João tỹ ẽg tỹ nén venh ke mũ rá 22:1-21
22 Kỹ Topẽ tỹ jẽnẽ jafã tóg inh mỹ goj mág ven mũ. Goj ẽn vỹ ẽg rĩnrĩr han tĩ. Kómkóm ke ti tĩ, pó kupri fĩn ẽváj tỹ kómkóm ke ẽn ri ke. Goj ẽn nĩhỹg vỹ Topẽ nĩgja tá nĩ, cordeiro nĩgja ẽn tá.
2 Kỹ tóg ẽmã kuju mĩ tĩ mũ, ẽpry mág jagma, ẽmĩn mág ẽn jagma, goj ti. Ti fyr tá ka tóg nỹtĩ, ti fyr ũ tá ke gé. Ka kanẽ ẽn vỹ ẽg rĩnrĩr han tĩ gé. Ẽn vỹ prỹg pir ki kanẽ tỹ 12 (ke) han tĩ. Kysã kar ki tóg ti kanẽ hynhan tĩ. Ti féj vỹ tỹ vẽnh kagta kar nĩ. Vẽnh kaga kar tỹ tóg háꞌ he kãn tĩ.
3 Topẽ tỹ nén ũ to jũ vỹ tá nĩnh ke tũ pẽ nĩ, ẽmã ẽn tá.
Topẽ nĩgja vỹ ẽmã ẽn tá nĩ nĩ, cordeiro nĩgja ẽn ti. Kỹ vẽnh kar vỹ ti to: “Topẽ vẽ,” henh ke mũ, Topẽ rãnhrãj han tĩ ag kar.
4 Topẽ ve jé ag tóg ke mũ. Kỹ ti jiji vỹ ag kakã ki rán kỹ nĩnh mũ.
5 Tá tóg kutyg vãnh nĩgtĩ. Hã kỹ ag tóg tá néj grug ke tũ nĩ. Rã vỹ tá tũ nĩ gé. Topẽ vỹ ag mỹ jẽngrẽ han tĩgtĩ, ẽg pãꞌi ti. Kỹ tá nỹtĩ ag tóg tỹ pãꞌi nỹtĩnh ke mũ gé. Ag tỹ tỹ pãꞌi nỹtĩnh ke tag vỹ tũꞌ henh ke tũ pẽ nĩ.
Jesus kãtĩg mãn
6 Kỹ Topẽ tỹ jẽnẽ jafã ẽn tóg inh mỹ: “inh vĩ vỹ tỹ ki hã ke nĩ,” he mũ. “Vẽnh ó pijéꞌ,” he tóg. “Ẽg jóg tỹ Topẽ vỹ ũ tỹ ti vĩ tó tĩ ag mỹ ti kuprĩg jẽnẽ, ti tỹ ag kanhrãn jé. Hã kỹ tóg ti tỹ jẽgnẽ jafã ag kã ũ jẽnẽ, ti tỹ ti mỹ rãnhrãj tĩ ag mỹ tó jé, nén tỹ kãnhmar kutẽnh ke mũ ti,” he tóg.
7 Jesus vỹ tag tó mũ, ha mẽ. “Ha vé, inh kãtĩg mãn ke nẽ ha. Nén tỹ livro tag ki rán kỹ nĩ tag to jykrén há han nĩ. Kỹ Topẽ tóg ãjag mỹ vĩ há han ke mũ,” he tóg.
8 Tag kar ve inh, mẽ inh ke gé, inh, hã vỹ: João, he mũ. Isỹ ve kãn kar kỹ sóg ũ tỹ inh mỹ tag ven mũ ẽn krẽm mũg ke mũ, sỹ ti mỹ: “Topẽ vỹ tỹ ã nĩ,” he jé.
9 Hã ra tóg: “ke tũg nĩ,” he mũ. “Ã ri ke sóg nĩ, isỹ Topẽ rãnhrãj han kỹ. Ã régre ag ri ke sóg nĩ. Ũ tỹ Topẽ vĩ tó tĩ ag ri ke sóg nĩ. Ũ tỹ livro tag ki nén rán kỹ nĩ mẽg mũ ag ri ke sóg nĩ gé. Topẽ hã mỹ: “Topẽ vỹ tỹ ã nĩ,” hem nĩ,” he tóg, inh mỹ, Topẽ tỹ jẽnẽ jafã ti.
10 Kỹ Jesus vỹ tag tó mũ gé, ha mẽ. “livro tag ki nén rán kỹ nĩ tag péju sór tũg nĩ,” he tóg, inh mỹ. “Kakó ti nĩ ha, ãjag tỹ nén tỹ ki rán kỹ nĩ tag venh ke mũ ti.
11 Ũ tỹ vẽjykre pãno han mũ ẽn jé han kỹ nĩ nĩ. Ũ mỹn hỹn há tĩgtĩ, ti jykre kavéj ti. Ti jé ti jykre kórég hã mĩ tĩg. Ũ tóg vẽjykre kuryj han tĩ. Ti jé to tar nĩ. Ũ ag tóg tỹ Topẽ tũ nỹtĩ. Ag jé ti to krónh ke tũg,” he tóg.
12 “Ha vé, inh kãtĩg mãn ke nẽ ha. Ãjag kaja ma sóg kãtĩg ke mũ, ha vem nĩ. Vẽnh kar vỹ ve kãn ke mũ, ag tỹ nén han mũ kaja ti.
13 Topẽ vĩ kar han sóg tĩ. Ũn ve vỹ tỹ inh nĩ, ũn tỹ ẽgno vỹ tỹ inh nĩ gé. Isỹ nén kar han to hã sóg nĩ, kỹ sóg nén kar tỹ tũꞌ he mũ ra ẽgno kã nĩnh ke mũ gé,” he tóg, Jesus ti.
14 “Ũ ag tóg ag jykre kugrynh sór tĩ. Hã kỹ ag tóg ẽg tỹ ẽg kur kygfa ri ke han tĩ. Ẽn ag mỹ tóg vĩ há han ke mũ, Topẽ ti. Ka kanẽ tỹ ẽg rĩnrĩr han tĩ ẽn ko jé ag tóg ke mũ. Kỹ ag tóg ẽmã ẽn jãnkã ra genh ke mũ gé.
15 Hã ra ũ ag tóg ẽn ra genh ke tũ nĩ, hã vỹ: ũ tỹ vẽjykre pãno tỹ vẽnh kavénh tĩ ag, kujá ag, curandeiro ag, ũ tỹ ag prũ tũ fag mré nỹgnỹ mũ ag, ũ tỹ fag mén tũ ag mré nỹgnỹ mũ fag, ũ tỹ ũ tén mũ ag, ũ tỹ vẽnh kãgrá jykre mĩ mũ mũ ag, ũn ón mũ ag, ũ tỹ ũ ag lograr he mũ ag, he mũ. Ẽn ag vỹ ẽmã ẽn ra genh ke tũ pẽ nĩ,” he tóg, Jesus ti.
16 Kỹ Jesus tóg: “isỹ jẽnẽ jafã jẽnẽ inh,” he mũ, “ti tỹ ãjag mỹ ãjag tỹ nén venh ke mũ kar tó jé, ũ tỹ inh vĩ jẽmẽ jé vẽnh mãn tĩ ag kar mỹ. Davi krẽꞌkrẽ ag kã ũ ẽn vỹ tỹ inh nĩ. Krĩg mág hã sóg nĩ,” he tóg.
17 Kỹ Topẽ kuprĩg vỹ Jesus mỹ: “kur kãtĩg,” he mũ. Ũ tỹ ti ki ge kỹ nỹtĩ kar ag vỹ ti mỹ: “kur kãtĩg,” he tĩ gé, ag tỹ tỹ ti prũnh ke fi ri ke nỹtĩn kỹ.
Kỹ Jesus tóg: “ũ tỹ goj kron sór mũ ẽn jé iso kãtĩg,” he mũ, “sỹ ti mỹ goj jun jé, fagrĩnh mỹ. Goj ẽn vỹ ti rĩr han ke mũ, ha vem nĩ,” he tóg.
João tỹ ve ja
18 Vãhã sóg tag tó sór mũ, inh, hã vỹ: João, he mũ, ha mẽ. Ũ tóg kejẽn isỹ nén rán mũ tag ve kỹ pãte ũ rán mãn sór ke mũ gé, hẽn ri ke mũn. Ẽn vóg kónãn tãvĩ han jé tóg ke mũ, Topẽ ti. Kỹ tóg sỹ nén ũ jagy tó mũ ẽn ve kãn ke mũ, ha mẽ.
19 Kejẽn ũ tóg hẽn ri ke mũn isỹ nén rán mũ ũ tỹ nén ũ tũ han sór mũ. Ẽn tũ mág tỹ tóg tũꞌ henh ke mũ gé, Topẽ ti. Kỹ tóg ka kanẽ tỹ ẽg rĩnrĩr han mũ ẽn konh ke tũ nĩ. Topẽ tỹ ẽmã nĩm mũ ẽn ra tóg rãnh ke tũ nĩ gé, sỹ ẽmã kãmén mũ ẽn ra.
20 Ũ tỹ inh mỹ tag kar ven mũ ẽn vỹ: “inh kãtĩg mãn ke nẽ ha, sỹ ki hã tó vẽ,” he mũ.
Hỹ, kur kãtĩg, ẽg Senhor tỹ Jesusꞌ.
21 Ẽg Senhor tỹ Jesus jé ãjag kar tar han. Hã vẽ.
