Mateus tỹ rá 11:1-30
11 Jesus tỹ ti mré mũ tĩ ag mỹ tó kãn kỹ tóg, tá kãkutẽ mũ sir, ũ tỹ 12 (ke) ag mré. Kỹ tóg ẽmã kar mĩ tĩ mũ sir. Vẽnh kar kanhrãnrãn tóg tĩ mũ, ag mỹ Topẽ vĩ tón kỹ.
2 Kejẽn João Batista tóg se kỹ nĩ nĩ. Ti tỹ se kỹ nĩ ra tóg Jesus kãme mẽg mũ. Kỹ tóg ti mỹ vẽnh vĩ jẽnẽg mũ, ti mré mũ tĩ ag tỹ.
3 Kỹ tóg Jesus mỹ: “ã hã mỹꞌ?“ he mũ. “Ẽg tỹ ũn jãvãnh mũ mỹ tỹ ã nĩꞌ? Topẽ tỹ ũn jẽnẽg mũ hã mỹ tỹ ã nĩꞌ? Ẽg mỹ ũ jãvãnh mãn ke tũ nĩ haꞌ, ã pãteꞌ?“ he tóg.
4 Kỹ tóg ag mỹ: “ha João mỹ ãjag tỹ nén vég mũ tag ti tó, ha mẽ,” he mũ.
5 “Tag han inh tĩ, ha mẽ: ũn kyvó ag vỹ, isugrĩn ẽvãnh há nỹtĩ. Ũn kãnhgrĩ ag vỹ mũ há nỹtĩ, ũ tỹ vẽnh kaga kren vãnh han mũ ẽn ag krenkren han inh tĩ. Ũn kutu ag vỹ ẽmẽ há nỹtĩ ha, ũn kãgter mũ ag vỹ rĩnrĩr mãn kỹ nỹtĩ. Ũn jagtar ag vỹ Topẽ vĩ mẽg tĩ, ũ tỹ kanhkã tá nĩ ẽn tỹ tỹ ẽg pãꞌi nĩnh ke to.
6 Kỹ tóg ti tỹ iso jykrén kónãn tũ nĩn kỹ há tĩ. Kỹ Topẽ tóg ti ve há han mũ gé. Tag tóm nĩ, ti mỹ,” he tóg.
7 Kỹ ag tóg mũ mũ sir, João mỹ tó jé.
Ag mũ kar kỹ tóg, vẽnh e ag mỹ ti kãmén mũ. “Ãjag tỹ ẽmã tũ ja ra mũn kỹ, ti ve jé, kỹ ti jykre hỹn ne ri ke nĩ, ãjag mỹ?“ he tóg. “Ti jykre mỹ kãka tỹ vãnh tỹ man man ke ri ke nĩ? Vó, ri ke tũ ti nĩ.
8 Kỹ ti jykre mỹ ãjag mỹ ũn kur sĩnvĩ ag jykre ri ke nĩꞌ? Vó, ũn kur sĩnvĩ ag vỹ, ẽmã mág tá nỹtĩgtĩ, pãꞌi ag ĩn krẽm.
9 Ti jykre mỹ, Topẽ vĩ tó tĩ jykre ri ke nĩꞌ? Hỹ, Topẽ vĩ tó tĩ vẽ mỹr. Hã ra tóg ag kãfór kar nĩ.
10 Topẽ vỹ ti jẽnẽ, ti tỹ ijo tĩg jé. Hã kỹ tag tóg, ti to rán kỹ nĩ gé: “ha vé, ã jo sóg ũ jẽnẽnh ke mũ, ti tỹ vẽnh kar jykre tỹ háꞌ hen jé, ã tĩg ken jo. Ag jyvẽn jé tóg ke mũ, kỹ tóg ẽpry kure ri ke nĩ,” he ja tóg nĩ, Topẽ ti, João to.
11 Ki hã sóg tó mũ, ha mẽ. Ẽprã ke ag kãfór kar ti nĩ, Topẽ vĩ tón ki. Ge ra ũ tỹ Topẽ tỹ tỹ ẽg pãꞌi nĩ vég mũ ag vỹ ti kãfór nỹtĩnh mũ, ag kãsir nỹtĩ ra,” he tóg.
12 “Ti kãtĩg kar kỹ ũ ag tóg ag jykre tar tỹ ũ tỹ kanhkã tá nĩ ẽn tỹ tỹ ẽg pãꞌi nĩ han sór mũ, vẽsóg ki.
13 Topẽ vĩ tó tĩ ag kar vỹ Topẽ tỹ tỹ ẽg pãꞌi nĩnh ke ẽn kãmén ja nĩgtĩ, Topẽ tỹ ẽg jyvẽn mũ ẽn ti. Kỹ João tóg tag tó ja nĩ gé, ag nón.
14 João vỹ Elias ri ke nĩ, Elias kãtĩg mãn ke ẽn ti, Cristo kãtĩg ke ẽn jo. Rán kỹ tóg nĩ. Ti hã vẽ, João hã vẽ, Elias kãtĩg mãn ẽn ti.
15 To jykrén há han nĩ,” he tóg.
16 “Ũri ãjag ge nỹtĩ gé, ha mẽ. Gĩr ri ke ãjag nỹtĩ. Gĩr ag vỹ, jagnẽ mré kanhinnhir mũgtĩ. Kỹ ag tóg kejẽn jagnẽ to jũgjũ tĩ gé.
17 “Ãjag mỹ ẽg tóg vãkyn tĩ, kanhinnhir kỹ, hã ra ãjag ne, vẽnh gringrén jãvãnh nỹtĩꞌ. Kỹ ẽg tóg vẽsỹrénh mũ sir, kanhinnhir kỹ, hã ra ãjag tóg, ẽg mré kygfỹ jãvãnh nỹtĩ gé,” he ag tóg tĩ, ón kỹ jagnẽ to jũ kỹ.
18 Gĩr tag ag ri ke ãjag nỹtĩ, João to, iso ke gé. João vỹ vãkre ja nĩgtĩ, jẽg tũ, kron tũ ke gé. Kỹ ãjag tóg ti to: jagrẽ kórég ti nĩ, he ja nĩgtĩ, ti vãkre to.
19 Ti jãvo sóg vãkrég tũ nĩgtĩ. Jẽg sóg tĩ, kron sóg tĩ gé. Kỹ ãjag tóg iso: “ti hã ne jẽg tĩꞌ, ti hã ne kron tĩꞌ, ti hã ne governo mỹ jãnkamy mãg tĩ ag to há nĩgtĩꞌ, ti hã ne Topẽ vĩ mranh tĩ ag hã to há nĩgtĩꞌ,” he tĩ sir, ẽprã ke fi kósin to. Kỹ João jykre tóg, ãjag mỹ kórég nỹ, ti vãkre to. Jãvo inh jykre tóg ãjag mỹ kórég nỹ gé, inh vãkrég tũ to. Hã ra ẽg tóg ẽg tỹ ũ jykre tugnỹm kỹ ti jykre há ẽn ki kanhró nĩ sir,” he tóg, Jesus ti.
Jesus tỹ ẽmã ũ tá ke ag mỹ vĩ kónãn
20 Kỹ Jesus tóg ẽmã ũ tá ke ag mỹ vĩ kónãn mũ sir, ũ tỹ ti tỹ milagre hynhan vég mũ ra ag jykre tovãnh sór tũ ag mỹ, ũ tỹ ti ki ge sór tũ ag mỹ.
21 Kỹ tóg: “ẽmã tỹ Corazim ki ke ag mỹ sóg tag tó sór mũ, ẽmã tỹ Betsaida tá ke ag mỹ ke gé, ha mẽ,” he mũ. “Kórég ve jé ãjag tóg ke mũ. Milagre tỹ hẽn ri ke hynhan isóg ãjag mỹ, hã ra ãjag tóg, ãjag jykre tovãnh sór tũ nĩ. Ẽmã tỹ Tiro tá, ẽmã tỹ Sidom tá sóg hynhan ja tũ nĩ. Sỹ tá hynhan ra ag tóg vãsỹ, ag jykre tovãnh ke mũ vẽ. Kygfỹ ag mũ vẽ, ag jykre pãno tỹ ag mỹ e tĩn kỹ,” he tóg.
22 “Tiro tá ke ag vỹ, vẽsỹrénh ke mũ, kurã tỹ ẽgno ẽn kã, Sidom tá ke ag ke gé, ag jykre pãno to. Hã ra ãjag tóg, ag vẽsỹrénh kãfór han ke mũ, ha vem nĩ, ãjag tỹ inh vég mũ ra inh ki ge sór tũ nĩn kỹ. Ki hã sóg tó mũ,” he tóg.
23 “Sỹ ẽmã tỹ Cafarnaum tá ke ag mỹ tag tó sór vẽ gé, ha mẽ. Ũri tóg ãjag mỹ sér tĩ. Kanhkã ra ẽg mũnh mũ, he ãjag tóg tĩ, to jykrén kỹ. Hã ra ãjag tóg nũgme ki vár kãn ke mũ, ha vem nĩ. Ẽmã tỹ Sodoma tá ke ag vỹ, ag jykre pãno to kãgter. Ag tỹ sỹ nén han mũ ve ra ag vãsỹ to jykrén mũ vẽ, kỹ ag kãgter ke tũ nĩ vẽ. Kỹ ag ũri ẽg mré nỹtĩnh mũ vẽ.
24 Kurã tỹ ẽgno kã ag tóg vẽsỹrénh ke mũ. Hã ra ãjag tóg, ag vẽsỹrénh kãfór han ke mũ, sỹ vẽnh kar jykre tugnỹm ke kurã ẽn kã, ãjag tỹ inh vég mũ ra inh ki ge sór tũ nỹtĩn kỹ,” he tóg.
Jesus tỹ ẽg krĩ tỹ kãnhvyꞌ henh ke
25 Kỹ tóg: “jógꞌ,” he mũ. “Tỹ ã kanhkã tãn ag kãfór kar nĩ, kar kỹ ã tỹ ẽprã ke ag kãfór kar nĩ gé,” he tóg. “Inh mỹ tóg há tĩ, ã tỹ nén han mũ ti. Ũ tỹ: ki kanhró mág inh nĩ, he mũ ag mỹ ã tóg, ã jykre ven ja tũ nĩ. Ag mỹ ã tóg kãmén ja tũ nĩ gé. Ũ tỹ gĩr ri ke ki kagtĩg ag hã mỹ ã tóg ven ja nĩ, ã jykre ti,” he tóg.
26 “Hỹ, hã vẽ. Hã ra tóg há tãvĩ nĩ, jógꞌ,” he tóg.
27 Kỹ tóg ag mỹ: “inh jóg tóg, inh mỹ tovãnh kãn, ti tỹ nén han mũ kar ẽn ti,” he mũ. “Kỹ ũ pijé ti kósin ki kanhró nĩꞌ. Inh jóg hã ne inh ki kanhró nĩꞌ. Kỹ ũ pijé inh jóg ki kanhró nĩ géꞌ. Inh hã ne ti ki kanhró nĩꞌ, isỹ tỹ ti kósin nĩn kỹ. Hã ra sóg ãjag mỹ ti kãmén jé kãtĩ mũ, sỹ ũn kuprẽg mũ ag mỹ, fag mỹ ke gé“ he tóg.
28 “Ãjag tỹ Topẽ vĩ ki króm ki kagtĩg nỹtĩ tugrĩn jagtar nỹtĩn kỹ iso kãmũ jẽg. Nén ũ tỹ ãjag mỹ jagy tĩn kỹ iso kãmũ jẽg. Ãjag krĩ tỹ sóg kãnhvyꞌ henh ke mũ mỹr, ha mẽ,” he tóg.
29 “Inh mré kãmũ jẽg. Ãjag kanhrãn jé sóg ke mũ. Komẽr hã sóg vĩ tĩ. Inh pijé vẽsỹ ũn mág han tĩꞌ. Vĩ tar han vãnh sóg nĩ. Ãjag tỹ iso kãmũ kỹ ãjag krĩ vỹ háꞌ henh mũ, ha vem nĩ.
30 Ijykre pijé kufy nĩꞌ. Isỹ ãjag mỹ nén tó mũ pijé han kórég nĩꞌ,” he tóg.
