João tỹ ẽg tỹ nén venh ke mũ rá 14:1-20
14 Kỹ sóg ki ẽvãnh kỹ cordeiro ẽn ve mãn mũ. Pãnónh kri tóg jẽ nĩ, pãnónh tỹ Sião he mũ ẽn kri. Ũn e ag tóg ti mré tá nỹtĩ, ũ tỹ 144 mil (ke) ag. Cordeiro ẽn jiji tóg ag kakã ki rán kỹ nĩ, Ti jóg jiji vỹ ag ki rán kỹ nĩ gé.
2 Kỹ sóg kanhkã tá nén ũ mẽg mũ. Tỹ tóg sa krog mẽ tĩ. Tỹ tóg ta tỹ tỹrỹr he ri ke tĩ gé. Kỹ tóg tỹ ag tỹ vãkyn jafã tỹ harpa kyn ẽn ri ke tĩ gé, ti kyr ti.
3 Vẽjãn tãg tó ag tóg mũ gé, nén nẽ tỹ 4 (ke) ẽn ag rĩnve, kófa ag rĩnve ke gé, nĩgja sĩnvĩ ẽn tá. Ũ tỹ 144 mil (ke) ag vỹ Topẽ jé tãg tag tó há nỹtĩ, ẽn ag tãvĩ. Ẽprã ke ja ag vẽ. Hã ra ag tóg krenkren kỹ nỹtĩ.
4 Jãnhkri ag nỹtĩ. Ag pijé fag vóg ja nĩgtĩꞌ. Cordeiro mré ag tóg mũ ja nĩgtĩ, ag tỹ tỹ ẽprã ke ra. Ẽprã ke ag kã mĩ tóg ag kygjãm ja nĩ, cordeiro ti. Kỹ ag tóg tỹ Topẽ tũ nỹtĩ, cordeiro tũ ke gé.
5 Ag pijé ũ mỹ ón ja nĩgtĩꞌ. Kygnẽ ja tũ pẽ ag tóg nĩgtĩ.
Topẽ tỹ jẽgnẽ jafã tãgtũ ag
6 Kỹ sóg Topẽ tỹ jẽnẽ jafã ũ vég mũ gé. Kanhkã krẽm tóg tẽ tĩ mũ. Kỹ tóg Topẽ vĩ ma kãtĩ mũ. Topẽ vĩ ẽn vỹ tũꞌ henh ke tũ nĩ. Ti tỹ ẽprã ke kar ag mỹ Topẽ vĩ tónh ke vẽ, nação kar ag mỹ, povo kar mỹ ke gé, vyr mỹ vĩ nỹtĩ kar ag mỹ ke gé.
7 Kỹ tóg prẽr mũ sir. “Topẽ hã kamẽg nĩ, ti hã to: ũn mág vỹ tỹ ti nĩ, hem nĩ,” he tóg. “Ti kurã vỹ hur jun. Ẽprã ke ag jykre tugnỹm jé tóg ke mũ ha. Ũ tỹ kanhkã mré, ga han kar kỹ, goj han mũ ẽn hã mỹ: “Topẽ vỹ tỹ ã nĩ,” hem nĩ,” he tóg, Topẽ tỹ jẽnẽ jafã ẽn ti.
8 Ti nón Topẽ tỹ jẽnẽ jafã ũ tóg jun mũ gé. Kỹ tóg: “ ẽmã tỹ Babilônia vỹ kókén kỹ nỹ ha,” he mũ. “Ẽprã ke kar to tóg vãsãn ja nĩ, Babilônia to pãꞌi ti, ag tỹ ti mré ag prũ tũ fag mré nỹgnỹ jé, fag tỹ ti ri ke fag mén tũ ag mré nỹgnỹ jé. Kỹ tóg vẽnh kar tỹ ti mré vinho fã pẽ kron ri ke nĩ,” he tóg.
9 Kỹ Topẽ tỹ jẽnẽ jafã ũ tóg ag nón kãtĩ mũ gé. Ẽn vỹ prẽr kỹ: “!..ẽprã ke ũ ag tóg mĩg to: topẽ vẽ, he ja nĩgte..!“ he mũ, prẽr kỹ. “!..Ti kãgrá to ag tóg: topẽ vẽ, he ja nĩgte..! Ag kakã ki ag tóg ti rá han ja nĩgte..! Ag nĩgé pãnĩ ki ag tóg ránrán kỹ nỹtĩ gé..!” he tóg.
10 “Ẽn ag vỹ Topẽ tỹ ag to jũ jagy han venh ke mũ ha..! Kỹ tóg ag tỹ vinho kron ri ke nĩ ha..! Topẽ vỹ jũ jagy han kỹ jẽ ha..! Kỹ tóg ẽg tỹ vinho tỹ kópa fãn kỹ fẽg ẽn ri ke nĩ ha..! Ti tỹ ag to jũnh ke ti..! Topẽ tỹ vẽnh kãn kỹ jẽ to ken hã vẽ..! Ũ tỹ mĩg to: topẽ vẽ, he ja ẽn ag vỹ jagtar mág ke mũ ha..! Cordeiro rĩnve..! Pĩ ki ag tóg jagãgtar ke mũ ha..! Pó tỹ enxofre pũr nĩja ki ke gé..!” he tóg.
11 “Ag tỹ pĩ ki jagtar mũ ẽn nĩja tóg kanhkã ra tãpry mũ ha..! Tũꞌ henh ke tũ ti nĩ, pĩ ẽn ti..! Ũ tỹ mĩg to: topẽ vẽ, he mũ ẽn ag vỹ vẽnhkánkán ke tũ pẽ nĩ..! Ũ tỹ ti kãgrá to: topẽ vẽ, he mũ ẽn ag kar ti..! Ũn jiji tỹ ránrán kỹ nỹtĩ ẽn ag kar ti..!“ he tóg, prẽr kỹ, Topẽ tỹ jẽnẽ jafã ũ ẽn ti.
12 Ũ tỹ Topẽ ki ge kỹ nỹtĩ ag jé ti to krónh ke tũg. Ag jé Topẽ tovãnh tũg, ũ tỹ Topẽ vĩ kri fig mũ ag, ũ tỹ Jesus to tar nỹtĩ ag.
13 Kỹ sóg kanhkã tá vẽnh vĩ ũ mẽg mũ gé. Kỹ tóg: “tag rán nĩ, ha mẽ,” he mũ. “Ũ ag tóg ẽg Senhor ki ge kỹ nỹtĩ ki kãgter ja nĩ. Ẽn ag mỹ tóg sér tãvĩ tĩ ha,” he tóg. Kỹ Topẽ kuprĩg tóg: “hỹ,” he mũ gé. “Ag rãnhrãj kaja vég ag tóg mũgtĩ. Kỹ ag tóg ag rãnhrãj to vẽnhkán kỹ nỹtĩ ha,” he tóg.
Ẽprã ke ag vóg kónãn
14 Kỹ sóg kanhkã góg kupri vég mũ gé sir. Ũ tóg kri nĩ nĩ, tỹ tóg ẽprã ke nĩ ve nĩ. Krĩ tógfĩ tỹ ouro tóg nĩ, kỹ tóg ẽg tỹ tỹ trigo kre jafã ri ke vyn kỹ nĩ nĩ gé.
15 Kỹ Topẽ tỹ jẽnẽ jafã ũ tóg kãtĩ mũ gé, Topẽ ĩn kã tá. Kỹ tóg ũ tỹ kanhkã góg kri nĩ ẽn mỹ: “trigo kre jafã tỹ krenh tĩg nĩ,” he mũ. “Tỹ ti krenh ke kurã vẽ. Vẽnh kãn kỹ ag nỹtĩ nĩ, ẽprã ke ag,” he tóg.
16 Kỹ ũ tỹ kanhkã góg kri nĩ ẽn tóg trigo kre jafã ẽn tỹ krenh tĩ mũ.
17 Kỹ sóg Topẽ tỹ jẽnẽ jafã ũ vég mũ gé. Topẽ ĩn kã tá tóg kãkutẽ mũ. Uva kanẽ kykym jafã vyn kỹ tóg tá kãkutẽ mũ.
18 Kỹ Topẽ tỹ jẽnẽ jafã ũ tóg jun mãn mũ gé. Topẽ mỹ nén ũ pũn jafã ẽn tá tóg kãkutẽ mũ. Topẽ tỹ jẽnẽ jafã tag vỹ pĩ ki rĩr tĩgtĩ. Kỹ tóg ũ tỹ uva kanẽ kykym jafã vãg mũ ẽn mỹ: “uva kykym tĩg,” he mũ. “Ga kri ti nỹtĩ. Rã há ti nỹtĩ ha,” he tóg.
19 Kỹ tóg tĩ mũ, Topẽ tỹ jẽnẽ jafã ẽn ti. Uva kanẽ kykym tóg mũ sir. Kỹ tóg uva jẽgmĩ jafã ki ag vãm mũ, hã vỹ: Topẽ tỹ vẽnh kar to jũ, he mũ.
20 Ẽmã fyr tá tóg jẽ nĩ, uva jẽgmĩ jafã ẽn ti. Kỹ ag tóg uva jẽgmĩg mũ sir, Topẽ tỹ jẽgnẽ jafã ẽn ag. Kỹ ag tóg tá ag kyvénh kujẽg mũ, ẽprã ke ag kyvénh ti. Kỹ tóg tãra tĩ mũ, 300 (ke) quilômetros ra. Tỹ tóg goj mág nỹ ve nĩ, ag kyvénh ti.
