Marũa ma Mbere ma Johana 4:1-21
4 Endwa akwa, mũtigetĩkagie kiugo o gĩothe gĩtongoretio nĩ roho,*+ no thuthuragiai ciugo icio itongoretio nĩ roho* nĩguo mũmenye kana ciumanĩte na Ngai,+ nĩ gũkorũo nĩ kũgĩĩte na anabii aingĩ a maheeni thĩinĩ wa thĩ.+
2 Ũũ nĩguo mũrĩmenyaga atĩ kiugo kĩrĩa gĩtongoretio nĩ roho kiumĩte kũrĩ Ngai: Kiugo o gĩothe gĩtongoretio nĩ roho, kĩrĩa kiumbũraga atĩ Jesu Kristo nĩ ookire thĩinĩ wa mwĩrĩ, kiumĩte kũrĩ Ngai.+
3 No kiugo o gĩothe gĩtongoretio nĩ roho kĩrĩa gĩtoimbũraga Jesu, gĩtiumanĩte na Ngai.+ Makĩria ma ũguo, kĩu nĩkĩo kiugo gĩtongoretio nĩ roho kĩa mũregi-Kristo, kĩrĩa mũiguĩte atĩ nĩ kĩngĩgooka,+ na rĩu kĩrĩ thĩinĩ wa thĩ.+
4 Twana tũtũ, inyuĩ muumanĩte na Ngai, na nĩ mũmatooretie,+ nĩ gũkorũo ũrĩa ũrĩ na ũiguano hamwe na inyuĩ+ nĩ mũnene gũkĩra ũrĩa ũrĩ na ũiguano hamwe na thĩ.+
5 Acio moimanĩte na thĩ;+ nĩkĩo maragia maũndũ marĩa moimanĩte na thĩ, nayo thĩ nĩ ĩmathikagĩrĩria.+
6 Ithuĩ tuumanĩte na Ngai. Mũndũ o wothe ũmenyete Ngai nĩ atũthikagĩrĩria;+ mũndũ o wothe ũtoimanĩte na Ngai ndatũthikagĩrĩria.+ Ũndũ ũcio nĩguo ũtũteithagia gũkũũrana kiugo gĩtongoretio nĩ roho kĩa ũhoro wa ma kuuma harĩ kiugo gĩtongoretio nĩ roho kĩa mahĩtia.+
7 Endwa akwa, nĩ tũthiĩi na mbere kwendana,+ tondũ wendo uumaga kũrĩ Ngai, na mũndũ o wothe wendanaga aciarĩtwo kuumana na Ngai na nĩ oĩ Ngai.+
8 Mũndũ o wothe ũtendanaga ndamenyete Ngai, nĩ gũkorũo Ngai nĩ wendo.+
9 Wendo wa Ngai waguũririo ũhoro-inĩ witũ na njĩra ĩno, atĩ Ngai nĩ aatũmire Mũrũ wake wa mũmwe+ gũkũ thĩ nĩguo tũgĩe na muoyo kũgerera harĩ we.+
10 Wendo ũcio ũtariĩ ũũ, ti atĩ nĩ ithuĩ tweendire Ngai, no nĩwe watwendire na agĩtũma Mũrũ wake arĩ igongona rĩa ũiguano*+ nĩ ũndũ wa mehia maitũ.+
11 Endwa akwa, angĩkorũo ũguo nĩguo Ngai aatwendire-rĩ, o na ithuĩ nĩ twagĩrĩirũo kwendanaga.+
12 Gũtirĩ mũndũ ũrĩ wona Ngai o na rĩ.+ Tũngĩthiĩ na mbere kwendana, Ngai atũũraga thĩinĩ witũ na wendo wake ũgatuwo mũkinyanĩru thĩinĩ witũ.+
13 Kũgerera ũndũ ũyũ nĩ tũmenyaga atĩ tũratũũra tũrĩ na ũiguano hamwe nake, nake agatũũra arĩ na ũiguano hamwe na ithuĩ, tondũ nĩ atũheete roho wake.
14 Makĩria ma ũguo-rĩ, ithuĩ ene nĩ tuonete na nĩ tũrutaga ũira atĩ Ithe witũ nĩ atũmĩte Mũrũ wake arĩ mũhonokia wa thĩ.+
15 Mũndũ o wothe umbũraga atĩ Jesu nĩ Mũrũ wa Ngai,+ Ngai atũũraga arĩ na ũiguano hamwe na mũndũ ta ũcio, nake agatũũra arĩ na ũiguano hamwe na Ngai.+
16 Na nĩ tũmenyete na tũgetĩkia wendo ũrĩa Ngai akoragwo naguo harĩ ithuĩ.+
Ngai nĩ wendo,+ na mũndũ ũrĩa ũtũũraga thĩinĩ wa wendo atũũraga arĩ na ũiguano hamwe na Ngai, nake Ngai agatũũra arĩ na ũiguano hamwe nake.+
17 Ũguo nĩguo wendo ũtuĩtwo mũkinyanĩru thĩinĩ witũ, nĩgetha tũgaakorũo na wĩyathi wa kwaria*+ mũthenya wa ciira, nĩ gũkorũo o ta ũrĩa ũcio atariĩ, noguo o na ithuĩ tũtariĩ thĩinĩ wa thĩ ĩno.
18 Wendo ndũrĩ guoya,+ ĩndĩ wendo ũrĩa mũkinyanĩru nĩ ũingataga* guoya, tondũ guoya nĩ ũtũgiragĩrĩria. Ti itherũ, mũndũ ũrĩa ũkoragwo na guoya ndatuĩtwo mũkinyanĩru thĩinĩ wa wendo.+
19 Ithuĩ twendanaga tondũ nĩwe waambire gũtwenda.+
20 Mũndũ angiuga, “Nĩ nyendete Ngai,” no nĩ athũire mũrũ wa Ithe, ũcio nĩ mũheenania.+ Nĩ gũkorũo mũndũ ũrĩa ũtendete mũrũ wa Ithe,+ ũcio onete, ndangĩhota kwenda Ngai, ũcio atarĩ ona.+
21 Na tũrĩ na rĩathani rĩrĩ kuuma kũrĩ we, atĩ mũndũ o wothe wendete Ngai ningĩ no mũhaka ende mũrũ wa Ithe.+
Tũũhoro twa magũrũ-inĩ
^ Ũkk., “maroho macio.”
^ Ũkk., “roho o wothe.”
^ Kana “igongona rĩa kũhumbĩra mehia.”
^ Kana “tũgaakorũo na ũmĩrĩru.”
^ Kana “weheragia.”
