Lucas tỹ rá 20:1-47
20 Kurã kar ki tóg Topẽ vĩ tó jẽ nĩ, vẽnh vĩ sér ẽn, Topẽ ĩn krẽm. Kejẽn Topẽ tũ to pãꞌi ag tóg ti to kãmũ mũ, kófa ag ke gé.
2 Ti mỹ ag tóg: “ẽg tỹ ã ki jẽmẽnh há tóg tĩ,” he mũ. “Ã vẽjykre tỹ ne tỹ tag han tĩꞌ? Ũ nỹ ã jẽnẽ?“ he ag tóg.
3 Kỹ tóg ag mỹ: “ãjag ki sóg jẽmẽnh ke mũ gé, vẽnh kato,” he mũ.
4 “João vỹ ag kygpég tĩ ja nĩgtĩ. Kỹ ti mỹ kanhkã tá vẽjykre hanꞌ, ẽprã vẽjykre vóꞌ?“ he tóg. “Ũ nỹ ti jẽnẽ? Inh mỹ tó,” he tóg.
5 Kỹ ag tóg jagnẽ mré to jykrén mũ sir. “Ẽg tỹ ti mỹ: Topẽ tỹ ti jẽnẽ vẽ, hen kỹ tóg ẽg mỹ: ãjag tỹ ne jé ti vĩ kri fi ja tũ nĩ nẽ? henh ke mũ,” he ag tóg.
6 “Ẽg tỹ hã ra ti mỹ: ẽprã ke jykre ja vẽ, hen kỹ vẽnh kar vỹ ẽg pin sór ke mũ, pó tỹ, ha vem nĩ. João to ag tóg: Topẽ vĩ tó tĩ pẽ ja vẽ, he tĩ, hã kỹ ag tóg ẽg to jũnh ke mũ,” he ag tóg.
7 “Topẽ jykre han ja ti nĩ,” he sór tũ ag nĩ, kỹ ag tóg: “ẽprã vẽjykre han ja ti nĩ,” he sór tũ nĩ gé. Hã kỹ ag tóg ti mỹ: “ẽg pijé ki kanhró nỹtĩꞌ,” he mũ.
8 Kỹ Jesus tóg ag mỹ: “kỹ sóg ãjag mỹ ũ tỹ ijẽnẽg mũ tónh ke tũ nĩ gé,” he mũ.
Ũn camarada kórég ag
9 Kỹ tóg vẽnh kar mỹ: “ẽg tỹ Topẽ kato tẽ kỹ tóg ge nỹnh mũ, ha mẽ,” he mũ. “Kejẽn ũ tóg uva krãn ja nĩ, tỹ vinho han jafã ẽn. Kỹ tóg ũ tỹ ki rĩr tĩ ag mré to jykrén kỹ ag mỹ tovãnh mũ sir. Kar tóg ga ũ ra tĩ mũ. Hã ra tóg kãtĩg vãnh han mũ.
10 Uva ẽn kanẽn kỹ tóg ag mỹ ti camarada ũ jẽnẽg mũ, ũ tỹ ki rĩr tĩ ag mỹ, ag tỹ ti mỹ ti tũ jẽnẽ jé, ẽkré kanẽ ẽn ti. Hã ra ag tóg ti mỹ vin tũg mũ. Ti mrãnmrãn ag tóg mũ. Kỹ ag tóg ti mỹ: “ha tĩg, nén ũ mãg mẽ kã ã tóg vỹn kenh mũ,” he mũ.
11 Kỹ tóg ti camarada ũ jẽnẽ mãn mũ gé sir. Hã ra ag tóg ti mrãnmrãn mũ gé. Ti mỹ féfén kar kỹ ag tóg ti mỹ: “ha tĩg, nén ũ mãg mẽ kã ã tóg vỹn kenh ke mũ,” he mũ gé sir.
12 Kỹ tóg ag mỹ ũ jẽnẽ mãn mũ gé sir, hã ra ag tóg ti mrãnmrãn kỹ ti rỹnhrỹnh kỹ ti tĩn mũ gé sir.
13 Kỹ uva kré tỹ tũn mũ tóg to jykrén mũ. “Inh hỹn hẽn ri kenh ha,” he tóg. “Inh kósin jẽnẽ jé sóg ke mũ ha, inh fe pẽ ẽn, hẽn ri ke mũn ag tóg ti kamẽg ke mũ,” he tóg.
14 Ti kósin tỹ ag tá jun kỹ nén kré ki rĩr tĩ ag tóg ti vég mũ. Kỹ ag tóg ti to jykrén mũ, jagnẽ mré. “Kejẽn ẽkré tag vỹ tỹ ti tũ nỹnh mũ,” he ag tóg. “Mũ nỹ, ti tén jé, ti tũ tag tỹ tỹ ẽg tũ nỹn jé,” he ag tóg.
15 Kỹ ag tóg ró mã ra ti pére mũ kỹ tá ti tén mũ sir. Kỹn hỹn hẽ ri kenh ke mũꞌ, ẽkré tỹ tũn mũ ẽn tiꞌ?“ he tóg,
16 “Kãtĩg jé tóg ke mũ, ẽkré ki rĩr tĩ ag kãgtén jé. Kỹ tóg camarada ũ ag mỹ finh mũ sir, ti jakré ti,” he tóg.
Kỹ ag tóg mẽg mũ, ti vĩ ti. Kỹ tóg ag mỹ e tĩ. “Ẽg jé hã ra tag vég tũ nĩgtĩ,” he ag tóg mũ.
17 Hã ra tóg ag ki ẽvãnh kỹ ag mỹ: “Topẽ vĩ rá tag to jykrén nĩ, ha mẽ,” he mũ. “Pó fón ag tóg, pó tỹ ĩn han tĩ ag. Ag mỹ tóg kórég ja nĩ. Hã ra Topẽ tóg pó ẽn hã tỹ ĩn nũna han mũ,” he tóg.
18 Ũ tỹ hẽn ri ke ag vỹ pó tag kri vár ke mũ, kỹ ag tóg kri vár kỹ tũꞌ henh ke mũ. Kỹ pó tag vỹ ũ tỹ hẽn ri ke ag kri kutẽnh ke mũ gé, kỹ tóg ag tỹ nám nám ke kãn mũ sir, ag kri kutẽ kỹ,” he tóg, Topẽ vĩ tỹ rán kỹ nĩ ki,” he tóg, Jesus ti.
Ẽg tỹ imposto kajãm
19 Kỹ Topẽ tũ to pãꞌi ag vỹ ti vĩ mẽg mũ. Kỹ ag tóg: “ẽg hã to tóg kãmén ja nĩ, ẽg tỹ Topẽ kato vãsãn tag vỹ ge nỹnh mũ, he mũ ẽn ti,” he mũ. Hã kỹ ag tóg ti se sór mũ. Hã ra ag tóg vẽnh e ẽn kamẽg mũ.
20 Kỹ ag tóg hã ra ti tỹ rĩr mũ. Ti to ag tóg vãjig mũ, ag tỹ ti vĩ to fóg tỹ pãꞌi mỹ: “ha ti vóg kónãn,” he jé. Hã jé ag tóg ũn jykre kuryj nỹtĩ ve ag jẽgnẽg mũ, ag tỹ Jesus ki jẽmẽ jé.
21 Kỹ ag tóg ón kỹ Jesus mỹ: “Senhorꞌ,” he mũ. “Vẽjykre kuryj hã tó ã tóg tĩ, hã kãmén ã tóg tĩ. Hã kỹ ẽprã ke ag ve tóg ã mỹ tỹ nén ũ tũ nĩ. Hã kỹ ã tóg Topẽ japry to ẽg kanhrãn há han tĩ,” he ag tóg.
22 “Kỹn mỹ há nỹ, ẽg tỹ fóg tỹ pãꞌi mág tỹ imperador mỹ jãnkamy nĩm ti, imposto kajãm jé? Ẽg mỹ hỹn nĩm mũꞌ, nĩm ke tũ nĩ vó?“ he ag tóg.
23 Hã ra tóg ag jykre régre nỹtĩn ki kanhró nĩ. Hã kỹ tóg ag mỹ: “ãjag ne tóg ón kỹ inh ki jẽmẽ sór mũꞌ,” he mũ.
24 “Inh mỹ jãnkamy ven. Ũ jiji nỹ kã nĩ? Ũ kãgrá nỹ kã nĩ?“ he tóg. Kỹ ag tóg ti mỹ: “pãꞌi mág kãgrá vẽ,” he mũ.
25 Kỹ tóg ag mỹ: “kỹ pãꞌi mág mỹ ti tũ nĩm, jo Topẽ mỹ ti tũ nĩm gé,” he mũ.
26 Hã kỹ ag tỹ ne to ti senh ke tóg tũ tĩ, ti vĩ há han tĩn kỹ. Kỹ tóg ag mỹ e tĩ. Vẽnh kar vỹ ti vĩ mẽg nỹtĩ nĩ. Kỹ ag tóg ti mỹ vĩ mãn tũ nĩ sir.
Ũn kãgter mũ ag tỹ rĩnrĩr mãn ke
27 Kỹ Saduceu ag tóg ti tá junjun mũ gé, ti ki jẽmẽ jé. Hã ra Saduceu ag tóg: “ẽg ter ja tá ẽg tóg vỹn ke mãn ke tũ nĩ. Rĩr mãn ke tũ ẽg tóg nĩ,” he tĩ.
28 Ẽn ag vỹ ón kỹ Jesus ki jẽmẽ sór mũ gé. Kỹ ag tóg ti mỹ: “Senhorꞌ,” he mũ gé. “Moisés vỹ ẽg mỹ vẽjykre tag nĩm, hã vỹ: ã régre tỹ ti krẽ tũ ra ter kỹ ã tỹ ti prũ fi tỹ prũg ke vẽ, he mũ. Ã tỹ ã régre mỹ ã krẽ han ke vẽ, fi ki, he tóg mũ,” he ag tóg.
29 “Kỹ ũ tỹ jagnẽ mré pafa ja tỹ 7 (ke) ag vỹ nỹtĩgtĩ. Ag kãke vỹ prũg mũ, hã ra tóg ti kósin tũ ra ter mũ.
30 Kỹ ti jãvy vỹ fi tỹ prũg mũ sir, hã ra tóg ti kósin tũ ra ter mũ gé.
31 Kỹ ti jãvy ũ tóg fi tỹ prũg mũ gé, hã ra tóg ter mũ gé, ti kósin tũ ra. Gen kỹ ag tóg kãgter kãn mũ kejẽn, ũ tỹ 7 (ke) ẽn ag.
32 Kỹ vãhã ag prũ fi vỹ ter mũ gé sir.
33 Kỹ fag tỹ fag kãgter ja tá rĩnrĩr mãn kỹ fi hỹn mén tỹ 7 (ke) nĩnh mũ vẽ. Ag kar vỹ fi tỹ prũg ja nỹtĩgtĩ. Hã kỹ tóg vẽnh mỹ nỹ, ag tỹ: “rĩnrĩr mãn jé ẽg tóg ke mũ,” hen kỹ,” he ag tóg.
34 Kỹ tóg ag mỹ: “ẽprã ke ag vỹ kyprũg tĩ, kỹ fag vỹ ag tỹ mén tĩ gé,” he mũ.
35 “Ag kã ũ ag tóg ag kãgter ja tá rĩnrĩr mãn ke mũ, ti kurã tá krỹg kỹ. Ẽn ag vỹ prũg mãn ke tũ nĩ sir, mén mãn ke tũ fag tóg nĩ gé sir, rĩnrĩr mãn kỹ.
36 Ter mãn ke tũ ag tóg nĩ gé, mỹr, ha mẽ. Hã kỹ ag prũg mãn ke tũ nĩ. Kỹ fag mén mãn ke tũ nĩ gé. Topẽ tỹ jẽgnẽ jafã ag ri ke fag nỹtĩnh mũ. Topẽ krẽ vỹ tỹ fag nỹtĩ sir, fag tỹ fag kãgter ja tá rĩnrĩr mãn kỹ.
37 Rĩnrĩr mãn jé ag tóg ke mũ, ũn kãgter mũ ag, ha vem nĩ. Hã kỹ Moisés tóg Topẽ to tag tó ja nĩ, ha mẽ. Ti tỹ vãnh pũr nĩ ẽn tá ti mré vẽmén kar kỹ tóg Topẽ to: “Abraão mré Isaque mré Jacó ag tỹ ũn to: Topẽ, he mũ ẽn vẽ,” he ja nĩ.
38 Kãgter ag huri, Abraão, Isaque, Jacó, hã ra Moisés tóg Topẽ to: “Abraão tỹ ũn to: Topẽ, he mũ ẽn vẽ,” he ja nĩ. Ti tỹ tỹ ag Topẽ nĩn kỹ ag tóg rĩnrĩr nỹtĩ, ha mẽ, ag kãgter mũ ra. Ũn kãgter mũ ag kar vỹ Topẽ mỹ rĩnrĩr nỹtĩ,” he tóg, Jesus ti.
39 Kỹ ũ tỹ Topẽ vĩ rán tĩ ũ ag tóg ti mỹ: “vĩ há han ã, ẽg tỹ ẽg ter ja tá vỹn kenh ke mũ tag to,” he mũ.
40 Kỹ ũ tóg ti ki jẽmẽ mãn sór tũ nĩ sir. Ti kamẽg ag tóg mũ. Hã kỹ ag tóg ti ki jẽmẽ mãn sór tũ nĩ ha.
Cristo mỹ tỹ ẽprã ke nĩ, Topẽ kósin mỹ vó
41 Kỹ Jesus tóg ag ki jẽmẽg mũ gé sir. Kỹ tóg ag mỹ: “Topẽ vĩ rán tĩ ag ne tóg: “Cristo vỹ tỹ Davi krẽꞌkrẽ nĩ,” he tĩ,” he mũ.
42 “Hã ra Davi tóg Cristo tó ja nĩ, ti tỹ Topẽ mỹ jãn kỹ. Kỹ tóg: “ẽg jóg mág tỹ Topẽ vỹ inh Senhor mỹ: “nĩ ra ver, inh pẽgja tá,” he ja nĩ.
43 “Isỹ ã kato vãsãnsãn mũ ag tỹ ã krẽm ag vin ke vẽ, kỹ ag sigse ri ke vẽ sir. Tag jãvãnh nĩ ver,” he ja ti nĩ, Topẽ ti, he ja tóg nĩ, Davi ti,” he tóg, Jesus ti.
44 “Hã kỹ Davi tóg Cristo to: “inh Senhor,” he ja nĩgtĩ. Kỹ ti krẽꞌkrẽ mỹ tỹ ti kri ke nĩ nĩꞌ?“ he tóg mũ.
Hã ra ti kato tẽ ag tỹ ne tónh ke tóg tũ tĩ.
Ón kỹ Topẽ vĩ tó tĩ ag kamẽg jé ẽg ke mũ
45 Vẽnh kar tóg mẽg mũ, Jesus vĩ ti. Kỹ tóg ti mré mũ tĩ ag mỹ:
46 “ón kỹ Topẽ vĩ to ẽg kanhrãn tĩ ag kamẽg nĩ,” he mũ. “Kur téj rĩg ag tóg tĩ,” he tóg. Kỹ tóg vẽnh kar tỹ ag mỹ: “ã mỹ há?“ he kỹ ag mỹ sér tĩgtĩ, ag tỹ ẽmã kuju kã mĩ mũn kỹ. Vẽnh kanhrãn jafã krẽm ag tóg vẽnh kãpãm kỹ nỹtĩgtĩ. Fénhta ki ag tóg jẽn vén tĩ, ag tỹ tỹ pãꞌi nỹtĩn kỹ,” he tóg.
47 “Hã ra ag tóg ũn mén ter ja fag tũ mãn kãn tĩ. Kar kỹ ag tóg ón kỹ Topẽ mré vĩ mág han mũgtĩ, ẽg tỹ ag to: “ũn há vỹ tỹ ag nỹtĩ,” he jé. Hã to ag vẽsỹrénh mág tãvĩ han ke mũ,” he tóg, Jesus ti.
