João tỹ rá 5:1-47
5 Tag pãte Judeu ag tỹ fénhta há ũ tóg kejẽn kutẽ mũ, kỹ Jesus vỹ Jerusalém ra tĩ mũ.
2 Tá goj nig tóg nĩgtĩ, ẽmã jy ró jãnkã rã hã. Jãnkã ẽn jijin hã vỹ: carneiro jo jãnkã, he mũ. Goj ẽn pénĩn vẽnh kaga jo ĩn tỹ 5 (ke) vỹ nỹtĩ. Goj ẽn jiji hã vỹ: Betesda, he mũ.
3 Ẽn tá vẽnh kaga tỹ hẽn ri ke ag vỹ nỹtĩgtĩ, ũn kyvó ag, ũn tĩg vãnh ag, ũn grĩn grĩn kỹ nỹtĩ ag ke gé.
4 Goj tỹ vũnvũn he jãvãnh ag tóg nỹtĩ. Kejẽn Topẽ tỹ jẽnẽ jafã vỹ goj ki rã kỹ tỹ vũnvũn he tĩ. Ẽn kã ũ tỹ kã ra rã vén mũ ẽn tóg háꞌ he tĩ. Vẽnh kaga kar tỹ tóg háꞌ he tĩ, goj vũnvũn ẽn, ũ tỹ ki ge vén mũ ag kar tỹ.
5 Ẽn tá ũn kaga ũ tóg nĩgtĩ. Kaga nĩ ki tóg 38 (ke) anos han mũ.
6 Kỹ Jesus tóg tá jun kỹ ti vég mũ, ti tỹ tá nỹn kỹ. Hã ra tóg ki kanhró nĩ, ti tỹ vãsỹ tá kaga nỹ ki. Kỹ tóg ti mỹ: “ã mỹ háꞌ he sór tũ?“ he mũ.
7 Hã ra tóg ti mỹ: “vó”, hã ra tóg tũ tĩ, ũ tỹ goj kã kã inh fẽg ke ti,” he mũ. “Goj tỹ vũnvũn he kỹ ag tóg ijo kã ra ge tĩ, ijo tá jun kỹ,” he tóg.
8 Kỹ tóg: “jẽg ra, ã kỹmỹ va tĩg,” he mũ.
9 Vẽsỹmér tóg háꞌ he mũ, kỹ tóg ti kỹmỹ va tĩ mũ sir. Vẽnhkán ke kurã ki ke vẽ, Jesus tỹ ti tỹ háꞌ he mũ ti.
10 Ti tỹ vẽnhkán ke kurã ki ti kỹmỹ va tĩg kỹ pãꞌi ag tóg ti mỹ: “vẽnhkán ke kurã ki ẽg tóg nén ũ va tĩg ke tũ nĩ vẽ,” he mũ.
11 Kỹ tóg: “ũ tỹ isỹ háꞌ he mũ ẽn vỹ inh mỹ: “ã kỹmỹ va tĩg,” hé, hã kỹ sóg va tĩ mũ,” he mũ.
12 Kỹ ag tóg ti mỹ: “ũ nẽ?“ he mũ.
13 Hã ra tóg ki kagtĩg nĩ. Jesus vỹ ti tỹ háꞌ he kar tĩg ja nĩ, vẽsỹmér. E ag nỹtĩ, goj ẽn tá. Kỹ tóg ti jiji mẽ ja tũ nĩ.
14 Kar kỹ tóg Topẽ ĩn tá ti ve mãn mũ. Kỹ tóg ti mỹ: “ha vé, ã tỹ inh háꞌ hé. Topẽ vĩ mranh mãn sór tũg nĩ. Ã tỹ ti vĩ mranh mãn mũ ra ã tóg ã kaga kãfór venh ke mũ, ha vem nĩ,” he mũ.
15 Hã ra tóg tĩ mũ, pãꞌi ag mỹ ti tó jé.
16 Kỹ ag tóg ti tén sór mũ sir, ti tỹ vẽnhkán ke kurã ki ũn kaga ẽn tỹ háꞌ hen kỹ.
17 Hã ra tóg pãꞌi ag mỹ: “inh panh vỹ rãnhrãj nĩ nĩ, ẽg jóg mág ti. Kỹ sóg ver ti kóm isũ han ke mũ gé,” he mũ.
18 Kỹ ag tóg ti to jũ jagy han kỹ ti tén sór mũ sir. Vẽnhkán ke kurã ẽn ki tóg ti tỹ nén han ke tũ ẽn han ja nĩ, Judeu ag jykre tovãnh kỹ. Hã ra tóg Topẽ to: “inh panh“ he ja nĩ gé. Ti tỹ vẽso: “Topẽ ri ke inh nĩ,” he vẽ.
Jesus tỹ ti tỹ tỹ Topẽ kósin nĩ kãmén
19 Kỹ tóg ag mỹ vẽnh kãmén mũ. “Ki hã sóg tó mũ, ha mẽ. Ẽg jóg mág kósin vỹ ti pir mỹ nén ũ han ki kagtĩg nĩ. Ti panh vég ti tĩ, kỹ tóg ti tỹ ti panh ki nén vég mũ ẽn hã han tĩ. Ẽg jóg mág tỹ nén han mũ ẽn hã han tóg tĩ gé.
20 Ti kósin to tóg há tãvĩ nĩgtĩ. Hã kỹ tóg ti mỹ ti tỹ nén han mũ ẽn ven kãn mũ. Ti tỹ nén han mũ ũ ve ãjag huri. Hã ra ãjag tóg ti kãfór venh ke mũ ver, ha vem nĩ. Kỹ tóg ãjag mỹ e tĩnh mũ.
21 Ẽg jóg mág tóg ũn kãgter mũ ag rĩnrĩn mãn tĩ. Ẽn ri ke han jé tóg ke mũ gé, ti kósin ti. Ti tỹ ũn rĩn mãn sór mũ ẽn rĩn mãn jé tóg ke mũ, ha vem nĩ.
22 Kỹ ẽg jóg mág vỹ vẽnh kar jykre tugnỹm ke mũ. Hã ra tóg ti kósin mỹ tag tovãnh,
23 vẽnh kar tỹ ti to: “ũn mág vỹ tỹ ti nĩ,” he jé, ag tỹ ẽg jóg mág to: “ũn mág vỹ tỹ ti nĩ,” he mũ tag ri ke. Ũ tỹ ti kósin mỹ: “ũn mág vỹ tỹ ã nĩ,” he tũ nĩn kỹ tóg ẽg jóg mág mỹ tag tónh ke tũ nĩ gé. Ti hã vỹ ti kósin jẽnẽ ja nĩgtĩ. Inh hã vẽ, ti kósin ti,” he tóg, Jesus ti.
24 “Ãjag mỹ sóg tag tó mũ, ha mẽ. Ki hã sóg tó mũ, ha mẽ. Ũ tỹ inh vĩ jẽmẽg mũ ẽn vỹ ter ke tũ nĩ. Rĩr krỹg ja tũ ve jé tóg ke mũ, ti tỹ ũ tỹ inh jẽnẽg mũ ẽn ki rã kỹ jẽn kỹ. Ẽn to tóg jũnh ke tũ nĩ, Topẽ ti. Ti ter ke vẽ vẽ, hã ra tóg ter ke tũ nĩ.
25 Ki hã sóg tó mũ, ha mẽ. Kãnhmar ũn kãgter mũ ag vỹ Topẽ kósin vĩ mẽnh ke mũ, kỹ ũn tỹ ti vĩ mẽg mũ ag vỹ rĩnrĩr mãn ke mũ. Kakó tãvĩ ti tĩ ha, ag rĩnrĩr mãn ke kurã ti.
26 Inh panh vỹ ti pir mỹ vẽnh kar rĩnrĩr han ki kanhró nĩ. Hã ra tóg inh mỹ ti jykre tag nĩm gé, sỹ vẽnh kar rĩnrĩr han mãn jé gé, isỹ tỹ ti kósin nĩn kỹ.
27 Kỹ tóg inh mỹ: “ẽprã ke kar jykre tugnỹm nĩ,” he ja nĩgtĩ, isỹ tỹ ẽprã ke fi kósin nĩn kỹ.
28 Tag hỹn tóg ãjag mỹ e tĩ, sỹ ãjag mỹ: vẽnh kar rĩnrĩr han jé sóg ke mũ, hen kỹ. Sỹ ke há vẽ, hã ra. Kejẽn ũn kãgter mũ kar ag vỹ inh vĩ mẽnh ke mũ, kỹ ag tóg ag kej tá kãpa kãn ke mũ.
29 Kỹ ũn tỹ vẽjykre há han mũ ag vỹ, rĩnrĩr mãn kỹ, rĩr krỹg ja tũ ẽn venh ke mũ. Jãvo ũn tỹ vẽjykre pãno han mũ ag vỹ, rĩnrĩr mãn sĩ han kỹ, nũgme ki vár kãn ke mũ,” he tóg.
30 “Inh pijé isỹ vẽsóg ki nén to jykrén mũ ẽn han tĩꞌ. Inh panh tỹ inh mỹ nén tó mũ ẽn hã tó sóg tĩ, isỹ vẽnh kar jykre tugnỹm ken kỹ. Hã kỹ sóg ki hã tó tĩ,” he tóg, Jesus ti.
Ũ tỹ Jesus kãmén mũ
31 Kỹ tóg: “isỹ vẽso: ẽg jóg mág vỹ inh jẽnẽ, he mũ ra ãjag tóg inh mỹ: “ã ón nẽ,” henh ke mũ vẽ,” he mũ.
32 “Ũ vỹ iso: “Topẽ vỹ ti jẽnẽ,” he mũ. Hã ra tóg ki hã tó mũ.
33 João ki jẽmẽ sór ja ãjag tóg nĩ, hã kỹ ãjag tóg ti mỹ vẽnh vĩ jẽnẽ ja nĩgtĩ. Kỹ tóg ãjag mỹ inh kãmén há han ja nĩgtĩ.
34 Hã ra tóg inh mỹ tỹ nén ũ tũ nĩ, ẽprã ke tỹ iso: “Topẽ vỹ ti jẽnẽ,” hen kỹ. Hã ra sóg ãjag mỹ João vĩ tó mũ, ãjag tỹ ti vĩ kri fi jé, ãjag tỹ inh ki ge jé, ãjag krenkren jé,” he tóg.
35 “João vỹ ãjag mỹ néj gru ri ke ja nĩ, ãjag mỹ kurã sĩ han kỹ, ti tỹ ãjag mỹ Topẽ vĩ kãmén ja nĩn kỹ. Kỹ tóg ãjag mỹ sér tĩ ja nĩ. Hã ra tóg kurã e han ja tũ nĩ.
36 Ãjag mỹ tóg inh kãmén ja nĩ. Hã ra nén ũ vỹ inh kãmén tĩ gé, kỹ tóg João vĩ kãfór nĩ. Inh panh vỹ inh mỹ: “ẽprã ke ag tỹ nén han vãnh hynhan nĩ, milagre ti,” he ja nĩ, hã kỹ sóg hynhan tĩ. Ãjag tỹ milagre tag ven kỹ ãjag tóg inh ki kanhrãn ke mũ vẽ.
37 Kar kỹ ẽg jóg mág vỹ, inh kãmén tĩ gé. Ti vĩ jẽmẽg tũ ãjag nĩ. Kỹ ãjag tóg ti vég tũ nĩ gé.
38 Kỹ ãjag tóg ti vĩ to jykrén há han tũ nĩ gé, ãjag tỹ inh ki ge sór tũ nỹtĩn kỹ. Ti hã vỹ inh jẽnẽ.
39 Topẽ vĩ to ãjag tóg ke tĩ. Há ti nĩ. “Ẽg tỹ Topẽ vĩ rá to ken kỹ ẽg hỹn rĩr krỹg ja tũ venh ke mũ,” he ãjag tóg tĩ. Inh hã vỹ ki rán kỹ nĩ, ha mẽ. Hã kỹ ki ve há han nĩ.
40 Hã ra ãjag tóg inh ki ge sór tũ nĩ. Ãjag tỹ inh ki ge kỹ nỹtĩ ra ãjag rĩnrĩr kỹ nỹtĩnh mũ vẽ,” he tóg.
41 “Ẽprã ke ag tỹ inh mỹ vĩ há han tũ ra tóg inh mỹ tỹ nén ũ tũ nĩ.
42 Hã ra sóg ãjag jykre ki kanhró nĩ. Ãjag pijé Topẽ to há nỹtĩꞌ.
43 Ãjag mỹ sóg: “ẽg jóg mág vỹ inh jẽnẽ,” henh kãtĩg ja nĩ. Hã ra ãjag tóg inh vĩ mẽ sór tũ nỹtĩ. Ũ tóg kejẽn ãjag mré vẽmén kãtĩg ke mũ, Topẽ tỹ ti jẽnẽg tũ (hã) ra. Ẽn vĩ jẽmẽ jé ãjag ke mũ, ha vem nĩ.
44 Inh ki ge sór tũ ãjag nỹtĩ, ãjag tỹ ẽprã ke ag vĩ jẽmẽn kỹ. Ag tỹ ãjag mỹ vĩ há han kỹ tóg ãjag mỹ sér tĩ. Kỹ ãjag tóg Topẽ tỹ ãjag mỹ nén tónh ke mũ mĩ ẽkrég tũ nĩgtĩ. “Inh jykre mỹ ti mỹ há nĩ vỹ?” he sór tũ ãjag nĩ.
45 Ãjag hỹn iso: “ti hỹn ẽg to vĩ kónãn sór mũ, ẽg jóg mág mỹ,” he tĩ. Hã tũ vẽ. Ũ tỹ ãjag to vĩ kónãn ke mũ hã vỹ tỹ Moisés ti nĩ, ãjag tỹ ũ to: “ti hỹn ẽg to há tãvĩ nĩ,” he mũ ẽn ti.
46 Ãjag tỹ Moisés vĩ kri fi (hã) ra ãjag tóg inh vĩ kri finh ke mũ vẽ. Moisés vỹ iso livro han ja nĩ, ha mẽ.
47 Hã ra ãjag tóg ti vĩ rá kri fi sór tũ nĩ. Hã kỹ ãjag tóg inh vĩ kri fi sór tũ nĩ gé,” he tóg, Jesus ti, pãꞌi ag mỹ vẽnh kãmén kỹ.
