MAITA maingĩ Jehova nĩ eringithanagia na mũrĩithi ta ũcio. Atwĩraga ũũ thĩinĩ wa Kiugo gĩake: “Niĩ mwene, nĩ niĩ ngaacaria ng’ondu ciakwa ndĩcirĩithagie.”—Ezekieli 34:11, 12, Holy Bible in Gĩkũyũ.

Ng’ondu cia Jehova nĩ irĩkũ? Nĩ andũ arĩa mamwendete na mamũthathayagia. Bibilia yugaga ũũ: “Gĩũkeni, tũmũthathaiye, tũmũinamĩrĩre; nĩtũturĩrie Jehova ndu, o ũcio mũtũũmbi. Nĩ gũkorũo we nĩwe Ngai witũ, na nĩ ithuĩ kĩrĩndĩ gĩake kwĩrĩithĩria, nĩ ithuĩ ng’ondu iria atungataga.” (Thaburi 95:6, 7) O ta ng’ondu irũmĩrĩire mũrĩithi, athathaiya a Jehova nĩ makenaga gũtongorio nĩwe arĩ Mũrĩithi wao. Hihi ũguo nĩ kuuga matihĩtagia? Aca. Ndungata cia Ngai rĩmwe nĩ ihaanaga ta ‘rũũru rũhurunjũkĩte,’ ‘ng’ondu ciũrĩte,’ kana “ng’ondu irora njĩra.” (Ezekieli 34:12, Holy Bible in Gĩkũyũ; Mathayo 15:24;  1 Petero 2:25) O na kũrĩ ũguo, Jehova nĩ akoragwo na mwĩhoko atĩ o na mũndũ angĩmũraihĩrĩria no agaacoka.

Hihi wee no wonaga Jehova arĩ Mũrĩithi waku? Jehova akoragwo arĩ Mũrĩithi na njĩra ĩrĩkũ ũmũthĩ? Ta wĩcirie njĩra ici ithatũ:

Nĩ atũheaga irio cia kĩĩroho. Jehova oigaga atĩrĩ: “Ngacirĩithagia kũrĩa kũrĩ ũrĩithio mwega, . . . o na irĩithagio kũndũ kũnoru.” (Ezekieli 34:14) Jehova ndarĩ aaga gũtũhe irio nyingĩ njega cia kĩĩroho ihinda rĩrĩa rĩagĩrĩire. Hihi no ũririkane gĩcunjĩ kĩa ũhoro, mĩario, kana video weroreire ũkĩona atĩ mahoya maku nĩ maacokio? Githĩ ũndũ ũcio ndwatũmire wĩtĩkie atĩ Jehova nĩ akũrũmbũyagia?

Nĩ atũgitagĩra na agatũtirĩrĩra. Jehova eranĩire ũũ: ‘Iria hahũre nĩ ngacicokithia, ningĩ iria nyunĩku ndĩciohe, o nacio iria ndũaru ndĩciĩkĩre hinya.’ (Ezekieli 34:16) Jehova nĩ ekĩraga hinya arĩa maritũhĩirũo kana makahinyĩrĩrio nĩ mĩtangĩko. Nĩ ohaga ironda cia ng’ondu ciake, agaciteithia angĩkorũo nĩ itihĩtio, o na angĩkorũo hihi itihĩtio nĩ Akristiano arĩa angĩ. Ningĩ nĩ acokagia iria ciũrĩte njĩra na iria ireigua itarĩ kĩene.

Nĩ atũrũmbũyagia. Jehova oigĩte ũũ: “Nĩngaciruta kũndũ guothe kũrĩa ciahurunjĩirũo. . . . Iria ciũrĩte nĩngacicaria.” (Ezekieli 34:12, 16) Maitho-inĩ ma Jehova, ng’ondu yũrĩte ti kuuga atĩ ndĩngĩcoka. Nĩ amenyaga rĩrĩa ng’ondu yora, akamĩcaria, na amĩona agakena mũno. (Mathayo 18:12-14) Makĩria ma ũguo, etaga athathaiya ake a ma “ng’ondu ciakwa, o inyuĩ ng’ondu cia rũũru rwakwa.” (Ezekieli 34:31, Holy Bible in Gĩkũyũ) Wee ũrĩ ũmwe wa ng’ondu icio.

Jehova aragũcaria nĩkĩ na arenda ũmũcokerere nĩkĩ? Tondũ nĩ arenda ũkorũo na gĩkeno. Nĩ eranĩire atĩ nĩ arĩtũmaga “kuurage mbura ya kũrehe kĩrathimo” harĩ ng’ondu ciake. (Ezekieli 34:26) Icio to ciugo theri tu. Wee nĩ wĩyoneire ũguo.

Ta ririkana hĩndĩ ĩrĩa wamenyire Jehova. Kwa ngerekano-rĩ, waiguire atĩa rĩrĩa werutire ma cia gũcanjamũra ciĩgiĩ rĩĩtwa rĩa Ngai na muoroto wake harĩ andũ? Hihi no ũririkane ũrĩa waiguaga ũcanjamũkĩte rĩrĩa wacemania na Akristiano arĩa angĩ hĩndĩ ya igomano? Rĩrĩa wahunjĩria mũndũ ũrakenio nĩ ũhoro mwega, na githĩ ndwainũkaga ũkenete na ũiganĩire mũno?

No wone gĩkeno ta kĩu rĩngĩ. Ndungata cia Jehova cia mahinda ma tene ciahoire ũũ: “Jehova, tũgarũre ũtwerekerie na kũrĩ wee, na nĩtũgũkũgarũrũkĩra; erũhia matukũ maitũ macoke o ta ũrĩa maatariĩ tene.” (Macakaya 5:21) Jehova nĩ aacokirie mahoya macio, na andũ ake makĩmũcokerera na makĩmũtungatĩra marĩ na gĩkeno rĩngĩ. (Nehemia 8:17) Jehova nĩ egũcokia mahoya maku o nawe.

O na kũrĩ ũguo, gũcokerera Jehova ti ũndũ mũhũthũ. Wĩcirie ũhoro wa moritũ mamwe ũngĩcemania namo na ũrĩa ũngĩhiũrania namo.