Kumno Phi Lah ban Ïoh Im ha ka Pyrthei Bathymmai

TEM

Ha ki lynnong kiba la dep ngi la ïohi ba shen U Blei un sa pynduh noh ïa ki briew kiba sniew bad ki jingeh baroh. Ngi lah ban thikna ba kane kan sa jia shisha. Balei? Namar ka Baibl, ka Ktien U Blei, ka ong:

“Kata ka pyrthei ka їaid jah noh.”—1 ÏOANNIS 2:17.

Ngi lah ban thikna ba kin don kiban lait im, namar kajuh ka dkhot ka kular ruh:

“Uta uba leh їa ka mon U Blei u їaisah bymjukut.”

Na kata ka daw, lada ngi kwah ban lait im, ngi dei ban leh ïa ka mon jong U Blei. Hynrei, ban tip ïa ka mon jong U Blei, ngi dei ban ithuh shuwa ïa u.

PHI LAH BAN LAIT IM DA KABA “ITHUH” ÏA U BLEI

U Jisu u la ong: “Kane te ka long ka jingim bymjukut, ba kin ïoh ithuh ïa me U Blei uba shisha tang ma me hi.” (Ïoannis 17:3) Ban ïoh lait im bad ban im junom, ngi donkam ban ithuh ïa U Blei. Kata kam mut ban shu ngeit ba U Blei u don ne ban tip tang katto katne ki jingshisha shaphang jong u. Ngi donkam ban long paralok bad u. Lada ngi kwah ba ka jingïadei paralok jong ngi kan long kaba skhem, ngi dei ban pynlut por bad la ki paralok. Ka long kumjuh ruh bad U Blei. Peit katto katne ki jingshisha kiba ngi ïoh jinghikai na ka Baibl kiba lah ban ïarap ïa ngi ban long ki paralok jong U Blei.

Ki Jingshisha kiba Ngi Ïoh na ka Baibl

Ngi їoh jinghikai ba U Blei u kwah їa ngi ban im ha ka Paradais.

U la thaw ïa u Adam bad ka Im, ki briew kiba nyngkong, bad u la buh ïa ki ha ka jaka kaba itynnad bha kaba khot ka kper Eden. Ki la long kiba janai, bad U Blei u la pyndap ïa ki jingdonkam jong ki baroh. Katba ki dang kohnguh ïa U Blei, kin ym ïap. Hynrei ki la jied ban saitlah ïa ka hukum kaba suk jong U Blei.

Ngi їoh jinghikai balei ngi jynjar mynta.

Da kaba saitlah ïa U Blei, u Adam u la duh noh ïa ka lad ban im junom, ym tang ïalade, hynrei ïa ki briew baroh ruh. Ka Baibl ka batai: “Da uwei u briew ka pop ka la bsut sha ka pyrthei, bad da kata ka pop ka jingïap; bad kumta kata ka jingïap ka la wan hap ha ki bynriew baroh phar.” (Rom 5:12) Kumba ka jingpang jong ki kmie ki kpa ka lah ban hiar pateng ha ki khun, kumjuh ruh, ka jingbym janai jong u Adam ka la hiar pateng ha ki khun ki ksiew jong u. Na kata ka daw, ngi tymmen bad ngi ïap.

Ngi їoh jinghikai shaphang kaei kaba U Blei u la leh ban їarap їa ngi.

Ka Baibl ka ong: “U Blei u la ieid katta katta ïa ka pyrthei katba u la aiti noh ïa la u Khun ba la kha marwei, ba uei uei ruh uba ngeit ha u, un ym jot shuh, hynrei un ïoh ka jingim bymjukut.” (Ïoannis 3:16) U Blei u la phah ïa u Jisu sha ka pyrthei ban aiti ïa la ka jingim na ka bynta jong ngi. Ha kaba ïadei bad kata ka jingieid, uwei u briew na India, uba kyrteng u Prabhakar, uba la 86 snem ka rta, u ong: “Ka pyni ïa ka jingieid kaba khraw jong U Jehobah a ïa nga. Ka jingieid jong u ka la ai ïa nga ka jingkyrmen jong ka jingim bymjukut.”

Ngi їoh jinghikai ba kumno ngi lah ban pyni jingsngewnguh їa kaei kaba U Blei u la leh na ka bynta jong ngi.

Ka Baibl ka ong ba ngi lah ban pyni jingsngewnguh ïa kaei kaba U Blei u la leh na ka bynta jong ngi da kaba “sumar ïa ki hukum jong u.” (1 Ïoannis 2:3) U Blei Jehobah u la pyni ïa ngi ïa kaei kaba ngi lah ban leh ban im ka jingim kaba kmen mynta. (Isaïah 48:17, 18) U Blei um kwah ïa ngi ban jynjar. U kular ba lada ngi bud ïa ki jinghikai jong u, ngin ïoh ym tang ïa ka jingim kaba kmen mynta, hynrei ngin ïoh ruh ïa ka jingim bymjukut ha ka lawei.

PULE ÏA KA BAIBL, KA KTIEN JONG U BLEI, MAN LA KA SNGI

Phi lah ban ïoh lait im na ka jingshah pynjot jong ka pyrthei da kaba duwai bad pan jingïarap na U Blei ban leh ïa ka mon jong u

Man la ka sngi ngi bam ban im. Hynrei u Jisu u la ong: ‘Ym tang da u kpu hi u briew un im, hynrei da ki ktien baroh ba mih na ka shyntur U Jehobah.’—Mathaïos 4:4.

Mynta ngi shem ïa ki ktien jong U Jehobah ha ka Baibl. Haba phi pule bniah ïa ka Baibl, phin sa tip ïa ki jingshisha shaphang kaei kaba U Blei u la leh mynshuwa, kaei kaba u leh mynta, bad kaei kaba un sa leh ha ka lawei.

DUWAI HA U BLEI BAN ÏOH JINGÏARAP

Lada phi kwah ban kohnguh ïa U Blei tangba phi shem jingeh ban iehnoh ïa kiei kiei kibym dei, kumno phi lah ban leh? Kan ïarap shisha lada phi tip kham bha shaphang U Blei.

Peit ïa ka nuksa jong iwei i kynthei iba kyrteng i Sakura, iba la im ka jingim awria. Haba i la sdang ban pule Baibl, i la ïoh jinghikai shaphang ka hukum U Blei ban ‘phet ïap na ka jingleh awria.’ (1 Korinth 6:18) I Sakura i la duwai ha U Blei na ka bynta ka bor ban lah ban iehnoh ïa kane ka jingmlien kaba sniew. Hynrei i dang hap ban ïaleh bad ki jingpynshoi. I ong, “Lada ki jingmut kiba awria ki wan ha ki jingmut jingpyrkhat jong nga, nga kren ïa U Jehobah ha ka jingduwai naduh ka dohnud. Namar nga tip ba ngan ym lah ban ïaleh ïa kane da lade hi. Ka bor jong ka jingduwai ka la pynlong ïa nga ban kham jan sha U Jehobah.” Kum i Sakura, bun ki la ïoh ban tip ïa U Blei. U ai ïa ki ka bor ban pynkylla ïa la ka jingim bad ban im ha ka rukom kaba pynsngewbha ïa u.—Philipi 4:13.

Katba phi nang ithuh kham bha ïa U Blei, katta yn nang “ithuh ïa phi da U Blei” kum i paralok bakordor jong u. (Galatia 4:9; Salm 25:14) Te phin sa ïoh ban im ha ka pyrthei bathymmai. Hynrei kata ka pyrthei bathymmai kan long kaba kumno? Ka lynnong kaba bud kan batai ïa kata.

a Jehobah ka dei ka kyrteng jong U Blei kumba la thoh ha ka Baibl.

KA KUTPHIRA