Maũndũ Marĩa Meekirũo nĩ Atũmwo 25:1-27
25 Rĩrĩa Fesito+ aakinyire gĩcigo-inĩ kĩu na akĩambĩrĩria gwathana, akiuma Kaisarea agĩthiĩ Jerusalemu thutha wa thikũ ithatũ.
2 Nao anene a athĩnjĩri-Ngai na anene a Ayahudi makĩmũhe ũhoro mũũru wĩgiĩ Paulo.+ Nĩ ũndũ ũcio makĩambĩrĩria gũthaitha Fesito
3 athikĩrĩrie ihoya rĩao,* atũmanĩre Paulo athiĩ Jerusalemu. No maabangaga kũmuohia mamũũrage arĩ njĩra-inĩ.+
4 No rĩrĩ, Fesito akĩmeera atĩ Paulo angĩaikarire Kaisarea na atĩ we mwene aarĩ hakuhĩ gũcoka kuo.
5 Agĩcoka akĩmeera ũũ: “Kwoguo-rĩ, atongoria arĩa marĩ gatagatĩ-inĩ kanyu nĩ moke tũikũrũke nao makamũthitange, angĩkorũo nĩ harĩ ũndũ mũũru ekĩte.”+
6 Kwoguo rĩrĩa aaikarire hamwe nao thikũ itakĩrĩte inyanya kana ikũmi, agĩikũrũka Kaisarea, na mũthenya ũrĩa warũmĩrĩire agĩikarĩra gĩtĩ gĩa ciira na agĩathana Paulo arehwo.
7 Rĩrĩa ookire, Ayahudi arĩa maaikũrũkĩte kuuma Jerusalemu makĩrũgama mamũthiũrũrũkĩirie, makĩmũthitangĩra maũndũ maingĩ moru marĩa mataahotire kũruta ũira wamo.+
8 No Paulo agĩĩtetera akiuga: “Niĩ ndiunĩte Watho wa Ayahudi o na kana wa hekarũ kana wa Kaisari.”+
9 Nĩ ũndũ wa Fesito kwenda gũkenia Ayahudi,+ akĩũria Paulo atĩrĩ: “Nĩ ũkwenda kwambata Jerusalemu ũgatuĩrũo kũu mbere yakwa ũhoro wĩgiĩ maũndũ maya?”
10 No Paulo akiuga: “Ndũgamĩte mbere ya gĩtĩ gĩa Kaisari gĩa ciira, harĩa njagĩrĩirũo nĩ gũtuĩrũo. Ndirĩ ũndũ hĩtĩirie Ayahudi naguo, na o nawe nĩ ũramenya ũguo.
11 Angĩkorũo kũna ndĩ mwĩhia na nĩ harĩ ũndũ njĩkĩte wa gũtũma njũragwo-rĩ,+ ndiroiga ndikooragwo; ĩndĩ angĩkorũo hatirĩ na ũira wa thitango iria athuri aya mathitangĩire, gũtirĩ mũndũ ũrĩ na kĩhooto gĩa kũũneana kũrĩ o nĩguo amakenie. Nĩ ndacokia ciira riiko kũrĩ Kaisari!”+
12 Nake Fesito thutha wa kwaria na kĩama kĩa ataarani, akĩmwĩra: “Tondũ nĩ wacokia ciira riiko kũrĩ Kaisari; ũgũthiĩ kũrĩ Kaisari.”
13 Thutha wa thikũ cigana ũna, mũthamaki Agiripa marĩ na Berinike magĩthiĩ Kaisarea gũceerera Fesito.
14 Na tondũ nĩ maaikaraga kũu matukũ maigana ũna, Fesito akĩra mũthamaki ũhoro wa ciira wa Paulo, akiuga:
“Nĩ harĩ mũndũ watigirũo njera nĩ Felike,
15 na rĩrĩa ndarĩ Jerusalemu anene a athĩnjĩri-Ngai na athuri a Ayahudi makĩhe ũhoro wake,+ makĩenda atuĩrũo.
16 No ngĩmacokeria atĩ nĩ mũgarũ na mũtaratara wa Roma kũneana mũndũ o na ũrĩkũ nĩguo ndĩmakenie, mũndũ ũcio ũthitangĩtwo atacemanĩtie ũthiũ kwa ũthiũ na arĩa mamũthitangĩte na agĩe na mweke wa gwĩtetera ũhoro-inĩ wa thitango ĩyo.+
17 Nĩ ũndũ ũcio rĩrĩa maakinyire gũkũ, ndiateire mahinda, no mũthenya ũrĩa warũmĩrĩire ngĩikarĩra gĩtĩ gĩa ciira na ngĩathana mũndũ ũcio arehwo.
18 Rĩrĩa acio maamũthitangĩte maarũgamire, matiagwetire ũndũ o na ũmwe mũũru ũmwĩgiĩ wa marĩa nderĩgĩrĩire.+
19 Maagwetire o maũndũ maakararanagĩria megiĩ ũthathaiya wa ngai wao*+ na megiĩ mũndũ wĩtagwo Jesu, ũrĩa wakuĩte no Paulo aatĩtĩrithagia atĩ nĩ aariũkĩte.+
20 Nĩ ũndũ wa kũrigwo nĩ ũrĩa ingĩekire ũndũ-inĩ ũcio, ngĩmũũria kana no ende gũthiĩ Jerusalemu agatuĩrũo kuo.+
21 No rĩrĩa Paulo aacokirie ciira riiko atĩ aikare ohetwo eterere itua rĩa Augusto Ũrĩa Mũgaathe,*+ ngĩathana aikare ohetwo nginya ndĩmũneane kũrĩ Kaisari.”
22 Agiripa agĩkĩra Fesito atĩrĩ: “No nyende kũigua mũndũ ũcio niĩ mwene.”+ Fesito akĩmwĩra: “Rũciũ nĩ ũkaamũigua.”
23 Nĩ ũndũ ũcio, mũthenya ũrĩa warũmĩrĩire Agiripa na Berinike makĩingĩra kũrĩa gwaciiragĩrũo marĩ na riri mũingĩ marũmĩrĩirũo nĩ atongoria a mbũtũ o hamwe na andũ a itũũra arĩa maarĩ igweta; na rĩrĩa Fesito aathanire, Paulo akĩrehwo.
24 Nake Fesito akiuga: “Mũthamaki Agiripa na inyuothe mũrĩ hamwe na ithuĩ, nĩ muona mũndũ ũyũ, nĩwe Ayahudi othe thĩinĩ wa Jerusalemu na gũkũ maathaithĩte makĩanagĩrĩra atĩ ndagĩrĩirũo gũtũũra muoyo.+
25 No niĩ ngĩona atĩ gũtirĩ ũndũ eekĩte ũngĩtũma oragwo.+ Kwoguo rĩrĩa we mwene aacokirie ciira riiko kũrĩ Augusto Ũrĩa Mũgaathe, ngĩtua itua rĩa kũmũtũma kũrĩ we.
26 No ndirĩ ũndũ o na ũmwe ingĩandĩka ũmwĩgiĩ kũrĩ Mwathi wakwa. Nĩkĩo ndĩmũrehire mbere yanyu inyuothe, na makĩria mbere yaku Mũthamaki Agiripa, nĩguo arĩkia gũthuthurio, nyone ũndũ wa kwandĩka.
27 Tondũ ndirona ta arĩ ũndũ wa ũũgĩ gũtũma mũndũ muohe na njage kuonania maũndũ marĩa athitangĩirũo.”
Tũũhoro twa magũrũ-inĩ
^ Ũkk., “makĩmũũria athikĩrĩrie ihoya rĩao rĩa kũmũũkĩrĩra.”
^ Kana “ndini yao.”
^ Rĩu nĩ rĩĩtwa rĩa gĩtĩo rĩa mũnene wa Roma.
