LYNNONG 28
Pyni Jingsngewnguh ïa Kaei kaba U Jehobah bad u Jisu ki la Leh na ka bynta jong Phi
Kumno phi sngew haba i paralok jong phi i ai sngewbha ïa phi da kaei kaba phi itynnad bha? Kane kan pynkmen ïa phi bad phin ai khublei ïa i. U Jehobah bad u Jisu ruh ki la ai ïa ngi ka jingai sngewbha kaba kyrpang tam. Kaei kata, bad kumno ngi lah ban pyni ba ngi sngewnguh ïa ka?
1. Kaei kawei ka rukom kaba ngi lah ban pyni jingsngewnguh ïa kaei kaba U Jehobah bad u Jisu ki la leh na ka bynta jong ngi?
Ka Baibl ka kular ba ‘uei uei uba pyni jingngeit ha u [Jisu]’ u lah ban im junom. (Ïoannis 3:16) Ka mut aïu ban pyni jingngeit? Ka mut ba ngim dei tang ban shu ngeit ha u Jisu, hynrei ngi donkam ruh ban pyni ïa la ka jingngeit lyngba ki rai ba ngi shim bad kiei kiei kiba ngi leh. (Jakob 2:17) Haba ngi pyni ïa la ka jingngeit da kaei kaba ngi ong bad kaei kaba ngi leh, ngi pynkhlaiñ ïa ka jingïadei paralok jong ngi bad u Jisu lem bad U Jehobah.—Pule Ïoannis 14:21.
2. Ka prokram bakyrpang aïu kaba lah ban ïarap ïa ngi ban pyni jingsngewnguh ïa kaei kaba U Jehobah bad u Jisu ki la leh na ka bynta jong ngi?
Ha ka miet shuwa ba u Jisu un ïap, u la ïathuh ha la ki nongbud ïa kawei ka rukom ba kumno ki lah ban pyni jingsngewnguh ïa ka jingsiewspah ka jong u. U la sdang ïa kawei ka jingïalang bakyrpang kaba la ka khot “ka Jingkhawai Miet u Trai,” kaba ngi ju khot ruh ka Jingkynmaw Burom ïa ka jingïap u Khrist. (1 Korinth 11:20) U Jisu u kwah ïa ki apostol—bad ïa baroh ki Khristan bashisha—ban kynmaw ba u la ïap na ka bynta jong ngi. Te u ai ïa ki kane ka hukum: “To phin leh ïa kane ïa kaban kynmaw ïa nga.” (Loukas 22:19) Haba phi wan sha ka Jingkhawai u Trai, phi pyni ba phi sngewnguh ïa ka jingieid bakhraw kaba U Jehobah bad u Jisu ki la leh na ka bynta jong ngi.
WAD SHUH SHUH
Pule shuh shuh ïa kiwei de ki rukom ba kumno ngi lah ban pyni jingsngewnguh na ka bynta ka jingieid kaba U Jehobah bad u Jisu ki la pyni ïa ngi. Peit balei ka Jingkynmaw Burom ïa ka jingïap u Khrist ka long kaba donkam bha.
3. Kaei kaba ngi lah ban leh ban pyni jingsngewnguh
Shu mutdur don ba pyllait im ïa phi na ka jingngam jyllop. Hato phin klet ïa ka jingleh bha jong i ïa phi? Ne phin wad lad kumno ban pyni jingsngewnguh ïa kaei kaba i la leh?
U Jehobah u la pyllait im shisha ïa ngi. Pule 1 Ïoannis 4:8-10, bad nangta sa ïa peit lang ïa kine ki jingkylli harum:
-
Balei ka jingaiti jong u Jisu ïa la ka jingim ka long ka jingai sngewbha kaba kyrpang?
-
Kumno phi sngew ïa kaei kaba U Jehobah bad u Jisu ki la leh na ka bynta jong phi?
Kumno ngi lah ban pyni jingsngewnguh ïa kaei kaba U Jehobah bad u Jisu ki la leh na ka bynta jong ngi? Pule 2 Korinth 5:15 bad 1 Ïoannis 4:11; 5:3, bad hadien ba la pule ïa kawei pa kawei ka dkhot, sa ïa peit lang ïa kane ka jingkylli harum:
-
Katkum kine ki dkhot, kaei kaba ngi lah ban leh ban pyni jingsngewnguh?
4. Pyrthuhbud ïa u Jisu
Sa kawei ka rukom ba kumno ngi lah ban pyni jingsngewnguh ka dei da kaba pyrthuhbud ïa u Jisu. Pule 1 Petros 2:21, bad nangta sa ïa peit lang ïa kane ka jingkylli harum:
-
Ha kino ki rukom phi lah ban pyrthuhbud ïa ki dienjat jong u Jisu?
U Jisu u ieid ïa ka Ktien U Blei, u la ïalap ïa ka khubor babha, bad u la ïarap ruh ïa kiwei.
5. Rakhe ïa ka Jingkynmaw Burom ïa ka jingïap u Jisu Khrist
Ban tip kumno la rakhe ïa ka Jingkhawai Miet u Trai kaba nyngkong, pule Loukas 22:14, 19, 20. Nangta sa ïa peit lang ïa kine ki jingkylli harum:
-
Ka Jingkhawai Miet u Trai kan long kumno?
-
U kpu bad ka waiñ ki thew ïa kaei? —Peit ka dkhot 19 bad 20.
U Jisu u kwah ïa ki synran jong u ban rakhe ïa ka Jingkhawai Miet u Trai shisien shi snem ha ka lyngkhuh snem ka jingïap jong u. Na kata ka daw, ki Nongsakhi U Jehobah ki rakhe ïa ka jingïap u Jisu shisien shi snem kumba u la hukum. Ban tip shuh shuh shaphang kane ka jingïalang bakyrpang, peit ïa ka VIDEO. Nangta sa ïa peit lang ïa kane ka jingkylli harum:
-
Ka Jingkynmaw Burom ïa ka Jingïap u Jisu ka long kumno?
U kpu bad ka waiñ ki dei ka dak jong ka jingkynmaw burom. U kpu u thew ïa ka met ba janai jong u Jisu kaba u la aiti na ka bynta jong ngi. Katba ka waiñ pat ka thew ïa ka snam jong u.
DON KIBA ONG: “Tang ban shu ngeit ha u Jisu ka la biang ban ïoh lait im.”
-
Kumno phi lah ban pyndonkam Ïoannis 3:16 bad Jakob 2:17 ban pyni ïa kaei de kaba ngi dei ban leh ban ïoh lait im?
KI MAT BAKONGSAN
Ngi pyni jingsngewnguh ïa kaei kaba u Jisu u la leh na ka bynta jong ngi da kaba pyni jingngeit ha u Jisu da ki kam bad da kaba wan ruh sha ka Jingkynmaw Burom ïa ka jingïap jong u.
Peit Biang
-
Ka mut aïu ban pyni jingngeit ha u Jisu?
-
Kumno phin pyni ba phi sngewnguh ïa kaei kaba U Jehobah bad u Jisu ki la leh na ka bynta jong phi?
-
Balei ka long kaba kongsan ban wan sha ka Jingkynmaw Burom ïa ka jingïap jong u Jisu?
PULE SHUH SHUH
Ka jingïap u Jisu ka pynshlur ïa ngi ban leh aïu?
U la Pyndonkam ïa La ka Met ban Pyndonburom ïa U Jehobah (Phareng) (9:28)
Pule shuh shuh shaphang ka jingngeit bad kumno ngi lah ban pyni da ki kam.
“Pyni ïa La ka Jingngeit ha ki Jingkular U Jehobah” (Ka Kutphira, Risaw 2016, Phareng)
Peit kumno ka jingim jong kawei ka kynthei ka la kylla haba ka la sngewthuh ba ka jingïap u Khrist ka mut aïu ïa ka.
“Ka Baibl ka Pynkylla ïa ka Jingim” (Ka Kutphira, Nailar 1, 2011, Phareng)
Peit balei don tang katto katne ngut kiba bam ïa u kpu bad kiba dih ïa ka waiñ.
