Han kãme 12:1-25
12 Kejẽn pãꞌi mág tỹ Herodes vỹ Jesus ki ge kỹ nỹtĩ ũ ag sigség mũ, ag vóg kónãn jé.
2 Kỹ tóg soldado jẽnẽg mũ, ti tỹ Tiago tén jé, João kãke ẽn. Kyfé téj tỹ tóg ti tén mũ, rógro téj tỹ.
3 Kỹ tóg Judeu ag mỹ há tĩ, kỹ Herodes tóg Pedro kãgmĩg mũ gé sir. Fénhta kã ki tóg ti kãgmĩg mũ. Fénhta ẽn ki ag tóg pũ jẽgjã tũ ko tĩ. Judeu ag jykre vẽ.
4 Kỹ Soldado ag tóg Pedro tỹ vẽse ja kã ki ti fón mũ. Soldado tỹ 16 (ke) ag vỹ ti ki rĩr mũ. Ũ tỹ 4 (ke) tỹ ti ki rĩr kar kỹ ũ tỹ 4 (ke) ũ ag vỹ ag nỹtĩg ja ki nỹtĩ he tĩ, ag ri kén. “Fénhta tỹ Páscoa kar kỹ sóg ag mỹ ti ven mũ, ag tỹ ti vóg kónãn jé,” he tóg, Herodes ti.
5 Kỹ Pedro tóg se kỹ jẽ nĩ. Hã ra Jesus ki ge kỹ nỹtĩ ag tóg ti to Topẽ mré vĩ mũ. To ag krónh ke tũ nĩ.
Pedro tỹ kavar nĩ
6 Tỹ vaj kỹ Herodes vỹ ag mỹ ti ven sór mũ. Kuty ẽn kã Pedro tóg soldado régre ag kuju ki nũr mũ. Ferro régre tỹ tóg se kỹ nỹ, ag mré. Soldado ũ ag tóg vẽse ja jãnkã ki rĩr mũ.
7 Kỹ vãhã Topẽ tỹ jẽnẽ jafã tóg ti mré jẽ nĩ. Kỹ tóg ĩn ẽn krẽm jẽngrẽ nĩ, kuty hã ra. Ẽn tóg Pedro ki pérén ke mũ, ti kãvy ki. Ti rĩn kỹ tóg ti mỹ: “kur nĩ,” he mũ. Kỹ ti nĩgé se ja tóg varan ke mũ, ferro ẽn ti.
8 Kỹ tóg ti mỹ: “vẽsóg fĩ ra,” he mũ. “Ã pẽn né tu ra gé,” he tóg. Kỹ tóg ke mũ sir. Kỹ tóg ti mỹ: “Ã kur rỹ tu kỹ inh nón kãtĩg,” he mũ.
9 Kỹ tóg kãkutẽ mũ. Ti nón tóg tĩ mũ, Pedro ti. Hã ra tóg ti mỹ tỹ nén ũ ve jẽ, ti tỹ vég mũ ti. Ti mỹ tóg tỹ ti vẽnhpéti ve nĩ, Topẽ tỹ jẽnẽ jafã tỹ nén han mũ ti.
10 Jãnkã ki rĩr vén mũ ẽn pãtén ag tóg mũ, jãnkã ki rĩr mũ ũ ke gé. Kỹ ag tóg jãnkã mág tá junjun mũ, ferro tỹ han kỹ jẽ ẽn. Jãnkã ẽn vỹ vẽsógki norꞌ he mũ, ag jo. Kỹ ag tóg kãpa mũ sir. Ẽpry jagma ag tóg mũ mũ. Hã ra vãhã Topẽ tỹ jẽnẽ jafã tóg tĩ mũ sir.
11 Kỹ Pedro tóg vãhã mrin ke mũ, kỹ tóg: “vãhã sóg ki kanhró nĩ,” he mũ. “Topẽ vỹ ti tỹ jẽnẽ jafã jẽnẽ ja nĩ, kỹ tóg inh kren han mũ, pãꞌi tỹ Herodes jo. Judeu kar ag tóg inh jagtar nĩnh ke jãvãnh mũ, hã ra sóg venh ke tũ nĩ,” he tóg.
12 To jykrén kỹ tóg Maria fi ĩn ra tĩ mũ, João mỹnh ẽn fi, ag tỹ ũ to: Marcos, he mũ ẽn mỹnh fi. Fi ĩn krẽm ag tóg vẽnh mãn kỹ nỹtĩ nĩ. Topẽ mré ag vĩ nỹtĩ nĩ, ũ tỹ hẽn ri ke ag.
13 Kỹ tóg ĩn jãnkã tỹ tórónꞌ tórónꞌ ke mũ. Kỹ fi mỹ rãnhrãj tĩ fi tóg venh kãtĩ mũ. Fi jiji hã vỹ: Rode, he mũ.
14 Kỹ fi tóg Pedro vĩ ki kanhrãn mũ, hã ra fi tóg ti jy nón tũ nĩ. Róm tũ fi nĩ, jãnkã ti, fi fe tỹ mrin ke mũ ra. Fi tỹ ĩn kã ra rã kỹ fi tóg vẽnh kar mỹ: “Pedro vỹ ró to jẽ,” he mũ.
15 Kỹ ag tóg fi mỹ: “krĩ vẽnh mỹ ã nĩ,” he mũ. Hã ra fi tóg: “vó, ti hã vẽ,” he mũ. Kỹ ag tóg fi mỹ: “ti ki rĩr tĩ ẽn hỹn,” he mũ.
16 Kỹ Pedro tóg ver re tá jẽ nĩ, jãnkã tỹ tórónꞌ tórónꞌ ke mãn kỹ. Kỹ ag tóg ti jy nón mũ. Ti vég ag tóg mũ sir, kỹ tóg ag mỹ e tĩ.
17 Kỹ Pedro tóg ag mỹ ti nĩgé tỹ ge mũ, ag tỹ katyꞌ he jé. Kỹ tóg ag mỹ Topẽ tỹ ti kavãn tó mũ sir. Topẽ tỹ vẽse ja kã tá ti kãkutẽm kãmén tóg mũ sir. Kỹ tóg ag mỹ: “Tiago mỹ tóm nĩ, Jesus mré ke kar ag mỹ ke gé,” he mũ. Kỹ tóg Jerusalém tá kutẽ kỹ ẽmã ũ ra tĩ mũ sir.
18 Tỹ vaj kỹ soldado ag fe tóg jũrũn ke mũ. “Pedro hỹn hẽ kã tá vyr,” he ag tóg mũ, ti jãvãnh kỹ.
19 Kỹ Herodes tóg ũ ag jẽgnẽg mũ gé, ti kãgmĩ jé. Hã ra ag tóg ti vég tũ nĩ gé. Kỹ Herodes tóg Pedro ki rĩr mũ ag ki jẽmẽ mãn mũ. Kar kỹ tóg soldado ũ ag mỹ: “ag kãgtén ra, ti ki rĩr mũ ẽn ag,” he mũ. Kỹ ag tóg ag kãgtén mũ sir.
Kar kỹ Herodes tóg Judéia tá kutẽ kỹ ẽmã tỹ Cesaréia ra tĩ mũ sir, tá nĩ jé.
Herodes ter
20 Herodes tóg ẽmã tỹ Tiro tá ke ag to jũ mũ, ẽmã tỹ Sidom tá ke ag to ke gé. Ẽn ag tóg Herodes nĩgja tá junjun mũ. Kỹ ag tóg pãꞌi sĩ mré vĩ mũ, ti jiji hã vỹ: Blasto, he mũ. Herodes vỹ ti tỹ pãꞌi han ja nĩ. Ẽn mỹ ag tóg to vĩ mũ, ti tỹ ag jagfy vĩ jé, Herodes mré. Ti tỹ ag to jũ nĩn kỹ ag tóg tá vẽjẽn ve mãn tũ nĩ sir. Hã kỹ ag tóg ti fe tỹ háꞌ he sór mũ, ti tỹ ag mỹ vẽjẽn vẽne he mãn jé.
21 Kỹ Herodes tóg ag mỹ kurã nĩm mũ. Kỹ tóg ti kur sĩnvĩ ẽn tu mũ, pãꞌi kur ẽn ti. Kỹ tóg ti nĩgja kri nĩ kỹ ag mỹ vĩ mág han mũ.
22 Kỹ vẽnh kar tóg ti to: “ẽprã vẽnh vĩ pijéꞌ,” he mũ. “Topẽ vĩ vẽ, ti vĩ ti,” he ag tóg mũ.
23 Kỹ vẽsỹmér Topẽ tỹ jẽnẽ jafã tóg ti vóg kónãn mũ sir, ti tỹ ag mỹ: “vó,” he tũ nĩn kỹ. “Inh pijé tỹ Topẽ nĩꞌ,” he ja tũ tóg nĩ. Kỹ ti nug ga vỹ ti kagrãg mũ, hã kỹ tóg ter mũ.
Barnabé tỹ Saulo mré Topẽ vĩ tónh tĩg
24 Jó ũ tỹ hẽn ri ke ag vỹ Topẽ vĩ mẽg mũ, kỹ ag tóg Jesus ki ge mũ.
25 Kỹ Barnabé vỹ Saulo mré ag tỹ nén gé kãmũ mũ ẽn vin mũ, Jerusalém tá ke ag mỹ. Prỹg tĩn kỹ Jesus ki ge kỹ nỹtĩ ag tóg Jerusalém tá ke ag mỹ vẽjẽn jẽgnẽ ja nĩgtĩ. Ag mỹ vẽjẽn ẽn vin kar kỹ ag tóg vỹnvỹn ke mũ sir, Barnabé ti, Saulo ti ke gé. Kỹ ag tóg João Marcos pére mũ mũ.
