Marũa ma Mbere Kũrĩ Akorintho 6:1-20
6 Hĩndĩ ĩrĩa ũmwe wanyu ahĩtanĩtie na ũrĩa ũngĩ-rĩ,+ nĩ kĩĩ kĩngĩtũma athiĩ igooti-inĩ kũrĩ andũ matarĩ athingu, no ti mbere ya arĩa aamũre?
2 Kana hihi mũtiũĩ atĩ arĩa aamũre nĩ magaatuĩra thĩ?+ Na angĩkorũo nĩ inyuĩ mũgaatuĩra thĩ-rĩ, githĩ mũtikĩrĩ na ũhoti wa gũtuithania tũmaũndũ tũrĩa tũnini mũno?
3 Kaĩ mũtoĩ atĩ nĩ tũgaatuĩra araika?+ Tũngĩkĩremwo atĩa gũtuithania maũndũ ma ũtũũro ũyũ?
4 Nĩ ũndũ ũcio-rĩ, mũngĩkorũo na maũndũ ma ũtũũro ũyũ mũrabatara gũtuithanio-rĩ,+ hihi andũ arĩa mataheetwo gĩtĩo thĩinĩ wa kĩũngano nĩo mũthuuraga matuĩke atuanĩri ciira?
5 Ndĩraria nĩgetha mũigue mũconokete. Kaĩ gũtarĩ mũndũ o na ũmwe mũũgĩ gatagatĩ-inĩ kanyu ũngĩhota gũtuithania ariũ a Ithe?
6 Handũ ha ũguo-rĩ, mũrũ wa Ithe witũ ũmwe atwaraga mũrũ wa Ithe witũ ũngĩ igooti-inĩ, mbere ya andũ matarĩ etĩkia!
7 Gũkorũo mũrĩ na maciira igooti-inĩ gatagatĩ-inĩ kanyu nĩ kuonania atĩ nĩ mũhootetwo. Githĩ ti kaba mwĩtĩkagĩre kũhĩtĩrio?+ Githĩ ti kaba mwĩtĩkagĩre gũtunywo?
8 No inyuĩ-rĩ, mũhĩtagĩria ariũ a Ithe wanyu na mũkamatunya.
9 Kana hihi mũtiũĩ atĩ andũ arĩa matarĩ athingu matikaagaya Ũthamaki wa Ngai?+ Mũtikahĩtithio.* Andũ arĩa meingĩragia thĩinĩ wa ngomanio itagĩrĩire,*+ ahoi mĩhianano,+ arĩa matharagia,+ arũme arĩa metuaga ta atumia,+ arũme arĩa makomaga na arũme,+
10 aici, andũ akoroku,+ arĩĩu,+ arumani, na atunyani matikaagaya Ũthamaki wa Ngai.+
11 Na ũguo nĩguo amwe anyu mwatariĩ. No nĩ mũthambĩtio mũgathera;+ nĩ mwamũrĩtwo;+ nĩ mũtuĩtwo athingu+ thĩinĩ wa rĩĩtwa rĩa Mwathani Jesu Kristo na roho wa Ngai witũ.
12 Nĩ njĩtĩkĩrĩtio maũndũ mothe nĩ watho, no ti maũndũ mothe marĩ ũguni.+ Nĩ njĩtĩkĩrĩtio maũndũ mothe nĩ watho, no ndigwĩtĩkĩra gwathwo* nĩ ũndũ o na ũrĩkũ.
13 Irio nĩ cia nda nayo nda nĩ ya irio, no icio cierĩ Ngai nĩ agaaciagithia kĩene.+ Mwĩrĩ ti wa kũingĩrio thĩinĩ wa ngomanio itagĩrĩire* no nĩ wa Mwathani,+ nake Mwathani nĩwe ũrũmbũyagia mwĩrĩ.
14 No Ngai nĩ aariũkirie Mwathani+ na nĩ agaatũriũkia o na ithuĩ kuuma gĩkuũ-inĩ+ kũgerera hinya wake.+
15 Kaĩ mũtoĩ atĩ mĩĩrĩ yanyu nĩ ciĩga cia Kristo?+ Hihi nĩ ngĩagĩrĩirũo kweheria ciĩga cia Kristo ndĩcinyitithanie na mũmaraya? Ndirĩ hĩndĩ ingĩka ũguo!
16 Kaĩ mũtoĩ atĩ mũndũ o wothe ũnyitanĩte na mũmaraya akoragwo arĩ mwĩrĩ ũmwe nake? Nĩ gũkorũo Ngai oigĩte atĩrĩ: “Nao eerĩ matuĩke mwĩrĩ ũmwe.”+
17 No mũndũ o wothe ũnyitanĩte na Mwathani akoragwo arĩ kĩndũ kĩmwe nake thĩinĩ wa roho.+
18 Ũragĩrai ngomanio itagĩrĩire!*+ Mehia mangĩ o mothe mũndũ angĩhia makoragwo nja ya mwĩrĩ wake, no mũndũ o wothe wĩingĩragia thĩinĩ wa ngomanio itagĩrĩire nĩ mwĩrĩ wake mwene ehagĩria.+
19 Kaĩ mũtoĩ atĩ mwĩrĩ wanyu nĩ hekarũ+ ya roho mũtheru thĩinĩ wanyu, ũrĩa mũheetwo nĩ Ngai?+ Ningĩ-rĩ, inyuĩ mũtirĩ anyu inyuĩ ene,+
20 nĩ gũkorũo mwagũrirũo na thogora.+ Nĩ ũndũ ũcio, goocithagiai Ngai+ mwĩrĩ-inĩ wanyu.+
Tũũhoro twa magũrũ-inĩ
^ Rora Ũthathaũri wa Ciugo.
^ Kana “Mũtikaheeneke.”
^ Kana “gũtongorio.”
^ Kĩngiriki, por·neiʹa. Rora Ũthathaũri wa Ciugo.
^ Kĩngiriki, por·neiʹa. Rora Ũthathaũri wa Ciugo.
