Ũhoro Mwega Ũrĩa Waandĩkirũo nĩ Luka 5:1-39
5 Hĩndĩ ĩmwe Jesu aarũgamĩte hakuhĩ na iria rĩa Genesareti,*+ nakĩo kĩrĩndĩ kĩahatĩkanagĩra harĩ we gĩgĩthikĩrĩria akĩrutana kiugo kĩa Ngai.
2 Na akĩona tũtarũ twĩrĩ tũigĩtwo mwena-inĩ wa iria, no ategi a thamaki nĩ mooimĩte thĩinĩ wa tuo na nĩ neti ciao maathambagia.+
3 Agĩtonya thĩinĩ wa gatarũ kamwe karĩa kaarĩ ga Simoni na akĩmwĩra agatonyie iria-inĩ hanini. Agĩcoka agĩikara thĩ, akĩambĩrĩria kũruta kĩrĩndĩ arĩ thĩinĩ wa gatarũ kau.
4 Arĩkia kũrutana, akĩra Simoni ũũ: “Gatware harĩa hariku, na mũikie neti cianyu maĩ-inĩ mũtege thamaki.”
5 No Simoni akĩmũcokeria akĩmwĩra atĩrĩ: “Mũrutani, tũgeririe ũtukũ mũgima na gũtirĩ kĩndũ tũnyitire,+ no tondũ nĩ woiga nĩ ngũikia neti maĩ-inĩ.”
6 Na rĩrĩa maaikirie, makĩnyita* thamaki nyingĩ mũno. Nacio neti ciao ikĩambĩrĩria gũtuĩkanga.+
7 Nĩ ũndũ ũcio, magĩta ategi a thamaki arĩa maarĩ na gatarũ kau kangĩ moke mamateithie, nao magĩũka, na makĩiyũria tũtarũ tũu twerĩ nginya tũkĩambĩrĩria kũrikĩra maĩ-inĩ.
8 Rĩrĩa Simoni Petero oonire ũguo, agĩturĩria Jesu maru, akĩmwĩra ũũ: “Njeherera, Mwathani, nĩ ũndũ niĩ ndĩ mũndũ mwĩhia.”
9 Nĩ gũkorũo we o hamwe na andũ arĩa maarĩ nao nĩ maatooretio nĩ kĩmako nĩ ũndũ wa thamaki iria maanyitĩte,
10 na Jakubu na Johana, ariũ erĩ a Zebedi,+ arĩa maategaga thamaki hamwe na Simoni o nao nĩ maamakire. No Jesu akĩra Simoni atĩrĩ: “Tiga gwĩtigĩra. Kuuma rĩu ũrĩtegaga andũ.”+
11 Nĩ ũndũ ũcio, makĩruta tũtarũ tũu maĩ-inĩ na magĩtiga indo ciothe makĩmũrũmĩrĩra.+
12 Hĩndĩ ĩngĩ rĩrĩa Jesu aarĩ itũũra-inĩ rĩmwe, nĩ kwarĩ mũndũ ũmwe waiyũrĩtwo nĩ mangũ. Rĩrĩa oonire Jesu, akĩĩgũithia agĩturumithia ũthiũ thĩ, akĩmũthaitha akĩmwĩra: “Mwathani, angĩkorũo no wende, theria.”+
13 Nĩ ũndũ ũcio, agĩtambũrũkia guoko gwake, akĩmũhutia, akĩmwĩra atĩrĩ: “Nĩ ngwenda! Thera.” Hĩndĩ o ĩyo mangũ macio magĩthira.+
14 Agĩcoka akĩmwatha ndakere mũndũ o na ũrĩkũ, akĩmwĩra: “No thiĩ wĩyonanie kũrĩ mũthĩnjĩri-Ngai na ũrute igongona nĩ ũndũ wa gũtherio gwaku kũringana na ũrĩa Musa aathanire,+ nĩguo magĩe na ũira.”+
15 Naguo ũhoro wake ũgĩthiĩ na mbere gũtherema, na kĩrĩndĩ kĩnene nĩ gĩacokanagĩrĩra hamwe kũmũthikĩrĩria na kũhonio mĩrimũ yao.+
16 No rĩrĩ, nĩ aathiaga kaingĩ kũndũ gũtarĩ andũ nĩguo ahoe.
17 Na mũthenya ũmwe rĩrĩa aarutanaga, Afarisai o hamwe na arutani a Watho arĩa mooimĩte icagi-inĩ ciothe cia Galili na Judea, na kuuma Jerusalemu maaikarĩte thĩ hau; na nĩ aarĩ na hinya wa Jehova* wa kũhonania.+
18 Na rĩrĩ, gũgĩũka andũ maakuuĩte mũndũ warĩ na mũrimũ wa gũkua ciĩga arĩ karĩrĩ-inĩ, na nĩ maageragia ũrĩa mangĩmũtonyia mamũkinyie harĩ Jesu.+
19 No tondũ nĩ maagire njĩra ya kũmũkinyia nĩ ũndũ wa kĩrĩndĩ, makĩhaica nyũmba igũrũ, makĩmũikũrũkĩria maturubarĩ-inĩ arĩ karĩrĩ-inĩ nginya harĩ arĩa maaikarĩte mbere ya Jesu.
20 Rĩrĩa oonire wĩtĩkio wao, akĩmwĩra: “Mũndũ ũyũ, nĩ woherũo mehia maku.”+
21 O hĩndĩ ĩyo, andĩki-watho na Afarisai makĩambĩrĩria kwĩyũria ũũ: “Mũndũ ũyũ ũraruma Ngai nĩwe ũ? Nũũ ũngĩohera andũ mehia tiga o Ngai wiki?”+
22 No Jesu amenya mwĩcirĩrie wao, akĩmoria atĩrĩ: “Mũreciria ũguo thĩinĩ wa ngoro cianyu nĩkĩ?
23 Nĩ ũndũ ũrĩkũ mũhũthũ, nĩ kuuga, ‘Nĩ woherũo mehia maku-ĩ,’ kana nĩ kuuga, ‘Ũkĩra wĩtware’?
24 No nĩgetha mũmenye atĩ Mũrũ wa mũndũ arĩ na wathani wa kuohanĩra mehia gũkũ thĩ—” akĩra mũndũ ũcio wakuĩte ciĩga ũũ: “Ndakwĩra atĩrĩ, Ũkĩra, woe karĩrĩ gaku, na ũinũke mũciĩ.”+
25 Erũo ũguo akĩrũgama na igũrũ andũ meroreire, akĩoya karĩrĩ gake, na akĩinũka mũciĩ akĩgoocaga Ngai.
26 Nao andũ othe makĩgega mũno na makĩambĩrĩria kũgooca Ngai, na magĩĩtigĩra, makiuga: “Kaĩ ũmũthĩ nĩ tuona maũndũ ma magegania-ĩ!”
27 Na rĩrĩ, thutha ũcio, akiuma kũu na akĩona mũndũ warĩ mwĩtia wa mbeca cia igooti wetagwo Lawii aikarĩte wabici-inĩ ya kũrĩhĩra igooti, na akĩmwĩra atĩrĩ: “Tuĩka mũrũmĩrĩri wakwa.”+
28 Nake agĩtiga indo ciothe, agĩũkĩra na akĩambĩrĩria kũmũrũmĩrĩra.
29 Nake Lawii akĩhaarĩria iruga inene gwake nĩ ũndũ wake, na kwarĩ na kĩrĩndĩ kĩnene kĩa etia a mbeca cia igooti na andũ angĩ makĩrĩanĩra hamwe* nao.+
30 Na rĩrĩa Afarisai na andĩki ao a watho moonire ũguo, makĩambĩrĩria gũtetia arutwo ake makĩmoragia atĩrĩ: “Mũrĩanagĩra na etia a mbeca cia igooti na ehia nĩkĩ?”+
31 Nake Jesu akĩmacokeria akĩmeera atĩrĩ: “Andũ arĩa marĩ na ũgima mwega wa mwĩrĩ matibataraga ndagĩtarĩ, no arĩa arwaru nĩo mamũbataraga.+
32 Ndiũkĩte gwĩta arĩa athingu, no njũkĩte gwĩta ehia nĩguo merire.”+
33 Nao makĩmwĩra: “Arutwo a Johana nĩ mehingaga kaingĩ kũrĩa na kũnyua na makahoya mũno, na noguo arutwo a Afarisai mekaga, no arutwo aku marĩaga na makanyua.”+
34 Nake Jesu akĩmeera: “Mũtingĩtũma arata a mũhikania mehinge hĩndĩ ĩrĩa mũhikania arĩ hamwe nao, kana tiguo?
35 No matukũ nĩ marĩũka rĩrĩa mũhikania+ akeeherio kũrĩ o; matukũ-inĩ macio nĩ makeehinga.”+
36 Agĩcoka akĩmahe ngerekano akĩmeera: “Gũtirĩ mũndũ ũtinagia kĩraka nguo-inĩ njerũ agagĩtumĩrĩra nguo-inĩ ngũrũ. Angĩka ũguo, kĩraka kĩu kĩerũ no gĩtarũre nguo ĩyo ngũrũ, na gĩtingĩaganĩrĩrũo na nguo ĩyo.+
37 Ningĩ-rĩ, gũtirĩ mũndũ wonoragĩria ndibei njerũ* thĩinĩ wa mondo ngũrũ cia ndibei. Angĩka ũguo, ndibei ĩyo njerũ no ĩtumũre mondo icio na ĩitĩke, nacio mondo ithũke.
38 No ndibei njerũ* yonoragĩrio mondo-inĩ njerũ cia ndibei.
39 Gũtirĩ mũndũ thutha wa kũnyua ndibei ngũrũ wendaga ndibei njerũ, tondũ ekuuga, ‘Ĩrĩa ngũrũ nĩyo njega.’”
Tũũhoro twa magũrũ-inĩ
^ Norĩo Iria rĩa Galili.
^ Ũkk., “makĩrigicĩria.”
^ Rora Ũhoro Muongerere A5.
^ Kana “maaikarĩte metha-inĩ hamwe.”
^ Kana “ndibei ya mũhihano.”
^ Kana “ndibei ya mũhihano.”
