Kũrĩ Aroma 11:1-36
11 Nĩ ũndũ ũcio ngũũria atĩrĩ, hihi Ngai nĩ kũrega aaregire andũ ake?+ Aca, tiguo kũrĩ! Nĩ gũkorũo o na niĩ ndĩ Mũisiraeli, wa mbeũ ya* Iburahimu, kuuma mũhĩrĩga-inĩ wa Benjamini.
2 Ngai ti kũrega aaregire andũ ake arĩa aambire gwĩciria ũhoro wao.+ Kaĩ mũtoĩ ũrĩa rĩandĩko riugaga ũhoro-inĩ wĩgiĩ Elija rĩrĩa aathaithaga Ngai nĩ ũndũ wa Isiraeli?
3 Elija ooigire ũũ: “Jehova,* nĩ moragĩte anabii aku, makenja igongona ciaku, na no niĩ nyiki ndigarĩte, na rĩu marageria kũnduta muoyo.”+
4 No rĩrĩ, ndũmĩrĩri ya Ngai yamwĩrire atĩa? “Nĩ ndĩtigĩirie arũme 7,000 mataturĩirie Baali maru.”+
5 Kwoguo na njĩra o ta ĩyo, o na mahinda-inĩ maya nĩ kũrĩ na matigari+ ma arĩa maathuurirũo kũgerera ũtugi mũnene wa Ngai.
6 Angĩkorũo mathuurĩtwo kũgerera ũtugi mũnene,+ matithuurĩtwo nĩ ũndũ wa ciĩko;+ tondũ kũngĩkorũo nĩguo, ũtugi ũcio mũnene ndũngĩtuĩka ũtugi mũnene rĩngĩ.
7 Tũkiuge atĩa rĩu? Kĩndũ kĩrĩa Isiraeli maacaragia na kĩyo matiakĩonire, no arĩa mathuurĩtwo nĩ maakĩonire.+ Acio angĩ nĩ moomirie ngoro ciao,+
8 o ta ũrĩa kwandĩkĩtwo atĩrĩ: “Ngai nĩ amaheete roho wa toro mũnene,+ akamahe maitho matonaga na matũ mataiguaga, o nginya ũmũthĩ ũyũ.”+
9 O nake Daudi oigĩte ũũ: “Metha yao ĩrotuĩka mũtego na kĩndũ gĩa kũmanyita o na mũhĩnga na kĩndũ gĩa kũmaherithia.
10 Maitho mao marogĩa nduma maremwo nĩ kuona, na ũtũme mĩgongo yao ĩikarage ĩyunĩte hingo ciothe.”+
11 Nĩ ũndũ ũcio ngũũria atĩrĩ, Hihi ũguo nĩ kuuga atĩ maahĩngirũo na makĩgwa biũ? Aca, tiguo kũrĩ! No nĩ ũndũ wa ihĩtia rĩao, andũ a ndũrĩrĩ nĩ marahonokio, nĩguo o maigue ũiru.+
12 Rĩu-rĩ, angĩkorũo ihĩtia rĩu rĩao nĩ ũtonga harĩ thĩ na kũnyiha kwao nĩ ũtonga harĩ andũ a ndũrĩrĩ,+ githĩ gũtigaagĩkorũo na ũtonga mũnene makĩria rĩrĩa mũigana wao ũgaakinyanĩra!
13 Rĩu ndĩraria na inyuĩ andũ a ndũrĩrĩ. Tondũ ndĩ mũtũmwo kũrĩ andũ a ndũrĩrĩ,+ nĩ heete gĩtĩo* ũtungata wakwa+
14 nĩguo nyone kana hihi ndahota gũtũma andũ aitũ maigue* ũiru nĩgetha amwe ao mahonokio.
15 Tondũ angĩkorũo kũregwo kwao+ kũratũma thĩ ĩiguithanio na Ngai-rĩ, gwĩtĩkĩrũo kwao kũngĩkĩrehe kĩĩ tiga gũcokio muoyo kuuma kũrĩ arĩa akuũ?
16 Ningĩ-rĩ, angĩkorũo gĩcunjĩ gĩa kĩmere kĩrĩa kĩrutĩtwo kĩrĩ maciaro ma mbere nĩ gĩtheru, kĩmere gĩothe o nakĩo nĩ gĩtheru; na angĩkorũo mũri nĩ mũtheru, honge o nacio nĩ theru.
17 No rĩrĩ, angĩkorũo honge imwe nĩ ciatemirũo, nawe o na ũrĩ mũtamaiyũ wa gĩthaka ũgĩciarithanio gatagatĩ-inĩ ga cio na ũgĩtuĩka wa kũgunĩka nĩ ũtonga wa mũri waguo-rĩ,
18 ndũgetĩĩre* honge icio. Ũngĩciĩtĩĩra,*+ ũririkane atĩ tiwe ũnyitĩrĩire mũri no nĩ mũri ũkũnyitĩrĩire.
19 No wee no ũkiuge atĩrĩ: “Honge ciatemirũo nĩguo niĩ njiarithanio ho.”+
20 Ũcio nĩ ũhoro wa ma! Ciatemirũo nĩ ũndũ wa kwaga wĩtĩkio,+ no wee ũrũgamĩte nĩ ũndũ wa wĩtĩkio.+ Ndũgetĩe, no wĩtigagĩre.
21 Tondũ angĩkorũo Ngai ndaacaĩire honge icio cia ndũire, o nawe ndegũgũcaĩra.
22 Nĩ ũndũ ũcio-rĩ, wĩciragie ũhoro wa ũtugi wa Ngai+ o na iherithia rĩake. Nĩ aherithagia arĩa maagũire,+ no wee nĩ ũrĩonagio ũtugi wa Ngai, ũngĩtũũra ũtugi-inĩ wake; kwaga ũguo, o nawe nĩ ũgaatemwo.
23 O nao mangĩambĩrĩria gũkorũo na wĩtĩkio, nĩ megũciarithanio ho,+ nĩ gũkorũo Ngai no ahote kũmaciarithania macoke mũtĩ-inĩ.
24 Tondũ rĩrĩ, angĩkorũo wee watemirũo kuuma mũtamaiyũ-inĩ wa gĩthaka na ũgĩciarithanio mũtamaiyũ-inĩ wa mũgũnda, na ũndũ ũcio ti wa ndũire-rĩ, na githĩ honge icio cia ndũire itingĩgĩciarithanio o na makĩria icokio mũtamaiyũ-inĩ wacio!
25 Ariũ a Ithe witũ, ndirenda mwage kũmenya ũhoro wa hitho ĩno theru,+ nĩguo mũtigatuĩke ogĩ maitho-inĩ manyu ene: Andũ amwe thĩinĩ wa Isiraeli nĩ momĩtie ngoro, nginya mũigana mũkinyanĩru wa andũ a ndũrĩrĩ ũkorũo ũingĩrĩte,
26 na njĩra ĩyo, Isiraeli othe+ nĩ makaahonokio. O ta ũrĩa kwandĩkĩtwo atĩrĩ: “Mũkũũri* nĩ akooima Zayuni+ na eherie maũndũ matarĩ na ũngai kuuma harĩ Jakubu.
27 Na kĩu nĩkĩo kĩrĩkanĩro gĩakwa hamwe nao,+ hĩndĩ ĩrĩa ngeeheria mehia mao.”+
28 Nĩ ma, ha ũhoro ũrĩa mwega, acio nĩ thũ nĩ ũndũ wanyu; no ha ũhoro wĩgiĩ gũthuura kwa Ngai, nĩ mendetwo nĩwe nĩ ũndũ wa maithe mao ma tene.+
29 Nĩ gũkorũo Ngai ndakeerira nĩ ũndũ wa kũheana iheo kana nĩ ũndũ wa gwĩtana kũrĩa etanaga.
30 Tondũ o ta ũrĩa hĩndĩ ĩmwe mũtaathĩkagĩra Ngai+ no rĩu nĩ mũiguĩrĩirũo tha+ nĩ ũndũ wao kwaga gwathĩka,+
31 ũguo no taguo rĩu acio matigĩte gwathĩka na kwoguo inyuĩ mũkaiguĩrũo tha, nĩguo o nao rĩu maiguĩrũo tha.
32 Nĩ gũkorũo Ngai nĩ ahingĩire andũ othe hamwe ũhoro-inĩ wa kwaga gwathĩka+ nĩguo amaiguĩre tha othe.+
33 Kaĩ ũtonga wa Ngai nĩ mũrikĩru-ĩ, o na ũmenyo na ũũgĩ wake! Matuĩro make matingĩtuĩrĩka o na njĩra ciake itingĩtaũkĩka biũ.
34 Tondũ rĩrĩ, “nũũ ũmenyete meciria ma Jehova,* kana nũũ ũtuĩkĩte mũtaarani wake?”+
35 Kana rĩrĩ, “nũũ ũrĩ wamũhe kĩndũ, atĩ nĩguo akĩmũrĩhe?”+
36 Nĩ gũkorũo indo ciothe ciumĩte kũrĩ we na nĩwe ũtũmaga ikorũo kuo na ikoragwo kuo nĩ ũndũ wake. Arogĩa na riri tene na tene. Ameni.
Tũũhoro twa magũrũ-inĩ
^ Kana “rũciaro rwa.”
^ Rora Ũhoro Muongerere A5.
^ Kana “ndũũgĩrĩtie.”
^ Ũkk., “mwĩrĩ wakwa ũigue.”
^ Kana “Ũngĩkorũo na mwĩgaatho gũcierekera.”
^ Kana “ndũgakorũo na mwĩgaatho kwerekera.”
^ Kana “Mũhonokia.”
^ Rora Ũhoro Muongerere A5.
