Han kãme 5:1-42
5 Kỹ ũ tóg nĩ gé, ti jiji hã vỹ: Ananias, he mũ. Jãvo ti prũ fi jiji hã vỹ: Safira, he mũ. Ẽn fag vỹ tóg fag japỹ fón mũ gé.
2 Kỹ tóg ti prũ fi mỹ: “ti kaja vẽnh kãpóv péju kỹ ẽg tóg nĩm ke mũ,” he mũ. Kỹ tóg Jesus tỹ ũn vin mũ ag mỹ nĩm mũ. “Ẽg japỹ kaja kar hã vẽ,” he tóg mũ ón kỹ.
3 Kỹ Pedro tóg ti mỹ: “Satanás hã ne tóg ã krĩn ja nĩꞌ, hã ra ã tóg ti mỹ: nejé, he ja tũ nĩ,“ he mũ. “Hã kỹ ã tóg Topẽ kuprĩg mỹ ón. Hã kỹ ã tóg ti kaja vẽnh kãpóv péju kỹ nĩm ja nĩꞌ,” he tóg.
4 “Ã japỹ vẽ mỹr, ha mẽ, kỹ ti kaja vỹ tóg tỹ ã tũ nĩ gé sir. Kỹ ã tỹ ma kãtĩ tũ nĩ ra tóg tỹ nén ũ tũ nĩ vẽ. Hã ra ã tóg ã ón ke to jykrén ja nĩgtĩ. Hã kỹ ã tóg ẽg mỹ ón,“ he tóg, Pedro ti.
5 Ananias tỹ ti vĩ mẽ kỹ tóg kutẽ mũ. Ti ter vẽ sir. Kỹ tóg ũ tỹ mẽg mũ ag kar mỹ e tĩ. Ag fe tóg jũrũn ke mũ.
6 Kỹ kyrũ ag tóg jẽgnẽgnẽ kỹ ti fi han mũ. Kar kỹ ag tóg ti kénh mũ mũ sir.
7 3 óra tũg kỹ ti prũ fi tóg mĩ kãtĩ mũ gé. Hã ra fi tóg fi mén ter mẽ ja tũ nĩ ver.
8 Kỹ Pedro tóg fi mỹ: “ãjag mỹ ti kaja tag to fón, ãjag japỹ ti?“ he mũ.
Kỹ fi tóg: “hỹ, ti kaja tag to ẽg tóg fón,” he mũ, ón kỹ.
9 Kỹ Pedro tóg fi mỹ: “ãjag ne tóg jagnẽ mré to jykrén ja nĩ géꞌ,“ he mũ. “Topẽ kuprĩg mỹ ãjag ón mỹr. Ũ tỹ ã mén kénh mũ ag vỹ hur kãmũ jẽg. Kỹ ag tóg ã va mũnh mũ gé,” he tóg.
10 Kỹ fi tóg kutẽ kỹ hun ke mũ gé sir. Kyrũ ag tỹ junjun kỹ ag tóg fi ter vég mũ gé. Kỹ ag tóg fi kénh mũ mũ gé, fi mén mré.
11 Kỹ Jesus ki ge kỹ nỹtĩ kar ag fe tóg jũrũn ke mũ, ũ tỹ mẽg mũ kar ag ke gé.
Hã kỹ Ananias fag tóg Topẽ mỹ ón tugrĩn kãgter ja nĩ.
Ag tỹ Jesus tỹ ũn vin mũ ag vóg kónãn
12 Jesus tỹ ũn vin mũ ag tóg nén ve vãnh tỹ hẽn ri ke hynhan mũgtĩ, vẽnh kar mỹ. Kỹ Jesus ki ge kỹ nỹtĩ kar ag vỹ kurã kar ki vẽnh mãn tĩ, pãꞌi tỹ Salomão he mũ ẽn sala tá, Topẽ ĩn krẽm.
13 Jesus ki ge tũ ag tóg venh kãmũ tũ nĩgtĩ, ag tỹ ag kamẽg kỹ. Hã ra tóg vẽnh kar mỹ há nĩ sir, Jesus ki ge kỹ nỹtĩ ag jykre ti.
14 Kurã kar ki ũ tóg to jykrénꞌ he mũ, Jesus ki rã jé, ũ tỹ hẽn ri ke ag, fag ke gé. Hã ki ag tóg e nỹtĩ sir, Jesus ki ge mũ ẽn ag.
15 Kejẽn ag tóg ũn kagyga gé kãmũ mũ gé vãhã, ẽpry kri. Tá ag tóg nỹgnỹ kỹ nỹtĩ. Kỹ ag tóg Pedro jãvãnh mũ. “Ti kãnhvég tỹ ẽg mĩ tĩg kỹ ũ tóg hẽn ri ke mũn háꞌ henh mũ,” he ag tóg. Kỹ ag tóg hágháꞌ he mũ.
16 Ũ tỹ hẽn ri ke ag tóg Jerusalém tá vẽnh mãn mũ, ẽmã kar tá kãmũ ẽn ag. Ũn kagyga ag gé ag tóg kãmũ mũ, ũn jagrẽ kórég ag ke gé. Kỹ ag tóg hágháꞌ he kãn mũ sir.
17 Kỹ Topẽ tũ to pãꞌi mág tóg jũ pẽ han mũ, ti mré pãꞌi kar ag ke gé.
18 Kỹ ag tóg Jesus tỹ ũn vin mũ ag sigség mũ, vẽse ja mág tá.
19 Hã ra kuty tá Topẽ tỹ jẽnẽ jafã tóg tére kỹ vẽse ja jãnkã nugnón mũ. Ag gé tóg tĩ mũ, ag kygvãn kỹ, kỹ tóg ag mỹ:
20 “ha mũ jẽg, Topẽ ĩn ra, ãjag tỹ vẽnh kar mỹ Topẽ vĩ tó jé, Topẽ tỹ ẽg rĩnrĩn mãn ke ẽn ti,” he mũ.
21 Tỹ vaj kỹ ag tóg kusãg pẽ ki Topẽ ĩn ra mũ mũ, tá Topẽ vĩ tó jé.
Hã ra Topẽ tũ to pãꞌi mág tóg ti mré ke ag jẽgnẽg mũ, ag tỹ kófa ag jé prẽr jé, pãꞌi kar ag ke gé. Kỹ ag tóg vẽse ja ra porisa ag jẽgnẽg mũ, ag tỹ vẽsigse ag tatĩ kãmũ jé.
22 Ag tỹ tá junjun mũ ra ag tóg vẽse ja kã tá tũgtũ nĩ.
23 Kỹ ag tóg: “vẽse ja tóg nĩfénh kỹ jẽ nĩ,“ he mũ. “Kỹ ũ tỹ ki rĩr mũ ag tóg tá nỹtĩ gé, ti jãnkã tá. Ẽg tỹ nón mũ ra tóg kuprã jẽ,” he ag tóg mũ, pãꞌi ag mỹ.
24 Kỹ tóg ag mỹ epẽ tĩ. Kỹ tóg ag krĩ tũ tĩ sir.
25 Kỹ ũ tóg tá jun kỹ: “Topẽ ĩn krẽm ag nỹtĩ, ãjag tỹ ũn sigség mũ ag,” he mũ. “Tá ag tóg vẽnh kar mỹ Topẽ vĩ tó nỹtĩ,” he tóg.
26 Kỹ porisa ag pãꞌi tóg ag mré tĩ mũ, ag tatĩ kãmũ jé. Komẽr hã ag tóg ag mré vĩ mũ. “Ẽg tỹ ag mỹ vĩ tar han kỹ ũ tỹ ag vĩ mẽg nỹtĩ ag tóg hẽn ri ke mũn ẽg pin ke mũ, pó tỹ,” he ag tóg.
27 Kỹ Jesus tỹ ũn vin mũ ag kar tóg porisa ag mré mũ mũ. Kỹ Topẽ tũ to pãꞌi mág tóg ag mỹ:
28 “ãjag mỹ ẽg tóg: ker ẽn jiji tó mãn hẽꞌ, he ja nĩgtĩꞌ,” he mũ. “Ge ra ãjag tóg Jerusalém tá ke kar ag mỹ tugtó ja nĩgtĩ. Ãjag hỹn ti ter to ẽg jagtar han sór mũ,” he tóg.
29 Kỹ Pedro tóg: “Topẽ tỹ ẽg mỹ nén tó mũ ẽn han jé ẽg tóg ke mũ, ẽprã ke ag tỹ ẽg mỹ: ke tũg nĩ, he mũ ra,“ he mũ.
30 “Ẽg jógjóg ag vỹ Topẽ to há nỹtĩgtĩ. Ag tỹ ũ to há nỹtĩ ẽn vỹ Jesus ti rĩn mãn ja nĩgtĩ, ãjag tỹ ũn tén mũ ẽn ti, ka to ũn sãg mũ ẽn ti.
31 Kỹ Topẽ tóg ti tỹ pãꞌi mág han mũ, ti tỹ ti mỹ: kunĩg, inh pẽgja tá nĩ, hen kỹ. Jesus tỹ tóg ẽg kar krĩn sór mũ, ẽg kar tỹ vẽjykre pãno tovãnh jé, ti tỹ ẽg tỹ ti vĩ mranh tỹ vẽnh pãte fón jé.
32 Nén kar ẽn ve ja ẽg tóg nĩgtĩ, hã kỹ ẽg tóg ti vĩ tó mũ sir. Kỹ Topẽ kuprĩg tóg ẽg kanhrãn mũ gé. Topẽ vỹ ũ tỹ ti vĩ han mũ kar ag mỹ ti kuprĩg jẽnẽg mũ,“ he tóg, Pedro ti.
33 Kỹ pãꞌi ag fe tóg gỹm ke mũ, kỹ ag tóg ag kãgtén ke to jykrén mũ, Jesus tỹ ũn vin mũ ẽn ag to.
34 Kỹ vãhã ũ tóg jẽgnẽ mũ, ti jiji hã vỹ: Gamaliel, he mũ. Vẽnh kar mỹ tóg tỹ ũn jykre há nĩ. Kỹ tóg: “ver ag kãpan nĩ,” he mũ.
35 Kỹ tóg ag mỹ: “inh kanhkãꞌ, ãjag tỹ nén han ke mũ to jykrén nĩ ver,” he mũ.
36 “Pedro ag jo ke ũ tóg jẽ ja nĩ gé, ti jiji hã vỹ: Teudas, he mũ. Ti hã ne tóg vẽsỹ pãꞌi mág han ja nĩ, kỹ ũ tỹ 100 tỹ 4 (ke) ag vỹ ti nón mũ kỹ ti tén ja nĩgtĩ sir. Kỹ ũ tỹ ti vĩ han mũ ag tóg tã mĩ mũ ja nĩ, kỹ tóg tũꞌ he mũ.
37 Kar kỹ ũ vỹ jẽ ja nĩ gé, ti jiji hã vỹ: Judas, he mũ. Galiléia tá ke ẽn vẽ. Ag tỹ vẽnh kar jigji ránrán mũ ra tóg tá jẽ ja nĩ, kỹ ũ tỹ hẽn ri ke ag tóg ti nón mũ kỹ ti tén ja nĩgtĩ gé, kỹ ũ tỹ ti vĩ han mũ ag tóg krigꞌ ke kãn ja nĩ,” he tóg.
38 “Isỹ nén to jykrén mũn hã vẽ, ha mẽ: Pedro ag tovãnh nĩ ver. Ag mỹ: ha mũ jẽg, hem nĩ ver. Ag tũ tỹ tỹ ẽprã ke ag jykre nĩn kỹ tóg tũꞌ henh ke mũ mỹr, vẽsóg ki, ha mẽ.
39 Ti tỹ hã ra tỹ Topẽ jykre nĩn kỹ ãjag tóg tỹ tũꞌ henh ke tũ nĩ. Ãjag tỹ ge ra ag to jũ nỹtĩn kỹ ãjag tóg vãhã Topẽ kato tẽ mũ,” he tóg, Gamaliel ti.
40 Kỹ ag tóg ti mỹ: “he,” he mũ. Kỹ ag tóg Jesus tỹ ũn vin mũ ag jé prẽr mãn mũ. Ag mrãnmrãn ag tóg mũ. Kỹ ag tóg: “ker Jesus tó mãn hẽꞌ,” he mãn mũ, “ha mũ jẽg,” he ag tóg, ag mỹ.
41 Kỹ ag tóg mũ mũ, Jesus tỹ ũn vin mũ ag. Ag mỹ tóg sér tĩ, ha mẽ. Ag tỹ Jesus ri kén jagtar mũ ra tóg ag mỹ sér tĩ.
42 Kurã kar ki ag tóg Topẽ ĩn tá Jesus tó tĩ, ti to: “Topẽ vỹ ti jẽnẽ,” hen kỹ. Vẽnh kar ĩn tá ag tóg ti kãmén mũ gé, ũ tỹ ag kógfyn kỹ. To ag tóg krónh ke tũ nĩgtĩ sir.
