João tỹ ẽg tỹ nén venh ke mũ rá 4:1-11
4 Kỹ sóg kynhmỹ ẽvãnh, kỹ sóg kanhkã jãnkã vé. Hã ra tóg nor kỹ jẽ nĩ. Kỹ sóg vẽnh vĩ ẽn mẽ mãn, vẽnh vĩ tỹ trombeta kyr ri ke ẽn. Kỹ tóg inh mỹ: “ha kãtãpry,” he mũ. “Ã mỹ sóg ven sór mũ, ãjag tỹ kar kỹ nén venh ke mũ ti,” he tóg, vẽnh vĩ ti.
2 Kỹ vãhã Topẽ kuprĩg tóg inh krĩn mũ. Kỹ sóg nén nẽ vég mũ. Kanhkã tá tóg nĩgja sĩnvĩ kri nĩ nĩ.
3 Ti kakã tóg jẽngrẽ nĩ, pó sĩnvĩ tỹ jaspe mré sardônio jẽngrẽ ẽn ri ke. Nĩgja sĩnvĩ ẽn vỹ ta no jẽngrẽ ri ke jẽ gé, pó tỹ esmeralda jẽngrẽ ẽn ri ke.
4 Nĩgja sĩnvĩ ẽn pénĩn nĩgja sĩnvĩ ũ tóg nỹtĩ gé. 24 (ke) ti nỹtĩ. Nĩgja ẽn kri kófa ag tóg nĩgnĩ kỹ nỹtĩ, kófa tỹ 24 (ke) ag. Kur kupri rĩnh kỹ ag tóg nỹtĩ. Ouro tỹ krĩ tógfĩn jafã rĩnh kỹ ag tóg nỹtĩ gé.
5 Nĩgja sĩnvĩ ẽn tá ta tỹ kómkóm ke ri ke ẽn tóg vẽnh ven mũ. Kỹ ta tỹ tỹrỹr he ri ke ẽn tóg mẽ há tĩ gé, vẽnh vĩ ke gé. Ti jo pĩ jónhkó gru tỹ 7 (ke) tóg nỹtĩ gé. Topẽ kuprĩg to ken hã vẽ, hã vỹ: pĩ jónhkó gru tỹ 7 (ke), he mũ.
6 Nĩgja sĩnvĩ kakãm nén ũ tóg nỹ nĩ, tỹ tóg vidro tỹ goj nĩ ve nĩ, goj jãpri, goj kókov pẽ.
Kỹ nĩgja sĩnvĩ ẽn pénĩn ũ ag tóg nỹtĩ, ũ tỹ 4 (ke) ag. Ag kakã ki ag tóg kanẽ e nỹtĩ, kar kỹ ag pãnĩ tá ke gé.
7 Ag kã mĩ ũ tóg mĩg ve ri ke nĩ. Kỹ ũ tóg monh ve ri ke nĩ gé. Kỹ ũ tóg ẽg kakã ve ri ke nĩ. Jãvo ũ tóg kónhkó mág tẽ tĩ ve ri ke nĩ.
8 Ag kar vỹ fẽr tỹ 6 (ke) nỹtĩ. Kỹ ag tóg ag fẽr ven ja ki kanẽ e nỹtĩ gé. Kurã mré kuty ki ag tóg jãn tĩ. Jãn to krónh ke vãnh ag tóg nỹtĩ. Ag jãn hã vẽ, ha mẽ: “ũn mágꞌ, mágꞌ, mágꞌ vỹ tỹ ti nĩ, ẽg jóg tỹ Topẽ ti, ũ tỹ nén kar han ki kanhró nĩ ẽn ti. Vãsỹ tóg nĩ ja nĩgtĩ. Kỹ tóg ũri nĩ gé. Kỹ tóg kãtĩg ke mũ gé,” he ag tóg tĩ, nén nẽ tỹ 4 (ke) ẽn ag.
9 Topẽ tỹ tỹ ũn mág nĩ ẽn hã tỹ ag tóg jãn tĩ. Ti mỹ vĩ há han ag tóg tĩ. Ti mỹ ag tóg: “nén kar hynhan há ã tóg nĩ,” he tĩ, ũ tỹ nĩgja sĩnvĩ kri nĩ mũ ẽn mỹ.
10 Ag tỹ ti mỹ jãn kỹ kófa tỹ 24 (ke) ẽn ag vỹ mũgmũg ke tĩ, ũ tỹ nĩgja sĩnvĩ kri nĩ ẽn krẽm. Kỹ ag tóg ti mỹ: “Topẽ vỹ tỹ ã nĩ,” he tĩ, ũn rĩr nĩ ẽn mỹ. Ti rĩr nĩ vỹ tũꞌ henh ke tũ pẽ nĩ. Kỹ ag tóg ag krĩ tógfĩ ẽn vin tĩ, nĩgja sĩnvĩ ẽn krẽm.
11 Ti mỹ ag tóg: “ẽg Senhor vỹ tỹ ã nĩ,” he mũ. “Topẽ vỹ tỹ ã nĩ. Nén ũ kar to jykrén kỹ ã tóg hynhan ja nĩgtĩ, hã kỹ tóg ki nỹtĩ, ã tỹ nén hynhan mũ kar ẽn ti. Kỹ vẽnh kar vỹ ã mỹ vĩ há han ke mũ, ã to: “ũn mág vỹ tỹ ti nĩ,” hen kỹ,” he ag tóg, kófa ag, ũ tỹ nĩgja sĩnvĩ kri nĩ ẽn mỹ.
