Isaia 21:1-17
21 Ĩno nĩ ndũmĩrĩri nditũ ĩkoniĩ werũ wa iria:*+
Ĩroka o ta huho nene iria ihurutanaga ituĩkanĩirie mwena wa mũhuro,Kuuma werũ-inĩ, kuuma bũrũri wa kũmakania.+
2 Nĩ njĩrĩtwo ũhoro wĩgiĩ kĩoneki gĩa kũmakania:
Ũrĩa ũkunyanagĩra nĩ arakunyanĩra,Na mũniinani nĩ araniinana.
Ambata, wee Elamu! Rigicĩria, wee Media!+
Nĩ ngũniina gũcaya guothe kũrĩa arehete.+
3 Nĩkĩo ndĩ na ruo rũnene mũno.*+
Ngetugutania,O ta mũtumia ũragĩa mwana.
Ndĩ na kĩeha kĩnene mũno nginya ngaremwo nĩ kũigua;Ngathĩnĩka mũno nginya ngaremwo nĩ kuona.
4 Ngoro yakwa nĩ ĩrahũũrahũũra; ngainaina nĩ kũmaka.
Hwaĩ-inĩ ũrĩa nderiragĩria ũratũma nyinaine.
5 Bangai metha na mũbange itĩ!
Rĩai na mũnyue!+
Ũkĩrai, inyuĩ anene, itĩrĩriai* ngo maguta!
6 Nĩ gũkorũo ũũ nĩguo Jehova aanjĩrire:
“Thiĩ, ũige mũrangĩri na ũmwĩre amenyithanie maũndũ marĩa arona.”
7 Nake akĩona ngaari ya mbaara ĩrĩ na gĩkundi kĩa mbarathi,Ngaari ya mbaara ya ndigiri,Ngaari ya mbaara ya ngamĩra.
Akĩrora wega, eiguĩte biũ.
8 Agĩcoka akĩanĩrĩra ũũ o ta mũrũthi:
“Jehova, hĩndĩ ciothe mũthenya njikaraga ndũgamĩte nyũmba-inĩ ndaya na igũrũ ya mũrangĩri,Naguo ũtukũ ngaikara handũ hakwa ha kũrangĩra.+
9 Ta rora kĩrĩa kĩroka:
Arũme marĩ ngaari-inĩ ya mbaara na gĩkundi kĩa mbarathi!”+
Agĩcoka akĩaria akiuga atĩrĩ:
“Nĩ agwĩte! Babuloni nĩ agwĩte!+
Mĩhianano yothe ya gwacũhio ya ngai ciake nĩ amĩgũithĩtie thĩ ĩkoinĩkanga!”+
10 Inyuĩ andũ akwa mũrangĩrĩirio,O inyuĩ maciaro ma* kĩhuuhĩro gĩakwa,+Nĩ ndĩmwĩrĩte maũndũ marĩa njiguĩte kuuma kũrĩ Jehova mũnene wa ita, o we Ngai wa Isiraeli.
11 Ĩno nĩ ndũmĩrĩri nditũ ĩkoniĩ Duma:*
Harĩ mũndũ ũranjĩta kuuma Seiru:+
“Mũrangĩri, ũtukũ ũkinyĩte ha?
Mũrangĩri, ũtukũ ũkinyĩte ha?”
12 Mũrangĩri akiuga atĩrĩ:
“Rũcinĩ nĩ rũkuhĩrĩirie, o na ũtukũ.
Angĩkorũo kũrĩ ũndũ mũkũũria, ũriai.
Ũkai o rĩngĩ!”
13 Ĩno nĩ ndũmĩrĩri nditũ ĩkoniĩ werũ mwaraganu:
Mũtitũ-inĩ wa werũ mwaraganu nĩkuo mũkaaraara,Inyuĩ gĩkundi kĩa agendi a Dedani.+
14 Twarĩrai andũ arĩa anyotu maĩ,Inyuĩ aikari a bũrũri wa Tema,+Na mũtwarĩre mũndũ ũrĩa ũrethara mũgate.
15 Nĩ gũkorũo marorĩra hiũ cia njora, makorĩra rũhiũ rwa njora rũrĩa rũcomore,Makorĩra ũta mũkũnje, na makora nĩ ũndũ wa mbaara kũrũra.
16 Nĩ gũkorũo ũũ nĩguo Jehova aanjĩrire: “Ihinda-inĩ rĩa mwaka ũmwe, o ta mĩaka ya mũruti wĩra wa mũcara,* riri wothe wa Kedari+ nĩ ũgaathira.
17 Arũme arĩa marũaga na ũta arĩa magaatigara harĩ njamba cia ita cia Kedari magaakorũo marĩ o anini, nĩ gũkorũo Jehova Ngai wa Isiraeli nĩ oigĩte ũguo.”
Tũũhoro twa magũrũ-inĩ
^ No kũhoteke nĩ gĩcigo kĩa Babulonia ya tene.
^ Ũkk., “njohero yakwa ĩiyũrĩtwo nĩ ruo.”
^ Kana “hakai.”
^ Ũkk., “mũrũ wa.”
^ Rĩĩtwa rĩu riugĩte “Gũkira.”
^ Kana “ĩtarĩtwo wega o ta ũrĩa mũruti wĩra wa mũcara ekaga”; ũguo nĩ kuuga, mwaka ũmwe wathira.
