Samueli wa Kerĩ 9:1-13
-
Daudi kuonia Mefiboshethu wendo mwĩhokeku (1-13)
9 Daudi agĩcoka akĩũria ũũ: “Hihi nĩ harĩ mũndũ o na ũmwe ũtigarĩte wa nyũmba ya Saulu nĩguo ndĩmuonie wendo mwĩhokeku nĩ ũndũ wa Jonathani?”+
2 Na rĩrĩ, nĩ kwarĩ na ndungata ya nyũmba ya Saulu yetagwo Ziba.+ Nĩ ũndũ ũcio makĩmĩĩta ĩthiĩ harĩ Daudi, mũthamaki agĩkĩmĩũria atĩrĩ: “Wee nĩwe Ziba?” Nayo ĩgĩcokia ũũ: “Ĩĩ nĩ niĩ ndungata yaku.”
3 Mũthamaki agĩcoka akĩũria atĩrĩ: “Hihi nĩ harĩ mũndũ o na ũmwe ũtigarĩte wa nyũmba ya Saulu nĩguo ndĩmuonie wendo mwĩhokeku wa Ngai?” Ziba agĩcokeria mũthamaki ũũ: “Nĩ harĩ mũrũ ũmwe wa Jonathani ũtigarĩte; akoragwo arĩ muonju* magũrũ meerĩ.”+
4 Mũthamaki akĩmũũria atĩrĩ: “Arĩ kũ?” Ziba agĩcokeria mũthamaki ũũ: “Arĩ mũciĩ kwa Makiru+ mũrũ wa Amieli itũũra-inĩ rĩa Lo-debari.”
5 O hĩndĩ ĩyo Mũthamaki Daudi agĩtũmana agĩĩrũo na akĩrutwo mũciĩ kwa Makiru mũrũ wa Amieli kũu Lo-debari.
6 Rĩrĩa Mefiboshethu mũrũ wa Jonathani mũrũ wa Saulu aakinyire harĩ Daudi, o rĩo akĩĩgũithia agĩturumithia ũthiũ wake thĩ akĩmũinamĩrĩra. Nake Daudi akiuga ũũ: “Mefiboshethu!” nake akiuga: “Ĩ niĩ ũyũ ndungata yaku.”
7 Daudi akĩmwĩra ũũ: “Ndũgetigĩre nĩ gũkorũo hatarĩ nganja nĩ ngũkuonia wendo mwĩhokeku+ nĩ ũndũ wa thoguo Jonathani, na nĩ ngũcokia mũgũnda wothe wa gukaguo Saulu harĩ wee, na hingo ciothe ũrĩrĩagĩra* metha-inĩ yakwa.”+
8 Aigua ũguo agĩturumithia mũtwe thĩ akĩũria ũũ: “Ndungata yaku nĩyo kĩĩ, atĩ nĩ waririkana ngui nguũ+ ta niĩ?”
9 Mũthamaki agĩcoka agĩtũmanĩra Ziba ndungata ya Saulu, akĩmwĩra ũũ: “Kĩrĩa gĩothe kĩarĩ gĩa Saulu o hamwe na nyũmba yake yothe nĩ ndaciheana kũrĩ mũcũkũrũ wa* mwathi waku.+
10 Wee nĩwe ũrĩmũrĩmagĩra mũgũnda—wee o hamwe na ariũ aku na ndungata ciaku—na nĩwe ũrĩcokanagĩrĩria maciaro maguo nĩgetha gũkoneka irio cia kũrĩa cia andũ a mũcũkũrũ wa mwathi waku. No Mefiboshethu, mũcũkũrũ wa mwathi waku, arĩrĩagĩra metha-inĩ yakwa hĩndĩ ciothe.”+
Na rĩrĩ, Ziba aarĩ na ariũ 15 na ndungata 20.+
11 Ziba akĩra mũthamaki ũũ: “Ndungata yaku ĩgwĩka ũrĩa wothe mũthamaki aatha ndungata yake ĩke.” Nĩ ũndũ ũcio Mefiboshethu aarĩagĩra metha-inĩ ya Daudi* o ta ũmwe wa ariũ a mũthamaki.
12 Na rĩrĩ, Mefiboshethu o nake nĩ aarĩ na kamwana geetagwo Mika;+ na arĩa othe maaikaraga mũciĩ gwa Ziba magĩtuĩka ndungata cia Mefiboshethu.
13 Na Mefiboshethu agĩgĩikara Jerusalemu tondũ hĩndĩ ciothe aarĩagĩra metha-inĩ ya mũthamaki;+ na aarĩ muonju magũrũ meerĩ.+
Tũũhoro twa magũrũ-inĩ
^ Kana “gĩthua.”
^ Ũkk., “ũrĩrĩaga mũgate.”
^ Kana “mwana wa mwana wa.”
^ Kana hihi, “yakwa.”
