Ũhoro Mwega Ũrĩa Waandĩkirũo nĩ Mathayo 2:1-23
2 Thutha wa Jesu gũciarĩrũo Bethilehemu+ ya Judea matukũ-inĩ ma Mũthamaki Herode,*+ atuĩria a njata kuuma mwena wa Irathĩro magĩũka Jerusalemu,
2 makĩũria atĩrĩ: “Arĩ kũ mũthamaki ũcio wa Ayahudi ũciarĩtwo?+ Tondũ nĩ tũronire njata yake tũrĩ mwena wa Irathĩro, na rĩu tuoka kũmũinamĩrĩra.”
3 Rĩrĩa Mũthamaki Herode aaiguire ũguo, agĩtangĩka mũno o hamwe na andũ othe a Jerusalemu.
4 Agĩta anene othe a athĩnjĩri-Ngai hamwe na andĩki-watho a kĩrĩndĩ, akĩmoria kũrĩa Kristo* aarĩ aciarĩrũo.
5 Makĩmwĩra atĩrĩ: “Thĩinĩ wa Bethilehemu+ ya Judea, nĩ gũkorũo ũũ nĩguo mũnabii aandĩkire:
6 ‘Nawe, Bethilehemu ya bũrũri wa Juda, tiwe itũũra rĩrĩa rĩtarĩ igweta gatagatĩ-inĩ ka mangavana a Juda, tondũ thĩinĩ waku nĩkuo gũkoima ũrĩa ũgaathana, ũrĩa ũkaarĩithia andũ akwa Isiraeli.’”+
7 Herode agĩcoka agĩta atuĩria acio a njata na hitho na agĩtuĩria na kinyi kuuma harĩ o ũhoro wĩgiĩ ihinda rĩrĩa njata ĩyo yoimĩrire.
8 Akĩmatũma Bethilehemu, akĩmeera: “Thiĩi mũtuĩrie wega ũhoro wĩgiĩ mwana ũcio, na mwamuona, mũndehere riboti nĩguo o na niĩ thiĩ ngamũinamĩrĩre.”
9 Marĩkia gũthikĩrĩria mũthamaki, magĩthiĩ, nayo njata ĩrĩa moonete marĩ mwena wa Irathĩro+ ĩgĩthiĩ ĩrĩ mbere yao, nginya rĩrĩa yarũgamire igũrũ rĩa nyũmba ĩrĩa mwana ũcio aarĩ.
10 Rĩrĩa moonire njata ĩyo, magĩkena mũno.
11 Na rĩrĩa maaingĩrire nyũmba ĩyo, makĩona mwana ũcio na nyina Mariamu, magĩturia maru makĩinamĩrĩra mwana ũcio. Ningĩ makĩhingũra igĩna ciao makĩmũhe iheo—thahabu na ũbani na manemane.
12 No rĩrĩ, tondũ nĩ maakaanirio nĩ Ngai kĩroto-inĩ+ matigacoke kũrĩ Herode, magĩcoka bũrũri wao magereire njĩra ĩngĩ.
13 Thutha wao kuumagara, mũraika wa Jehova* akiumĩrĩra Jusufu kĩroto-inĩ,+ akĩmwĩra: “Ũkĩra woe mwana ũcio na nyina mũũrĩre Misiri, na mũikare kuo nginya rĩrĩa ngaakwĩra, tondũ Herode arĩ hakuhĩ kwambĩrĩria gũcaria mwana ũcio nĩguo amũũrage.”
14 Kwoguo Jusufu agĩũkĩra na akĩoya mwana ũcio na nyina ũtukũ o ũcio na magĩthiĩ Misiri.
15 Agĩikara kuo nginya rĩrĩa Herode aakuire. Ũndũ ũcio wahingirie ciugo ici Jehova* aaririe kũgerera mũnabii wake: “Nĩ ndetire mũrũ wakwa kuuma Misiri.”+
16 Nake Herode, amenya atĩ nĩ aaheenirio nĩ atuĩria a njata, akĩrakara mũno, na agĩathana tũhĩĩ tuothe twa mĩaka ĩĩrĩ gũcoka na thĩ tũũragwo thĩinĩ wa Bethilehemu na icigo ciakuo ciothe, kũringana na ihinda rĩrĩa aatuĩrĩtie na kinyi kuuma harĩ atuĩria acio a njata.+
17 Nĩ ũndũ ũcio ciugo ici iria ciaarĩtio kũgerera mũnabii Jeremia ikĩhinga:
18 “Mũgambo nĩ waiguirũo Rama, wa kĩrĩro na mbugĩrĩrio nene. Warĩ wa Rakeli+ akĩrĩrĩra ciana ciake, na ndeendaga kũũmĩrĩrio, tondũ itirĩ ho.”+
19 Rĩrĩa Herode aakuire, mũraika wa Jehova* akiumĩrĩra Jusufu kĩroto-inĩ+ arĩ Misiri
20 akĩmwĩra: “Ũkĩra woe mwana ũcio na nyina mũthiĩ bũrũri wa Isiraeli, tondũ arĩa maacaragia muoyo* wa mwana ũcio nĩ makuĩte.”
21 Kwoguo agĩũkĩra na akĩoya mwana ũcio na nyina na magĩthiĩ bũrũri wa Isiraeli.
22 No rĩrĩa aaiguire atĩ Arikelau nĩwe waathanaga Judea ithenya rĩa ithe Herode, agĩĩtigĩra gũthiĩ kuo. Ningĩ-rĩ, tondũ nĩ aakaanĩtio nĩ Ngai kĩroto-inĩ,+ agĩthiĩ gĩcigo-inĩ kĩa Galili.+
23 Agĩikara itũũra-inĩ rĩtagwo Nazarethi,+ nĩguo ciugo ici ciaaririo kũgerera anabii ihinge: “Ageetagwo Mũnazarethi.”*+
Tũũhoro twa magũrũ-inĩ
^ Rora Ũthathaũri wa Ciugo.
^ Kana “Mesia; Ũrĩa Mũitĩrĩrie Maguta.”
^ Rora Ũhoro Muongerere A5.
^ Rora Ũhoro Muongerere A5.
^ Rora Ũhoro Muongerere A5.
^ Kĩngiriki, psy·kheʹ. Rora Ũthathaũri wa Ciugo.
^ No kũhoteke rĩĩtwa rĩu riumanĩte na kiugo gĩa Kĩhibirania kĩrĩa kiugĩte “thuuna.”
