Ezekieli 41:1-26
41 Agĩcoka akĩndwara thĩinĩ wa harĩa hatheru,* na agĩthima itugĩ cia mĩena-inĩ; ciarĩ na wariĩ wa mĩkono* ĩtandatũ mwena ũmwe na mĩkono ĩtandatũ mwena ũcio ũngĩ.
2 Mũromo waho warĩ na wariĩ wa mĩkono ikũmi, na thingo cia mĩena-inĩ cia mũromo ciarĩ cia mĩkono ĩtano mwena ũmwe na mĩkono ĩtano mwena ũcio ũngĩ. Agĩthima ũraihu waho, na warĩ mĩkono 40, na wariĩ waho mĩkono 20.
3 Agĩcoka agĩtonya rumu ya thĩinĩ* na agĩthima gĩtugĩ kĩa mwena-inĩ kĩa mũromo, na kĩarĩ na wariĩ wa mĩkono ĩĩrĩ, naguo mũromo warĩ na wariĩ wa mĩkono ĩtandatũ. Thingo cia mĩena-inĩ cia mũromo ciarĩ cia* mĩkono mũgwanja.
4 Agĩcoka agĩthima rumu ĩyo ya thĩinĩ, na yarĩ na ũraihu wa mĩkono 20 na wariĩ wa mĩkono 20.+ Na akĩnjĩra atĩrĩ: “Haha nĩho Harĩa Hatheru Mũno.”+
5 Ningĩ agĩthima rũthingo rwa hekarũ, na rwarĩ na wariĩ wa mĩkono ĩtandatũ. Natuo tũnyũmba tũrĩa twarĩ mĩena-inĩ gũthiũrũrũkĩria hekarũ twarĩ na wariĩ wa mĩkono ĩna.+
6 Tũnyũmba tũu twa mĩena-inĩ twarĩ twa ngoroba ithatũ, ĩmwe igũrũ rĩa ĩrĩa ĩngĩ, na o ngoroba yarĩ na tũnyũmba 30. Ningĩ nĩ haarĩ mĩgamba yahũũrĩirũo gũthiũrũrũkĩria rũthingo rwa hekarũ ya gũtiirĩrĩra tũnyũmba tũu twa mĩena-inĩ, na mĩgamba ĩyo ndĩatonyete rũthingo-inĩ rwa hekarũ yo nyene.+
7 Mĩena-inĩ yerĩ ya hekarũ kwarĩ na ngathĩ ciathiaga ciĩnyogondete ikĩaramaga o ũrĩa ciambataga ithiĩte tũnyũmba-inĩ twa igũrũ.+ Wariĩ wa tũnyũmba tũu wathiaga ũkĩongererekaga kuuma ngoroba ĩmwe nginya ĩrĩa ĩngĩ o ũrĩa mũndũ aambataga kuuma ngoroba ya thĩ nginya ya igũrũ agereire ngoroba-inĩ ya gatagatĩ.
8 Ningĩ ngĩona atĩ haarĩ na handũ hatũũgĩru gũthiũrũrũka hekarũ yothe, na mĩthingi ya tũnyũmba twa mĩena-inĩ ĩthimĩtwo o nginya kona-inĩ yarĩ ya ithanjĩ igima rĩa mĩkono ĩtandatũ.
9 Wariĩ wa rũthingo rwa nja rwa tũnyũmba tũu twa mĩena-inĩ warĩ mĩkono ĩtano. Na kwarĩ na ithenya* rĩatigĩtio nja ya mwako wa tũnyũmba tũu twa mĩena-inĩ ũrĩa warĩ gĩcunjĩ kĩa hekarũ.
10 Gatagatĩ ka hekarũ na rumu cia kũrĩĩra*+ kwarĩ na handũ hataarĩ kĩndũ ha wariĩ wa mĩkono 20 o mwena.
11 Haarĩ na mũromo gatagatĩ ga tũnyũmba tũu twa mĩena-inĩ na ithenya rĩu rĩatigĩtio mwena wa rũgongo na mũromo ũngĩ mwena wa mũhuro. Wariĩ wa ithenya rĩu warĩ mĩkono ĩtano mĩena yothe.
12 Mwako ũrĩa warĩ mwena wa ithũĩro ũrorete handũ hau hataarĩ kĩndũ warĩ na wariĩ wa mĩkono 70, na ũraihu wa mĩkono 90; rũthingo rwa mwako ũcio rwarĩ na wariĩ wa mĩkono ĩtano mĩena yothe.
13 Agĩthima hekarũ, na yarĩ na ũraihu wa mĩkono 100. Handũ hau hataarĩ kĩndũ, mwako ũcio,* na thingo ciaguo o nacio ciarĩ na ũraihu wa mĩkono 100.
14 Wariĩ wa mwena wa mbere wa hekarũ ũrĩa warorete irathĩro na handũ hau hataarĩ kĩndũ warĩ mĩkono 100.
15 Agĩthima ũraihu wa mwako ũrĩa warorete handũ hau hataarĩ kĩndũ mwena wa thutha, o hamwe na ithaku ciaguo cia mĩena yerĩ, na warĩ mĩkono 100.
Ningĩ agĩthima harĩa hatheru, harĩa hatheru mũno,+ na ithaku cia nja,
16 o hamwe na itonyero, ndirica iria ciarĩ na buremu ciathiĩte icekehete,+ na ithaku cia kũndũ kũu gũtatũ. Hakuhĩ na itonyero haarĩ buremu cia mbaũ+ kuuma thĩ nginya ndirica-inĩ; na ndirica icio nĩ ciahumbĩrĩtwo.
17 Ningĩ agĩthima igũrũ rĩa mũromo na thĩinĩ wa hekarũ o hamwe na nja na rũthingo ruothe gũthiũrũrũka.
18 Na kwarĩ na mĩcongo ya akerubi+ na mĩkĩndũ,+ o mũkĩndũ gatagatĩ ka akerubi erĩ, na o kerubi aarĩ na mothiũ merĩ.
19 Mwena ũmwe ũthiũ wa mũndũ warorete mũkĩndũ, naguo mwena ũcio ũngĩ, ũthiũ wa mũrũthi* ũkarora mũkĩndũ.+ Ciacongetwo ũguo thĩinĩ wa hekarũ yothe.
20 Kuuma thĩ o nginya igũrũ rĩa mũromo kwarĩ na mĩcongo ya akerubi na mĩkĩndũ rũthingo-inĩ rwa hekarũ.
21 Itugĩ cia mĩrango* ya hekarũ nĩ ciaiganaine mĩena yothe.+ Mbere ya handũ harĩa hatheru* haarĩ na kĩndũ gĩatariĩ ta
22 kĩgongona kĩa mbaũ,+ na kĩarĩ na ũraihu wa na igũrũ wa mĩkono ĩtatũ na ũraihu wa mĩkono ĩĩrĩ. Kĩarĩ na ikĩngĩ cia kona, na mwena wakĩo wa thĩ* na mĩena yakĩo yaakĩtwo na mbaũ. Agĩcoka akĩnjĩra atĩrĩ: “Ĩno nĩyo metha ĩrĩa ĩrĩ mbere ya Jehova.”+
23 Kwarĩ na mĩrango ĩĩrĩ thĩinĩ wa harĩa hatheru na ĩĩrĩ thĩinĩ wa harĩa hatheru mũno.+
24 O mũrango wathondeketwo na mĩrango ĩĩrĩ yekũnjaga, o mũrango warĩ na mĩrango ĩĩrĩ.
25 Kwarĩ na mĩcongo ya akerubi na mĩkĩndũ mĩrango-inĩ ya hekarũ, o ta ĩrĩa yarĩ thingo-inĩ.+ Ningĩ nĩ kwarĩ na rwembea rwa mbaũ mwena wa mbere wa gĩthaku kĩrĩa kĩarĩ mwena wa nja.
26 Ningĩ nĩ kwarĩ na ndirica ciarĩ na buremu ciathiĩte icekehete+ na mĩcongo ya mĩkĩndũ mĩena-inĩ yerĩ ya gĩthaku, o hamwe na tũnyũmba-inĩ twa mĩena twa hekarũ na rwembea-inĩ rũu.
Tũũhoro twa magũrũ-inĩ
^ Ũkk., “hekarũ.”
^ Mĩkono ĩno nĩ ĩrĩa mĩraihu. Rora Ũhoro Muongerere B14.
^ Ũguo nĩ kuuga, Harĩa Hatheru Mũno.
^ Ũkk., “Wariĩ wa mũromo warĩ wa.”
^ Kwahoteka nĩ gacĩra gaceke gaathiũrũrũkĩirie hekarũ.
^ Kana “tũnyũmba.”
^ Nĩ mwako ũrĩa warĩ mwena wa ithũĩro wa hekarũ.
^ Kana “mũrũthi mwĩthĩ wa njamba.”
^ Ũkk., “Gĩtugĩ kĩa mũrango.” No kũhoteke nĩ mũromo wa kũingĩra Harĩa Hatheru.”
^ No kũhoteke nĩ Harĩa Hatheru Mũno.
^ Ũkk., “ũraihu wakĩo.”
