Mateus tỹ rá 27:1-66
27 Tỹ vaj kỹ kusãg ki ag tóg Jesus tén ke to jykrén mũ sir, Topẽ tũ to pãꞌi kar ag.
2 Kỹ ag tóg ti mrĩnh mũ sir. Ti pére mũ kỹ ag tóg pãꞌi mág tỹ governador mỹ ti fẽg mũ sir, Pilatos mỹ.
Judas Iscariotes ter
3 Hã ra Judas tóg, ag tỹ ti tén ke vég mũ. Kỹ tóg vãhã ti mỹ e tĩ. Ti tỹ to jykrén mãn kỹ tóg jãnkamy tỹ 30 (ke) ẽn ma kãtĩg kỹ Topẽ tũ to pãꞌi ag mỹ ven mũ, kófa ag mỹ.
4 Kỹ tóg ag mỹ: “ti kórég han inh,” he mũ. “Ti pijé, nén ũ kórég han ja nĩgtĩꞌ, hã kỹ tóg vẽnh mỹ nĩ, ti tỹ inh vĩ to ter kỹ,” he tóg.
5 Hã ra ag tóg ti mỹ: “ẽg tũ pijéꞌ, ã tũ hã nẽꞌ,” he mũ. Kỹ tóg jãnkamy ẽn vãm mũ sir, Topẽ ĩn krẽm, kar kỹ tóg hẽn ra tĩ mũ sir. Tá tóg ti nunh kã vẽnh jãján mũ, kỹ tóg ter mũ sir.
6 Kỹ Topẽ tũ to pãꞌi ag vỹ, jãnkamy ẽn mãn kỹ to jykrén mũ. “Ẽg tỹ Topẽ mỹ jãnkamy tag nĩm kỹ tóg vẽnh mỹ tĩ. Tỹ tóg vẽnh kyvénh kajãm ja nĩ, hã kỹ ẽg tóg Topẽ mỹ nĩm sór tũ nĩ,” he ag tóg.
7 Kỹ ag tóg vẽnh mãn kỹ to jykrén kỹ: “ẽg hỹn tỹ ẽpỹ kajãm mũ,” he mũ. Ag tỹ tá goꞌor vég tĩ ẽn tá ag tóg, fóg ag kej han sór mũ, fóg tỹ Jerusalém ra pygsa tĩ ag mỹ.
8 Hã kỹ ẽg tóg ẽpỹ ẽn to: “ẽpỹ kyvénh,” he tĩ.
9 Hã ra Topẽ vĩ tó tĩ tỹ Jeremias vỹ Judas to tag rán ja nĩgtĩ, ha mẽ: “jãnkamy tỹ 30 (ke) tỹ tóg, ẽprã ke ũ kajãm vén ke mũ, ti kaja tỹ ag mỹ há nỹn kỹ.
10 Ẽprã ke ẽn kajãm kar kỹ ag tóg tỹ ẽpỹ kajãm mũ sir, ag tỹ goꞌor vég tĩ ẽn tá. Hã tó ja tóg nĩ, inh mỹ, ẽg jóg tỹ Topẽ ti,” he ja tóg nĩgtĩ, Jeremias ti.
Pilatos tỹ Jesus ve
11 Hã ra Jesus tóg, fóg tỹ pãꞌi mág rã hã jẽ nĩ. Kỹ tóg ti ki jẽmẽg mũ, kỹ tóg: “ã mỹ tỹ Judeu ag pãꞌi nĩꞌ?“ he mũ. Kỹ Jesus tóg ti mỹ: “ki hã ã tóg tó mũ,” he mũ.
12 Kỹ Topẽ tũ to pãꞌi ag tóg ti kato vĩ mág mũ, kófa ag ke gé, hã ra tóg hun ke kỹ jẽ nĩ.
13 Kỹ Pilatos tóg ti mỹ: “mỹ ã mỹ tỹ nén ũ tũ nĩ, ag tỹ ã kato vĩ mág han mũ tag ti?“ he mũ.
14 Hã ra Jesus tóg vĩ mãn tũ nĩ, kỹ tóg Pilatos mỹ e tĩ sir.
Ag tỹ Jesus to: ter jé tóg ke mũ, he
15 Hã ra Pilatos tóg ag mỹ fénhta tỹ Páscoa kar ki vẽse pir kavãg tĩ, ag tỹ ũn to vĩ mũ. Ti jykre vẽ.
16 Ẽn kã ũ tóg se kỹ jẽ nĩ, vẽnh kar tỹ ũn ki kanhró ẽn, ti jijin hã vỹ: Jesus Barrabás, he mũ.
17 Jãvo ag tóg tá vẽnhmãn kỹ nỹtĩ, Judeu kar ag. Kỹ Pilatos tóg ag mỹ: “inh ãjag mỹ ũ tỹ hẽ kavãn ha? Mỹ Jesus Barrabás, Jesus Cristo mỹ vó?” he mũ.
18 Pilatos vỹ pãꞌi ag jykre ki kanhró nĩ, ag tỹ ón kỹ Jesus to jũ nỹtĩn ki. Ti há nĩ hã tugrĩn ag tóg ti to jũ mũ. Hã kỹ tóg ti kavãn sór mũ.
19 Ti tỹ vẽnh jyvẽn jafã tá nĩ ra ti prũ fi tóg, ti mỹ vẽnh vĩ jẽnẽg mũ, kỹ fi tóg ti mỹ: “vẽjykre kuryj han ti tĩ,” he mũ, Jesus to. “Hã kỹ ti vóg sór tũg nĩ. Kuty tag kã sóg ti to vẽnh péti kónãn. Ẽg tỹ ti tugrĩn jagtar ke ve inh, inh vẽnh péti ki,” he fi tóg.
20 Hã ra Topẽ tũ to pãꞌi ag tóg, vẽnh kar krĩn mũ sir, kófa ag mré, vẽnh kar tỹ Barrabás kavar ve sór jé, ag tỹ Jesus ter hã ve sór jé.
21 Kỹ fóg tỹ pãꞌi tóg, ag ki jẽmẽ mãn mũ. “Inh hỹn ũn régre tag ag kã ũ tỹ hẽ kavãn ha?“ he tóg. Kỹ ag tóg ti mỹ: “Barrabás“ he mũ.
22 Kỹ tóg ag mỹ: “kỹ inh Jesus tỹ hẽ ri kenh mũ, ag tỹ ũ to: “Cristo vỹ tỹ ti nĩ,” he tĩ ẽn tỹ,” he mũ. Kỹ ag tóg ti mỹ: “krunh to ti sã,” he kãn mũ sir.
23 Kỹ tóg ag mỹ: “ti kórég tỹ ne han ti?“ he mũ. Hã ra ag tóg prẽnprẽr mũ sir. “!..Krunh to ti sã..!“ he ag tóg mũ sir, prẽnprẽr kỹ.
24 Ag tỹ tóg hẽ ri ke tũ nĩ. Vẽnh génh kutẽ ri ke tóg nĩ, hã kỹ tóg goj jé prẽr mũ. Kỹ tóg nĩpég mũ sir, vẽnh kar rĩnve, kỹ tóg ag mỹ: “inh jykre pijéꞌ,” he mũ. “Inh nĩgé kavénh ke tũ sóg nĩ, ti kyvénh tỹ. Ũn jykre kuryj vẽ, kỹ sóg ti tén sór tũ nĩ. Ãjag jykre vẽ,” he tóg.
25 Kỹ vẽnh kar ag tóg ti mỹ: “ẽg jykre vẽ,” he kãn mũ. “Ẽg hã ne ti tén sór mũꞌ. Kỹ Topẽ vỹ, ẽg hã vóg kónãn ke mũ, ẽg krẽ ag ke gé,” he ag tóg.
26 Kỹ Pilatos tóg Barrabás kavãg mũ sir. Jesus to tóg porisa ag mỹ: “ha ti mrãnmrãn,” he mũ sir. Ag tỹ ti mrãnmrãn kar kỹ tóg ag mỹ ti fẽg mũ, ag tỹ ka to ti sa jé.
Porisa ag tỹ Jesus vóg kónãn
27 Kỹ fóg tỹ pãꞌi krẽm porisa ẽn ag tóg, Jesus pére mũ mũ, pãꞌi tỹ governador ĩn ra, palácio ẽn ra. Kỹ ag tóg porisa ũ ag jé prẽr kãn mũ.
28 Ti kur kunũg ag tóg mũ, kỹ ag tóg kur kusũg tỹ ti kri fón mũ.
29 Sónh rẽr téj pirĩn kỹ ag tóg, tỹ ti krĩ tógfĩg mũ sir. Vãn tỹ ag tóg, ti nĩgé kã fẽg mũ, ti pẽgja tá. Kỹ ag tóg, ti krẽm grĩnhgrĩnh ke mũ sir, ón kỹ. Ti to é he kỹ ag tóg: “viva, Judeu ag pãꞌiꞌ,” he mũ.
30 Kỹ ag tóg ti to sugsug mũ gé. Vãn ẽn tỹ ag tóg ti krĩ mĩ rẽg mũ sir.
31 Ag tỹ ti nyg kar kỹ ag tóg, ti ki kur kusũg ẽn kunũg mũ. Kỹ ag tóg, ti tũ pẽ tỹ ti kã ra rãg mãn kỹ ti pére mũ mũ, krunh to ti sa jé sir.
Jesus tỹ krunh to sa
32 Ag mũn kỹ ag tóg, ũ kato tẽ mũ, Cirene tá ke ũ, ti jijin hã vỹ: Simão, he mũ. Ẽn mỹ ag tóg vĩ tar han mũ, ti tỹ Jesus krunh vyn kỹ tĩg jé, ti jo.
33 Kỹ ag tóg, Gólgota tá junjun mũ sir. Gólgota to ẽg tóg: vẽnh krĩ kuka, he tĩ, ẽg vĩ ki.
34 Tá junjun kỹ ag tóg, ti mỹ vinagre ven mũ, nén ũ tỹmẽ jynh mré hã. Kỹ tóg kãmẽ sĩ han mũ, hã ra tóg kron sór tũ nĩ, vẽnh kagta ti.
35 Kỹ ag tóg, krunh to ti sãg mũ sir. Ti kur tỹ ag tóg, jagnẽ mỹ vẽnh kãpãm mũ sir, to ag tóg joga he mũ.
36 Kỹ ag tóg nĩgnĩg kỹ nỹtĩ nĩ, ti ki rĩr jé.
37 Ag tỹ nén tỹ ti kato vĩ mũ vỹ, ti kri rán kỹ sa, hã vỹ: “Jesus, Judeu ag pãꞌi mág vẽ,” he mũ. Ti tỹ vẽsỹ pãꞌi mág han to ag nẽji ti tén mũ.
38 Ti kóm ag tóg, ũn régre ag tỹ krunh to sãg mũ gé, bandido ag. Kỹ ũ tóg ti pẽgja tá sa, jó ũ tóg ti jakãnh tá sa.
39 Kỹ ũ tỹ mĩ mũ mũ ag tóg, ti nyg mũ gé, vỹn vỹn hen kỹ.
40 “Ã mỹ Topẽ ĩn kókén kar kỹ kurã tãgtũ ki ũ han mãn sór mũꞌ?“ he ag tóg mũ. “Vẽnh kren han ra kemaꞌ, krunh to kãtére, ã tỹ tỹ Topẽ kósin nĩn kỹ,” he ag tóg ti mỹ.
41 Kỹ Topẽ tũ to pãꞌi ag tóg ti nyg mũ gé, Topẽ vĩ to ẽg kanhrãn tĩ ag mré hã, kófa ag ke gé. Kỹ ag tóg jagnẽ mỹ:
42 “ũ ag krenkren han tóg, hã ra tóg vẽnh hã kren han ki kagtĩg nĩ,” he mũ. “Ẽg pãꞌi mág jé krunh to kãtére kemaꞌ, ẽg tỹ ve jé, ẽg tỹ ti ki ge jé,” he ag tóg.
43 “Topẽ ki ti nẽji rã kỹ jẽ, kỹ Topẽ jé ti kren han, ti tỹ ti to há nĩn kỹ. Topẽ kósin vỹ tỹ inh nĩ, he ti mỹr,” he ag tóg ti to, ti nyg kỹ.
44 Kỹ ũ tỹ ti kóm krunh to nỹtĩ ẽn ag tóg ti nyg mũ gé, bandido ag.
Jesus ter
45 Rã tỹ ẽg nĩno kã sa ra tóg kutyꞌ he mũ sir, ga kar mĩ hã. Kuty ẽn tóg óra tãgtũ han mũ.
46 3 (ke) óra ki Jesus tóg prẽr mũ sir, kỹ tóg: “Eli, Eli, lemá sabactani?“ he mũ. Ẽg vĩ ki tóg tag to: “Topẽ, Topẽ, ã tỹ ne jé isovãnh nẽ?“ he mũ.
47 Kỹ ũ tỹ tá nỹtĩ ag tóg, ag tỹ mẽg kỹ jagnẽ mỹ: “Elias jé tóg prẽr mũ,” he mũ.
48 Kỹ ũ tóg vẽnhvãg mũ, kỹ tóg esponja mrãn mũ sir, vinho kaja pir tỹ. Ka jurỹn kỹ tóg, tỹ kusón kỹ ti mỹ ven mũ sir, ti tỹ ki ũnhꞌ ũnhꞌ he jé.
49 Hã ra ũ ag tóg: “toregꞌ,” he mũ. “Hẽn ri ke mũn Elias kãtĩg mũ, ti kren han jé,” he ag tóg.
50 Hã ra Jesus tóg, prẽr mág han mãn kỹ hun ke mũ sir.
51 Hã ra Topẽ ĩn krẽm kur tỹ jãnkã nĩfe tóg, vẽnh kã hã jaran ke mũ, ha mẽ, ti jar tóg vẽnh kãkym ke kãn mũ sir.
52 Kỹ ga tóg, ragra ke mũ sir, pãró vỹ, gũm ke mũ gé, vẽnh kej vỹ, nugnor mũ gé, kỹ ũ tỹ Topẽ ki ge kỹ nỹtĩ tỹ hẽn ri ke ag tóg, rĩnrĩr mãn mũ, ũn kãgter mũ ag. Ag kej tá ag tóg kãpa mũ.
53 Kỹ ag tóg Jerusalém kã ra ge mũ, kỹ ag tóg, ũ tỹ hẽn ri ke ag mỹ vẽnh venven mũ sir. Kỹ ag tóg ag vigvég mũ, Jerusalém tá ke ag.
54 Hã ra capitão tóg, porisa ag mré Jesus ki rĩr jẽ nĩ. Ga tỹ ragra ke ẽn vég ag tóg mũ, nén kar ti, Jesus ter ẽn kã. Kỹ tóg ag mỹ e tĩ. Kỹ ag tóg: “Topẽ kósin ja vẽ mỹr,” he mũ.
55 Kỹ ũn tỹtá fag vỹ, tá nỹtĩ gé, ũ tỹ hẽn ri ke fag. Kuvar há tá nỹtĩ kỹ fag tóg ti vég nỹtĩ nĩ. Ti mré fag tóg kãmũ ja nĩ, ga tỹ Galiléia tá. Ti ki fag tóg rĩr ja nĩgtĩ.
56 Fag kã ũ fi vỹ tỹ Maria Madalena fi nĩ, jo ũ fi tóg tỹ Maria fi nĩ gé, José mré Tiago mỹnh fi. Kỹ ũ fi vỹ tỹ Zebedeu krẽ ag mỹnh fi nĩ gé. Fag mré ke ũ fag vỹ tá nỹtĩ gé.
Ag tỹ vẽnh kej kã kã Jesus fi
57 Rãké tóg nỹ ha, kỹ ũn há tóg jun mũ. Arimatéia tá tóg kãtĩg ja nĩ. Ti jijin hã vỹ: José, he mũ. Jesus mré ke ũ vẽ gé.
58 Ẽn tóg, Pilatos venh tĩ mũ, kỹ tóg ti mỹ Jesus to vĩ mũ, ti ter kar kỹ. Kỹ Pilatos tóg: “he,” he mũ.
59 Kỹ José tóg Jesus vyn kỹ tĩ mũ sir, kur jãnhkri tỹ ti pãg kỹ.
60 Kỹ tóg, vẽnh kej kã kã ti fig mũ sir. Pó kã ki tóg han ja nĩgtĩ, kỹ tóg tãg nĩ, vẽnh kej ti. José tũ vẽ. Ẽn kã kã tóg ti fig mũ sir, kỹ tóg, pó tãpér tĩn kỹ tỹ vẽnh kej jãnkã nĩfénh mũ sir. Kar kỹ tóg tĩ mũ.
61 Hã ra Maria Madalena fi vỹ tá nĩ nĩ, Maria ũ fi ke gé. Ti kej rã fag tóg nĩgnĩ kỹ nỹtĩ nĩ.
Ag tỹ ti kej ki rĩr
62 Tỹ vaj kỹ, vẽnh kán ke kurã ki Topẽ tũ to pãꞌi ag tóg, vẽnh mãn mũ sir. Kỹ ag tóg, Pilatos venh mũ mũ.
63 Ti mỹ ag tóg: “vẽnh kar krĩn kónãn tĩ ẽn tóg tag tó ja nĩ, ha mẽ: “kurã tãgtũ ki sóg rĩr mãn ke mũ,” he ja ti nĩ. Ẽg tỹ tag to jykrén kỹ ẽg tóg, ã mỹ nén ũ to vĩ sór mũ.
64 Ẽg mỹ tóg, porisa ag tỹ ti kej ki rĩr há tĩ, kurã tãgtũ ki. Jãvo tóg ẽg mỹ, ti mré mũ tĩ ag tỹ ti to nón kỹ ti péjunh ha mẽ tĩ, kỹ tóg ẽg mỹ ag tỹ vẽnh kar mỹ: “rĩr mãn ti, ti ter kar kỹ,” henh ha mẽ tĩ gé,” he ag tóg, Pilatos mỹ.
65 Kỹ Pilatos tóg ag mỹ: “he,” he mũ. “Vỹ nỹtĩ, ti kej ki rĩr ke mũ ag,” he tóg, porisa ũ ag to. “Ti kej ki rĩr há han nĩ, ge kỹ,” he tóg.
66 Kỹ ag tóg, mũ kỹ ti kej to ag vin mũ, ag tỹ ki rĩr jé sir. Ti kej nĩfe ẽn jy ag tóg tógfĩn mũ gé, vãfe tỹ, pãró to. Ẽn ki ag tóg nỹtĩ nĩ, porisa ag, ũ tỹ ti kej nĩfe kunũg tũ nĩ jé.
