẽnh kar jykre tugnỹm ke mũ ẽn ti, ũn rĩnrĩr nỹtĩ ag jykre, ũn kãgter mũ ag jykre ke gé. Vỹn ke mãn jé tóg ke mũ. Kỹ tóg tỹ pãꞌi mág jẽnh mũ, ha vem nĩ. Ẽg Senhor rĩnve sóg ã mỹ:
2 “Topẽ vĩ kãmén ra,” he mũ. Kejẽn ag tóg mẽ sór tĩ. Kejẽn ag tóg mẽ sór tũ nĩgtĩ. Ge ra ag mỹ kãmén nĩ. Ag mỹ ag tỹ kygnẽ ja ẽn tóm nĩ. Ag jyvẽn tar han nĩ, ag tỹ mẽ jãvãnh nỹtĩn kỹ. Ag to krónh ke tũg nĩ, ag tỹ kejẽn Jesus ki rã sór jé.
3 Kurã tỹ ẽgno to hã ag tóg jẽmẽ sór ke tũ pẽ nĩ, vẽnh vĩ há ti, ha vem nĩ. Kỹ ag tóg vẽnh vĩ kórég nón mũ sór mũ, ag tỹ nén to én mũ ẽn ti. Ũ tỹ ón kỹ ag mỹ tónh ke mũ ẽn vỹ vẽme sér tónh ke mũ. Kỹ tóg ag mỹ sér tĩnh mũ.
4 Vẽnh vĩ há jẽmẽnh ke tũ ag nĩ. Hã ra ag tóg vẽnh ó hã jẽmẽnh ke mũ sir.
5 Ag jãvo nén ũ kar to jykrén há han nĩ. Ã tỹ nén ũ jagy ve kỹ kato tar nĩm nĩ. Cristo kãme sér ẽn kãmén nĩ, vẽnh kar mỹ. Ã rãnhrãj ki rĩr há han nĩ gé.
6 Ag hỹn kãnhmar isén ke mũ, Jesus Cristo tugrĩn. Hã ra tóg inh mỹ tỹ nén ũ tũ nĩ.
7 Ẽg tỹ carreira han kỹ ẽg tóg vãsãn tãvĩ han tĩ, ẽg tỹ gỹjỹ he jé. Tag ri ke han inh, isỹ Topẽ rãnhrãj han kỹ. Ti rãnhrãj han kãn inh huri. Ti ki rã tovãnh ja tũ inh nĩgtĩ.
8 Ũ tỹ carreira ki gỹjỹ he mũ ẽn vỹ ka féj tỹ coroa gỹjỹ he tĩ. Ẽn ri ke nĩm jé tóg ke mũ inh mỹ, Topẽ ti, inh jykre kuryj to, kurã ẽn kã. Vẽnh kar mỹ ti nĩm ke mũ gé, ũ tỹ ti kãtĩg jãvãnh mũ ag kar mỹ.
Paulo tỹ nén ve ja
9 Kur inh venh kãtĩg.
10 Demas vỹ isovãnh kỹ vyr. Ẽprã vẽjykre han sór ti nĩ, hã kỹ tóg isovãnh kỹ Tessalônica ra vyr. Crescente vỹ Galácia ra vyr, kỹ Tito vỹ Dalmácia ra vyr.
11 Lucas vỹ inhhã inh mré nĩ nĩ. Marcos pére kãtĩg, ti tỹ inh rãnhrãj han jé. Tag to tóg tar nĩ.
12 Tíquico jẽnẽ inh, ti tỹ Éfeso ra tĩg jé.
13 Kỹ, ã kãtĩg kỹ inh mỹ inh capa ma kãtĩg. Trôade tá ti nĩ, Carpo ĩn krẽm. Kỹ inh mỹ inh livro gé kãtĩg gé, nén ũ fár ki rán kỹ nỹtĩ ẽn mré. Isỹ livro ẽn venh hapẽ tóg tĩ.
14 Alexandre, ũ tỹ ferro tỹ nén ũ kar han tĩ ẽn vỹ iso kórég tãvĩ nĩ. Ẽg Senhor vỹ ti jykre kórég to ti vóg kónãn ke mũ.
15 Ti kamẽg ra. Inh vĩ kato tẽ mág han tóg.
16 Fóg tỹ pãꞌi vỹ inh ki inh jykre jẽmẽ pin huri. Ẽn kã ũ tóg inh mré ve ja tũ nĩ. Isovãnh kãn ag tóg. Topẽ mỹ sóg to vĩ tĩ, ti tỹ ag mỹ vẽnh pãte fón jé.
17 Ag jãvo ẽg Senhor vỹ isar han, ti tỹ inh mré tag kã jẽn kỹ. Hã kỹ vẽnh kar vỹ ti vĩ mẽ huri, isỹ ag mỹ kãmén kỹ. Povo kar ag vỹ hur mẽ kãn. Kỹ ẽg Senhor tóg ijy nĩgãn, ag tỹ mĩg mỹ inh fón tũ nĩ jé.
18 Ijy nĩgãn mãn jé tóg ke mũ gé, Nén-Kórég tỹ isỹ hẽ ri ke tũ nĩ jé. Inh ki tóg rĩr há han ke mũ, sỹ kanhkã ra tĩg há han jé, ti nĩgja ra. Ti hã mỹ ẽg vĩ há han ke mũꞌ. Kỹ tóg tũꞌ henh ke tũ nĩ. Hã vẽ.
19 Priscila fi mré fi mén tỹ Áquila mĩ sóg ẽkrég tĩ, Onesíforo mré ke fag mĩ ke gé.
20 Erasto vỹ Corinto tá nĩ nĩ. Jãvo Trófimo tóg Mileto tá kaga nỹ ja nĩ, isỹ tá kãtĩ mũn kã.
21 Kur kãtĩg mẽ han, kusa tá krỹg tũg ki. Êubulo vỹ ã mĩ ẽkrég tĩ, Prudente ti ke gé, Lino ti ke gé, Cláudia fi ke gé, ẽg régre kar ag mré hã.
22 Ẽg Senhor mỹ sóg to vĩ tĩ, ti tỹ ã tar han jé, ti tỹ ãjag kar tar han jé gé.
Hã vẽ.
