Ezekieli 30:1-26
30 Na rĩrĩ, kiugo kĩa Jehova gĩkĩnginyĩra o rĩngĩ ngĩrũo atĩrĩ:
2 “Mũrũ wa mũndũ, ratha ũhoro uuge atĩrĩ, ‘Jehova Mwathani Ũrĩa Mũnene oigĩte ũũ:
“Cakayai muuge atĩrĩ, ‘Mũthenya nĩ ũroka!’
3 Nĩ gũkorũo mũthenya ũcio ũrĩ hakuhĩ, ti itherũ, mũthenya wa Jehova ũrĩ hakuhĩ.+
Ũgaakorũo ũrĩ mũthenya ũiyũire matu,+ ihinda rĩrĩa rĩtuĩtwo rĩa ndũrĩrĩ.+
4 Rũhiũ rwa njora nĩ rũgookĩrĩra Misiri, nayo Ethiopia ĩtoorio nĩ guoya rĩrĩa andũ arĩa magaakorũo moragĩtwo makaagwa Misiri;
Ũtonga wakuo ũtahwo na mĩthingi yakuo ĩmomorũo.+
5 Andũ a Ethiopia,+ Puti,+ Ludu, o hamwe na andũ othe a ndũrĩrĩ ingĩ matukanĩte,
Na andũ a Kubu, hamwe na ariũ a bũrũri wa kĩrĩkanĩro,*
Othe makaaniinwo na rũhiũ rwa njora.”’
6 Jehova oigĩte atĩrĩ:
‘Andũ arĩa manyitaga Misiri mbaru o nao nĩ makaaniinwo,
O na hinya ũcio ũtũmaga magĩe na mwĩtĩo nĩ ũkaaniinwo.’+
“‘Kuuma Migidoli+ nginya Sevene+ makaaniinwo na rũhiũ rwa njora marĩ thĩinĩ wa bũrũri ũcio,’ ũguo nĩguo Jehova Mwathani Ũrĩa Mũnene oigĩte.
7 ‘Magaatuĩka bũrũri ũrĩa mũtiganĩrie biũ harĩ marĩa mangĩ mothe, na matũũra makuo matuĩke matũũra marĩa manangĩku biũ harĩ matũũra marĩa mangĩ mothe.+
8 Na nĩ makaamenya atĩ niĩ nĩ niĩ Jehova rĩrĩa ngaakia mwaki bũrũri-inĩ wa Misiri, nao arĩa othe mamanyitaga mbaru maanangwo.
9 Mũthenya ũcio nĩ ngaatũma andũ mathiĩ na meri magatũme andũ a Ethiopia mainaine, o acio meĩhokete o ene; nĩ makaanyitwo nĩ guoya mũthenya ũcio Misiri ĩgooka kũniinwo, tondũ no mũhaka ũgaakinya.’
10 “Jehova Mwathani Ũrĩa Mũnene oigĩte ũũ: ‘Nĩ ngaahũthĩra Mũthamaki Nebukadineza* wa Babuloni kũniina irĩndĩ cia Misiri.+
11 We mwene hamwe na thigari ciake, o icio itarĩ tha o na hanini harĩ iria ingĩ ciothe cia ndũrĩrĩ,+ nĩ makaarehwo nĩguo manange bũrũri ũcio. Magaacomora hiũ ciao cia njora mokĩrĩre Misiri na maiyũrie bũrũri ũcio andũ arĩa magaakorũo moragĩtwo.+
12 Nĩ ngaatũma tũrũũĩ twa Nailo+ tũhũe na nyendie bũrũri ũcio kũrĩ andũ aganu. Nĩ ngaatũma bũrũri ũcio o hamwe na kĩrĩa gĩothe kĩrĩ thĩinĩ waguo ũtuwo kũndũ gũtiganĩrie kũgerera guoko kwa andũ a kũngĩ.+ Niĩ mwene, Jehova, nĩ njarĩtie.’
13 “Jehova Mwathani Ũrĩa Mũnene oigĩte ũũ: ‘Ningĩ nĩ ngaananga mĩhianano ĩyo ĩrĩ magigi* na niine ngai icio itarĩ kĩene cia Nofu.*+ Gũtigaacoka kũgĩa na mũtongoria kũu bũrũri wa Misiri, na nĩ ngaatũma kũgĩe na guoya kũu bũrũri-inĩ wa Misiri.+
14 Nĩ ngaatũma Patherosi+ gũtuĩke kũndũ gũtiganĩrie na njakie mwaki Zoani o na herithie itũũra rĩa No.*+
15 Nĩ ngaaitũrũrĩra Sini marakara makwa, o kũu mwĩgitio wa Misiri, na nyanange kĩrĩndĩ gĩa itũũra rĩa No.
16 Nĩ ngaakia mwaki bũrũri-inĩ wa Misiri; Sini nĩ gũgaatoorio nĩ guoya narĩo itũũra rĩa No rĩtonywo kĩa hinya, na Nofu* gũtharĩkĩrũo mũthenya barigici!
17 Anake a Oni* na Pibesethu nĩ makaaninwo na rũhiũ rwa njora, namo matũũra macio matahwo.
18 Nĩ gũkaagĩa nduma mũthenya thĩinĩ wa Tehafunehesi rĩrĩa ngoinanga mĩtĩ ya icoki ya Misiri.+ Hinya ũrĩa ũtũmaga agĩe na mwĩtĩo nĩ ũgaathira,+ ahumbĩrũo nĩ matu, na taũni ciake itahwo.+
19 Nĩ ngaaherithia Misiri, na nĩ makaamenya atĩ niĩ nĩ niĩ Jehova.’”
20 Na mwaka-inĩ wa 11, mweri wa mbere, mũthenya wa mũgwanja wa mweri ũcio, kiugo kĩa Jehova nĩ kĩanginyĩire ngĩrũo atĩrĩ:
21 “Mũrũ wa mũndũ, nĩ nyunĩte guoko kwa Firauni mũthamaki wa Misiri; gũtikuohwo atĩ nĩguo kũhone kana gũthaywo nĩguo kũgĩe na hinya ũndũ kũngĩoya rũhiũ rwa njora.”
22 “Nĩ ũndũ ũcio, Jehova Mwathani Ũrĩa Mũnene oigĩte ũũ: ‘Nĩ ngookĩrĩra Firauni mũthamaki wa Misiri,+ na nĩ ngaamuuna moko, nyune guoko kũrĩa kũrĩ na hinya o na kũrĩa kuunĩku,+ na ndũme rũhiũ rwa njora rũgwe kuuma guoko-inĩ gwake.+
23 Njoke hurunje Amisiri ndũrĩrĩ-inĩ na ndĩmahurunje mabũrũri-inĩ mangĩ.+
24 Na nĩ ngeekĩra moko ma mũthamaki wa Babuloni hinya*+ na ndĩmũnengere rũhiũ rwakwa rwa njora,+ na nĩ ngoinanga moko ma Firauni, nake acaĩre hau mbere yake* anĩrĩire o ta mũndũ ũrakua.
25 Nĩ ngeekĩra moko ma mũthamaki wa Babuloni hinya, no moko ma Firauni nĩ makoorũo nĩ hinya; nao nĩ makaamenya atĩ niĩ nĩ niĩ Jehova rĩrĩa ngaanengera mũthamaki wa Babuloni rũhiũ rwakwa rwa njora na arũhũthĩre gũũkĩrĩra bũrũri wa Misiri.+
26 Na nĩ ngaahurunja Amisiri ndũrĩrĩ-inĩ na ndĩmaharaganĩrie mabũrũri-inĩ,+ na nĩ makaamenya atĩ niĩ nĩ niĩ Jehova.’”
Tũũhoro twa magũrũ-inĩ
^ Kwahoteka acio nĩ Aisiraeli arĩa maanyitaga Misiri mbaru.
^ Ũkk., “Nebukadireza,” njĩra ĩngĩ ya kwandĩka rĩĩtwa rĩu.
^ Kana “Memufisi.”
^ Haha kiugo gĩa Kĩhibirania kĩrĩa gĩtaũrĩtwo no kĩringane na kiugo kĩrĩa gĩtaũragwo “mai” na kĩhũthĩkaga kuonania ũhoro wa kĩndũ kĩrĩ magigi.
^ Ũguo nĩ kuuga, Thebesi.
^ Kana “Memufisi.”
^ Ũguo nĩ kuuga, Heliopoli.
^ Kana “nĩ ngaamuongerera hinya.”
^ Ũguo nĩ kuuga, mbere ya mũthamaki wa Babuloni.
