Lucas tỹ rá 16:1-31
16 Kỹ tóg ti mré mũ tĩ ag mỹ, fag mỹ: “kejẽn ũn riko tóg nĩgtĩ,” he mũ. “Kỹ ti tũ ki rĩr tĩ tóg nĩgtĩ gé. Kejẽn ag tóg ti tũ ki rĩr tĩ ẽn to vĩ mũ. Ti lograr he mẽ ti nẽji nĩ.
2 Kỹ tóg ti mỹ: “ã tỹ han mũ mẽ inh,” he mũ. “Sỹ ã rãnhrãj tugnỹm ke vẽ. Ki rĩr mãn ke tũ ã tóg nĩ ha,” he tóg mũ.
3 Kỹ tóg to jykrén kỹ: “inh hỹn hẽ ri kenh mũ ha?” he mũ. “Inh patrão tỹ inh kutẽm kỹ inh hỹn ne konh ke mũ ha? Inh ẽpỹ jé sóg krój nĩ. Kỹ sóg vẽnh kar mỹ: “inh mỹ nén ũ nĩm, inh mỹ jãnkamy nĩm,” he sór tũ nĩ gé. Inh mỹꞌa tóg tĩ,” he tóg.
4 Kejẽn tóg: “vãhã inh ki kanhró nĩ ha,” he mũ. “Sỹ tag han kỹ ag tóg iso há nỹtĩnh mũ, kỹ ag tóg inh mỹ: “inh mré nĩnh kãtĩg,” henh ke mũ,” he tóg.
5 Kỹ tóg ũ tỹ ti patrão mỹ néve nỹtĩ ẽn ag jé prẽr kãn mũ sir. Kỹ tóg ũ mỹ: “ã néve tỹ hẽ ri ke nĩ?” he mũ.
6 Kỹ tóg ti mỹ: “azeite lata tỹ 100 (ke) ki inh néve jẽ,” he mũ. Kỹ tóg ti mỹ: “hỹn, ã vẽnh rán ti, sỹ ã mỹ ã néve térem kỹ 50 (ke) rán jé,” he mũ.
7 Kỹ tóg ũ mỹ: “jo ã?” he mũ gé. Kỹ tóg ti mỹ: “trigo sako tỹ 100 (ke) vẽ,” he mũ. Kỹ tóg ti mỹ: “hỹn, ã vẽnh rán ti, sỹ ã mỹ térem kỹ 80 (ke) rán jé,” he mũ gé.
8 Kỹ ti patrão tóg mẽg mũ. Kỹ tóg ti mỹ: “jykre mẽ ã tóg nĩ, kỹ ã tóg ũ tỹ hẽn ri ke tỹ ã to há nĩ han, ã tỹ ag mỹ ag néve rem kỹ,” he mũ,” he tóg.
“Kỹ hã vẽ. Ũ tỹ inh ki ge tũ ag vỹ ag tũ to jykrén há han tĩ, inhhã, ha mẽ. Tỹ ag ẽprã ke nỹtĩ, hã kỹ ag tóg tag ki nén to jykrén há han tĩ, ũ tỹ inh ki ge kỹ nỹtĩ ag kãfór,” he tóg.
9 “Hã kỹ sóg ãjag mỹ tó mũ. Ãjag tũ tỹ vẽnh kãpãm nĩ, Kỹ ag tóg ãjag to há nỹtĩnh mũ. Kejẽn ãjag tóg ãjag tũ ré kỹ mũnh mũ. Ẽn kã ãjag tóg mũ há han ke mũ gé. Kanhkã tá ag tóg ãjag mỹ: kunĩg, henh ke mũ.
10 Ũ tỹ nén ũ sĩ ki rĩr há han kỹ tóg nén ũ ki rĩr há han kãn ke mũ gé. Jãvo ũ tỹ nén ũ sĩ ki rĩr kónãn kỹ tóg nén ũ ki rĩr kónãn kãn ke mũ gé sir.
11 Ẽg tỹ ga kri nén vég mũ vỹ kãnhmar tũꞌ henh ke mũ. Ãjag tỹ hã ra ga kri ãjag tũ ki rĩr há han tũ nĩn kỹ ãjag tóg kanhkã tỹ tỹ nén ũ tũ nỹtĩnh mũ gé.
12 Ãjag tỹ ẽprã nén vég mũ vỹ tỹ Topẽ tũ nĩ. Ti hã mỹ ãjag tóg ki rĩr ke mũ. Ãjag tỹ ti tũ ki rĩr há han tũ nĩn kỹ tóg sir ãjag mỹ ãjag tũ pẽ ẽn nĩm ke tũ nĩ gé, kanhkã tá,” he tóg, Jesus ti.
Ẽg jagrẽ régre
13 “Ã jagrẽ régre nĩn kỹ tóg vẽnh mỹ tĩ. Ã tỹ Topẽ hã tỹ jagrẽ nĩn kỹ jãnkamy tãn ẽn tỹ jagrẽ nĩ sór tũg nĩ. Ã tỹ jãnkamy e ve sór kỹ ti hã vỹ tỹ ã jagrẽ nĩnh mũ. Kỹ ã tóg Topẽ tỹ ã mỹ nén tó mũ ẽn to jykrén há han ke tũ nĩ, ha vem nĩ,” he tóg, Jesus ti.
Topẽ jykre
14 Hã ra Fariseu ag tóg mẽg mũ. Jãnkamy mág hã to ag tóg há nỹtĩ. Hã kỹ ag tóg ag tỹ Jesus vĩ mẽ kỹ ti to é he mũ.
15 Hã ra tóg ag mỹ: “ẽprã ke ag mỹ ãjag tóg tỹ ũn jykre há nỹtĩ ve nĩ,” he mũ. “Hã ra Topẽ vỹ ãjag tỹ nén to jykrén mũ ẽn vég nĩ, ti mỹ ãjag tóg kavéj nỹtĩ,” he tóg. “Ẽprã ke mỹ nén sĩnvĩ nĩ ve tóg Topẽ mỹ kórég nĩ,” he tóg.
16 “Moisés tỹ ẽg mỹ Topẽ vĩ tó ja ẽn vỹ João tá krỹg, vãsỹ Topẽ vĩ tó tĩ ag tỹ ẽg mỹ nén tó ja kar ẽn ti. João tá jun kỹ vẽjykre tãg vẽ sir, hã vỹ: Topẽ tỹ tỹ ẽg pãꞌi nĩ, he mũ. Kỹ ũ tỹ hẽn ri ke ag tóg vãsãnsãn tĩ, ag tỹ ve jé.
17 Hã ra Topẽ jykre si ẽn tóg tũꞌ henh ke tũ nĩ gé, Moisés tỹ ẽg mỹ nén tó mũ ẽn ti. Ga vỹ tũꞌ henh ke mũ, kanhkã ti ke gé. Jãvo Topẽ jykre vỹ tũꞌ henh ke tũ nĩ,” he tóg.
18 “Ẽg prũg kỹ tóg ge nĩ, ha mẽ. Ã tỹ ã prũ fi fón kar kỹ ũ fi tỹ prũg mãn kỹ ã prũ tũ fi vẽ sir. Kỹ ã tỹ ã prũ fi fón kar kỹ ũ tỹ fi tỹ prũg mãn kỹ fi mén tũ vẽ gé sir,” he tóg, Jesus ti.
Ũ tỹ Topẽ vĩ mẽ jãvãnh ag tỹ nũgme ki vár ke
19 Kỹ tóg ag mỹ: “kejẽn ũ tóg nĩgtĩ, ũn riko pẽ,” he mũ. “Kur kaja e tu ti tĩgtĩ, kur hapẽ. Kurã kar ki tóg vẽjẽn há ko tĩ. Fénhta ri ke han tóg tĩ, kurã kar ki.
20 Kỹ ũn jagtar tóg nĩgtĩ gé. Ti jiji hã vỹ: Lázaro, he mũ. Vẽnh kaga fugfo han vãnh ẽn han kỹ tóg nĩ, kỹ tóg nỹ nĩ, ũn riko ẽn ĩn jãnkã kã.
21 Ẽn vỹ kókĩr tĩgtĩ, ti kaga to. Kỹ tóg ũn riko jẽn vár ko sór tĩgtĩ, hã ra tóg ti mỹ nĩm tũg tĩ. Kasor hã ne ti pénĩn e nỹtĩ. Vẽnh fugfo han vãnh ẽn tugmãg ag tóg tĩ.
22 Kejẽn tóg ter mũ, ũn jagtar ẽn ti. Kỹ Topẽ tỹ jẽgnẽ jafã ag vỹ ti va mũ mũ, ti kuprĩg ti, kanhkã ra. Tá Abraão tóg nĩ nĩ, ẽg jógꞌ jóg ve ti, kỹ tóg ti mré nĩ nĩ sir, ti tỹ tỹ ti krẽꞌkrẽ nĩn kỹ.
Kar ũn riko tóg ter mũ gé sir. Kỹ ag tóg ga kã tá ti péju mũ.
23 Hã ra tóg nũgme ki kutẽ mũ, ti kuprĩg ti. Inferno tá ti vẽsỹrénh jagy han mũ sir. Kejẽn tóg kanhkã ki ẽvãnh mũ, kỹ tóg tá Abraão vég mũ, Lázaro ke gé, kuvar há tá.
24 Kỹ tóg ag mỹ prẽr mũ. “!..Ijógꞌ..! !..Abraãoꞌ..!” he tóg. “!..Ijagãgtãn ra..!” he tóg. “Lázaro jẽnẽ ra, ti tỹ ti nĩjuja junun mrãn kỹ inh nũnẽ mrãn sĩ han jé. Inh mỹ tóg rỹjgy tãvĩ tĩ, pĩ kã ki,” he tóg.
25 Kỹ Abraão tóg ti mỹ: “inh kósin,” he mũ. “Ã tỹ ga kri tĩ ja ẽn ki ẽkré. Tá ã tóg há tĩ ja nĩgtĩ, jãvo Lázaro tóg jagtar ja nĩgtĩ. Kỹ tóg tag ki há tĩ nĩ, jo ã tóg vẽsỹrénh jẽ nĩ, ã tỹ ti jagãgtãn ja tũ nĩn kỹ.
26 Kỹ ẽg kuju ki tóg tỹ kãgnó nĩ, kỹ ũ tóg pãte rẽg ke tũ nĩ. Tag ki ke pijé ẽn ra tĩg mũꞌ, ẽn tá ke pijé tag ra kãtĩg mũ géꞌ, kãgnó tag tugrĩnꞌ,” he tóg.
27 Kỹ ũn riko ja tóg ti mỹ: “kỹ sóg ã mỹ nén ũ tó sór mũ, ha mẽ,” he mũ. “Ã mỹ inh jóg ĩn ra Lazaro jẽnẽnh ke tũ? Tá inh mré ke ag vỹ nỹtĩ.
28 5 (ke) ag nỹtĩ, inh mré pygfa ja ag. Ti tỹ ag mỹ tónh tĩg jé, ag tỹ tag ki junjun tũ nĩ jé, ag tỹ inh mré vẽsỹrénh tũ nĩ jé,” he tóg.
29 Kỹ Abraão tóg ti mỹ: “vó, tá ag tóg Moisés tỹ ẽg mỹ nén tó ja ẽn mẽnh mũ, Topẽ vĩ tó tĩ kar ag vĩ ke gé. Hã kỹ ag tóg Topẽ vĩ jẽmẽnh mũ, ag tỹ mẽ sór kỹ,” he mũ.
30 Hã ra tóg: “vó, vẽser tỹ ag tá jun kỹ ag tóg jẽmẽ há han ke mũ vẽ, kỹ ag tóg ag jykre pãno ẽn tovãnh ke mũ vẽ,” he mũ.
31 Hã ra tóg: “vó, ag tỹ Moisés vĩ jẽmẽ sór tũ nĩn kỹ ag tóg vẽser vĩ mẽnh ke tũ nĩ gé, ag tỹ Topẽ vĩ tó tĩ ag vĩ mẽ jãvãnh nỹtĩn kỹ,” he mũ, Abraão ti, ũn riko ja ẽn mỹ,” he tóg, Jesus ti.
