Isaia 33:1-24
33 Kaĩ ũrĩ na haaro-ĩ, wee mũniinani ũtarĩ ũraniinwo;+Wee mũkunyanĩri ũtarĩ ũrakunyanĩrũo!
Rĩrĩa ũkaarĩkia kũniinana, nĩ ũkaaniinwo.+
Rĩrĩa ũkaarĩkia gũkunyanĩra, nĩ ũgaakunyanĩrũo.
2 Jehova twagũthaitha ũtũiguĩre tha.+
Kĩĩrĩgĩrĩro gitũ kĩrĩ harĩ wee.
Tuĩka guoko gwitũ*+ o rũcinĩ,Ũtuĩke ũhonokio witũ hĩndĩ ya mĩtangĩko.+
3 Rĩrĩa ikundi cia andũ ciaigua mũgambo wa ngũĩ nĩ kũũra ciũraga.
Rĩrĩa warahũka, ndũrĩrĩ nĩ ihurunjũkaga.+
4 O ta ũrĩa ngigĩ iria irĩ mũkoroko icokanagĩrĩra, noguo indo iria mũgaakorũo mũtahĩte igaacokanĩrĩrio;Andũ magaaciũmbĩrĩra o ta ikundi cia ngigĩ.
5 Jehova nĩ agaatũũgĩrio,Tondũ aikaraga igũrũ mũno.
Nĩ akaaiyũria kĩhooto na ũthingu thĩinĩ wa Zayuni.
6 Nĩwe ũtũmaga mahinda maku makorũo marũmĩte wega;Na ũingĩ wa ũhonokio,+ ũũgĩ, ũmenyo, na gwĩtigĩra Jehova+—Ũcio nĩguo mũthithũ wake.
7 Na rĩrĩ, njamba ciao irarĩrĩra barabara-inĩ;Atũmwo ao a thayũ mararĩra na ruo rũingĩ.
8 Barabara iria nene nĩ itiganĩirio;Gũtirĩ mũndũ ũragerera njĩra-inĩ.
Nĩ* agĩte kũhingia kĩrĩkanĩro;Nĩ aregete matũũra;Ndarĩ mũndũ arũmbũyagia ũhoro wake.+
9 Bũrũri nĩ ũracakaya* na ũkahooha.
Lebanoni nĩ ĩconokete;+ nĩ ĩbuthĩte.
Sharoni ĩtuĩkĩte o ta werũ,Nacio Bashani na Karimeli igaita mathangũ ma cio.+
10 “Rĩu nĩ ngwarahũka,” ũguo nĩguo Jehova ekuuga,“Rĩu nĩ ngwĩtũũgĩria;+Rĩu nĩ ngwĩyambararia.
11 Muohaga nda ya nyeki nyũmũ na mũgaciara mahuti.
Roho wanyu ene ũkaamũniina o ta mwaki.+
12 Na ikundi cia andũ igaatuĩka o ta coka ũcinĩtwo.
Ikaagwatio mwaki o ta mĩigua ĩtemetwo.+
13 Inyuĩ arĩa mũrĩ kũraya, ta thikĩrĩriai ũrĩa ngwĩka!
Na inyuĩ mũrĩ gũkuhĩ, ĩtĩkĩrai hinya wakwa!
14 Ehia arĩa marĩ Zayuni nĩ amaku;+Aregenyũki nĩ manyitĩtwo nĩ kĩmako:
‘Nũũ gatagatĩ-inĩ gaitũ ũngĩikara handũ harĩ na mwaki wa kũniinana?+
Nũũ gatagatĩ-inĩ gaitũ ũngĩikarania na nĩnĩmbĩ cia mwaki ũtarahora?’
15 Nĩ ũrĩa ũthiaga na mĩthiĩre ya ũthingu hĩndĩ ciothe,+Ũrĩa waragia maũndũ marũngĩrĩru,+Ũrĩa ũreganaga na uumithio ũtarĩ wa kĩhooto, wa ũtunyani,Ũrĩa moko make maregaga kwamũkĩra ihaki handũ ha kũrĩgutha,+Ũrĩa ũhingaga gũtũ gwake ndakaigue mĩario ya ũiti wa thakame,Na ũrĩa ũhingaga maitho make nĩguo etheme kuona maũndũ moru.
16 —Ũcio agaatũũra kũndũ kũrĩa gũtũũgĩru mũno;Rĩũrĩro rĩake irũmu rĩgaakorũo rĩrĩ mĩĩgitio ĩrĩ ndwaro-inĩ cia mahiga,Nĩ akaaheo mũgate,Na ndarĩ hĩndĩ akaaga maĩ.”+
17 Maitho maku nĩ makoona mũthamaki arĩ riri-inĩ wake;Nĩ makoona bũrũri wa kũraya.
18 Ngoro-inĩ yaku nĩ ũkaaririkana* ũndũ wa kũmakania:
“Mwandĩki arĩ kũ?
Arĩ kũ ũrĩa wathimaga mbeca cia marĩhi?+
Arĩ kũ ũrĩa wataraga nyũmba iria ndaya na igũrũ?”
19 Andũ arĩa matarĩ gĩtĩo ndũkaamona rĩngĩ,Arĩa rũthiomi rwao rũrĩ hinya* mũno gũtaũkĩka,O acio rũrĩmĩ rwao rũtondoiraga ũndũ ũtangĩtaũkĩrũo nĩ ũrĩa maroiga.+
20 Ta rora Zayuni, itũũra rĩrĩa rĩa ciathĩ citũ!+
Maitho maku nĩ makoona Jerusalemu ĩrĩ kũndũ kũhooreru gwa gũtũũra,Hema ĩtakeherio.+
O na mĩcumarĩ yayo ya hema ndĩrĩ hĩndĩ ĩgaacomorũo,Na gũtirĩ mĩkwa yayo ĩgaatuangwo.
21 No kũu nĩkuo Ũrĩa Mũnene, Jehova,Agaatuĩka gĩcigo kĩa njũũĩ, kĩa mĩtaro mĩaramu harĩ ithuĩ,Na gũtirĩ gĩkundi kĩa meri gĩgaakinya kuoNa gũtirĩ meri nene ikaagerera kuo.
22 Nĩ gũkorũo Jehova nĩwe Mũtuanĩri Ciira witũ,+Jehova nĩwe Mũheani Watho harĩ ithuĩ,+Jehova nĩwe Mũthamaki witũ;+Nĩwe ũgaatũhonokia.+
23 Mĩkwa yaku ĩgaacunjura ĩregerete;Ndĩngĩhota kũnyitĩrĩra gĩtugĩ kana gũtambũrũkia gĩtambaya kĩa meri.
Hĩndĩ ĩyo indo nyingĩ iria igaakorũo itahĩtwo nĩ ikaagayanwo;O na arĩa mathuaga nĩ magaakuua indo nyingĩ cia gũtahwo.+
24 Na gũtirĩ mũikari wakuo* ũkoiga: “Ndĩ mũrwaru.”+
Andũ arĩa magaatũũra bũrũri ũcio nĩ makoherũo mehia mao.+
Tũũhoro twa magũrũ-inĩ
^ Kana “hinya witũ.”
^ Ĩkĩaria ũhoro wa thũ.
^ Kana hihi, “ũroma.”
^ Kana “ũgeecũrania ũhoro wa.”
^ Ũkk., “rũriku.”
^ Kana “mũndũ ũtũũraga kuo.”
