Nĩ kĩĩ gĩtũmaga tũkenere mũno igomano citũ cia o mwaka? O ta thĩinĩ wa Isiraeli ya tene, igomano cia mahinda maya nĩ itũheaga mweke wa gũthathaiya Jehova hamwe na aarĩ na ariũ a Ithe witũ aingĩ. Nĩ tũkenagĩra irio nyingĩ cia kĩĩroho iria tũheagwo. Ningĩ nĩ tũkenagĩra mahinda marĩa tũhũthagĩra hamwe na arata na andũ a famĩlĩ. Kwoguo ũndũ ũcio nĩ ũtũmaga tũthiĩ thikũ ciothe ithatũ cia kĩgomano.

Rĩrĩa twagĩa na mweke wa gũcemania hamwe, tũtiagĩrĩirũo gwĩciria o ũrĩa tũngĩgunĩka ithuĩ ene, no nĩ twagĩrĩirũo gwĩciria nginya ũrĩa tũngĩonia andũ arĩa angĩ wendo. (Ga 6:10; Ahi 10:24, 25) Rĩrĩa twahingũrĩra mũrũ kana mwarĩ wa Ithe witũ mũrango kana twaiga itĩ o iria tu tũrabatara, nĩ tuonanagia atĩ nĩ tũrarũmbũiya nginya maũndũ ma arĩa angĩ. (Afi 2:3, 4) Igomano nĩ itũheaga mĩeke ya mwanya ya kũgĩa na arata angĩ erũ. Mbere kana thutha wa programu, kana ihinda-inĩ rĩa ranji, no tũcarie mweke wa kũmenyana na mũndũ tũtoĩ. (2Ko 6:13) Ũrata ũrĩa tũgĩaga naguo mahinda-inĩ macio no ũtũũre ihinda iraihu. Makĩria ma ũguo, rĩrĩa andũ angĩ mona tũkĩonania wendo wa ma, no matue itua rĩa kũnyitanĩra na ithuĩ harĩ gũthathaiya Jehova.​—Joh 13:35.

WĨRORERE VIDEO YA IGOMANO CIA KĨĨMABŨRŨRI CIA “WENDO NDŨRĨ HĨNDĨ ŨTHIRAGA”! ŨCOKE ŨCOKIE CIŨRIA ICI:

• Ageni arĩa maathiĩte igomano cia kĩĩmabũrũri cia mwaka wa 2019 moonirio wendo atĩa?

• Ũrũmwe na wendo ũrĩa ũkoragwo gatagatĩ-inĩ ka andũ a Jehova ũkoragwo ũrĩ wa mwanya nĩkĩ?

• Nĩ maũndũ marĩkũ megiĩ wendo wa Gĩkristiano maataarĩirio nĩ athuri a Kĩama Kĩrĩa Gĩtongoragia?

• Wendo wa Gĩkristiano ũtũmĩte atĩa aarĩ na ariũ a Ithe witũ thĩinĩ wa Njĩrĩmani na South Korea makorũo na ũrũmwe?

• Twagĩrĩirũo gũtua itua rĩrĩkũ?