Hebreu ag mỹ carta 4:1-16
4 Ha vé, Topẽ tỹ ẽg vẽnhkán han sór vẽ, kanhkã tá. Kỹ ti vĩ to é he tũg nĩ. Vẽnh ki rĩr há han nĩ, ãjag tỹ to krónh ke tũ nĩn jé.
2 Mẽ ẽg huri, Topẽ tỹ ẽg mỹ nén han sór mũ ẽn ti. Ũ tỹ ga kórég mĩ mũ mũ ẽn ag tỹ mẽ ri ke han ẽg tóg huri. Hã ra ag tóg kri fi ja tũ nĩgtĩ, ag tỹ mẽg mũ ra. Hã kỹ tóg ag mỹ nén ũ há han ja tũ nĩ, Topẽ ti.
3 Ẽg tỹ ti ki ge hã kỹ ẽg tóg vẽnhkánkán ke mũ. Hã kỹ Topẽ vỹ: “ sỹ ag vẽnhkán han ke vẽ vẽ, hã ra ag tóg vẽnhkán ke tũ nĩ ha,” he ja nĩ, ag to jũ kỹ. Topẽ vỹ vãsỹ vẽnhkán ja nĩgtĩ, ti tỹ nén ũ kar hynhan kar kỹ. Kỹ nén ũ kar vỹ hynhan kỹ nỹtĩ ha.
4 Hã kỹ tóg Topẽ vĩ rán kỹ nĩn ki: “kurã tỹ 7 (ke) ki Topẽ vỹ vẽnhkán, ti rãnhrãj han kãn kar kỹ,” he mũ.
5 Hã ra tóg Israel ũ ag to: “vẽnhkánkán ke tũ ag nĩ ha,” he mũ gé.
6 Vãsỹ Topẽ tóg ẽg jógjóg ve ag mỹ ag vẽnhkánkán ke tag tó ja nĩgtĩ vẽ, hã ra ag tóg ti vĩ jẽmẽ ja tũ nĩgtĩ. Kỹ Topẽ tóg ũ ag kuprẽg ja nĩgtĩ, kỹ tóg ag hã mỹ ag vẽnhkánkán ke ti nĩm mũ sir, ẽg hã mỹ.
7 Kurã tãg nĩm ja ti nĩ gé, ẽg vẽnhkán ke to, hã vỹ: ũri, he mũ. Hã kỹ Davi tóg: “ãjag tỹ ũri ti vĩ mẽ kỹ vẽnh kutu han tũg nĩ,” he ja nĩ. Ag tỹ ga kórég ẽn tá kãpa kar kỹ ke ja vẽ, ag tỹ ga há tá junjun kar kỹ.
8 Josué vỹ Israel ag mré ga há ẽn ra tĩg ja nĩgtĩ. Hã ra ag tóg tá vẽnhkán pẽ han ja tũ nĩgtĩ ver. Hã kỹ Davi vỹ ag mỹ kurã ũ tó ja nĩ. Ag vẽnhkán pẽ han ke ẽn ti tó ja ti nĩgtĩ.
9 Ha mẽ, Topẽ povo vỹ vẽnhkán ke mũ, ha vem nĩ, ti tỹ ag mỹ kurã nĩm kỹ.
10 Ũ tỹ vég mũ vỹ ti rãnhrãj ki vẽnhkán ke mũ, Topẽ tỹ vẽnhkán mũ ẽn ri ke, kurã tỹ 7 (ke) ẽn ki.
11 Hã kỹ vãsãnsãn nĩ, ãjag tỹ tỹ prãnh ke tũ nĩ jé, ãjag tỹ ũ tỹ ga kórég mĩ mũ ja ẽn ag nón ti vĩ mranh tũ nĩ jé, ãjag tỹ ãjag vẽnhkán ke ẽn ve jé.
12 Topẽ vĩ hã tugrĩn ẽg tóg rĩnrĩr nỹtĩ. Ti vĩ hã tỹ tóg nén kar hynhan ja nĩ. Rógro jã régre vỹ nén ũ kym há nỹgtĩ. Hã ra Topẽ vĩ vỹ ti tỹ nén ũ kym há kãfór nĩ. Kỹ ti vĩ tóg ẽg ki rã tĩ, ẽg nĩ ki, ẽg kuka ki, ẽg krĩ ki, ẽg kuprĩg ti ki ke gé, ẽg há kar ki. Kỹ tóg ẽg tỹ nén to jykrén mũ kar ki kanhró nĩ. Ẽg tỹ nén han sór mũ ki kanhró kar ti nĩ gé, Topẽ ti.
13 Nén kar ki kanhró tóg nĩ. Ti tỹ nén han mũ kar ki kanhró tóg nĩ. Nén ũ tóg ti mỹ vẽnh péju kỹ nĩ tũ pẽ nĩ. Ũ tóg ti vatánh tá nén ũ han ke tũ pẽ nĩ gé. Ki kanhró kar ti nĩ, ũ tỹ ẽg jykre tugnỹm ke mũ ẽn ti.
Jesus tỹ ẽg jagfy vĩnh ke
14 Ti to tar nỹtĩm nĩ, ha mẽ. Ti ki ge kỹ ãjag nỹtĩ. Ẽg jagfy Topẽ tũ ki rĩr tĩ to pãꞌi mág vỹ nĩ nĩ, hã vỹ: Jesus, he mũ. Ẽn vỹ kanhkã tá jun huri.
15 Ti pijé ẽg krój nỹtĩ tag ki kagtĩg nĩꞌ. Ki kanhró tóg nĩ mỹr. Ẽg ri ke tóg jagtar nĩ ja nĩgtĩ gé, kỹ Japo vỹ ti tỹ Topẽ vĩ mranh han sór ja nĩgtĩ gé. Hã ra tóg inhhã mranh ja tũ nĩgtĩ.
16 Hã kỹ ẽg tóg Topẽ mré vẽmén ke mũ, jatun mỹ. Mũmẽg ke tũ ẽg tóg nĩ. Ẽg jagãgtãn jé tóg ke mũ. Kỹ tóg ẽg tar han ke mũ gé, ẽg krój nỹtĩn kỹ.
