Han kãme 3:1-26
3 Kejẽn Pedro mré João ag tóg Topẽ ĩn ra mũ mũ, meio dia pãte 3 óra ki. Judeu ag tỹ Topẽ mré vĩ jafã vẽ, hã vỹ: 3 óra, he mũ.
2 Topẽ ĩn tá ũ tóg nĩ nĩ, ũn kãnhgrĩ. Ti mũr mũ kã tóg ge nĩ. Tá tóg: “inh mỹ nén ũ nĩm,” he nĩgtĩ, ũ tỹ Topẽ ĩn kã ra ge mũ ag mỹ.
Ẽn va ag tóg kãmũ mũ, jãnkã tá ti nĩm jé. Kỹ João mré Pedro ag tóg Topẽ ĩn tá junjun mũ.
3 Ũn kãnhgrĩ tỹ Pedro ag ve kỹ tóg ag mỹ nén ũ to vĩ mũ.
4 Kỹ ag tóg ti tugnỹm mũ. Kỹ Pedro tóg ti mỹ: “ẽg ki ẽvãnh,” he mũ.
5 Kỹ tóg ag ki ẽvãnh mũ. “Ag hỹn inh mỹ jãnkamy nĩm ke mũ,” he tóg.
6 Hã ra Pedro tóg ti mỹ: “jãnkamy tóg inh mỹ tũ tĩ,” he mũ. “Sỹ nén ma tĩ hã tỹ sóg ã mỹ nĩm mũ, hã vỹ: Jesus Cristo jiji hã tó kỹ, sóg ã mỹ: ha jẽg, he mũ,” he tóg, Pedro ti, ũn kãnhgrĩ mỹ.
7 Kỹ tóg ti pẽgja tá ti kãgmĩ kỹ ti fẽg mũ.
Kỹ vãhã ti pẽn tóg tarꞌ he mũ sir, ti pẽn nágnán ti.
8 Hũm he tóg mũ sir. Jẽg háꞌ he tóg mũ. Vãhã tóg tĩ mũ sir. Kỹ tóg ag mré Topẽ ĩn kã ra ra mũ sir. Tá tóg hũm hũm he mũ. Topẽ mỹ tóg vĩ há han mũ sir.
9 Kỹ vẽnh kar tóg ti vég mũ, ti tỹ hũm hũm hen kỹ, ti tỹ Topẽ mỹ vĩ há han kỹ.
10 Kỹ ag tóg ti ki kanhrãn mũ. “Topẽ ĩn jãnkã tá nĩ ẽn hã vẽ mỹr, vẽnh kar mỹ: inh mỹ nĩm, he tĩ ẽn hã vẽ mỹr,” he ag tóg ti to. Kỹ tóg ag mỹ e tĩ sir. Ag fe tóg jũrũn ke mũ sir.
Pedro tỹ Topẽ jykre kãmén
11 Hã ra tóg Pedro mré João ag mré tĩ mũ, ũn kãnhgrĩ ja ẽn ti. Hã kỹ vẽnh kar tóg ag to vẽnh mãn mũ, Topẽ ĩn krẽm, pãꞌi tỹ Salomão he mũ ẽn sala tá. Ag mỹ tóg e tĩ, ti tỹ háꞌ hen kỹ.
12 Pedro tỹ ũn e ẽn ag ve kỹ tóg ag mỹ: “inh kanhkãꞌ, ãjag fe hã ne tóg jũrũn ke mũꞌ,” he mũ. “Ẽg tỹ vẽsóg ki ti tỹ háꞌ he tũ vẽ. Topẽ tỹ ti tỹ háꞌ he vẽ mỹr. Ẽg tỹ vẽjykre kuryj han mũ ra ẽg tóg ge han ki kagtĩg nỹtĩ,” he tóg.
13 “Ẽg jógjóg ve ag vỹ Topẽ to há ja nỹtĩgtĩ, Abraão ti, Isaque ti, Jacó ti ke gé. Topẽ ẽn vẽ mỹr, ũ tỹ ti tỹ háꞌ he mũ ti. Topẽ ẽn vỹ ti kósin tỹ ũn mág han. Ti hã vỹ tỹ Jesus nĩ. Hã ra ãjag tóg fóg tỹ pãꞌi tỹ Pilatos mỹ ti fẽg ja nĩgtĩ, kỹ tóg: ti kavãn jé sóg ke mũ, he mũ vẽ.
14 Hã ra ãjag tóg ũ tỹ vẽjykre kuryj han mũ to, nejé, he ja nĩgtĩ, Topẽ tỹ ũn kuprẽg mũ ẽn to, Jesus ẽn to. Hã ra ãjag tóg ũ tỹ ũn tén mũ to: ti kava ra, he ja nĩgtĩ.
15 Ũ tỹ ẽg rĩnrĩr han mũ ẽn tén ja ãjag tóg nĩgtĩ mỹr. Hã ra Topẽ tóg ti rĩn mãn ja nĩ, ti ter mũ hã ra, kỹ ẽg tóg ti ve ja nĩgtĩ,” he tóg.
16 “Kỹ ẽg tóg Jesus ki ge mũ. Hã kỹ Jesus tóg ũn kãnhgrĩ ja tag tỹ tarꞌ he mũ, ãjag tỹ ũn vég mũ tag ti. Jesus vỹ ti tỹ ti ki rã han. Hã kỹ tóg ti tỹ Jesus ki rã kỹ háꞌ he mũ sir, ãjag rĩnve,” he tóg.
17 “Inh kanhkãꞌ, ãjag tỹ ki kagtĩg nỹtĩn hã kỹ ãjag tóg Jesus tén ja nĩgtĩ, pãꞌi ag mré.
18 Hã kỹ Topẽ tóg vãsỹ rán kỹ nĩ ẽn han. Topẽ vĩ tó tĩ ag kar tóg vãsỹ Jesus jagtar ke ti tó ja nĩgtĩ, Topẽ tỹ ag mỹ: ha tó, hen kỹ. “Topẽ tỹ ũn jẽnẽg mũ ẽn tỹ jagtar ke vẽ, Cristo ti,” he ja ag tóg nĩgtĩ.
19 Kỹ ãjag jykre pãno tovãnh nĩ. Topẽ jykre ki gem nĩ, Topẽ tỹ ãjag tỹ ti vĩ mranh tỹ tũꞌ he jé.
20 Kỹ ãjag tóg tỹ Topẽ mré ke nỹtĩnh mũ. Kỹ tóg ãjag krĩ tỹ kãnhvyꞌ henh ke mũ. Kar kỹ tóg ãjag mỹ ti jẽnẽ mãn ke mũ gé, ti tỹ ãjag mỹ ũn jẽnẽnh ke mũ ẽn ti, Cristo ti, hã vỹ: Jesus, he mũ.
21 Ti tỹ kanhkã tá nĩ vẽ ver. Ti tỹ ti kurã pétẽm kỹ tóg vãhã tá vỹn kenh ke mũ, Topẽ tỹ nén kar han mãn ke kurã ẽn kã.
Hã kỹ Topẽ tóg vãsỹ ti vĩ tó tĩ ag mỹ tó ja nĩgtĩ, ag tỹ vẽnh kar mỹ ti vĩ tó jé, ti tũ ag kar mỹ.
22 Hã kỹ Moisés vỹ tag tó ja nĩ, ha mẽ: Topẽ vỹ ãjag mỹ ti vĩ tó tĩ ũ jẽnẽnh ke mũ, ti tỹ ãjag mỹ Topẽ vĩ tó jé, inh ri kén. Ẽn vĩ jẽmẽm nĩ.
23 Ũ tỹ ti vĩ jẽmẽ jãvãnh ẽn ter ke vẽ, ẽn pijé tỹ Topẽ tũ nĩꞌ, he ja tóg nĩgtĩ, Moisés ti,“ he tóg.
24 “Topẽ vĩ tó tĩ ag kar vỹ tó ja nĩgtĩ, ẽg tỹ ũri vég mũ tag ti. Samuel vỹ tag tó vén ja nĩgtĩ, kar kỹ ti nón ke ag tóg vãhã tag tó ja nĩ gé.
25 Topẽ vĩ tó tĩ ẽn krẽ vỹ tỹ ãjag nỹtĩ. Ãjag jógjóg ve ag hã mré tóg jykrén ja nĩgtĩ, Topẽ ti, Abraão hã mré. Hã kỹ tóg Abraão mỹ: ã kósin ũ hã tugrĩn sóg vẽnh kar to há nĩnh mũ, he ja nĩgtĩ, Topẽ ti.
26 Ãjag hã mỹ tóg ti kósin jẽnẽ, ti rĩn mãn kỹ. Ãjag hã mỹ tóg tó vén, ãjag tỹ tỹ Judeu nỹtĩn kỹ. Ãjag tỹ ãjag jykre pãno tovãnh jé,” he tóg, Pedro ti, João mré.
