Marũa ma Mbere Kũrĩ Timotheo 4:1-16
4 No rĩrĩ, kiugo kĩrĩa gĩtongoretio nĩ roho kiugaga* wega atĩ mahinda marĩa maroka andũ amwe nĩ makaagwa matigane na wĩtĩkio, mathikagĩrĩrie ciugo cia kũhĩtithia itongoretio nĩ roho*+ na morutani ma ndaimono,
2 kũgerera ũhinga wa andũ arĩa maragia maheeni,+ arĩa thamiri ciao ciũmĩte ta cioretwo na ruoro.
3 Magiragia andũ kũingĩra thĩinĩ wa kĩhiko+ na magaatha andũ atĩ matikarĩe irio+ iria Ngai oombire nĩguo irĩagwo+ na ngatho nĩ arĩa makoragwo na wĩtĩkio,+ na moĩ wega ũhoro ũrĩa wa ma.
4 Nĩ gũkorũo ũũmbi wothe wa Ngai nĩ mwega+ na gũtirĩ kĩndũ kĩagĩrĩire kũregwo+ kĩngĩamũkĩrũo na ngatho,
5 tondũ nĩ gĩtheragio kũgerera kiugo kĩa Ngai na gũkĩhoera.
6 Wahe ariũ a Ithe witũ ũtaaro ũyũ, ũgũtuĩka ndungata njega ya Kristo Jesu, ndungata ĩhũnĩtio na ciugo cia wĩtĩkio na cia ũrutani mwega ũrĩa ũkoretwo ũkĩrũmĩrĩra biũ.+
7 No reganaga na ng’ano cia maheeni cia kwagĩra Ngai gĩtĩo,+ ta iria iheanagwo nĩ atumia akũrũ. Handũ ha ũguo-rĩ, wĩmenyagĩrie ũrĩ na muoroto wa kwĩrutĩra harĩ Ngai.
8 Nĩ gũkorũo kũmenyeria mwĩrĩ kũrĩ ũguni o hanini, no kwĩrutĩra harĩ Ngai kũrĩ ũguni maũndũ-inĩ mothe, tondũ kũrĩ na kĩĩranĩro kĩa muoyo wa ihinda rĩrĩ na wa ihinda rĩrĩa rĩroka.+
9 Ciugo icio nĩ cia kwĩhokeka na nĩ ciagĩrĩire gwĩtĩkĩrũo biũ.
10 Nĩkĩo tũraruta wĩra na kĩyo na tũkerutanĩria,+ tondũ tũigĩte kĩĩrĩgĩrĩro gitũ harĩ Ngai ũrĩa ũtũũraga muoyo, o we Mũhonokia+ wa andũ a mĩthemba yothe,+ na makĩria arĩa ehokeku.
11 Thiĩ na mbere kũheana mawatho macio na kũrutana ũhoro wamo.
12 Ndũkanareke mũndũ o na ũrĩkũ aire wĩthĩ waku. Handũ ha ũguo, tuĩka kĩonereria harĩ arĩa ehokeku ũhoro-inĩ wĩgiĩ kwaria, mĩthiĩre, wendo, wĩtĩkio, na ũtheru.
13 Thiĩ na mbere kwĩrutanĩria gũthoma ũrĩ mbere ya andũ,+ gũtaarana,* na kũrutana o nginya hĩndĩ ĩrĩa ngooka.
14 Ndũkanatiganĩrie kĩheo kĩrĩa kĩrĩ thĩinĩ waku kĩrĩa waheirũo kũgerera ũrathi rĩrĩa kĩama gĩa athuri gĩakũigĩrĩire moko.+
15 Wĩciragie* igũrũ rĩa maũndũ macio; rikĩra thĩinĩ wamo, nĩguo gũkũra gwaku kuonekage wega nĩ andũ othe.
16 Wĩmenyagĩrĩre wee mwene na ũrutani waku.+ Tũũra wĩkaga maũndũ macio, nĩ gũkorũo weka ũguo, nĩ ũkeehonokia wee mwene na ũhonokie arĩa magũthikagĩrĩria.+
Tũũhoro twa magũrũ-inĩ
^ Kana “mĩario ya kũheenania.”
^ Ũkk., “roho uugaga.”
^ Ũkk., “maroho ma kũhĩtithia.”
^ Kana “Wĩcũranagie.”
