João tỹ rá 20:1-31
20 Tỹ vaj ũn kỹ, semana ki kurã ve ki Maria Madalena fi tóg Jesus kej venh tĩ mũ. Kusã pẽ ki fi tóg ti kej ra tĩ mũ, kurã sĩn hã mỹ. Tá jun kỹ fi tóg pó tỹ ti kej nĩfe kunũnh kỹ nĩ ẽn vég mũ.
2 Kỹ fi tóg Simão Pedro to vẽnhvãg tĩ mũ sir, Jesus mré tĩ tĩ ũ to ke gé, ũ tỹ Jesus to há tãvĩ ẽn to. Kỹ fi tóg ag mỹ: “ẽg Senhor va ag tóg mũ ja nĩ,” he mũ. “Ti kej kã ki tóg tũ nĩ. Ag hỹn hẽ ra ti va kagáv,” he fi tóg.
3 Kỹ ag tóg venh mũ mũ gé, Pedro ti, Jesus mré tĩ tĩ ũ ẽn ke gé.
4 Pétẽ ag tóg mũ mũ, hã ra ũ ẽn tóg Pedro kã raran ke mũ, kỹ tóg tá jun vén mũ.
5 Kỹ tóg pãró nor ẽn ki pãnh ke kỹ kã tá kur ẽn vég mũ, ti pãg ja ti, hã ra tóg kã ra rã ja tũ nĩ.
6 Kỹ Pedro tóg ti nón tá jun mũ gé, hã ra tóg inhhã kã ra rã mũ, ti kej kã ra. Kỹ tóg kur ẽn vég mũ gé sir.
7 Ti krĩ pãg ja vỹ vyr mỹ nĩ nĩ, kãnhpẽn kỹ.
8 Kỹ ũ ẽn tóg ti nón kã ra rã mũ gé sir, kỹ tóg ti tỹ ven kỹ: “hã ja vẽ,” he mũ.
9 Vãhã ag tóg ki kanhró nỹtĩ. Tag to hã ag tóg ti vĩ to jykrén há han ja tũ nĩ ver, ti to nén rán kỹ nĩ ẽn to, ti tỹ ti ter kar kỹ rĩr mãn ke ẽn to.
10 Ag tỹ ti kej tỹ kuprã nỹ ve kar kỹ ag tóg vỹnvỹn ke mũ, ag ĩn ra.
Jesus tỹ Maria Madalena fi mỹ vẽnh ven
11 Hã ra Maria Madalena fi tóg tá jẽ nĩ, ti kej nor nĩ ẽn tá. Fỹ fi tóg jẽ nĩ. Fi fỹ kỹ fi tóg ti kej ki pãnh ke kỹ kã tá ẽvãnh mũ sir.
12 Kỹ fi tóg ũn régre ag vég mũ. Topẽ tỹ jẽgnẽ jafã ag vẽ. Kur kupri rĩnh kỹ ag nĩgnĩg kỹ nỹtĩ, Jesus nỹgja tá, ti kej kã tá. Ũ tóg ti krĩ nĩgja tá nĩ, kỹ ũ tóg ti pẽn nỹtĩgja tá nĩ gé.
13 Kỹ ag tóg fi mỹ: “ã tỹ ũ jãvãnh kỹ fỹ nẽ, jỹ?“ he mũ. Kỹ fi tóg ag mỹ: “inh Senhor va ag tóg mũ ja nĩ,” he mũ.
14 Kỹ fi tóg vẽnh pãte ẽvãnh mũ, hã ra Jesus tóg tá jẽ nĩ. Hã ra fi tóg ti ki kagtĩg nĩ.
15 Kỹ tóg fi mỹ: “ã tỹ ũ jãvãnh kỹ fỹ nẽ, jỹ?“ he mũ gé. Hã ra fi tóg ti to: “ti hỹn tỹ ka kré tag ki rĩr tĩ jẽ,” he mũ. Hã kỹ fi tóg ti mỹ: “ã mỹ ag tỹ hẽn kã tá ti va mũ vég tũ, vỹ?“ he mũ.
16 Kỹ tóg fi mỹ: “Mariaꞌ,” he mũ, fi jiji tó kỹ. Kỹ fi tóg vãhã ti ki kanhrãn mũ sir, ti tỹ fi mỹ fi jiji tó kỹ. Kỹ fi tóg ti mỹ: “RaboniA078, ã hã mỹꞌ?“ he mũ. Hebreu vĩ ki fi tóg tó mũ. Ẽg vĩ ki ẽg tóg tag to: “Senhor,” he tĩ.
17 Hã ra tóg fi mỹ: “inh vóg tũg nĩ ver,” he mũ. “Isỹ inh panh ra tãprynh ke vẽ. Inh kanhkã ag mỹ tónh tĩg nĩ, hã ra. Ag mỹ: “isỹ inh panh venh tĩg ke vẽ, hã ra tóg tỹ ãjag panh nĩ gé, he tóg,” hem nĩ. “Isỹ inh Topẽ to tãprynh ke vẽ, hã ra tóg tỹ ãjag Topẽ nĩ gé, he ti,” hem nĩ, ag mỹ,” he tóg Jesus ti, Maria Madalena fi mỹ.
18 Kỹ fi tóg tĩ mũ, ti mré mũ tĩ ag mỹ tó jé. “Ẽg Senhor ve inh,” he fi tóg mũ. Kỹ fi tóg ag mỹ tó kãn mũ sir.
Jesus tỹ ti mré mũ tĩ ag mỹ vẽnh ven
19 Kurã ẽn kã, semana ki kurã ve ẽn tỹ rãkãnh kỹ ag tóg vẽnhmãn kỹ nỹtĩ, ĩn ũ krẽm, ti mré mũ tĩ ag. Hã ra ag tóg jãnkã nĩfénh ja nĩ, save tỹ, ag tỹ ẽprã pãꞌi ag kamẽg kỹ. Hã ra Jesus tóg vãhã vẽnh ven mũ, ag kã ki, kỹ tóg ag mỹ: “mỹ sér nỹtĩm nĩ,” he mũ.
20 Kỹ tóg ag mỹ ti nĩgé nug ven mũ, ti jẽnꞌyr ti ke gé. Kỹ tóg ag mỹ sér tĩ sir, ag tỹ ẽg Senhor ven kỹ, fag mỹ ke gé.
21 Kỹ tóg ag mỹ ke mãn mũ. “Mỹ sér nỹtĩm nĩ,” he tóg. “Inh panh tỹ inh jẽnẽ vẽ. Kỹ sóg ũri ãjag jẽgnẽg mũ gé, ti tỹ inh jẽnẽ ri ke,” he tóg.
22 Tag tó kar tóg ag ki hu he mũ, ag kar ki, fag ki ke gé. Kỹ tóg fag mỹ: “Topẽ kuprĩg vỹ tỹ ãjag jagrẽ nỹtĩ ha,” he mũ.
23 “Ãjag tỹ ũ mỹ: “ã tỹ Topẽ vĩ mranh ja ẽn tỹ tóg vẽnh pãte fón mũ,” hen kỹ tóg vẽnh pãte fón kỹ nĩ nĩ. Ãjag tỹ ũ mỹ: “ã mỹ ti vẽnh pãte fón ke tũ nĩ,” hen kỹ tóg vẽnh pãte fón ke tũ nĩ,” he tóg, ti tỹ ag mỹ vẽnh ven vén kỹ.
Tomé tỹ vãhã Jesus ve
24 Hã ra Tomé vỹ ag mré nĩ ja tũ nĩ, ag tỹ Jesus vég mũ ẽn kã. Tomé ẽn vẽ, ag tỹ ũ to: “ũn vẽgni,” he mũ ẽn, Jesus mré tĩ tĩ ũ ẽn ti.
25 Ag tỹ Tomé ẽn ve kỹ ag tóg ti mỹ: “ẽg Senhor ve ẽg,” he mũ. Hã ra tóg ag mỹ: “ti nĩgé nug ve sór inh mũ, isỹ ag tỹ prégu tỹ ti nĩgé nugnón ja ẽn mẽ jé, inh nĩgé tỹ,” he mũ. “Kỹ sóg ti jẽnꞌyr ki mẽnh ke mũ gé, sỹ ti kusón ja ẽn mẽ jé. Ke tũ nĩ (mũ) ra isóg ti rĩr mãn kri nĩm ke tũ pẽ nĩ,” he tóg, Tomé ti.
26 Kurã tỹ 8 (ke) tũg kỹ ag tóg vẽnh mãn kỹ nỹtĩ gé, kỹ Tomé vỹ ag mré nĩ gé. Ðn jãnkã vỹ ki saven kỹ jẽ. Kỹ Jesus tóg ag mỹ vẽnh ven mãn mũ. Kỹ tóg ag mỹ: “mỹ sér nỹtĩm nĩ,” he mũ.
27 Kỹ tóg vẽsỹmér Tomé mỹ: “ã nĩgé tỹ inh nĩgé nugnor mẽ,” he mũ. “Ã nĩgé tỹ inh jẽnꞌyr kusón ja ẽn ti mẽ gé. Kri nĩm nĩ, to: vẽnh ó vẽ, he mãn tũg nĩ,” he tóg.
28 Kỹ Tomé tóg ti mỹ: “inh Senhor,Topẽꞌ,” he mũ.
29 Kỹ tóg ti mỹ: “vãhã ã tóg kri fi sór mũ ha, ã tỹ inh ve kỹ,” he mũ. “Ũ tỹ ti tỹ inh vég tũ ra kri nĩm mũ ẽn mỹ tóg vĩ hapẽ han ke mũ, Topẽ ti,” he tóg.
Ẽg tỹ Jesus ki ge jé vẽnh rá
30 Jesus vỹ ẽg rĩnve ẽg tỹ nén han vãnh hynhan kãn ja nĩgtĩ, nén tỹ hẽn ri ke, hã ra sóg rán kãn ja tũ nĩ.
31 Sỹ vẽnh rá tag han vẽ, ũ tỹ vég mũ kar ẽn tỹ Jesus ki ge sór jé, ti to: “Cristo vỹ tỹ ti nĩ, Topẽ kósin vỹ tỹ ti nĩ,” he jé. Kỹ ag tóg ti ki ge kỹ rĩr krỹg ja tũ ẽn venh ke mũ, ti tugrĩn, fag mré hã, mỹr, ha mẽ.
