Lucas tỹ rá 9:1-62
9 Kỹ tóg ũ tỹ 12 (ke) ẽn ag jé prẽr mũ. Ag vẽnh mãn kỹ tóg ag tar han mũ sir, ag tỹ vẽjagrẽ kórég pan jé, ag tỹ ũn kagyga ag tỹ háꞌ he jé gé.
2 Kỹ tóg ag jẽgnẽg mũ sir, ag tỹ vẽnh kar mỹ Topẽ tỹ tỹ ẽg pãꞌi nĩ ẽn kãmén jé, ag tỹ ũn kagyga ag tỹ háꞌ he jé gé.
3 Hã kỹ tóg ag mỹ: “ãjag mũn kỹ nén ũ ma mũ tũg nĩ. Vãtó va mũ tũg nĩ, sako ke gé, ẽmĩ ke gé, jãnkamy ke gé. Kur régre rĩnh tũg nĩ gé,” he mũ.
4 “Ãjag tỹ ĩn ra ge mũ hã ki nũgnũrꞌ hem nĩ, hã ki ãjag tỹ kurã ki kãpanh ke tá krỹg nĩ,” he tóg.
5 “Ag tỹ ãjag mỹ: “kãge jẽg ra,” he jãvãnh nỹtĩn kỹ tá kãpam nĩ. Tá kãpa kỹ ãjag pẽn hã kykũkũnh nĩ, ag tỹ to ki kanhró nỹtĩ jé sir, Topẽ tỹ ag tovãnh ken ki,” he tóg.
6 Kỹ ag tóg mũ mũ sir. Ẽmã kar mĩ ag tóg mũ mũ. Topẽ kãmén ag tóg mũ mũ sir. Ũn kagyga ag tỹ háꞌ he ag tóg mũ gé sir, fag ke gé.
Jesus kãme tỹ pãꞌi tỹ Herodes mỹ e
7 Kỹ pãꞌi mág tỹ Herodes vỹ ti tỹ nén han mũ mẽg mũ sir. Kỹ tóg ti mỹ e tĩ. Ti tỹ to jykrén tũ tóg tĩ. Hã ra ũ ag tóg ti to: “João Batista vẽ,” he tĩ. “João hỹn ti ter kar kỹ rĩr mãn,” he ag tóg tĩ.
8 Jo ũ ag tóg ti to: “Elias vẽ, vãsỹ Topẽ vĩ tó tĩ ẽn hỹn vẽnh ven mãn,” he tĩ gé. Kỹ ũ ag tóg ti to: “vãsỹ Topẽ vĩ tó tĩ ũ hỹn rĩr mãn,” he tĩ gé.
9 Hã mẽg tóg, Herodes ti, kỹ tóg: “João mỹ vó?” he mũ.“Hã ra sóg João krĩ kym. Kỹ ũ nẽ, hỹnꞌ? Nén han vãnh tỹ hẽn ri ke hynhan tóg huri,” he tóg. Kỹ tóg kejẽn ti ve sór mũ, hã ra Jesus vỹ ti venh tĩ tũ nĩ.
Jesus tỹ ũ tỹ 5 mil (ke) ag jẽn
10 Kejẽn Jesus tỹ ũn vin mũ ag vỹ ti to vỹnvỹn ke mũ, ti tỹ ag jẽgnẽ ja ẽn tá. Ti mỹ ag tóg kãmén mũ sir. Kỹ tóg ag mré vẽnh péju kỹ tĩ mũ, ẽmã tỹ Betsaida ra, vyr mỹ ag mré vẽmén jé.
11 Hã ra ũn e ẽn ag tóg mẽg mũ, kỹ ag tóg ti nón mũ mũ. Ag tỹ ti pétẽm kỹ tóg ag mỹ vĩ há han mũ. Ag mỹ tóg Topẽ tỹ tỹ ẽg pãꞌi nĩnh ke kãmén mũ. Kỹ tóg ag kã mĩ ũn kagyga tỹ háꞌ he mũ gé, fag mré hã.
12 Ti tỹ ag mỹ tó jẽ ki tóg rãké nỹ sir, kỹ ũ tỹ 12 (ke) ag tóg ti mỹ: “ã tỹ ag jẽgnẽnh há tóg tĩ, ag tỹ ẽmã kar mĩ vẽjẽn kũmpra he jé, tá nũgnũr jé ke gé. Tag ki tóg ẽmã tũ nĩ,” he mũ.
13 Hã ra tóg: “ha inhhã ag jẽn,” he mũ. Kỹ ag tóg: “hã ra ẽmĩ tỹ 5 (ke) hã vỹ ki nỹtĩ, pirã régre mré ke gé. Ẽg mỹ ag mỹ kũmpra henh mũnh mũ vó, vẽjẽn ti?” he ag tóg, Jesus mỹ.
14 Ũ tỹ 5 mil (ke) ag vẽ mỹr, ag tãvĩ, fag mré tó tũ ra. Hã ra fag tóg tá e nỹtĩ gé, gĩr mré ke gé.
Kỹ Jesus tóg ag mỹ: “ag mỹ tugtó, ag nĩgnĩ jé,” he mũ. “Ũ tỹ 50 (ke) ag tỹ vyr mỹ vẽnh mãn kỹ nĩ nĩ he jé,” he tóg.
15 Kỹ vẽnh kar tóg nĩgnĩ mũ sir.
16 Kỹ tóg ẽmĩ tỹ 5 (ke) ẽn gég mũ, pirã régre ẽn mré. Kỹ tóg, kanhkã ki ẽvãnh kỹ Topẽ mré vĩ mũ sir. Kỹ tóg ẽmĩ vẽnh kãpópãm mũ sir. Kỹ tóg ti mré mũ tĩ ag mỹ vin mũ, ag tỹ ũn e ẽn ag mỹ kãnhkrén jé, pirã ẽn mré hã.
17 Kỹ vẽnh kar tóg ko kãn kỹ funfór mũ sir. Kỹ ti mré mũ tĩ ag tóg ti ke ẽn gég mũ. Kẽj tỹ 12 (ke) fãn tóg.
Pedro tỹ Jesus tó
18 Kejẽn Jesus tóg Topẽ mré vĩ mũ, ti pin kỹ. Hã ra ti mré mũ tĩ ag tóg ti mré nỹtĩ nĩ. Kỹ tóg ag mỹ: “ag iso hẽ ri ke tĩ?” he mũ.
19 Kỹ ag tóg ti mỹ: “ũ ag vỹ: João Batista vẽ, he tĩ, jãvo ũ ag vỹ: Elias vẽ, he tĩ gé, jãvo ũ ag vỹ: vãsỹ Topẽ vĩ tó tĩ ũ vỹ rĩr mãn, he tĩ gé, ã to,” he mũ.
20 Kỹ tóg ag mỹ: “ag jãvo ãjag hẽ ri ke tĩ, iso?” he mũ. Kỹ Pedro vỹ ti mỹ: “tỹ ã Cristo nĩ, Topẽ tỹ ẽg mỹ ũn jẽnẽg mũ ẽn vỹ tỹ ã nĩ,” he mũ.
21 Kỹ tóg ti mỹ vĩ tar han mũ, ag tỹ ũ mỹ tó tũ nĩ jé ver, ti tỹ tỹ Cristo nĩ ẽn.
Jesus tỹ ti jagtar ke tó vén
22 Kỹ tóg ag mỹ: “tỹ sóg, ẽprã ke fi kósin ẽn nĩ,” he mũ. “Ijagtar jagy han ke vẽ. Kófa ag tỹ iso: kórég ti nĩ, henh ke vẽ, Topẽ tũ to pãꞌi ag ke gé, Topẽ vĩ to ẽg kanhrãn tĩ ag ke gé. Ag tỹ isén ke vẽ. Kurã tãgtũ tũg kỹ sóg rĩr mãn mũ hã ra,” he tóg.
23 Kỹ tóg vẽnh kar mỹ: “ãjag tỹ inh mré kãmũ kỹ tóg há tĩnh mũ,” he mũ.“Kỹ ãjag jykre tovãnh nĩ, ãjag tỹ isũ tãvĩ han jé. Ha vé, ag tỹ inh krunh tỹ inh kri fi kỹ sóg tĩg ke mũ, ag tỹ to isa kỹ isén jé, ha vem nĩ. Vẽnh nenh ke tũ sóg nĩ. Isỹ tag han ri ke han nĩ, kurã kar ki,” he tóg.
24 “Ãjag tỹ ãjag jykre hã han kỹ ãjag tóg nũgme ki vár ke mũ. Jãvo ãjag tỹ isugrĩn ãjag jykre tovãnh kỹ ãjag tóg krenkren ke mũ, ãjag kãgter ke mũ hã ra.
25 Ãjag tỹ ga kri mũn kỹ ãjag tóg nén kar gỹjỹ he sór mũ. Kỹ ãjag kuprĩg vỹ vãfor ke mũ. Kỹ tóg kórég nỹ sir, ãjag riko tãvĩ nỹtĩ ra. Gỹj há venh ke tũ ãjag tóg nĩ, gen kỹ.
26 Iso mỹꞌãg tũg nĩ, inh vĩ to. Ãjag tỹ ũri iso mỹꞌãg kỹ sóg ãjag to mỹꞌãg ke mũ gé, inh kãtĩg mãn kỹ. Tỹ sóg ẽprã ke fi kósin nĩ. Sĩnvĩ ti nĩnh mũ, inh kãtĩg mãn kỹ, inh jóg tỹ inh jẽnẽn kỹ. Kỹ ti tỹ jẽgnẽ jafã ag vỹ inh mré kãmũnh mũ gé, Topẽ tũ ag,” he tóg.
27 “Ki hã sóg tó mũ, ha mẽ. Ãjag kã mĩ ũ ag vỹ Topẽ tỹ tỹ ẽg pãꞌi nĩ venh ke mũ, ag kãgter ke to hã, tag ki ẽg mré nỹtĩ ũ ag,” he tóg.
Jesus tỹ vẽnh ve ũ han
28 Ti tỹ tag tó kar kỹ kurã tỹ 8 (ke) vỹ tũg mũ. Kỹ tóg kejẽn ag mỹ: “mũ nỹ, vyrmỹ,” he mũ. Pedro mỹ tóg ke mũ, João mỹ ke gé, Tiago mỹ ke gé. Ag hã mré tóg tĩ mũ, pãnónh ra, Topẽ mré vẽmén jé.
29 Tá jun kỹ tóg Topẽ mré vĩ mũ sir. Kỹ tóg vãhã vẽnh ve ũ han mũ. Vẽnh ve kupri han tóg mũ. Ti kur tóg kópréj nĩ, kókov tóg nĩ.
30 Kỹ ũn régre ag tóg vãhã tá vẽnh ven mũ sir. Kỹ ag tóg Jesus mré vẽmén mũ sir. Moisés vẽ, Elias mré.
31 Ag ve vỹ ti ve ri ke nĩ gé. Jesus mré ag tóg vẽmén mũ, ti tỹ Jerusalém tá ter ke to.
32 Pedro ag mỹ tóg nũgnũr há tãvĩ tĩ, ge ra ag tóg ve kãn mũ.
33 Kỹ ũ tỹ ti mré vẽmén nỹtĩ ẽn ag tóg mũ sór mũ sir. Kỹ Pedro tóg Jesus mỹ: “Senhorꞌ,” he mũ. “Tag ki tóg há nĩ,” he tóg. “Ẽg tỹ tag ki pãjó tãgtũ han kỹn hỹn há nĩnh mũ, ã mỹ, Moisés mỹ, Elias mỹ ke gé,” he tóg. Hã ra tóg krĩ tũ nĩ, hã kỹ tóg pãjó tó mũ.
34 Ti tỹ ver ti mỹ vẽmén jẽ ki kanhkã góg tóg ag kri rũm ke mũ sir. Kỹ ag tóg kamẽg mũ.
35 Kỹ vẽnh vĩ tóg mẽ háꞌ e mũ, kanhkã góg ẽn kã tá. “Inh kósin hã vẽ. Inh fe pẽ vẽgtĩ. Ti vĩ jẽmẽ ra,” he tóg, vẽnh vĩ ẽn ti, Topẽ ti.
36 Kỹ vãhã Jesus tóg ti pir mỹ tá jẽ nĩ sir. Ti mré vẽmén nỹtĩ ẽn ag ve mãn tũ ag tóg nĩ sir. Kỹ ag tóg mũ mũ. Hã ra ag tóg ũ mỹ tó tũ nĩ ver, ag tỹ nén ve ja ẽn ti.
Jesus tỹ kyrũ jagrẽ kórég kutẽm
37 Tỹ vaj kỹ ag tóg pãnónh ẽn tá kãre mũ. Kỹ ag tóg ũ tỹ hẽn ri ke ag vigvég mũ sir. Jesus kato ag tóg kãmũ mũ.
38 Kỹ vãhã ũ tóg ag kã mĩ prẽr mũ, ha mẽ. “!..Senhor..!” he tóg. “!..Inh kósin ve ra..! Inh kósin pir vẽ.
39 Jagrẽ kórég ti nĩ. Kỹ tóg kejẽn ti kã vyryn ke tĩ. Vãhã tóg prẽr tĩ. Ti ter tĩ han tóg tĩ sir, kỹ tóg jãrãn tĩ. Jãrãn kỹ tóg jũrũnꞌ jũrũnꞌ ke tĩ gé, kỹ tóg kejẽn ti tovãnh mũ sir, komẽr hã, ti rỹj kar kỹ.
40 Ã mré mũ tĩ ag mỹ sóg tó vẽ, ag tỹ ti jagrẽ kórég kutẽm jé, hã ra ag tóg ti tỹ hẽ ri ke tũ nĩ,” he tóg.
41 Kỹ tóg ti mỹ: “ã ne tóg inh ki rã há han tũ nĩꞌ,” he mũ. “Topẽ tóg ã mỹ krój nĩ ve nĩ, ãjag kar mỹ. Inh mỹ tóg e tĩ. Sỹ ãjag to krónh kenh ha mẽ tóg tĩ. Inh mỹ ti pére kãtĩg,” he tóg.
42 Ti jun kỹ ti jagrẽ tóg ti kã vyryn ke mãn mũ. Kỹ tóg kutẽ mũ sir. Kỹ tóg ti jagrẽ mỹ vĩ jũ han mũ, ti tỹ ti ki kãkutẽ jé. Hã ki tóg kyrũ ẽn tỹ háꞌ he mũ sir. Kỹ tóg ti panh mỹ: “té,” he mũ sir.
43 Kỹ tóg vẽnh kar mỹ e tãvĩ tĩ.“Topẽ ne tóg tỹ ũn mág pẽ nĩꞌ, ti jykre tóg há tãvĩ nĩ,” he ag tóg mũ sir.
Jesus tỹ ti jagtar ke tó mãn
Kỹ tóg ti mré mũ tĩ ag mỹ:
44 “ha mẽ há han,” he mũ. “Ẽprã ke fi kósin ẽn vỹ jagtar nĩnh ke mũ. Inh hã vẽ,” he tóg. “Ẽprã ke ag vỹ ag tỹ inh ki nén han sór mũ ẽn han ke mũ,” he tóg.
45 Hã ra tóg ag tỹ ti tỹ ti ter ke kãmén mũ tag to jykrén tũ tĩ. Ag tỹ to jykrén mũ ra ag tóg ki kagtĩg nỹtĩ. Kỹ ag tóg ti ki jẽmẽ sór tũ nĩ, ag tỹ ti kamẽg kỹ, hã kỹ ag tóg ti mỹ: “ã tỹ ne tó nẽ?” he tũ nĩ.
Ũn mág
46 Kejẽn Jesus mré mũ ag vỹ jagnẽ mỹ vĩ jũ han mũ. “Ẽg kã ũ tỹ hẽ nỹ tỹ ũn mág nĩ?” he ag tóg jagnẽ mỹ.
47 Hã ra Jesus tóg ki kanhró nĩ, ag tỹ nén to jykrén mũn ki. Kỹ tóg gĩr jé prẽr mũ, ti tỹ ti mré jẽ jé.
48 Kỹ tóg ag mỹ: “gĩr tỹ ge to há nỹtĩm nĩ, isugrĩn,” he mũ. “Ãjag tỹ isugrĩn ti to há nỹtĩn kỹ ãjag tóg iso há nỹtĩ gé sir. Ãjag tỹ iso há nỹtĩn kỹ ãjag tóg ũ tỹ inh jẽnẽg mũ to há nỹtĩ gé sir. Kỹ ãjag kã ũn sĩ ẽn vỹ tỹ ãjag kãfór kar nĩnh mũ, ha mẽ,” he tóg.
Ũ tỹ ẽg kato tẽ tũ ag
49 Kỹ João tóg ti mỹ: “Senhorꞌ,” he mũ. “Ũ ve ẽg tóg. Vẽjagrẽ kórég pan ti tĩ, ã jiji tó kỹ. Hã ra tóg tỹ ẽg mré ke tũ nĩ, hã kỹ ẽg tóg ti mỹ: “vẽjagrẽ kórég pan sór tũg nĩ,” hé,” he tóg.
50 Kỹ tóg ti mỹ: “ũ mỹ: vẽjagrẽ kórég pan tũg nĩ, he tũg nĩ,” he mũ. “Ũ tỹ ẽg kato tẽ tũ nĩn kỹ tóg tỹ ẽg mré ke nĩ sir,” he tóg.
Samaria tá ke ag tỹ Jesus mỹ: “kãrã ra,” he sór tũ
51 Kejẽn ti tỹ kanhkã ra tĩg ke kurã tóg kakó tĩ sir. Kỹ tóg to jykrén kỹ Jerusalém ra tĩg sór mũ, ag tỹ tá ti tén jé. Kỹ tóg vẽnh jo ũ ag jẽgnẽg mũ, ag tỹ ẽmã kãsir tá ti jun ke tó jé.
52 Kỹ ag tóg ẽmã sĩ ũ ki junjun mũ. Samaria tá ke ag jamã ũ vẽ. Tá ag tóg ti nũr ke ve sór mũ.
53 Hã ra tá ke ag tóg ag mỹ: “ãjag tỹ hẽ ra mũ nẽ?” he mũ. Kỹ ag tóg: “Jerusalém ra,” he mũ. Kỹ tóg ag mỹ kórég nĩ, hã kỹ ag tóg ag mỹ ag nũgnũr ke ven sór tũ nĩ.
54 Kỹ Tiago tóg jũ mũ, João ke gé. Kỹ ag tóg ti mỹ: “ẽg tỹ Topẽ mỹ: “kanhkã tá pĩ tỹ ag pũn nĩ,” henh há tóg tĩ, Elias tỹ nén han ja ri ke,” he mũ.
55 Hã ra tóg ag jé vĩrĩn ke kỹ ag mỹ: “ke tũg ra,” he mũ. “Topẽ jykre pijéꞌ. Inh pijé ag tũg sór mũꞌ. Isỹ ag krenkren han sór vẽ jãvo,” he tóg.
56 Kỹ ag tóg ẽmã ũ ra mũ mũ, tá nũgnũr jé sir.
Ẽg tỹ Jesus mré mũnh ke
57 Ag mũn kỹ ũ tóg ti mỹ: “sỹ ã mré tĩg há tóg tĩ,” he mũ. “Ã tỹ hẽn kã tá tĩg jamĩ sóg ã mré tĩg ke mũ,” he tóg.
58 Kỹ tóg ti mỹ: “hã ra tóg jagy tĩ,” he mũ. “Ðn tũ sóg nĩ. Mĩg vỹ kré nỹgtĩ, jẽsĩ vỹ jagfe nỹgtĩ gé. Ag jãvo isỹ hẽ tá nũr ke tóg tũ tĩ. Tỹ sóg ẽprã ke fi kósin nĩ,” he tóg,
59 Kỹ Jesus tóg kejẽn ũ mỹ: “mũ nỹ, inh mré,” he mũ. Hã ra tóg ti mỹ: “inh hỹn ver tĩg mũ ha, sỹ inh panh ter kỹ ga ki ti fón jé ver,” he mũ.
60 Hã ra Jesus tóg ti mỹ: “vó, inh ki ge tũ ag vỹ ã panh kej han mũnh mũ. Hã kỹ tóg ã tỹ inh mré tĩg há tĩ, ã tỹ Topẽ tỹ tỹ ẽg pãꞌi nĩnh ke ẽn kãmén jé,” he mũ.
61 Kỹ ũ tóg ti mỹ: “sỹ ã mré tĩg há tóg tĩ. Hã ra sóg inh jamã ra tĩg sór mũ ver, sỹ inh mré ke fag mỹ isĩg ke tó jé,” he mũ.
62 Kỹ tóg ti mỹ: “vó,” he mũ gé. “Ẽg tỹ arado tỹ ga kũm kỹ ẽg pijé vẽsỹjãm ẽvãnh tĩꞌ. Ge ti nĩ, ã tỹ inh mré tĩg sór kỹ. Inh mré ã tóg tĩg mũ. Ã tỹ ã jykre han sór kỹ ã tóg Topẽ tỹ tỹ ẽg pãꞌi nĩ tá krỹg ke tũ nĩ,” he tóg.
