Isaia 48:1-22
48 Thikĩrĩriai ũhoro ũyũ, inyuĩ nyũmba ya Jakubu,Inyuĩ mwĩĩtanagia na rĩĩtwa rĩa Isiraeli+O inyuĩ muumanĩte na maĩ ma* Juda,Inyuĩ mwĩhĩtaga na rĩĩtwa rĩa Jehova+Na mũgakaĩra Ngai wa Isiraeli,O na gũtuĩka mũtiĩkaga ũguo mũrĩ na ũhoro wa ma na ũthingu.+
2 Tondũ meĩtanagia na itũũra rĩrĩa itheru+
Na makegiritania na Ngai wa Isiraeli,+O we wĩtagwo Jehova mũnene wa ita.
3 “Maũndũ marĩa mahĩtũku* nĩ ndamwĩrire o tene.
Makiuma kanua-inĩ gakwa niĩ mwene,Na ngĩmamenyithania.+
Ngĩoya ikinya o narua, namo makĩhinga.+
4 Nĩ gũkorũo nĩ ndamenyaga ũrĩ mũremi mũno—Atĩ ngingo yaku ĩtariĩ o ta mũkiha wa kĩgera naguo thiithi waku ũtariĩ o ta gĩcango+—
5 Nĩ ndakwĩrire o tene.
O na maũndũ macio matanekĩka, nĩ ndatũmire ũmaigue,Nĩguo ndũkanoige atĩrĩ, ‘Mũhianano wakwa nĩguo ũmekĩte;Mũhianano wakwa wa gwacũhio na mũhianano wakwa wa cuma* nĩyo yathanĩte mekwo.’
6 Nĩ mũiguĩte na mũkona maũndũ macio mothe.
Na githĩ mũtiagĩrĩirũo kũmamenyithania?+
Kuuma rĩu ndĩramũmenyithia maũndũ merũ,+Maũndũ ma hitho mũtarĩ mwamamenya.
7 Maũndũ macio rĩu nĩ hĩndĩ marombwo, matiombirũo tene,Maũndũ marĩa ũtarĩ waigua nginyagia ũmũthĩ,Nĩgetha ndũkoige atĩrĩ, ‘Niĩ nĩ ndĩmoĩ.’
8 Ti itherũ, ndũrĩ wamaigua,+ ndũrĩ wamamenya,Na hau kabere matũ maku matiarĩ mahingũre.
Nĩ gũkorũo nĩ njũĩ atĩ nĩ wagĩte wĩhokeku mũno,+Na ũtũire wĩtagwo mwĩhia kuuma rĩrĩa waciarirũo.+
9 No nĩ ũndũ wa rĩĩtwa rĩakwa nĩ ngagirĩrĩria marakara makwa;+Nĩ ũndũ wa rũgooco rwakwa nĩ ngeegirĩrĩria ndigagũũkĩrĩre,Na ndigakũniina.+
10 Atĩrĩrĩ, niĩ nĩ ngũtheretie, no ti ta ũrĩa betha ĩtheragio.+
Nĩ ngũgeretie* thĩinĩ wa riiko rĩa gũtwekia rĩa mĩnyamaro.+
11 Nĩ ũndũ wakwa niĩ mwene, nĩ ũndũ wakwa niĩ mwene nĩ nguoya ikinya,+Tondũ rĩrĩ, ingĩgĩtĩkĩra atĩa gũthahio niĩ mwene?+
Ndiheaga ũngĩ o wothe riri wakwa.*
12 Ta thikĩrĩria, wee Jakubu, na Isiraeli, o wee thuurĩte.
Niĩ no niĩ Ũrĩa ũmwe.+ Niĩ nĩ niĩ wa mbere; na nĩ niĩ wa mũico.+
13 Guoko gwakwa mwene nĩkuo gwaakire mũthingi wa thĩ,+Na guoko gwakwa kwa ũrĩo gũgĩtambũrũkia igũrũ.+
Rĩrĩa ndaciĩta, irũgamaga hamwe.
14 Cokanĩrĩrai hamwe inyuothe na mũthikĩrĩrie.
Nũũ gatagatĩ-inĩ kao ũrĩ wamenyithania maũndũ maya?
Jehova nĩ amwendete.+
Nĩ akaahingia wendi wake wa gũũkĩrĩra Babuloni,+Na guoko gwake nĩ gũgookĩrĩra Akalidei.+
15 Niĩ mwene nĩ njarĩtie, na nĩ ndĩmwĩtĩte.+
Nĩ ndĩmũrehete, na njĩra yake nĩ ĩkaagaacĩra.+
16 Nguhĩrĩriai, na mũthikĩrĩrie ũhoro ũyũ.
Kuuma o kĩambĩrĩria ndirĩ ndaria na hitho.+
Kuuma rĩrĩa ũndũ ũcio wekĩkire ndarĩ kuo.”
Na rĩu Jehova Mwathani Ũrĩa Mũnene nĩ andũmĩte, na* roho wake.
17 Jehova o we Mũkũũri waku, Ũrĩa Mũtheru wa Isiraeli ekuuga ũũ:+
“Niĩ Jehova, nĩ niĩ Ngai waku,O we Ũrĩa ũkũrutaga nĩguo ũgunĩke wee mwene,*+O we Ũrĩa ũgũtongoragia njĩra-inĩ ĩrĩa wagĩrĩirũo kũgerera.+
18 Na arĩ korũo no ũrũmĩrĩre maathani makwa!+
Thayũ waku ũngĩhaana o ta rũũĩ+Naguo ũthingu waku ũhaane o ta makũmbĩ ma iria.+
19 Mbeũ yaku ĩngĩingĩha* o ta mũthangaNacio njiarũa ciaku cingĩhe o ta thanda cia mũthanga.+
Rĩĩtwa rĩao rĩtingĩkeherio kana rĩniinwo rĩehere mbere yakwa.”
20 Umai thĩinĩ wa Babuloni!+
Ũrai muume kũrĩ Akalidei!
Menyithaniai ũhoro ũcio na kayũ kanene mũkenete! Hunjiai ũhoro ũcio!+
Menyithaniai nginya ituri-inĩ cia thĩ.+
Ugai ũũ: “Jehova nĩ akũũrĩte Jakubu ndungata yake.+
21 Matianyotire hĩndĩ ĩrĩa aamatongoririe magĩtuĩkanĩria kũndũ kwanangĩku.+
Nĩ aatũmire maĩ matherere kuuma rwaro-inĩ rwa ihiga nĩ ũndũ wao;Agĩatũrania rwaro rwa ihiga na agĩtũma maĩ moime ho.”+
22 Jehova oigĩte atĩrĩ, “Andũ arĩa aganu matirĩ thayũ mangĩkorũo naguo.”+
Tũũhoro twa magũrũ-inĩ
^ Kana hihi, “arĩa moimanĩte na.”
^ Ũkk., “ma mbere.”
^ Kana “mũhianano wa gũtwekio.”
^ Kana “ngũthuthurĩtie.” Kana hihi, “ngũthuurĩte.”
^ Kana “Ndigayanaga na ũngĩ o wothe riri wakwa.”
^ Kana “o hamwe na.”
^ Kana “maũndũ ma gũkũguna.”
^ Kana “Rũciaro rwaku rũngĩingĩha.”
