Mateus tỹ rá 21:1-46
21 Ag mũn kỹ ag tóg Jerusalém to hã junjun mũ, ẽmã tỹ Betfagé tá, krĩ tỹ Oliveiras tá. Kỹ Jesus tóg ũn régre ag mỹ:
2 “ẽmã ẽn ra mũjẽg, ẽg jo ẽmã nĩ ẽn ra,” he mũ. “Tá ãjag tóg burrica fi venh mũ. Se kỹ fi jẽ. Fi kósin vỹ fi mré jẽ nĩ. Ẽn fi kavãn kỹ fi pére kãmũm nĩ.
3 Hẽn ri ke mũn ag tóg ãjag mỹ vĩ sór mũ, fi to. Kỹ ag mỹ: “ẽg Senhor vỹ fi ve sĩ han sór mũ. Kãnhmar tóg fi jẽnẽ mãn mũ,” hem nĩ,” he tóg.
4 Hã ra tag tóg rán kỹ nĩ gé, ha mẽ.
5 “Sião tá ke fag mỹ: “ha vé, ãjag pãꞌi mág tóg ãjag ki jun ke mũ,” hem nĩ. Vẽnh kar to tóg fe há nĩ, jũ vãnh nĩn kỹ, ãjag Senhor ti. Burrica kri tóg nĩ nĩ, fi kósin kri, ẽg tu tĩ ẽn fi kósin kri mỹr,” he tóg, Topẽ vĩ tỹ rán kỹ nĩ ki.
6 Kỹ ag tóg burrica fi to mũ mũ sir.
7 Fi pére ag tóg kãmũ mũ, fi kósin mré. Kỹ ag tóg ag kur tỹ fi kri vãm mũ, kỹ tóg kri nĩ mũ.
8 Kỹ vẽnh e ẽn ag tóg ag kur tỹ ẽpry kri kugjén mũ. Kỹ ũ ag tóg ka féj kre kỹ ẽpry kri vãvãm mũ sir. Ag tỹ ti jamĩn sĩnvĩ han sór vẽ.
9 Kỹ ũ ag tóg ti jãmĩ mũ mũ, jo ũ ag tóg ti nón mũ mũ. Ẽn ag tóg prẽnprẽr mũ sir. “!..Viva, Davi krẽꞌkrẽ..!“ he ag tóg mũ. “!..Sér tóg tĩ, pãꞌi vỹ ẽg tá jun, ẽg Pãꞌi mág tỹ ti jẽnẽn kỹ..! !..Topẽ tá tóg kãtĩg, ũ tỹ kynhmỹ nĩ ẽn tá, viva..!“ he ag tóg, prẽnprẽr kỹ.
10 Hã ki ag tóg Jerusalém tá junjun mũ. Kỹ tá ke kar ag vỹ ti venh kãmũ mũ. Ag mỹ tóg e tĩ, kỹ ag tóg ti to: “ũ nẽ?“ he mũ.
11 Kỹ ag tóg ag mỹ: “Topẽ vĩ tó tĩ ẽn vẽ,” he mũ. “Jesus vẽ, Nazaré tá ke ẽn vẽ, Galiléia tá ke ẽn,” he ag tóg mũ sir.
Jesus tỹ Topẽ ĩn tá ag pan
12 Kỹ Jesus tóg Topẽ ĩn jy ró kã ra rã mũ. Hã ra ag tóg tá ag bodega han ja nĩ. Jãnkamy trocar he tĩ ag tóg tá nỹtĩ gé. Kỹ tóg ag pan kãn mũ sir, nén vẽne he tĩ ag, nén kũpra he tĩ ag ke gé. Ag tỹ nén tỹ kri vin jafã tỹ tóg vyryn ke mũ sir, sórãg vẽne he tĩ ag nĩgnĩ jafã tỹ ke gé.
13 Ag mỹ tóg: “Topẽ vĩ rá to jykrén nĩ, ha mẽ,” he mũ. “Inh ĩn jiji vỹ tỹ Topẽ mré vĩ jafã nĩ, he tóg, Topẽ vĩ rá ki. Hã ra ãjag tóg Topẽ mré vĩ jafã tag krẽm nén kar pigju mũgtĩ, kỹ tóg tỹ bandido ag jamã ri ke nĩ ha,” he tóg. Ag pan kỹ tóg ke mũ, Jesus ti.
14 Kỹ ũn kyvó ag tóg ti tá junjun mũ sir, ũn kãnhgrĩ ag ke gé, ti tỹ Topẽ ĩn krẽm jẽ ra. Kỹ tóg ag tỹ háꞌ he kãn mũ sir.
15 Hã ra Topẽ tũ ki rĩr tĩ ag tóg tá nỹtĩ, Topẽ vĩ to ẽg kanhrãn tĩ ag ke gé. Ti tỹ ag tỹ háꞌ he vég ag tóg mũ. Gĩr ag vĩ mẽg ag tóg mũ gé. Topẽ ĩn krẽm ag tóg nỹtĩ, gĩr ag, kỹ ag tóg Jesus mỹ prẽnprẽr mũ. “!..Viva, Davi krẽꞌkrẽ..!“ he ag tóg mũ, prẽnprẽr kỹ. Kỹ pãꞌi ag tóg ti to jũgjũ mũ.
16 Hã kỹ ag tóg ti mỹ: “ã mỹ ag prẽnprẽr mẽg tũꞌ?“ he mũ. Kỹ tóg ag mỹ: “hã ra Topẽ vĩ rá to jykrén nĩ,” he mũ. “Ũn kãsir ag vỹ iso vĩ há han tĩ. Ũn pafa tĩ ag vỹ inh mỹ vĩ há han tĩ. Ã hã ne tag hanꞌ, ũn kãsir ag tỹ inh mỹ vĩ há han jé, he tóg, Topẽ vĩ tỹ rán kỹ nĩ ki,” he tóg, Jesus ti.
17 Tag tó kar kỹ tóg ag ré kỹ tĩ mũ sir. Ẽmã ẽn tá tóg kãkutẽ mũ, ẽmã tỹ Betfagé ra tĩg jé. Tá tóg sir nũr mũ.
Ka tỹ figueira tóg
18 Tỹ vaj kỹ kusãg ki tóg ẽmã ra tĩg mãn mũ. Ti tĩg kỹ tóg kókĩr mũ.
19 Kỹ tóg ka tỹ figueira vég mũ sir, kỹ tóg ra tĩ mũ, ti kanẽ ko jé. Hã ra tóg kanẽ tũ jẽ. Féj tãvĩ tóg jẽ, kỹ tóg ti mỹ vĩ mũ. “Kanẽn mãn ke tũ ã nĩ ha,” he tóg mũ. Kỹ tóg tóg mũ sir vẽsỹmér, ka ti.
20 Kỹ ti mré mũ tĩ ag tóg vég mũ sir, kỹ tóg ag mỹ e tĩ. “Vẽsỹmér tóg tóg ja nĩ. Ti hẽ ri ké?“ he ag tóg.
21 Kỹ Jesus tóg ag mỹ: “ki hã sóg tó mũ,” he mũ. “Inh ri ke han jé ãjag tóg ke mũ. Isỹ ka tỹ figueira mỹ: “tóg ra,” hen kỹ tóg tóg ja nĩ. Inh vĩ tag ri ke han jé ãjag tóg ke mũ, ãjag tỹ inh ki ge há han kỹ. Hã ra to: “Topẽ mỹ inh vĩ mẽg mũ vỹ?” he tũg nĩ. “Hỹ mỹ vỹ?” he tũg nĩ. Kỹ ãjag tỹ kejẽn pãnónh mỹ: “ha kutẽ, goj nig mág ki,” hen kỹ tóg kutẽnh mũ, ãjag tỹ ti kutẽnh ke to: “hỹ mỹ vỹ?” he tũ nĩn kỹ.
22 Kỹ ãjag tỹ Topẽ mỹ nén ũ to vĩn kỹ to: “han jé tóg ke mũ,” hem nĩ. Kỹ tóg ãjag mỹ han ke mũ, ha vem nĩ,” he tóg, Jesus ti.
Jesus tỹ ũ tỹ ti jẽnẽg mũ tó tũg
23 Kỹ tóg ẽmã tá jun kỹ Topẽ ĩn kã ra rã mãn mũ sir. Kỹ Topẽ tũ to pãꞌi ag vỹ ti to kãmũ mũ, kófa ag mré hã. Kỹ ag tóg ti mỹ: “ũ nỹ ã mỹ: tag han nĩ, hé? Ũ nỹ ã jẽnẽ?“ he mũ.
24 Kỹ Jesus tóg: “ãjag ki sóg jẽmẽnh ke mũ gé, vẽnh kato,” he mũ. “Ãjag tỹ inh mỹ tó há han kỹ sóg ãjag mỹ ũ tỹ inh jẽnẽg mũ tónh ke mũ gé,” he tóg.
25 “João vỹ ag kygpég tĩ ja nĩgtĩ. Kỹ ti mỹ kanhkã tá vẽjykre han ja nĩgtĩꞌ, ẽprã vẽjykre vó? Ũ nỹ ti jẽnẽ?“ he tóg.
Kỹ ag tóg ti vĩ to jykrén mũ jagnẽ mré. “Ẽg tỹ ti mỹ: Topẽ tỹ ti jẽnẽ ja vẽ, hen kỹ tóg ẽg mỹ: kỹ ãjag tỹ ne jé ti vĩ kri fig tũ nĩ nẽ? henh ke mũ.
26 Ẽg tỹ hã ra ti mỹ: ẽprã ke jykre ja vẽ, hen kỹ ẽg tóg vẽnh kar kato tẽ mũ sir. Vẽnh kar vỹ João to: Topẽ vĩ tó tĩ pẽ ja vẽ, he tĩ. Kỹ ẽg tóg ag kamẽg mũ, vẽnh e ẽn,” he ag tóg mũ, jagnẽ mỹ, pãꞌi ag.
27 To jykrén kỹ ag tóg Jesus mỹ: “ẽg pijé João jykre ki kanhró nỹtĩꞌ,” he mũ. Ón kỹ ag tóg ke mũ. Kỹ tóg ag mỹ: “kỹ sóg ãjag mỹ tónh ke tũ nĩ gé, ũ tỹ inh jẽnẽg mũ ti,” he mũ.
Ũn krẽ régre kãme
28 Kỹ tóg ag kanhrãn kỹ ag mỹ: “tag to jykrén nĩ, ha mẽ,” he mũ sir. “Ũ tóg kósin régre nĩ. Kejẽn tóg ũn sanh mỹ: “inh kósin, ũri inh jakré tugnỹm tĩg,” he mũ.
29 Kỹ tóg ti panh ti mỹ: “vó,” he mũ. Kar kỹ tóg to jykrén mãn kỹ tĩ mũ sir, ẽpỹ ra.
30 Kỹ ti panh tóg ti jãvy mỹ ke mũ gé sir. “Ũri inh jakré tugnỹm tĩg,” he tóg mũ gé. Kỹ ti jãvy tóg: “he,” he mũ, ti panh ti mỹ. Hã ra tóg tĩ tũ nĩ.
31 Kỹ ũ tỹ hẽ nỹ ti panh vĩ ki króm hỹn?“ he tóg. Kỹ ag tóg ti mỹ: “ũn sanh ti,” he mũ. Kỹ Jesus tóg “hỹ, hã vẽ,” he mũ. “Hã kỹ sóg ãjag mỹ ke mũ. Ũ tỹ governo mỹ jãnkamy mãg tĩ ũ ag vỹ Topẽ vĩ mranh, hã ra ag tóg to jykrén mãn kỹ ag jykre kórég tovãnh. Kỹ ũn mén tũ ũ fag vỹ fag jykre kórég tovãnh gé. Hã kỹ ag tóg Topẽ tỹ tỹ ẽg pãꞌi nĩ venh ke mũ, fag ke gé. Ti kósin sanh ri ke ag hã vẽ. Ag jãvo ãjag tóg kanhkã venh ke tũ nĩ, ãjag tỹ ón kỹ Topẽ mỹ: he, he mũ ra.
32 João vỹ ãjag mỹ Topẽ vĩ tó ja nĩgtĩ, ãjag tỹ ti jykre kuryj jagma mũ jé. Hã ra ãjag tóg ti vĩ kri nĩm ja tũ nĩ. Ãjag jãvo ũ tỹ governo mỹ jãnkamy mãg tĩ ag vỹ ti vĩ kri fi ja nĩ, ũn mén tũ fag ke gé. Tag ve ãjag mỹr. Ge ra ãjag tóg ãjag jykre tovãnh tũ nĩ. João vĩ kri nĩm tũ ãjag nĩ,” he tóg.
Ũn camarada kórég ag
33 “Sỹ ãjag mỹ ãjag tỹ Topẽ tovãnh kãmén mãn ke vẽ, ha mẽ,” he tóg mũ. “Kejẽn ũ tóg nĩgtĩ. Uva kré tóg nĩgtĩ, tỹ vinho han jafã ẽn. Ti jakré to tóg rón mũ. Kỹ tóg kũm kỹ uva jẽgmĩ jafã han mũ. Kỹ tóg ki pãjó han mũ gé. Kỹ tóg ũ tỹ ki rĩr tĩ ag mỹ tovãnh mũ, ag tỹ ti mré ti kanẽ vẽnh kãpãm jé. Kỹ tóg tĩ mũ, ga ũ ra.
34 Ti kanẽn kỹ tóg ti camarada ag jẽgnẽg mũ, ag tỹ ag mỹ ti tũ vin jé, uva kanẽ ti.
35 Hã ra ag tóg ag vóg kónãn mũ sir. Ũ mrãnmrãn ag tóg mũ, ũ tén ag tóg mũ, ũ pin ag tóg mũ, pó tỹ.
36 Kỹ tóg ag mỹ ti camarada ũ ag jẽgnẽ mãn mũ gé sir, ũn e ag sir, hã ra ag tóg ag vóg kónãn kãn mũ gé.
37 Vãhã tóg ag mỹ ti kósin jẽnẽg mũ. “Ag hỹn ti kamẽg mũ, inh kósin ti,” he tóg, hã kỹ tóg ti jẽnẽg mũ.
38 Kỹ ag tóg ti kósin ti ve kỹ jagnẽ mỹ: “kejẽn ẽkré tag vỹ tỹ ti tũ nỹnh ke mũ,” he mũ. “Mũ nỹ, ti tén jé, ti tũ tag tỹ tỹ ẽg tũ nỹn jé,” he ag tóg mũ, patrão kósin to.
39 Kỹ ag tóg ti kãgmĩg mũ sir. Ró pãte ag tóg ti tén kỹ ti fón mũ sir.
40 Kejẽn ag patrão vỹ kãtĩg ke mũ, ũ tỹ nén krãn ja ẽn ti. Kỹn hỹn hẽ ri kenh mũ, ti camarada ag tỹ?“ he tóg, Jesus ti.
41 Kỹ ag tóg ti mỹ: “vẽjykre pãno han ag tóg mũ mỹr,” he mũ. “Ag kãgtén jé tóg ke mũ, jũ kỹ, ag patrão ti, kỹ tóg uva kré ẽn tỹ ũ mỹ tovãnh ke mũ, ag tỹ ti mré vẽnh kãpãm jé, ti kanẽ ti,” he ag tóg, Jesus mỹ.
42 Kỹ tóg ag mỹ: “hỹ,” he mũ. “Kỹ Topẽ vĩ rá tag to jykrén nĩ gé, ha mẽ: “pó tỹ ĩn han jafã fón ag tóg, pó tỹ ĩn han tĩ ag. Ag mỹ tóg kórég ja nĩ. Hã ra Topẽ tóg hã tỹ ĩn nũna han mũ. Ẽg Senhor mág tỹ há vẽ mỹr, hã kỹ tóg ẽg mỹ e tĩ,” he ja tóg nĩ, Topẽ vĩ rá ki,” he tóg, Jesus ti.
43 “Hã kỹ sóg ãjag mỹ: ãjag tỹ Topẽ tỹ tỹ ẽg pãꞌi nĩ venh ke vẽ vẽ, hã ra ãjag tóg venh ke tũ nĩ,” he mũ. “Ũ ag hã vỹ venh ke mũ, povo ũ ag, ag tỹ inh vĩ kri fi kỹ,” he tóg.
44 “Ũ tỹ hẽn ri ke ag vỹ pó tag kri vár ke mũ, kỹ ag tóg tũꞌ henh ke mũ. Kỹ pó tag vỹ ũ tỹ hẽn ri ke ag kri kutẽnh ke mũ gé, kỹ tóg ag tỹ tũꞌ he kãn mũ,” he tóg, Jesus ti. Ti tỹ ẽg tỹ ti ki rã tũ tugrĩn nũgme ki vár ke tón hã vẽ.
45 Kỹ pãꞌi ag tóg vãhã Jesus vĩ tag mẽ kỹ to jykrén mũ. “Ẽg hã to tóg: uva ki rĩr tĩ kórég ag, he ja nĩ,” he ag tóg mũ sir.
46 Hã kỹ ag tóg ti se sór mũ. Hã ra ag tóg vẽnh e ẽn kamẽg mũ, ag tỹ Jesus to: “Topẽ vĩ tó tĩ pẽ vẽ,” hen kỹ.
