João tỹ ẽg tỹ nén venh ke mũ rá 21:1-27
21 Kỹ sóg kanhkã tãg vég mũ gé, ga tãg ke gé. Kanhkã ve ẽn tóg hur tũg, ga ve ẽn ke gé, goj ti ke gé.
2 Kỹ sóg Topẽ jamã tag, Jerusalém tãg tag vég mũ gé. Kanhkã tá tóg kãtére mũ, Topẽ tá. Ẽmã sĩnvĩ han ja ag tóg nĩgtĩ. Kỹ tóg tỹ ag tỹ tá vẽnh prũg to fénhta han ke nĩ ve nĩ. Ẽmã sĩnvĩ tóg ũ prũnh ke fi sĩnvĩ ri ke nĩ, fi tỹ fi mén ke ti jãvãnh kỹ.
3 Nĩgja kupri ẽn tá vẽnh vĩ tóg mẽ há tĩ, kỹ tóg: “Topẽ tỹ ẽprã ke ag mré ẽmãn hã vẽ,” he mũ. “Ag mré tóg nĩ nĩ ha. Ti tũ vỹ tỹ ag nỹtĩnh ke mũ ha. Topẽ vỹ ag mré nĩnh mũ ha, kỹ tóg tỹ ag Topẽ nĩ sir.
4 Ag kanẽ var tỹ tũꞌ he kãn jé tóg ke mũ ha. Ũ tóg ter mãn ke tũ pẽ nĩ ha. Hã kỹ ũ tóg fe kaj nĩ mãn ke tũ nĩ gé, jagtar ke tũ, kaganh ke tũ. Vẽnh ven mãn ke tũ ti nĩ ha, ẽprã vẽjykre ti,” he tóg, vẽnh vĩ ẽn ti.
5 Kỹ ũ tỹ nĩgja kupri kri nĩ ẽn tóg: “nén ũ kar han mãn jé sóg ke mũ ha,” he mũ. Kỹ tóg inh mỹ: “inh vĩ tag rán nĩ,” he mũ gé. “Sỹ ki hã tó vẽ. Vẽnh ven kãn jé tóg ke mũ, sỹ ã mỹ nén tó mũ tag ti,” he tóg.
6 Kỹ tóg: “hỹ, vẽnh ven kãn ti huri,” he mũ gé. “Ũn ve vỹ tỹ inh nĩ, kỹ sóg tỹ ẽgno nĩ gé. Isỹ nén ũ kar han to hã sóg nĩ nĩ. Kỹ sóg nén ũ kar tũg mũ ra nĩnh mũ gé. Ũ tóg goj kron sór mũ. Ẽn mỹ sóg ven tĩ, fagrĩnh mỹ. Isỹ ti mỹ goj ven mũ ẽn vỹ ti ter ke tũ han ke mũ.
7 Ũ tỹ isovãnh tũ ẽn mỹ sóg nĩm ke mũ, presente tag ti, ha mẽ: ti Topẽ vỹ tỹ inh nĩnh mũ, kỹ tóg tỹ inh kósin nĩnh mũ gé,” he tóg inh mỹ, ũ tỹ nĩgja kupri kri nĩ ẽn ti.
8 Hã ra ũ ag tóg pĩ gru fir kã ki vár ke mũ, hã vỹ: ũ tỹ isovãnh mũ ag, ũ tỹ vẽjykre pãno han tĩ ag, ũ tỹ ũ tén tĩ ag, ũ tỹ ag prũ tũ fag mré nỹgnỹ mũ ag, ũ tỹ fag mén tũ mré nỹgnỹ mũ fag, kujá ag, curandeiro ag, ũ tỹ vẽnh kãgrá jykre mĩ mũ mũ ag, ũn ón mũ ag, he mũ. Pĩ gru fir kã ki tóg ag vãm kãn ke mũ. Kỹ tóg ag kãgter pẽ han ri ke nĩ sir,” he tóg, ũ tỹ nĩgja kupri kri nĩ ẽn ti.
Jerusalém tãg
9 Kỹ Topẽ tỹ jẽnẽ jafã ũ tóg inh ki jun mũ, ũ tỹ pénky kã kã nĩ ẽn tỹ ga kri ke ag vóg kónãn mũ ẽn ag kã ũ. Inh mỹ tóg: “kunĩg,” he mũ. “Cordeiro prũnh ke fi venh kãtĩg,” he tóg inh mỹ.
10 Kỹ Topẽ kuprĩg tóg inh krĩn mũ sir. Kỹ sóg nén nẽ vég mũ. Topẽ tỹ jẽnẽ jafã ẽn tóg pãnónh téj ra inh pére tĩ mũ. Pãnónh kri jẽ kỹ tóg inh mỹ Topẽ jamã tãg ven mũ sir, Jerusalém, he mũ tag ti, ũ tỹ kanhkã tá kãtére mũ tag ti, Topẽ tá.
11 Sĩnvĩ pẽ tóg nĩ, Topẽ sĩnvĩ ẽn ri ke ti nĩ. Kókov tóg nĩ gé, pó tỹ jaspe kókov ri ke.
12 Ẽmã jy ró tóg téj gy nỹ. Vẽnh ra hã tóg téj gy jẽ gé. Ró ki jãnkã tỹ 12 (ke) vỹ nỹtĩ. Kỹ Topẽ tỹ jẽgnẽ jafã tỹ 12 (ke) ag vỹ ki rĩr nỹtĩ, jãnkã ki. Ki vẽnh jỹgji tóg ránrán kỹ nỹtĩ, Israel jógjóg ve tỹ 12 (ke) ẽn ag jygji ti.
13 Rã jur ja kã tá tóg jãnkã tãgtũ nĩ. Rã pur ja kã tá tóg jãnkã tãgtũ ũ nĩ gé. Kanhkã tãpér kã tá tóg jãnkã tãgtũ ũ nĩ gé. Kanhkã tãpér ũ kã tá tóg jãnkã tãgtũ ũ nĩ gé.
14 Pó tỹ 12 (ke) kri tóg hynhan kỹ nĩ nĩ, ẽmã ti. Pó ẽn ki vẽnh jygji tóg ránrán kỹ nỹtĩ gé, apóstolo tỹ 12 (ke) ẽn ag jygji ti, cordeiro tũ ẽn ag jygji ti.
15 Kỹ ũ tỹ inh mré vĩ mũ ẽn, Topẽ tỹ jẽnẽ jafã ẽn tóg ti kãmun jafã vyn kỹ jẽ nĩ, ti kãmun jafã tỹ ouro ti. Kỹ tóg ẽmã kãmun sór mũ, ẽmã jy ró ti, ti jãnkã ti ke gé.
16 Péno tỹ 4 (ke) ti nĩ, ẽmã ti. Kỹ ti tãpér vỹ ti téj ri ke nĩ. Kỹ Topẽ tỹ jẽnẽ jafã ẽn vỹ kãmun mũ sir, ẽmã ti, ti kãmun jafã tỹ. Quilômetro tỹ 2 mil kri 200 (ke) ti nĩ, ti tỹ téj e kỹ nỹ ki, ti tãpér ki ke gé, Vẽnh ri ke kar ti nĩ, ti kãmur ti.
17 Kỹ tóg ẽmã jy ró ẽn kãmun mũ gé. Ti tãpér vỹ metro tỹ 64 (ke) nĩ. Metro tag vỹ tỹ ẽprã ke ag kãmun jafã nĩ. Hã ra Topẽ tỹ jẽnẽ jafã vỹ kãmun mũ, ẽprã ke ag kãmun jafã tỹ.
18 Ró vỹ pó tỹ jaspe tỹ han kỹ nỹ. Kỹ ẽmã vỹ ouro tỹ han kỹ nĩ. Hã ra tóg fĩn ẽváj nĩ, vidro fĩn ẽváj ri ke.
19 Ẽmã jy ró tóg pó mág kri han kỹ nĩ. Pó ẽn to pó ũ tóg nỹtĩ gé, ũn e ag. Pó mág ũ tóg tỹ jaspe nĩ. Kỹ ũ tóg tỹ safira nĩ. Kỹ ũ tóg tỹ ágata nĩ. Jo ũ tóg tỹ esmeralda nĩ.
20 Jo ũ tóg tỹ sardônio nĩ. Jo ũ tóg tỹ sárdio nĩ. Ũ tóg tỹ crisólito nĩ. Ũ tóg tỹ berilo nĩ. Ũ tóg tỹ topázio nĩ. Ũ tóg tỹ crisópraso nĩ. Ũ tóg tỹ jacinto nĩ. Ũ tóg tỹ ametista nĩ gé. 12 (ke) ti nỹtĩ, pó mág ti.
21 Kỹ ti jãnkã tỹ 12 (ke) vỹ pérola tỹ hynhan kỹ nỹtĩ. Jãnkã pir vỹ pérola pir nĩ mỹr, ha mẽ. Kỹ ẽpry mág ẽn vỹ ouro tỹ han kỹ sa. Hã ra tóg fĩn ẽváj nĩ, vidro fĩn ẽváj ri ke.
22 Hã ra sóg Topẽ ĩn vég tũ nĩ, ẽmã ẽn tá. Topẽ vỹ vẽnh kar kri nĩ. Kỹ tóg nén ũ kar han ki kanhró nĩ gé. Topẽ hã vỹ ẽmã ẽn tá ẽmã nĩ, cordeiro ti ke gé.
23 Kỹ rã tóg tá tũ nĩ gé, kysã ke gé. Topẽ tỹ jẽngrẽ vỹ ki kurã han tĩ. Kỹ tóg tá kutyg vãnh nĩ sir. Cordeiro ẽn vỹ ẽmã ẽn tá rã ri ke nĩ.
24 Kỹ vẽnh kar tóg Topẽ tỹ ẽmã ki jẽngrẽg ẽn tugrĩn ẽvãnh há han tĩ, povo kar ag. Ẽprã pãꞌi kar ag vỹ ag tỹ nén ũ kar gé kãmũnh mũ, ag tỹ tá vin han jé.
25 Jãnkã vỹ nugnón kỹ nỹtĩ, kurã kar ki. Kutyg tũ nĩn kỹ ag tóg jãnkã nĩgfénh tũ nĩgtĩ.
26 Povo kar ag vỹ ag tỹ nén ũ gé kãmũnh ke mũ, ẽmã ẽn mĩ.
27 Hã ra nén ũ kórég vỹ kãrãnh ke tũ pẽ nĩ. Ũ tỹ vẽjykre pãno han mũ ag vỹ ra genh ke tũ nĩ, ũn ón mũ ag ke gé. Ũn jygji tỹ livro ki ránrán kỹ nỹtĩ ẽn ag hã vỹ ra genh ke mũ. Ũ tỹ rĩr krỹg ja tũ vég mũ ẽn ag jygji vỹ ránrán kỹ nỹtĩ, cordeiro livro ẽn ki.
