Pedro tỹ carta han mãn 2:1-22
2 Hã ra ũ ag tóg ón kỹ Topẽ vĩ tó ja nĩgtĩ gé, vãsỹ, Israel ũ ag. Tag ve jé ãjag tóg ke mũ gé. Ũ ag tóg ón kỹ ãjag mỹ Topẽ vĩ kãmén sór ke mũ, ha vem nĩ. Ẽn ag vĩ vỹ ón kỹ ãjag mỹ mẽ há tĩ mẽ tĩnh ke mũ, hã ra tóg ãjag kókén ke mũ. Kỹ Topẽ vỹ vãhã ag tỹ tũꞌ henh ke mũ.
2 Ge ra ũ tỹ hẽn ri ke ag tóg ag jykre pãno han ke mũ, ag mré. Kỹ ũ tỹ ag mré vẽjykre pãno han mũ ẽn ag tỹ ag tugrĩn Topẽ jykre kato vĩ vĩ henh ke vẽ, ti tỹ ki hã tó mũ ra.
3 Ag tỹ jãnkamy mág ve sór vẽ, hã kỹ ag tóg ón kỹ vẽme sĩnvĩ tó sór mũ, ag tỹ ãjag lograr he jé. Hã ra ũ tỹ ag vóg kónãn ke mũ ẽn tóg ag vég tĩ. Ag tỹ tũꞌ he jé tóg ke mũ, kãnhmar, ha vem nĩ.
4 Topẽ tỹ jẽgnẽ jafã ũ ag vỹ Topẽ vĩ mranh. Ẽn ag vóg kónãn tóg huri, ag pijé krenkrenꞌ. Nũgme ki tóg hur ag vãm, Topẽ ti. Tá ag tóg sigse kỹ nỹtĩ, ferro tỹ corrente tỹ. Tá tóg kuty nỹ. Tá ag tóg Topẽ tỹ vẽnh kar jykre tugnỹm ke kurã ẽn jãvãnh nỹtĩ.
5 Kỹ Noé mré ke ag vỹ nỹtĩgtĩ gé. Topẽ vỹ ag vóg kónãn ja nĩ gé. Goj var tỹ tóg ũ tỹ ti vĩ mranh mũ ag tỹ tũꞌ he kãn. Ag pijé krenkrenꞌ. Ũ tỹ 8 (ke) ag hã vỹ krenkren, ẽn kã, hã vỹ: Noé, he mũ, ũ tỹ vẽnh kar mỹ: “Topẽ vĩ kri fim nĩ,” he mũ ẽn ti, kar kỹ ti mré ke tỹ 7 (ke) ẽn ag ke gé.
6 Topẽ vỹ ẽmã tỹ Sodoma mré ẽmã tỹ Gomorra tá ke ag vóg kónãn ja nĩgtĩ gé, kỹ ẽmã ẽn tá ĩn tóg kugpũr kãn ja nĩ. Ẽg tỹ tag ve kỹ ẽg tóg Topẽ tỹ ũn jykre pãno ag vóg kónãn ke ẽn ki kanhró nỹtĩ gé.
7 Ẽmã ẽn tá ũn pir vỹ kren, hã vỹ: Ló, he mũ. Ẽn vỹ jykre há nĩ ja nĩgtĩ, kỹ ti mré ke ag jykre kórég vỹ ti mỹ e tĩ ja nĩgtĩ.
8 Kurã kar ki tóg ag jykre pãno ve ja nĩgtĩ. Kỹ ti krĩ tóg kufy jagy nĩ ja nĩgtĩ, ti tỹ ag jykre kórég ve kỹ, ag vĩ kórég ke gé. Ẽn vỹ ti pir mỹ kren, Ló ti.
9 Ũ tỹ ti to: “ũn mág vỹ tỹ ti nĩ,” he mũ ag krenkren han ki kanhró tóg nĩ, Topẽ ti. Hã ra tóg ũ tỹ vẽjykre pãno han mũ ag vóg kónãn ke mũ, ti tỹ vẽnh kar jykre tugnỹm ke kurã ẽn kã.
10 Ũ ag vóg kónãn mág pẽ han jé tóg ke mũ, hã vỹ: ũ tỹ ag tỹ nén to én mũ han tĩ ẽn ag, he mũ, ũn vẽnh kavénh tĩ ag, he mũ, ũ tỹ: “Topẽ pijé tỹ ẽg Senhor nĩꞌ,” he mũ ẽn ag, he mũ.
Ón kỹ Topẽ vĩ tó tĩ tag ag vỹ ẽg vĩ kafãn tĩ. “Inh hã tóg ki kanhró nĩ,” he ag tóg tĩ. Kỹ ag tóg kanhkã tãn ag kamẽg vãnh nỹtĩ gé. Ag to ag tóg vĩ kónãn tĩ.
11 Topẽ tỹ jẽgnẽ jafã ag vỹ tag han tũ nĩgtĩ, ha mẽ. Kanhkã tãn ag to ag tóg vĩ kónãn tũ nĩgtĩ, Topẽ rĩnve. Ag tỹ ũ tỹ ón kỹ ti vĩ tó tĩ ag tar kãfór nỹtĩ ra ag tóg kanhkã tãn ag to vĩ tũ nĩgtĩ.
12 Ag jãvo ũ tỹ ón kỹ ti vĩ tó tĩ ẽn ag vỹ krĩ tũ nỹtĩ, vãnh kã mĩ sẽ ag jykre tũ ri ke ag nỹtĩ. Vãnh kã mĩ tóg tĩgtĩ, sẽ ti, ẽg tỹ ti to vãji kỹ ti tén jé. Tag ri ke ag nỹtĩ. Ag tỹ kanhkã tãn ag ki kagtĩg nỹtĩn kỹ ag tóg ag to vĩ kónãn tĩ. Hã kỹ Topẽ tóg ag tỹ tũꞌ henh ke mũ, ẽg tỹ sẽ tén tĩ ẽn ri ke.
13 Ag tỹ ag jykre pãno kajãm hã vẽ. Kurã ki ag tóg ag tỹ nén to én mũ ẽn han tĩ, mỹr, ha mẽ. Kỹ ag tóg ag mré jẽg tĩ gé, ag tỹ fénhta han kỹ. Ha ra ag tóg nén tỹ ẽg mỹꞌa han tĩ ẽn hã han tĩ, ag tỹ ag mré jẽn kỹ. Jykre régre ag nỹtĩ. Ón kỹ ag há nỹtĩ ve nĩ.
14 Ũn tỹtá fag kar to ag tóg én tĩ, fag ki ẽvãnh kỹ. Topẽ vĩ mranh sór ag tóg tĩ. Ti vĩ mranh to ag tóg krónh ke tũ nĩgtĩ. Ũn krój ag krĩn kónãn ag tóg tĩ, ag tỹ ag mré mranh jé. Ag topẽ vỹ tỹ jãnkamy nĩ. Topẽ vỹ ag vóg kónãn ke mũ, ha vem nĩ.
15 Topẽ japry ti tovãnh ag tóg. Vãgfor kỹ ag nỹtĩ. Beor kósin tỹ Balaão ẽn ri ke han ag tóg tĩ. Ẽn vỹ jãnkamy to há tãvĩ nĩ ja nĩgtĩ. Hã kỹ tóg povo tỹ Israel mỹ vĩ kónãn ke ẽn to jãnkamy ve sór mág ja nĩ, pãꞌi mág tỹ ti mỹ: “ha ag mỹ vĩ kónãn tĩg, inh jagfy,” hen kỹ.
16 Hã ra Topẽ tóg ti mỹ vĩ tar han, ti tỹ ti vĩ mranh kỹ. Hã kỹ ti mẽg tỹ burrica fi tóg fi vĩ vãnh ra ti mỹ vĩ ja nĩgtĩ. Ẽg tỹ jagnẽ mré vẽmén ri ke han ja fi tóg nĩgtĩ. Ti mỹ vĩ kỹ fi tóg ti tỹ vẽjykre kórég han ke mũ ra tỹ tũꞌ he mũ, ti tỹ ón kỹ Topẽ vĩ tónh tĩg sór mũ ẽn kã.
17 Ón kỹ Topẽ vĩ tó tĩ ag vỹ goj nĩhỹg ja ki goj tũ ẽn ri ke nỹtĩ. Kanhkã góg ri ke ag tóg nỹtĩ gé. Kãka tỹ vẽjo vóg kỹ tỹ tũꞌ he ẽn ri ke ag nỹtĩ, ũ tỹ ón kỹ Topẽ vĩ tó tĩ ag. Topẽ vỹ kuty tãvĩ tá ag vin ke mũ.
18 “Ũn mág vỹ tỹ inh nĩ,” he ag tóg tĩ, ón kỹ. Krĩ tũ ag nỹtĩ. Nén ũ vẽnhmỹ kar to én ag tóg tĩ. Nén ũ tỹ ẽg kavénh tĩ ẽn to én ag tóg tĩ. Vẽjykre pãno han kỹ ag tóg ũ tỹ ũri Topẽ ki ge sór mũ ag krĩn kónãn tĩ.
19 “Jatun mỹ ẽg tóg ẽg tỹ nén han sór mũ ẽn han kãn ke mũ. Topẽ vỹ ẽg to jũnh ke tũ nĩ,” he ag tóg tĩ, ón kỹ. Nén tỹ ẽg kavénh tĩ ẽn hã han ag tóg tĩ. Kỹ tóg tỹ ag jagrẽ nĩ, ẽprã vẽjykre ti. Ẽg tỹ nén ũ tovãnh sór mũ ra tovãnh ki kagtĩg nĩ ẽn vỹ tỹ ẽg jagrẽ nĩ sir, mỹr, ha mẽ.
20 Ẽg Senhor tỹ Jesus Cristo ki kanhró ja ag tóg nỹtĩ vẽ, ẽg kren han mũ ẽn ti. Ti tugrĩn ag tóg ẽprã vẽjykre kavéj kar tovãnh ja nĩgtĩ vẽ. Hã ra ag tóg ag tỹ nén tovãnh mũ ẽn han mãn mũ, kỹ tóg tỹ ag jagrẽ nĩ mãn mũ sir. Kỹ tóg ũri kórég kãfór nĩ, ag mỹ.
21 Ag tỹ Topẽ japry ẽn sãn ja tũ nĩ ra tóg há tĩ vẽ. Hã ra ag tóg ti sãn sĩ han kar kỹ tovãnh mũ, Topẽ tỹ ag mỹ vẽnh vĩ há jẽnẽg mũ ẽn ti.
22 Ag to ẽg tóg tag tó tĩ, ha mẽ: “cachorro vỹ ti tũgtũv ẽn ko mãn tĩ,” he ẽg tóg tĩ. “Porco tóg ti vẽnh kype há han kỹ jẽ ra óré mĩ vẽsĩn mãn tĩ. Kỹ tóg vẽnh kavénh mãn tĩ,” he ẽg tóg tĩ gé. Ũ tỹ vẽjykre kórég tovãnh kar kỹ han mãn tĩ ag to ken hã vẽ.
